Aʻoaʻoga a le Tusi Paia

O le ā le Finagalo o le Atua mo le Lalolagi?

Ua lāgā i lenei mataupu nisi o fesili atonu na e taumānatu ai, ma faasino mai i le Tusi Paia tali. E fiafia Molimau a Ieova e talatalanoa ma oe e faatatau i nei tali.

1. O le ā le finagalo o le Atua mo le lalolagi?

Ina ua uma ona faia e le Atua agelu e ola i le lagi, ona faia lea o tagata, ia ola fiafia i lona aiga i le lalolagi. (Iopu 38:4, 7) O lea na tuu ai e Ieova le uluaʻi tagata i le parataiso matagofie o Etena ma tuu atu iā te ia ma lana fanau le faamoemoe e ola e faavavau i le lalolagi.​—Kenese 2:15-17; faitau le Salamo 115:16.

E na o sina vaega o le lalolagi na iai le faatoʻaga o Etena. Na faatonuina Atamu ma Eva ia fanafanau, ma faatoʻateleina ai tagata e faatoʻaina le lalolagi atoa, ina ia avea ma parataiso. (Kenese 1:28) E lē taitai faaumatia le lalolagi.​—Faitau le Salamo 104:5.

2. Aiseā ua lē avea ai le lalolagi ma parataiso i le taimi nei?

Na tutuliese Atamu ma Eva mai i Etena ina ua lē usiusitaʻi i le Atua. Ua lē toe iai se parataiso ma e leai se isi e mafai ona faafoʻisia mai. Ua taʻua i le Tusi Paia, “Ua tuuina mai le lalolagi i le lima o lē ua amioleaga.”​—Iopu 9:24; faitau le Kenese 3:23, 24.

Peitaʻi, e manatua pea e Ieova lana fuafuaga mo tagata i le amataga, ma e lē mafai ona lē taulau. (Isaia 45:18) O le a ia toe faafoʻi le tagata i le tulaga na finagalo ai i le amataga.​—Faitau le Salamo 37:11.

3. E faapefea ona toe faafoʻisia e le Atua le filemu i le lalolagi?

E maua le filemu i le lalolagi pe a aveesea e le Atua tagata amioleaga. I le taua o Amaketo, o le a faaumatia e agelu a le Atua i latou uma e tetee i le Atua. O le a saisaitia Satani mo le afe tausaga, ae o ē e alolofa i le Atua, o le a faasaoina ma fiafia ai i le lalolagi fou.​—Faitau le Faaaliga 16:14, 16; 20:1-3; 21:3, 4.

  4. O afea e iʻu ai puapuaga?

O le a pule mai Iesu i le afe tausaga mai le lagi, ma toe faafoʻisia le lalolagi e avea ma parataiso. O le a ia faamagaloina foʻi agasala uma a ē alolofa i le Atua, ona aveesea ai lea e ia o maʻi, le ola matua ma le oti.​—Faitau le Isaia 11:9; 25:8; 33:24; 35:1.

O afea e faaumatia ai e le Atua ē amioleaga? Na tuu mai e Iesu se “faailoga” e iloa ai ua lata mai le iʻuga. Ua lamatia ola o tagata ona o tulaga mataʻutia i le taimi nei, ma ua iloa ai ua tatou iai i le “taufaaiʻuiʻuga o le faiga o mea a le lalolagi.”​—Faitau le Mataio 24:3, 7-14, 21, 22; 2 Timoteo 3:1-5.

5. O ai o le a ola i le Parataiso?

Na faatonuina e Iesu ona soo e ō e fai isi ma soo ma aʻoaʻo i ai ala alofa o le Atua. (Mataio 28:19, 20) O loo aʻoaʻoina e Ieova le faitau miliona o tagata mai i le lalolagi aoao, ia ola ai i le faiga fou o mea i le lalolagi. (Sefanaia 2:3) Ua aʻoaʻoina i sauniga a Molimau a Ieova tagata ina ia avea ma mātua po o ni avā ma ni tane lelei. Ua aʻoaʻo faatasi ai e fanau ma mātua le faavae e talitonu ai, e iai se lumanaʻi matagofie.—Faitau le Mika 4:1-4.

I le Maota mo Sauniga, o le a tou feiloaʻi ai ma ē e alolofa ma mananaʻo e faafiafia le Atua.​—Faitau le Eperu 10:24, 25.

Mo nisi faamatalaga, tagaʻi i le mataupu e 3 o lenei tusi, O ā Aʻoaʻoga Moni a le Tusi Paia?, ua lomia e Molimau a Ieova.