Ia Mafuta Atu i le Atua

Pe a Toe Talavou Ē e Matutua

PE E iai ea se isi o i tatou e fiafia pe a oo ina maanuminumi lona paʻu, faalētonu le vaai, le faalogo, ma le savali? Atonu o loo e fia iloa, ʻAfai na faia i tatou e le Atua ia malolosi e pei o talavou, aiseā ua tatou ola matutua ai?’ O se tala e fiafia ai, ona e leʻi finagalo le Atua e tatou te ola matutua, ae ia tatou saʻoloto mai i le ola matutua. Mātau ana fetalaiga iā Iopu, i le Iopu 33:24, 25.

Seʻi manatu i le tulaga o Iopu, o se tagata faamaoni na pele iā Ieova. E aunoa ma le iloa e Iopu, o loo fesiligia e Satani lona faamaoni i lona faapea atu i le Atua, e ala ona auauna Iopu iā te ia, ona o mea e maua mai i le Atua. Na faataga e Ieova Satani e tofotofoina Iopu, auā na ia faatuatuaina o ia ma na ia silafia foʻi, e mafai ona ia toe faaleleia mea e faaleagaina e Satani. Ona “taia [lea] o Iopu [e Satani] i se maʻi papala leaga e amata mai i ona alofivae e oo i lona tumuaʻi.” (Iopu 2:7) Na lilo le paʻu o Iopu i ilo, ma e toʻulu ese paʻupaʻu o lona tino pe a oo ina uliuli. (Iopu 7:5; 30:17, 30) E mautinoa lona tigāina tele. Ae na faamaoni pea Iopu ma faapea mai: “Seʻia oo lava i loʻu oti, ou te lē aveesea loʻu faamaoni!”​—Iopu 27:5.

Peitaʻi, e iai se mea na sesē ai Iopu. A o faasolo ina mou atu lona malosi, e pau le mea na popole i ai, o “lona taʻuamiotonuina o ia lava nai lo o le Atua.” (Iopu 32:2) Na aʻoaʻia o ia e Eliu le sui o le Atua, ma faailoa atu se feʻau mai i le Atua e faalaeiauina ai Iopu: “Ia laveaʻi iā te ia [Iopu] ina neʻi alu ifo i le lua [le tuugamau]! Ua ou maua le togiola! Ia faafouina lona tino e sili nai lo o le talavou; ia toe foʻi o ia i aso o le malaulau o lona talavou.” (Iopu 33:24, 25) E mautinoa na matuā faalaeiauina Iopu i na upu. E lē faaauau pea ona mafatia seʻia oo i le oti. Afai e salamō o ia, e talia e le Atua se togiola mo ia ma saʻoloto ai mai i ona puapuaga. *

Na talia e Iopu le aʻoaʻiga ma faaalia le salamō. (Iopu 42:6) E mautinoa na talia e Ieova le togiola mo Iopu, ma faaaogā e ufiufi ai lana agasala, ma toe faafoʻisia ai lona malosi ma tauia o ia. “Ua faamanuia e Ieova le iʻuga o Iopu e sili atu i lo o lona amataga.” (Iopu 42:12-17) E mautinoa sa fiafia Iopu i ona faamanuiaga, e aofia ai ma le toe faafoʻisia o lona malosi, ma le ʻfaafouina o lona tino e sili nai lo o le talavou’!

E gata mai le aogā o le togiola lea na talia e le Atua mai iā Iopu, auā na iai pea lona tino augavale ma iʻu ai ina oti. Peitaʻi, e sili mamao atu le togiola ua tatou maua. O le alofa o Ieova na ia foaʻi mai ai lona Alo o Iesu, e avea ma togiola mo i tatou. (Mataio 20:28; Ioane 3:16) O i latou uma e faatuatua i lenā togiola, e maua le faamoemoe o le ola e faavavau i le parataiso i le lalolagi, ma o le a faasaʻoloto ai e le Atua i latou ia lē ola matutua. E lelei lou aʻoaʻo atili pe faapefea ona e ola i le taimi o le a toe “faafouina [ai lou] tino e sili nai lo o le talavou”!

Faitauga Tusi Paia mo Aperila:

▪ Iopu 16-37

[Faaopoopoga i lalo]