Ke Ini N̄kani Owo Ẹdifiakde Idi N̄kparawa
San̄a Kpere Abasi
Ke Ini N̄kani Owo Ẹdifiakde Idi N̄kparawa
ANIE ke otu nnyịn ima afanikọn̄ ini usọn̄—iso emi ama akatan̄ tọk, enyịn emi mîtịmke ikụt n̄kpọ, utọn̄ emi mîkopke aba n̄kpọ, ye ukot emi ẹtiede nte oyom ndidọduọ? Afo emekeme ndikere m̀mê nso ikpanam Abasi obot owo man enye aka iso etie akparawa akparawa, edi etise usọn̄ iyakke enye ọbọ emem? Eyenem fi esịt ndifiọk ke idịghe se Abasi akaduakde edi oro. Ke ntre, enye anam ata eti ndutịm man ibọhọ usọn̄. Kere ban̄a se ẹketịn̄de ẹnọ Job ke Job 33:24, 25.
Job ekedi ata owo Abasi, ndien Jehovah Abasi ama ama enye etieti. Job ikọfiọkke ke se itiede oro, ke Satan ke amia ata ye Abasi ke ibuot imọ, ete ke imọ ikpono Abasi sia Abasi ọnọ imọ n̄kpọ. Sia Jehovah ama ekenyene mbuọtidem ke idem Job onyụn̄ ọfiọk ke imekeme ndinen̄ede kpukpru se Satan abiatde, Enye ama ayak Satan odomo Job. Satan ama ada “idiọk mbufịt etịm Job ọtọn̄ọde ke ekaikpat esie tutu esịm etịn̄ibuot.” (Job 2:7) Ndọn̄ okofofụk Job idem, ndien idem esie ekeditie n̄kikan n̄kikan, ebre, onyụn̄ ayan̄ade. (Job 7:5; 30:17, 30) Omokụt utọ ufen emi Job ọkọbọde! Edi ete mbon ama aka iso ọsọn̄ọ ada ye Abasi, ete: “Tutu n̄kpa, ndiduọkke nsọn̄ọnda mi.”—Job 27:5.
Job ama edidue nte ini akakade. Nte enye ekekerede ke n̄kpa imọ ekpere, enye ekenen̄ede ekere aban̄a idemesie tutu ọtọn̄ọ “ndidọhọ ke ukpọn̄ imọ enen utu ke ndidọhọ ke Abasi enen.” (Job 32:2) Abasi ama anam Elihu asua ọnọ enye, onyụn̄ otobo enye etop ndọn̄esịt emi, ete: “Kûyak enye [Job] osụhọde odụk obube [oro edi, udi]! Ami mmokụt ufak! Yak obụkidem esie akabade esehe akan eke ini uyen; yak enye afiak enyene odudu nte ekenyenede ke ini uyen esie.” (Job 33:24, 25) Enyene ndidi ikọ emi ama enen̄ede ọnọ Job idotenyịn. Ọwọrọ ke enye idibọhọ ufen tutu esịm usen n̄kpa. Edieke enye akabarede esịt, Abasi ọyọbọ ufak ke ibuot esie, onyụn̄ anyan̄a enye osio ke nnanenyịn esie. *
Job ama osụhọde idem ọbọ ntụnọ oro onyụn̄ akabade esịt. (Job 42:6) Imekere ke Jehovah ama onyụn̄ ọbọ ufak oro ẹkenọde ke ibuot Job, ayak enye ofụk idiọkn̄kpọ esie, anam idem afiak ọsọn̄ enye, onyụn̄ ọdiọn̄ enye. Bible ọdọhọ ke Jehovah “ama ọdiọn̄ utịt uwem Job akan ntọn̄ọ esie.” (Job 42:12-17) Kere nte eketiede Job ke idem ke ini Abasi ọkọdiọn̄de enye, akpan akpan, ke ini enye adahade ada usen kiet, etise idiọk udọn̄ọ emi okotụhọrede enye okụre, “obụkidem esie [onyụn̄] akabade esehe akan ke ini uyen”!
Ufak emi Abasi ọkọbọde anyan̄a Job ikanamke enye ọfọn ama onyụn̄ odu uwem ke nsinsi. Edi nnyịn imenyene ufak emi akande oro. Jehovah ama ọnọ edima Eyen esie, Jesus, edifak nnyịn. (Matthew 20:28; John 3:16) Kpukpru mbon oro ẹbuọtde idem ke ufak emi ẹnyene idotenyịn ndidu ke nsinsi ke Paradise ke isọn̄ emi. Abasi idiyakke owo ndomokiet ke obufa ererimbot oro ọsọn̄. Nnyịn imesịn udọn̄ inọ fi ite ekpep se akpanamde man etiene okụt ini emi n̄kani owo ‘ẹdifiakde isehe ikan ini uyen mmọ.’
Itie Bible emi okpokotde ke April:
[Ikọ Idakisọn̄]
^ ikp. 5 “Ufak” emi ẹtịn̄de ẹban̄a mi ọwọrọ “ndifụk n̄kpọ.” (Job 33:24) Etie nte ufak oro ẹkenọde ke ibuot Job ekedi uwa unam, emi Abasi akadade ofụk m̀mê osio isop idiọkn̄kpọ esie.—Job 1:5.