Ako mei he Folofola ‘a e ‘Otuá

Ko e Hā e Taumu‘a ‘a e ‘Otuá ki he Māmaní?

‘Oku langa‘i hake ‘i he kupu ko ení ‘a e ngaahi fehu‘i kuó ke ‘eke nai pea fakahaa‘i ai ‘a e feitu‘u ‘e lava ke ke lau ai ‘a e ngaahi talí ‘i ho‘o Tohi Tapú. ‘E fiefia ‘a e Kau Fakamo‘oni ‘a Sihová ke fetalanoa‘aki mo koe ki he ngaahi tali ko ení.

1. Ko e hā e taumu‘a ‘a e ‘Otuá ki he māmaní?

Ko e māmaní ‘a e ‘api ‘o e tangatá. Hili hono fakatupu ‘a e kau ‘āngeló ke nau nofo ‘i hēvaní, na‘e ngaohi ‘e he ‘Otuá ‘a e tangatá ke fiefia ‘i he māmaní. (Siope 38:4, 7) Ko ia ai, na‘e tuku ‘e Sihova ‘a e ‘uluaki tangatá ‘i ha palataisi faka‘ofo‘ofa na‘e ui ko ‘Īteni pea ‘oange kiate ia mo ‘ene fānau ‘i he kaha‘ú ‘a e ‘amanaki ke fiefia he mo‘ui ta‘ehanongata‘anga ‘i he māmaní.—Senesi 2:15-17; lau ‘a e Sāme 115:16.

Ko e ngoue ‘o ‘Ītení na‘á ne kāpui ha ki‘i konga si‘i pē ‘o e māmaní. Ko e ‘uluaki ongo me‘a fakaetangatá, ‘a ‘Ātama mo ‘Ivi, na‘e pau ke na ma‘u fānau. ‘I he faka‘a‘au ke tokolahi ange ‘a e fāmili ‘o e tangatá, na‘e pau ke nau ngoue‘i ‘a e māmaní pea ngaohi ia ko ha palataisi. (Senesi 1:28) He‘ikai ‘aupito ke faka‘auha ‘a e māmaní.—Lau ‘a e Sāme 104:5.

2. Ko e hā ‘oku ‘ikai palataisi ai he taimí ni ‘a e māmaní?

Na‘e talangata‘a ‘a ‘Ātama mo ‘Ivi ki he ‘Otuá, ko ia na‘e kapusi ai kinaua mei ‘Īteni. Na‘e mole ‘a e palataisí, pea kuo ‘ikai lavame‘a ha tangata ‘i hano fakafoki mai ia. ‘Oku pehē ‘e he Tohi Tapú: “Ko e fonua [‘māmaní,’ NW] e kuo ne tuku ki he nima ‘o e angahala.”—Siope 9:24; lau ‘a e Senesi 3:23, 24.

Ka kuo ‘ikai ngalo ‘ia Sihova ‘a ‘ene mu‘aki taumu‘a ki he fa‘ahinga ‘o e tangatá, pea he‘ikai ta‘elavame‘a ‘a e ‘Otuá. (Aisea 45:18) Te ne toe fakafoki ‘a e matakali ‘o e fa‘ahinga ‘o e tangatá ki he tu‘unga na‘á ne ‘uhinga ke nau ‘i aí.—Lau ‘a e Sāme 37:11.

3. ‘E anga-fēfē hono toe fakafoki mai ‘e he ‘Otuá ‘a e melinó ki he māmaní?

Ke ma‘u ‘e he fa‘ahinga ‘o e tangatá ‘a e melinó, kuo pau ke ‘uluaki to‘o ‘e he ‘Otuá ‘a e kakai fulikivanú. ‘I he tau ‘o ‘Āmaketoné, ‘e faka‘auha ai ‘e he kau ‘āngelo ‘a e ‘Otuá ‘a e fa‘ahinga kotoa ‘oku fakafepaki ki he ‘Otuá. ‘E tuku pōpula ai ‘a Sētane ‘i he ta‘u ‘e 1,000, ka ko e kakai ‘oku ‘ofa ki he ‘Otuá te nau hao ke fiefia ‘i ha fokotu‘utu‘u fo‘ou ‘i he māmaní.—Lau ‘a e Fakahā 16:14, 16; 20:1-3; 21:3, 4.

 4. ‘E ngata ‘afē ‘a e faingata‘á?

Lolotonga ‘a e ta‘u ‘e 1,000, ‘e pule mai ai ‘a Sīsū mei hēvani ki he māmaní pea fakafoki ia ki ha palataisi. Pehē foki, te ne kaniseli ‘a e angahala ‘a e fa‘ahinga ‘oku ‘ofa ki he ‘Otuá. Ko ia ‘e fakangata ai ‘e Sīsū ‘a e puké, hoholo ke motu‘á, mo e maté.—Lau ‘a e Aisea 11:9; 25:8; 33:24; 35:1.

‘E faka‘auha ‘afē ‘e he ‘Otuá ‘a e kovi ‘i he māmaní? Na‘e ‘omai ‘e Sīsū ha “faka‘ilonga” ke fakahaa‘i ‘aki ‘a e taimi ‘oku ofi ai ‘a e ngata‘angá. Ko e ngaahi tu‘unga lolotonga ‘i he māmaní ‘oku fakamanamana‘i ai ‘a e hao mo‘ui ‘a e tangatá pea fakahaa‘i ai ‘oku tau lolotonga mo‘ui ‘i he “faka ‘osi ‘o e kuonga.”—Lau ‘a e Mātiu 24:3, 7-14, 21, 22; 2 Timote 3:1-5.

5. Ko hai ‘e nofo ‘i he Palataisi he kaha‘ú?

Na‘e fakahinohino ‘e Sīsū hono kau muimuí ke nau ngaohi ākonga pea ke ako‘i kinautolu ki he ngaahi founga ‘ofa ‘a e ‘Otuá. (Mātiu 28:19, 20) ‘I māmani lahi, ‘oku teu‘i ai ‘e Sihova ‘a e kakai ‘e laui miliona ki he mo‘ui ‘i ha fokotu‘utu‘u fo‘ou ‘i he māmaní. (Sefanaia 2:3) ‘I he ngaahi Fale Fakataha‘anga ‘o e Kau Fakamo‘oni ‘a Sihová, ‘oku ako ai ‘a e kakaí ki he founga ke hoko ai ko e ngaahi husepāniti mo e tamai lelei ange mo e founga ke hoko ai ko e ngaahi uaifi mo e fa‘ē lelei ange. Ko e fānaú mo e mātu‘á ‘oku nau ako fakataha fekau‘aki mo e makatu‘unga ke tui ai ki ha kaha‘u lelei ange.—Lau ‘a e Maika 4:1-4.

‘I he Fale Fakataha‘angá, te ke fetaulaki ai mo e kakai ‘oku ‘ofa ki he ‘Otuá pea loto ke ako ke fakahōifua‘i ia.—Lau ‘a e Hepelu 10:24, 25.

Ki ha fakamatala lahi ange, sio ki he vahe 3 ‘o e tohi ko eni, Ko e hā ‘Oku Ako‘i Mo‘oni ‘e he Tohi Tapú?, ko e pulusi ‘e he Kau Fakamo‘oni ‘a Sihová.