Amwiiye Ncolyaamba Jwi Lya Leza

Ino Leza Ujisi Makanze nzi Kujatikizya Nyika?

Cibalo eeci cili amibuzyo imwi ambweni njomwakalibuzyide kale alimwi cilatondezya nkomukonzya kubujana bwiinguzi mu Bbaibbele lyanu. Bakamboni ba Jehova bayookkomana kubandika andinywe bwiinguzi kumibuzyo eeyi.

1. Ino Leza ujisi makanze nzi kujatikizya nyika?

Nyika ngomunzi wabantu. Leza naakamana kulenga bangelo bakujulu, wakalenga muntu kuti akkale cakukkomana anyika. (Jobu 38:4, 7) Aboobo, Jehova wakabikka muntu wakusaanguna mu paradaiso mbotu iitwa kuti Edeni akumupa bulangizi bwakupona anyika kukabe kutamani antoomwe abana mbaakali kuyoozyala.—Matalikilo 2:15-17; amubale Intembauzyo 115:16.

Muunda wa Edeni wakali kabeela buyo kasyoonto kanyika. Banabukwetene bakusaanguna ba Adamu a Eva bakeelede kuti bakabe abana. Ibantu mbobakali kuyaabuvwula, bakeelede kubamba nyika kuba paradaiso. (Matalikilo 1:28) Inyika tiikwe niiyoonyonyoonwa pe.—Amubale Intembauzyo 104:5.

2. Nkaambo nzi nyika nciitali paradaiso lino?

Ba Adamu a Eva bakazangila Leza, aboobo bakatandwa mumuunda wa Edeni. Paradaiso yakasweeka, alimwi kunyina muntu iwakonzya kwiibambulula. Ibbaibbele lyaamba kuti: “Inyika yapegwa mumaanza aababi.”—Jobu 9:24; amubale Matalikilo 3:23, 24.

Pele Jehova tanaaluba makanze aakwe aakusaanguna kujatikizya bantu alimwi Leza takonzyi kwaalilwa kwaazuzikizya. (Isaya 45:18) Bantu boonse bayakuba mbuli mbwaakali kuyanda kuti babe kuzwa kumatalikilo.—Amubale Intembauzyo 37:11.

3. Ino Leza uyooleta buti luumuno anyika?

Kutegwa bantu bakabe aluumuno, Leza uyoosaanguna kugwisya basizibi. Munkondo ya Armagedoni, bangelo ba Leza bayoobanyonyoona aabo boonse bamukazya Leza. Saatani uyooangwa kwamyaka iili 1,000, pele bantu bamuyanda Leza bayakufwutuka akunjila mubweende bwazyintu bupya bwa anyika.—Amubale Ciyubunuzyo 16:14, 16; 20:1-3; 21:3, 4.

  4. Ino kupenga kuyoomana lili?

Mumyaka iili 1,000, Jesu uyakulela nyika kali kujulu akwiibambulula kuba paradaiso. Alimwi uyoomana zibi zyabaabo bamuyanda Leza. Jesu uyoogusya kuciswa, kucembaala, alimwi alufu.—Amubale Isaya 11:9; 25:8; 33:24; 35:1.

Ino Leza uyoobumana lili bubi boonse anyika? Jesu wakapa “citondezyo”citondezya kuti mamanino alaafwaafwi. Bukkale bwazyintu sunu bubika buumi bwabantu muntenda alimwi ncitondezyo cakuti lino tupona ‘kumamanino aabweende bwazyintu.’—Amubale Matayo 24:3, 7-14, 21, 22; 2 Timoteyo 3:1-5.

5. Ino mbaani bayookkala mu Paradaiso?

Jesu wakaambila basikumutobela bakwe kuti bakagwasye bantu kuba basikwiiya akubayiisya nzila zya Leza zyaluyando. (Matayo 28:19, 20) Nyika yoonse, Jehova ulimukugwasya mamiliyoni aabantu kuti bakabe abuumi mubweende bwazyintu bupya anyika. (Zefaniya 2:3) Kumaanda a Bwami a Bakamboni ba Jehova, bantu balayiya mbobakonzya kuba bamalumi, bamausyi, bamakaintu alimwi abamanyina bali kabotu. Bana antoomwe abazyali balayiya kujatikizya twaambo tubapa kusyoma zisyomezyo zyakumbele.—Amubale Mika 4:1-4.

Kuŋanda ya Bwami, muyooswaangana abantu bamuyanda Leza alimwi ibayanda kwiiya mbobakonzya kumukkomanisya.—Amubale Bahebulayo 10:24, 25.

Kutegwa muzyibe zinji, amubone cibalo 3 mubbuku eeli, lyakamwaigwa a Bakamboni ba Jehova.