Mahibaro Tikang ha Pulong han Dios

Ano an Katuyoan han Dios Para ha Tuna?

Ini nga artikulo naghihisgot hin mga pakiana nga bangin nahunahuna mo na, ngan iginpapakita hini kon diin ha Biblia mabibilngan an mga baton hito. Nalilipay an mga Saksi ni Jehova nga hisgotan ini nga mga baton ha imo.

1. Ano an katuyoan han Dios para ha tuna?

An tuna an urukyan han tawo. Katapos larangon ni Jehova nga Dios an mga anghel basi mag-ukoy ha langit, Iya ginlarang an tawo basi mag-ukoy ha tuna. (Job 38:4, 7) Iginbutang ni Jehova nga Dios an siyahan nga tawo ha makaruruyag hinduro nga paraiso nga gintatawag nga Eden, ngan gintagan ito ngan an iya magigin mga anak hin paglaom nga mabuhi dinhi ha tuna ha waray kataposan.—Genesis 2:15-17; basaha an Salmo 115:16.

An hardin han Eden gutiay la nga bahin han tuna. An siyahan nga mag-asawa, hira Adan ngan Eva, sadang manganak. Samtang nagtitikadaku an ira pamilya, ira kukultibaron an tuna ngan hihimoon nga paraiso. (Genesis 1:28) Diri ito mabubungkag.—Basaha an Salmo 104:5.

2. Kay ano nga an tuna diri paraiso yana?

Han nagtalapas hira Adan ngan Eva ha Dios, ginpaiwas hira ha Eden. Tungod hito, nawara an paraiso, ngan waray tawo nga nakagpahiuli hito. An Biblia nasiring: ‘Iginhatag han Dios an kalibotan ha maraot.’—Job 9:24, Maopay nga Sumat; basaha an Genesis 3:23, 24.

Kondi waray hingalimti ni Jehova an Iya orihinal nga katuyoan para ha katawohan, ngan diri gud Hiya mapapakyas. (Isaias 45:18) Iya ipapahiuli an kahimtang han tawo uyon ha Iya katuyoan.—Basaha an Salmo 37:11.

3. Paonan-o ipapahiuli han Dios an kamurayawan ha tuna?

Basi magkaada kamurayawan ha tuna, kinahanglan wad-on anay han Dios an magraot nga tawo. Ha Armagedon, pupoohon han mga anghel an ngatanan nga nakontra ha Dios. Piprisuhon hi Satanas ha sulod hin 1,000 ka tuig, kondi an mga nahigugma ha Dios maluluwas ngan magkikinabuhi ha bag-o nga sistema dinhi ha tuna.—Basaha an Pahayag 16:14, 16; 20:1-3; 21:3, 4.

  4. San-o matatapos an pag-antos?

Tikang ha langit, magmamando hi Jesus ha tuna ha sulod hin 1,000 ka tuig ngan ibabalik an tuna ha pagin paraiso. Dugang pa, iya paparaon an sala han mga nahigugma ha Dios. Salit masisiring nga wawad-on ni Jesus an sakit, kalagas, ngan kamatayon.—Basaha an Isaias 11:9; 25:8; 33:24; 35:1.

San-o pupoohon han Dios an magraot? Naghatag hi Jesus hin “tigaman” nga bubuhaton niya ito ha hirani nga kataposan. An kahimtang han kalibotan yana nagpapahinabo nga mameligro an kinabuhi han tawo ngan nagpapakita nga nabubuhi na kita hinin “kataposan han kalibotan.”—Basaha an Mateo 24:3, 7-14, 21, 22; 2 Timoteo 3:1-5.

5. Hin-o an makakaukoy ha tiarabot nga Paraiso?

Ginsugo ni Jesus an iya mga sumurunod nga manhimo hin disipulo ngan tutdoan ito han mahigugmaon nga mga paagi han Dios. (Mateo 28:19, 20) Ha bug-os nga kalibotan, igin-aandam ni Jehova an minilyon nga katawohan para ha kinabuhi ha bag-o nga sistema dinhi ha tuna. (Sepania 2:3) Ha mga Kingdom Hall han mga Saksi ni Jehova, gintututdoan an mga tawo kon paonan-o magigin maopay nga bana ngan amay, ngan asawa ngan iroy. An mga anak ngan kag-anak urosa nga nahibabaro han marig-on nga mga basihan nga an katawohan magkakaada maopay nga tidaraon.—Basaha an Mika 4:1-4.

Didto, makikilala mo an katawohan nga nahigugma ha Dios ngan naruruyag mahibaro kon paonan-o hiya mapapalipay.—Basaha an Hebreo 10:24, 25.

Para hin dugang nga impormasyon, kitaa an kapitulo 3 hini nga libro Ano Gud ba an Igintututdo han Biblia? nga iginpublikar han mga Saksi ni Jehova.