Onapit ed Dios

Sano Unugaw Lamet Iray Maedad La

SIOPA’D sikatayo so malabay ya ontatken​—akumanet so baog, makapuy lay mata tan layag, tan manggiwgiw la ray bikking? Nayarin nitepet mo, ‘Akin et pinalsa itayo ni na Dios a walaan na biskeg na inkatobonbalo no ontatken tayo met lanlamang?’ Say maong a balita et aliwan saya so getma na Dios parad sikatayo. Noagta, maar-aron nanggaway paraan pian ekalen so itatatken! Imanoen pay mensahe ed si Job a nabasa’d Job 33:24, 25.

Nengnengen tayoy agawa’d si Job, toon matoor ya inar-aro nen Jehova. Agto amta ya kinuestion nen Satanas so katooran to. Mandadayew labat kuno’d Dios ta walay nanaala to. Lapud talek nen Jehova ed si Job tan lapud sarag Ton ekalen so paniirap, inabuloyan Toy Satanas a subokey Job. Insan, “kinabil [nen Satanas] si Job ed saray makapasinagem a pelsa manlapu ed dapan na sali to angga ed toktok.” (Job 2:7) Apanoy bigis so laman nen Job, tan kinmekegang, dinmeket, tan amigmig so baog to. (Job 7:5; 30:17, 30) Kasin naiimadyin moy impanirap to? Balet nansiansian matoor si Job ya inkuan ton: “Angga ed ompatey ak agko ekalen so inkaskey [odino katooran] ko.”​—Job 27:5.

Pero akagaway seryoson lingo si Job. Sanen say amta to et ompatey la, masyado ton indepensay sarili to ya imbaga ton ‘sikatoy magmaong nen say Dios.’ (Job 32:2) Imbaki na Dios si Elihu ya ipetek so panagnonot nen Job. Balet wala met so imbaga nen Elihu a makapabiskeg ya mensahe na Dios: “Sikato [si Job] so ilaban mo a manlapu ed ilasor to ed kalinsurong [ponponan], akaromog ak na karondon. Say laman to sikato naani tadtariwa nen say laman na ugaw; sikato ompawil ed saray agew na kaugawan to.” (Job 33:24, 25) Seguradon apabiskeg ed saya si Job. Agla manirap anggad ipatey to. No sikatoy magbabawi, maliket so Dios a mangawat ed dondon pian naekal so paniirap to. *

Mapaabeban inawat nen Job so panangipetek, tan nagbabawi. (Job 42:6) Mapatnag, inawat nen Jehova so dondon a parad si Job pian nasakbongan so lingo to, diad ontan et nayari To lan paabigen tan bendisyonan. “Benendisyonan [nen Jehova] so kaunoran a kasampotan nen Job a lalo nen say gapo.” (Job 42:12-17) Isip mo pay inawan alikna nen Job. Say sakey ed saray maabig ya agawa et inmabig so makapadimlan sakit to, tan say laman to et singa “tadtariwa nen say laman na ugaw”!

Say dondon ya inawat na Dios a parad si Job et limitadoy usar to ta sikatoy nansiansian agperpekto tan inatey met lanlamang. Balet mas maabig so dondon a parad sikatayo. Maar-aron inter nen Jehova so Anak ton si Jesus a panondon ed sikatayo. (Mateo 20:28; Juan 3:16) Amin a manisia ed satan a dondon et nawalaay pankanawnawan manbilay ya anggapoy anggaan diad paraison dalin. Diad onsabin balon mundo, agla ontatken iray matoor ya totoo. On, ekalen la na Dios so itatatken. Akin ta no aralen yo no antoy gawaen yo pian wadman kayo met sano ‘say laman na maedad la et magmaliw a tadtariwa nen say laman na ugaw’?

Suhestion a Basaen ed Biblia legay Abril:

▪ Job 16-37

[Paimano ed leksab]