Hen Kwagh Ken Mkaanem Ma Aôndo

Kanyi Aôndo A We Ishima u Eren sha ci u Tar Nee?

Ngeren ne time sha mbampin mba alaghga u vanden pinen yô, shi a tese ape ú fatyô u zuan a mbamlumun sha mbampin mba shon ken Bibilo you yô. A doo Mbashiada mba Yehova kpishi u lamen sha mbamlumun mban vea we.

1. Kanyi Aôndo a we ishima u eren sha ci u tar nee?

Tar ka ya u or. Aôndo yange gba mbatyomov ér ve lu sha, been cii yô, a gba or ér nana lu shin tar i̱ kpe nan iyol. (Yobu 38:4, 7) Yehova maa ver or u hiihii ne ken paradiso u doonashe u i yilan ér Eden la, shi á na or ne kua ônov mba una va mar la ian i lun uma gbem sha won sha tar.—Genese 2:15-17; ôr Pasalmi 115:16.

Sule u Eden ne yange u lu hen anijiir u kpuaa sha tar. Lu u Adam man Ifa, nom man kwase u hiihii ne vea mar ônov. Nahan er lu u tsombor u uumace ua lu seer a seer iyenge yô, vea lu sôron tar ne, geman u sha u ú hingir paradiso yô. (Genese 1:28) A tim tar ne kera mayange ga.—Ôr Pasalmi 104:5.

2. Er nan tar ne u lu paradiso hegen ga?

Adam man Ifa yange ve hemba Aôndo ato, nahan i zenda ve ken Eden kera. Paradiso ne maa saa, shi or môm kpa nan kera kôrcio u hiden a mi ga. Bibilo kaa ér: “I gema tar i na sha ikyev i mbaaferev”—Yobu 9:24; ôr Genese 3:23, 24.

Kpa Yehova hungur a kwagh u yange wa ishima u eren sha ci u uumace la ga, shi mayange una kanshio u kuren awashima ne kpaa ga. (Yesaia 45:18) Una hide a sôr mlu u orumace una lu er yange wa ishima ér a lu la nahan.—Ôr Pasalmi 37:11.

3. Aôndo una hide a va a bem sha tar nena?

Cii man orumace nana zua a bem yô, saa Aôndo una vande karen a mbaaferev sha tar kera. Shighe u ityav mbi Armagedon mbira, mbatyomov mba Aôndo vea tim mbahendan a Aôndo mbara kera cica cii. A wuhe Satan anyom 1,000, kpa ior mba Aôndo a doo ve ishima la cii vea war vea lu ember msertar u he u tar jimin cii la.—Ôr Mpase 16:14, 16; 20:1-3; 21:3, 4.

  4. Ka hanma shighe ican i yan ia bee?

Ken anyom 1,000 a Yesu una tema tor sha la, una nenge sha tar ne cica cii, shi una gema u ua hingir paradiso. Heela tseegh ga, una ese asorabo a mba Aôndo a doo ve ishima la kpa kera. Sha nahan yô, Yesu una kar a angev man iyolbeen man ku kera.—Ôr Yesaia 11:9; 25:8; 33:24; 35:1.

Ka hanma shighe Aôndo una tim ifer sha tar kera? Yesu yange na “ikyav” i tesen shighe u mkur una zurum yô. Mlu u tar u lu sha mi hegen ne na yô kwagh tser uumace shi kwagh ne tese ér se mba ken shighe u ‘mkurtar’ kpaa.—Ôr Mateu 24:3, 7-14, 21, 22; 2 Timoteu 3:1-5.

5. Ka unô vea lu ken Paradiso u a lu van laa?

Yesu yange wa mbadondon un kwagh ér ve gema ior ve hingir mbahenen shi ve tesen ve igbenda i Aôndo i dooshima la. (Mateu 28:19, 20) Yehova ngu wan ior umiliôn imôngo tar sha won cii agoyol sha u ve va lu uma sha tar ken msertar u he. (Sefania 2:3) Ior mba henen u lun noov man uter kua kasev man ungô mba dedoo sha Ayou a Tartor a Mbashiada mba Yehova ve nyer mbamkombo her la. Ônov kua mbamaren mba henen atôakyaa a a ne ve i doo u vea na jighjigh ér tar ua va doo ken hemen la imôngo.—Ôr Mika 4:1-4.

Aluer u za ken Iyou i Tartor i Mbashiada yô, u zua a ior mba Aôndo a doo ve ishima shi ve soo u eren ishima na la.—Ôr Mbaheberu 10:24, 25.

Wea soo u seer zuan a iwanger yô, ôr ityough 3 ki takerada u Bibilo Tese Ér Nyi Jimi? ka Mbashiada mba Yehova ve gber u ye.