Gudani Kha Ipfi Ḽa Mudzimu

Ndi Ifhio Ndivho Ya Mudzimu Nga Ha Ḽifhasi?

Yeneyi thero i haseledza nga ha mbudziso dze na vhuya na dzi vhudzisa nahone i ḓo sumbedza hune na ḓo wana hone phindulo Bivhilini yaṋu. Ṱhanzi dza Yehova vha ḓo takalela u haseledza dzenedzo phindulo na inwi.

1. Ndi Ifhio Ndivho Ya Mudzimu Nga Ha Ḽifhasi?

Ḽifhasi ndi haya ha vhathu. Musi Mudzimu o no sika vharuṅwa uri vha tshile ṱaḓulu, o mbo ḓi vhumba muthu u itela uri a ḓiphine kha ḽifhasi. (Yobo 38:4, 7) Nga zwenezwo, Yehova o vhea muthu wa u thoma paradisoni yo nakaho vhukuma ine ya pfi Edeni nahone a mu vhudza uri ene na vhana vhe a vha a tshi ḓo vha navho vha ḓo ḓiphina nga vhutshilo vhu sa fheli kha ḽifhasi.—Genesi 2:15-17; vhalani Psalme ya 115:16.

Tsimu ya Edeni yo vha i tshi tou vha kha tshipiḓa tshiṱuku fhedzi tsha ḽifhasi. Vhavhingani vha u thoma, Adamu na Eva, vho vha vha tshi ḓo vha na vhana. Samusi vhathu vho vha vha tshi ḓo engedzea, vho vha vha tshi ḓo ṱhogomela ḽifhasi nahone vha ḽi ita paradiso. (Genesi 1:28) Ḽifhasi ḽi nga si vhuye ḽa vuwa ḽo fheliswa.—Vhalani Psalme ya 104:5.

2. Ndi ngani ḽifhasi ḽi si paradiso zwino?

Adamu na Eva a vho ngo thetshelesa Mudzimu, nga nṱhani ha zwenezwo vho mbo ḓi pandelwa tsimuni ya Edeni. Zwenezwo zwo ita uri hu si tsha vha na paradiso, nahone a hu na muthu we a kona u dovha a i vusulusa. Bivhili i ri: “Shango ḽo vhewa zwanḓani zwa vhavhi.”—Yobo 9:24; vhalani Genesi 3:23, 24.

Fhedzi Yehova ho ngo hangwa nga ha ndivho yawe ya u thomani malugana na vhathu, nahone a nga si vhuye a kundelwa u i ḓadzisa. (Yesaya 45:18) U ḓo dovha a vhuyedzedza zwithu ngonani nga nḓila ye a vha a tshi ṱoḓa uri zwi vhe ngayo u bva mathomoni.—Vhalani Psalme ya 37:11.

3. Mudzimu u ḓo ḓisa hani mulalo kha ḽifhasi?

U itela uri vhathu vha kone u ḓiphina nga mulalo, Mudzimu u fanela u thoma a fhelisa vhathu vhavhi. Nga nndwa ya Haramagedo, vharuṅwa vha Mudzimu vha ḓo fhelisa vhoṱhe vhane vha pikisana nae. Sathane u ḓo valelwa miṅwaha ya 1 000, fhedzi vhathu vhane vha funa Mudzimu vha ḓo ponyoka nahone vha ḓiphina nga maitele maswa a zwithu kha ḽifhasi.—Vhalani Ndzumbululo 16:14, 16; 20:1-3; 21:3, 4.

  4. Tshengelo i ḓo fhela lini?

Tshifhingani tshenetsho tsha miṅwaha ya 1 000, Yesu u ḓo vha a tshi khou vhusa e ngei ṱaḓulu nahone u ḓo vusulusa ḽifhasi ḽa vha paradiso. Zwiṅwe hafhu, u ḓo phumula zwivhi zwa vhane vha funa Mudzimu. Nga zwenezwo Yesu u ḓo fhelisa vhulwadze, vhulala na lufu.—Vhalani Yesaya 11:9; 25:8; 33:24; 35:1.

Mudzimu u ḓo fhelisa lini vhuvhi kha ḽifhasi? Yesu o ri vhudza uri ndi mini “zwiné ra ḓo ḓivha ngazwo” uri vhufhelo vhu tsini. Zwiimo zwi re hone fhano shangoni zwino zwi ita uri vhathu vha konḓelwe nga vhutshilo nahone zwi sumbedza uri ri khou tshila “maḓuvhani a vhufhelo.”—Vhalani Mateo 24:3, 7-14, 21, 22; 2 Timotheo 3:1-5.

5. Ndi vhafhio vhane vha ḓo tshila Paradisoni tshifhingani tshi ḓaho?

Yesu o laedza vhatevheli vhawe uri vha ite vhathu vhafunziwa nahone vha vha funze nḓila dza Mudzimu dza lufuno. (Mateo 28:19, 20) Shangoni ḽoṱhe, Yehova u khou lugiselela vhathu vha dzimilioni vhutshilo shangoni ḽiswa. (Tsefanya 2:3) Holoni ya Muvhuso ya Ṱhanzi dza Yehova, vhathu vha guda u vha vhanna na vhokhotsi vhavhuḓi na u vha vhafumakadzi na vhomme vhavhuḓi. Vhana na vhabebi vha guda vhoṱhe nga ha zwine zwa ita uri vha vhe na fulufhelo ḽa vhumatshelo havhuḓi.—Vhalani Mixa 4:1-4.

Holoni ya Muvhuso, ni ḓo ṱangana na vhathu vhane vha funa Mudzimu na vhane vha ṱoḓa u guda nḓila dza u mu takadza.—Vhalani Vha-Heberu 10:24, 25.

U itela u wana mafhungo o engedzeaho, sedzani ndima ya 3 kha bugu Bivhili I Funza Mini Zwa Vhukuma? yo gandiswaho nga Ṱhanzi dza Yehova.