Diosar jakʼachasipxam

Wayn tawaquruw kuttxapxani

JANIW khitis chuymankipstasinxa, usuntatäña, tʼukharstatäña, jañchis sipʼuptatäña, uqaraptaña ukat juykhuptañ munktanti. ¿Jumax ukhamti jikxatasta? Ukhamächi ukhaxa, inas wayn tawaq tiempot amtasisax akham jisktʼasta: “¿Kunatsa chuymankipstañajäxa? ¿Kunatsa Diosax ukham lurawaypachistu?”. Jehová Diosax janiw ukhamäñasatak lurawaykistuti. Ukhamarusa jiwasar wal munasitas laykux wiñayatakiw uk chhaqtayani. ¿Ukhamapachäniti? Kuntï Job 33:24, 25 qillqatan siski uk uñxatañäni.

Job tatax Diosar jan jithiqtas yupaychirïnwa, ukatwa Jehová Diosax jupar wal munasïna. Askinak katuqañ laykukiw Diosar yupaychi sasaw Supayax kʼarintäna, ukxa Job tatax janiw yatkänti. Kuna jan waltʼañanakan jikxatasisasa janipuniw Jehová Diosat jithiqtkaspänti, uk Diosax sum yatïna. Ukatwa Supayarux yantʼamay sasin säna; Supayasti, “Job tataruxa jan qullkaña llixti usumpiw usuntayäna. Ukatsti uka llixti usuxa kayuta, pʼiqikamaw katuntäna” (Job 2:7). Cuerpopax qʼala laqʼuntatanwa, chhuxrinakapas jakaraskarakïnwa, jañchipas chʼiyaraptänwa ukat jukʼat jukʼatwa jañchipax jalaqtäna (Job 7:5; 30:17, 30). Job tatax walpun tʼaqhispachäna, ukampis janipuniw Diosat jithiqtkänti. Ukat jupa kikpaw akham säna: ‘Jiwañajkamax janipuniw Diosat jithiqtkäti’ sasa (Job 27:5, NM).

Ukat jiwañap jakʼankatap amuyasinxa, jupa pachpat sint llakisisinsti, Job tatax janis juchanïkaspa ukham amuyäna ukat Diosarus juchañcharakïnwa, ukhamatwa jupax wal pantjasïna (Job 32:2). Ukham pantjasitapatxa, Eliú tuqiw Jehová Diosax chiqañchäna, ukampis ‘jiwañatxa qhispiyasiñapänwa’, kunattix ‘qhispiyasiñapsti jikxatasitaynawa’. Ukat akham sarakïnwa. “Ukapachaw cuerpopaxa wasitata kʼumara uñjasxani, ukasti wayna tiempo sarnaqäwiparuw kuttxarakini” sasa (Job 33:24, 25). Ukham tʼaqhisisin jan jiwañap yatisinsti Job tatax wali chuymachtʼataw jikxataspachäna. Ukat arrepentisisapäna ukhaxa, ‘qhispiyasiñapatakix’ sacrificiop Diosax katuqarakispänwa, ukhamatwa uka thaqhisiñat qhispiyaspäna. *

Job tatax wali altʼat chuymanïnwa, ukatwa chiqañchäw katuqasïna ukat pantjasitapats arrepentisirakïna (Job 42:6). Kuna sacrificiotï Job tatan pantjasitap pampachkaspäna ukx Diosax katuqasïnwa, ukhamatwa Diosampix sum apasiskakiñapäna. “Diosasti Job tatarux jukʼampwa bendisxarakïna nayra maranakat sipansa” (Job 42:12-17). ¿Kunjamsa uk luräna? Jan wali usup chhaqtayasa, ‘cuerpopsa wasitatawa kʼumaraptayäna ukat wayna tiempo sarnaqäwiparuw kuttayxarakïna’. ¿Ukax kusiskañapunixaya?

Ukampis uka sacrificiox janiw wiñayatakïkänti, kunattix Job tatax pantjasirikiskänwa ukat jiwxarakïnwa. Job tatan sacrificiopat sipansa jukʼampi valorani sacrificiow utji, ukat taqiniruw qhispiyistaspa. Ukasti Jesusan luqtasïwipawa, Jehová Diosaw munasiñapat uk churawayistu (Mateo 20:28; Juan 3:16). Jesusan luqtasïwipar iyawsapkani ukanakaruxa, Jehová Diosax paraisoptayat Uraqinwa wiñayatak jakayani, ukanxa janiw chuymankipstañax utjxaniti. ‘Cuerposax wasitat kʼumara ukat wayna tiempo sarnaqäwisaru kuttxañapatakixa’, ¿kun lurañas wakisispa? Kuntï Bibliax uka tuqit qhanañchi uk yatxatañamatakiw chʼamañchtʼanipxsma.

[Qhanañchäwi]