Fren Gud Witim God

Taem Olo Bae Young Moa

NO ENIWAN laek for olo and kasem samting olsem for eye nogud, earpas, leg nogud, and skin rinkol. Maet iu ting olsem, ‘Why nao God creatim man for enjoyim wei for strong taem hem young and then safa taem hem olo?’ Tru samting nao, hem no plan bilong God for iumi kamap olo. From hem lovem iumi, hem plan for finisim wei for olo tu! Tingim samting wea Jehovah talem long Job long Job 33:24, 25.

Iumi bae storyim wanem happen long Job, wanfala faithful man wea Jehovah lovem. Job no savve Satan kwestinim wei wea hem faithful long God. Satan sei Job worshipim God nomoa bikos hem laek kasem samting for hemseleva. Jehovah savve Job bae faithful and Hem fit for stretem eni nogud samting wea Satan duim, so hem letem Satan testim Job. Then Satan “mekem Job garem olketa nogud boela start long leg go kasem hed bilong hem.” (Job 2:7) Staka worm stap long olketa soa bilong hem, and samfala skin bilong hem kamap blak and kamaot. (Job 7:5; 30:17, 30) Tingim bigfala pain wea hem kasem. Nomata olsem, Job gohed faithful and sei: “Go kasem taem mi dae, mi bae gohed faithful!”—Job 27:5.

Bat Job duim wanfala big mistek. Taem hem tingse hem klosap for dae, hem mekhae tumas long wei wea hemseleva raeteous, and “hem sei hemseleva nao gud winim God.” (Job 32:2) Elihu wea toktok for God kaonselem Job. Bat Elihu talem tu disfala gud message from God: “No letem hem [Job] go daon insaed long grev! Mi garem price for sevem hem! Body bilong hem bae kamap gud moa winim taem hem young and hem bae strong moa olsem taem hem young.” (Job 33:24, 25) Masbi toktok hia mekem Job garem hope. Hem bae no gohed safa go kasem taem hem dae sapos hem repent. God bae hapi for acceptim price for sevem Job from olketa nogud samting wea kasem hem. *

Job hambol for acceptim datfala kaonsel and hem repent. (Job 42:6) Luk olsem Jehovah acceptim price for sevem Job and kavarem sin bilong hem, and God blessim hem and mekem hem gud bak moa. Jehovah “blessim Job bihaen winim firstaem.” (Job 42:12-17) Masbi Job hapi taem hem kasem olketa blessing hia, datfala rabis sik finis, and body bilong hem “kamap gud moa winim taem hem young”!

Price wea God acceptim for sevem Job hem helpem Job for lelebet taem nomoa bikos hem still garem sin and bihaen hem dae. Jehovah givim Son bilong hem Jesus olsem nambawan price for sevem iumi, wea winim datfala price wea God acceptim for sevem Job. (Matthew 20:28; John 3:16) Evriwan wea showimaot faith long Jesus savve laef olowe long paradaes earth. Long datfala niu world, God bae finisim wei for olo. Gohed for lane hao iu savve stap long taem for lukim ‘body bilong olketa olo kamap gud moa winim taem olketa young.’

[Footnote]