Pikala bakulakaje ne bua kupingana kabidi ku bunsonga
Semena pabuipi ne Nzambi
Pikala bakulakaje ne bua kupingana kabidi ku bunsonga
NNGANYI udi mua kuanyisha bua kuikala ne ntatu itu nayi bakulakaje bu mudi: kuikala ne mpala muele minyengu, mêsu amona bitayitayi, matshi bu adi ne mapapa ne mikolo mitekete? Bantu ba bungi batu badiebeja ne: ‘Bua tshinyi Nzambi mmufuke bantu bua bikale ne makanda mu busonga, kadi balua kupeta ntatu ku bukulakaja?’ Bualu budi busankisha mbua ne: Nzambi kavua mutufuke bua tuikale tukulakaja to. Bua dinanga, ukadi mumane kulongolola bua kutumbushila bukulakaja. Mona mêyi avuabu bambile Yobo adi mu Yobo 33:24, 25.
Tukonkononayi nsombelu uvua nende Yobo, muntu uvua mulamate Yehowa ne uvua Yehowa munange. Pavua Satana ubenga ne: Yobo ki mmulamate Nzambi, wamba mudiye wenzela Nzambi mudimu anu bua kupeta masanka, Yobo kavua mumanye to. Bu muvua Yehowa mumanye ne: Yobo neashale anu mumulamate ne mumanye muvuaye yeye muine ne bukole bua kujikija makenga a Yobo, yeye kulekela Satana bua atete Yobo. Ke Satana ‘kusamishaye Yobo ne biûja binene pambidi ponso, munda mua makasa too ne ku lubombo lua mutu wende.’ (Yobo 2:7) Mubidi wa Yobo ukavua wenda bikusu, utayika milengu, ufikuluka ne upuluka. (Yobo 7:5; 30:17, 30) Anji tetabi pebe kufuanyikija bunene bua dikenga divuaye nadi! Nansha nanku, Yobo wakashala mulamate anu Nzambi, wamba ne: ‘Too ne pangafua tshiena ngitabuja bua mutshima wanyi mutoke umbuke kundi.’—Yobo 27:5.
Kadi Yobo wakenza tshilema tshinene. Pavua Yobo wela meji ne: ukadi pa kufua, wakatuadija kudibingisha kupitshisha ne pa mukenji, ‘udibingisha yeye, kayi ubingisha Nzambi.’ (Yobo 32:2) Elihu, uvua wakula mu dîna dia Nzambi wakabela Yobo. Elihu wakambila kabidi Yobo mukenji muimpe wa kudi Nzambi eu: ‘Umusungile [Yobo] bua kapueki mu Dijimba dia Bafue [lukita lua bukua-bantu], bualu bua nakusangana tshia kumupikula natshi. Munyinyi wa pambidi pende neupite wa muana bulengele, udi upingana ku matuku a bunsongalume buende.’ (Yobo 33:24, 25) Mêyi aa avua mapeshe Yobo ditekemena dikole. Pavuaye ufua, kavua utungunuka ne kukenga kabidi to. Bu Yobo munyingalale, Nzambi uvua usanka bua kuitaba tshia kumupikula natshi tshivuabu bamufidile ne umujikijila makenga ende. *
Yobo wakitaba ne budipuekeshi buonso mibelu ivua Elihu mumupeshe ne kunyingalalaye. (Yobo 42:6) Yehowa wakitaba mulambu wa tshia-bupikudi uvua mufila bua Yobo. Mulambu eu wakambuluisha bua kumubuikidilabu bubi buende ne bua Nzambi kumuondopaye ne kumubenesha. Yehowa ‘wakasankisha Yobo mu matuku ende a ku nshikidilu ne disanka dipite diakadiye nadi mu matuku a ku tshibangidilu.’ (Yobo 42:12-17) Elabi meji bua disanka divua nadi Yobo pakajika disama dibi divuaye nadi ne pakalua mubidi wende ‘mupite wa muana bulengele’!
Tshia-bupikudi tshivua tshifidibue bua Yobo tshivua Yehowa muitabe katshivua tshimubuikidile mibi bua kashidi to, bualu Yobo uvua anu muntu muena mapange ne wakalua anu kufua. Tudi ne mulambu wa kutupikula nawu udi ne mushinga wa bungi. Yehowa wakafila Muanende bua ikale mulambu wa kutupikula nawu. (Matayo 20:28; Yone 3:16) Bonso badi baleja ditabuja mu mulambu eu badi ne diakalenga dia kupeta muoyo wa kashidi mu mparadizu pa buloba. Mu bulongolodi bupiabupia, Nzambi neumbushile bantu badi bamulamate bukulakaja. Bua tshinyi kubenga kulonga malu makuabu bua kumanya tshiudi mua kuenza bua kumona pebe tshikondo tshikale bakulakaje ne ‘munyinyi wa pambidi mupite wa muana bulengele’?
[Mêyi adi kuinshi]
^ tshik. 3 Tshiambilu ‘tshia kumupikula natshi’ tshidibu batela muaba eu tshidi tshiumvuija “kubuikila.” Bua Yobo, tshia kumupikula natshi etshi tshivua mua kuikala mulambu wa nyama, uvua Nzambi mua kuitaba bua kumubuikidila anyi kumujimijila bubi buende.—Yobo 1:5.
