Uuna mboka ya kulupa taya ka kala aagundjuka ishewe
Hedha popepi naKalunga
Uuna mboka ya kulupa taya ka kala aagundjuka ishewe
OLYE gwomutse a hokwa iilanduliko yuukulupe, sha hala okutya, oshipa shoongandji, okwaahamona ko nawa, okwaahauva ko nawa nokweenda wa andalala? Otashi vulika wu ipule to ti: ‘Omolwashike hatu adhika ishewe kiilanduliko yuukulupe ngele Kalunga okwe tu shita tu nyanyukilwe oonkondo dhuugundjuka?’ Onkundana ombwanawa oyo kutya shika hasho Kalunga a li a lalakanena tu kale. Pehala lyaashono, okwe tu uvanekela pahole oku tu mangulula monkalo yuukulupe. Dhimbulukwa oohapu ndhoka dha li dha lombwelwa tatekulululwa Job, tadhi adhika muJob 33:24, 25.
Natu ka konakoneni shi na ko nasha nonkalo moka mwa li omulumentu omudhiginini Job ngoka a li e holike kuJehova. Satana okwa li a tula momalimbililo uudhiginini waJob, sho a ti kutya Job ohe mu longele owala netompelo lyokwiihola. Ihe Job ka li e shi kutya Satana oye a li ta makele uudhiginini we. Jehova okwa li e etha Satana a makele Job, molwaashoka okwa li e mu inekela nokwa li e shi shi kutya iilanduliko iiwinayi mbyoka Job te ke etelwa kuSatana, ota ka vula oku yi kutha po. Opo ihe Satana ‘oku umbu Job iitumbuka molutu aluhe.’ (Job 2:7) Olutu aluhe lwaJob olwa li lu na omazinyo noshipa she osha li sha luudha, sha ninga omakoko notashi natuka ko kolutu. (Job 7:5; 30:17, 30) Job ka li tuu muuwehame uunene! Ihe nonando oongaka, Job okwa li a kakatele uudhiginini we nokwa ti: “Sigo okusa itandi ki idhimbika uuyuuki wandje.”—Job 27:5.
Ihe nonando ongawo, Job okwa li a ningi eyono lya kwata miiti. Sho a li ta dhiladhila kutya eso lye olya hedha popepi, okwa li a tameke okukala ti iyukipalitha unene ‘mokwiininga ye nwene omuyuuki e vule Kalunga.’ (Job 32:2, yelekanitha NW.) Kalunga okwa li a longitha Elihu e li omupopikalelipo gwe a pukulule Job. Kalunga okwa li wo ape Elihu etumwalaka tali ti: “[Job] mu hupitha, kaa ye meso! Iikulila oyo mbika. Nena olutu lwe otalu shuna ko; talu kolo e talu nkondopala ishewe.” (Job 33:24, 25) Oohapu ndhoka odha li shili dha ningitha Job a kale e na etegameno. Job okwa li a tseya kutya ka li we ta ka mona iihuna sigo okeso lye. Okwa li e shi kutya ngele okwi iyele ombedhi, Kalunga ota ka kala e shi hokwa okutaamba ko iikulila opo e mu mangulule muupayakadhi mboka a li muwo. *
Job okwa li i iyele ombedhi nokutaamba ko epukululo ndyoka neifupipiko. (Job 42:6) Jehova okwa li a taamba ko iikulila, e etha eyambo lyaJob li siikile eyono lye nokungeyi okwa li a vulu oku mu galulila monkalo moka a li nale noku mu pa ondjambi. Jehova okwa li a “yambeke ohugunina yaJob shi vulithe nale.” (Job 42:12-17) Job ka li tuu u uvite a pepelelwa! Kakele owala komayambeko galwe ngoka a li a mono, omukithi gwe ogwa li gwa aludhwa nolutu lwe olwa li ‘lwa nkondopalekwa ishewe.’
Iikulila mbyoka Kalunga a li a taamba ko opo a dhimine po Job oya li yi na ongushu ya ngambekwa, molwaashoka kaya li ye mu ningitha a kale a gwanenwa nokonima okwa ka sa. Kunena, tse otwa gandjelwa iikulila yi na ongushu yi vule yaJob. Jehova okwa gandja pahole Omwana, Jesus, a ninge iikulila yetu. (Mateus 20:28; Johannes 3:16) Aantu ayehe mboka ye na eitaalo tali longo mekuliloyambo lyaJesus oye na etegameno lyoku ka kala nomwenyo sigo aluhe moparadisa kombanda yevi. Muuyuni mboka uupe twa tegelela, Kalunga ota ka mangulula aantu aadhiginini kuukulupe. Omolwashike itoo tsikile okwiilongo shoka wu na okuninga opo u vule oku ka mona nkene aakokele ‘omalutu gawo taga shuna ko e taga nkondopala ishewe’?
[Enyolo lyopevi]
^ okat. 3 Oshitya shOshihebeli shoka sha tolokwa “iikulila” otashi ti “okusiikila.” (Job 33:24; enyolo lyopevi) Pompinto mpoka, Kalunga okwa li ta ka siikila nenge ta ka dhima po omayono gaJob, molwaashoka okwa li tashi vulika i ilongekidha okutaamba ko eyambo lyoshinamwenyo ndyoka lya li tali vulu okuyambwa li ninge iikulila.—Job 1:5.