Finama Nzambi

Vava Anunu Bevutuka mu Ntela Kileke

NANI muna yeto ozolanga kituka se nunu, fitama nkand’a nitu, lembi toma mona, lembi toma wá ye mbevo a malu? Nanga olenda kiyuvula: ‘Wau vo Nzambi watusema y’ekani dia mwena kileke kieto e kiese, ekuma keyambulanga vo twanuna?’ Diakiese mu zaya vo Nzambi kakana ko vo twanunanga. Kansi, ozolele kutuvevola mu mpasi zitwasanga e kinunu! Tala e mvovo mia Yobi wa nkulu eto mina muna Yobi 33:24, 25.

Badika dina diabwila Yobi wa nkwa kwikizi ona wazolanga Yave. O Yobi kazaya wo ko vo Satana wakatikisa e kwikizi kiandi vava kavova vo Yobi wasadilanga Nzambi mu kuma ki’eloko. Wau vo Yave wabundanga e vuvu muna Yobi ye una yo nkuma wafokola e mpasi, wayambula vo Satana katonta e kwikizi kia Yobi. I bosi Satana “oyelese Yobi o mavumbu mampasi tuka nsasal’a tambi yaku mbat’a ntu.” (Yobi 2:7) E nitu a Yobi yazala ye mimvidi, o nkand’andi a nitu wakutama yo toboka e visi yandi yatompoka. (Yobi 7:5; 30:17, 30) Nga olenda yindula e mpasi zandi? Kansi, Yobi wasikila ye kwikizi yo vova vo: “Yavana mfwa kikatula ziku kiame oku ngina ko.”—Yobi 27:5.

Kansi, Yobi vilwa wampwena kavanga. Vava lufwa lwandi lwafinamanga, watokananga kwayingi mu kuma kia yandi kibeni muna ‘kuyilungisa ke mu Nzambi ko.’ (Yobi 32:2) Eleyu wa kimpovela kia Nzambi watumba Yobi. Kansi, Eleyu wasamuna kwa Yobi nsangu zambote zatuka kwa Nzambi oku vo. “Unkôla [Yobi] kakulumuka kuna mbilu, [ziami kia wantu awonso] nsolwele lubakanisu. E nitu andi isundidi o wete ke mu nitu a mwana ko; ovutuka kuna lumbu ya kileke kiandi.” (Yobi 33:24, 25) E mvovo miami miavana e vuvu kwa Yobi. Wabakula vo vava kefwa, ke mona diaka mpasi ko. Kele vo Yobi kaviluka o ntima, Nzambi wadi tonda lubakanisu yovo kimenga kiadi kelwa mu kuma kiandi yo kumvevola muna mpasi zandi. *

Kuna lembama kwawonso, Yobi watambulwila elongi yo viluka o ntima. (Yobi 42:6) Yave watonda kimenga kia lubakanisu kiavewa mu kuma kia Yobi, wayambula vo kia fuka esumu diandi yo ziula e nzila kimana Nzambi kansambula yo kunsenda. Yave ‘wasambula e mbaninu a Yobi ke mu lubantiku luandi ko.’ (Yobi 42:12-17) Yindula una kamona Yobi vava katambula nsambu zayingi kumosi yo wukwa yo mona vava nkand’andi a nitu wasunda ‘o wete ke mu nitu a mwana ko!’

E kimenga kia lubakanisu kina Nzambi katambula muna wete dia Yobi, kia ntalu yakete, kadi Yobi kakala walunga ko ye wafwa. Oyeto tuna ye kimenga kisundidi. Kuna zola kwawonso, Yave wavana Mwan’andi Yesu se lukûlu mu kuma kieto. (Matai 20:28; Yoane 3:16) Awonso bekwikilanga muna kimenga, bena ye vuvu kia zinga yakwele mvu muna paradiso ova ntoto. Muna nz’ampa tuvingilanga, Nzambi ovevola wantu akwikizi muna mpasi za kinunu. Ekuma olembi longokela mayingi mu kuma kia una ukala e zingu vava kifwana e ntangwa ina e nitu za nunu ‘zisunda o wete ke mu nitu a mwana ko’?

[Mvovo Vana Yand’a lukaya]