Sud Machiegni gi Nyasaye

Kinde ma Joma Oti Nobed Rowere Kendo

NG’ANO kuomwa mamor gi chandruoge ma bedo moti kelo kaka, pien del mojony, wang’ maok nen maber, it maok winj maber, gi tielo maok wuoth maber? Wanyalo penjore kama: ‘Ang’o momiyo Nyasaye ne ochweyowa gi nyalo mar winjo maber e diere ma wan gi teko mar rowere, kae to bang’e wachako bedo maluor nikech chandruok mag tiyo?’ Wach maber mamorowa en ni mano ok e kaka Nyasaye nochanonwa. Kar mano, oseng’ado mar gonyowa mondo kik wabed moti! Ne ane weche ma ne onyis Ayub, jaduong’ machon, kaka giyudore e Ayub 33:​24, 25.

Non ane chal mar Ayub, jal ma ne oluoro Nyasaye kendo ma Jehova nohero. Ayub ne ok ong’eyo ni Satan ne keto kiawa kuom chung’ne motegno e nyim Nyasaye, kowacho ni Ayub ne tiyo ne Nyasaye mana nikech rit ma ne oritego. Nikech Jehova ne nigi adier chuth kuom Ayub, kendo Jehova nigi teko mar tieko chandruoge, ne oyie ne Satan mondo otem Ayub. Kae to Satan “nogoyo Ayub gi buche malit nyaka a e mor tiende nyaka chopi e pat wiye.” (Ayub 2:7) Ringre Ayub nopong’ gi kute kuonde duto, kendo pien dende nolokore rateng’ ma walore awala. (Ayub 7:5; 30:17, 30) Be inyalo temo paro lit gi rem ma ne en-go? Kata kamano, Ayub nodong’ kochung’ motegno, mowacho kama: “Nyaka e thona, ok abi weyo luwo timna makare!”​—Ayub 27:5, New World Translation.

Kata kamano, Ayub ne otimo ketho moro maduong’. Kane oneno ni ochomo e tho, ne oketo pache ahinya kuom nyiso ni ne en kare, koyalo “ni en owuon obet makare moloyo Nyasaye.” (Ayub 32:2) Elihu, jal ma ne wuoyo e lo Nyasaye nokwero Ayub. Kata kamano, Elihu bende nomiyo Ayub wach maber moa kuom Nyasaye niya: ‘Res Ayub ni kik olor e bur [liel]! Aseyudo rawar. Eka dende nobed mapoth moloyo dend nyathi; obedo kaka nobet ka podi ne en rawera.’ (Ayub 33:​24, 25) Nyaka bed ni wechego nomiyo Ayub geno. Koro ok ne ochuno ni odhi nyime kosandore nyaka e thone. Kapo ni Ayub ne nyalo loko chunye, Nyasaye ne dhi rwako rawar mochiw e loye kendo gonye kuom masichege. *

Ayub ne obolore morwako siem ma ne omiye, kendo noloko chunye. (Ayub 42:6) Nenore ni Jehova norwako rawar ma ne ochiw e lo Ayub, moyie mondo rawarno oum richone kendo yawo yo mar Nyasaye change kendo gwedhe. Jehova ‘nogwedho Ayub nyaka e thone, moloyo mokwongo.’ (Ayub 42:12-17) Par ane kaka Ayub nowinjo kane ogwedhe, ok mana kuom golo tuwo marach ma nomako dende kende, to bende miyo dende obed “mapoth moloyo dend nyathi”!

Rawar ma Nyasaye norwako e lo Ayub ne dhi konyo mana matin, nimar Ayub ne pod nigi richo mar Adam, kendo bang’e ne otho. Wan to wan kod rawar maber moloyo. Jehova nonyisowa hera kuom chiwonwa Wuode Yesu obednwa rawar. (Mathayo 20:28; Johana 3:16) Jogo duto ma keto yie kuom rawarno nigi geno mar dak nyaka chieng’ e paradis e piny. E piny manyienno, Nyasaye biro gonyo dhano duto mochung’ motegno mondo kik gibed moti. Donge ber kimedo puonjori kaka inyalo dak mondo ibi ine kinde ma joma oti none ka ‘dendgi bedo mapoth moloyo rowere’?

[Weche moler piny]