Te den owruwan o kon yongu baka
Kon krosibei na Gado
Te den owruwan o kon yongu baka
SUMA fu wi wani kon owru? Suma fu wi wani taki wi skin kon ploiploi, taki wi no e si bun moro, taki wi no e yere so bun moro, èn taki wi futu e kon swaki? Kande yu e aksi yusrefi: ’Fu san ede Gado ben o meki wi de steifisteifi te wi yongu, soso fu meki wi pina te wi kon owru bakaten?’ We, a bun nyunsu na taki Gado no ben wani disi gi wi. Na presi fu dati, a sorgu na wan lobi-ati fasi taki wi no o kon owru moro! Luku den wortu di a famiri-edeman Yob ben kisi fu yere, soleki fa skrifi na ini Yob 33:24, 25.
Luku a situwâsi fu Yob, wan man di ben tai hori na Yehovah èn di Yehovah ben lobi. Sondro fu Yob sabi, Satan ben taki dati Yob no ben o tai hori na Gado, fu di a ben e dini Gado soso fu kisi wini gi ensrefi. Yehovah ben abi a frutrow taki Yob ben o tai hori na en èn Yehovah ben sabi taki a abi a krakti fu meki sani kon bun baka te ogri miti wan sma. Dati meki Yehovah gi pasi taki Satan tesi Yob. Ne Satan „meki Yob kisi wan takru siki. Fu en ede te na en ondrofutu Yob ben lai butsweri” (Yob 2:7). Yob en skin ben lai woron, den drei soro na en skin ben kon blaka èn piripiri (Yob 7:5; 30:17, 30). Yu kan frustan fa a ben e pina? Ma toku Yob ben tai hori na Yehovah, èn a ben taki: „Mi o tan du bun teleki mi bro mi lasti bro!”—Yob 27:5.
Ma toku, Yob ben meki wan seryusu fowtu. Di a ben e denki taki a ben o dede, dan a ben de nomonomo fu sori taki a no du ogri. Fu dati ede a ben „feni taki na en ben abi leti na presi fu Gado” (Yob 32:2). Elihu, a man di ben taki gi Gado, ben piri-ai gi Yob. Ma Elihu ben gi Yob wan moi boskopu tu di komoto fu Gado. A ben taki: „Frulusu en [Yob] fu a grebi! Mi feni wan lusu-paiman! Meki en skin kon moro moi leki di a ben yongu. Meki a kon abi krakti baka neleki di a ben yongu” (Yob 33:24, 25). Den wortu dati ben musu gi Yob howpu trutru. A no ben abi fu tan nyan pina teleki a dede. Efu Yob ben o sori berow, dan Gado ben o feni en bun fu teki a lusu-paiman fu en èn a ben o puru en na ini a pina fu en. *
Na wan sakafasi, Yob teki a piri-ai di a ben kisi, èn a sori berow (Yob 42:6). Soleki fa a sori, dan Yehovah ben teki wan ofrandi di ben tapu den fowtu fu Yob, èn na so Gado ben kan meki en kon betre èn blesi en. Yehovah ben „blesi Yob moro leki fosi” (Yob 42:12-17). Prakseri fa Yob ben breiti di a kisi den blesi. Iya, a takru siki fu en ben gowe, èn fu taki en leti en skin ben kon „moro moi leki di a ben yongu”!
Na ofrandi di Gado ben teki, no ben tapu den sondu fu Yob fu ala ten fu di Yob tan wan sondu libisma èn bakaten a dede. Wi abi wan moro bun ofrandi fu tapu den sondu fu wi. Na wan lobi-ati fasi Yehovah gi en Manpikin, Yesus, leki wan lusu-paiman fu tapu den sondu fu wi (Mateyus 20:28; Yohanes 3:16). Ala sma di e poti bribi na ini a lusu-paiman dati, abi a howpu fu libi fu têgo na ini wan paradijs na grontapu. Na ini a nyun grontapu dati, Gado o frulusu libisma di tan gi yesi na en, fu den takru bakapisi di sma abi te den e kon owru. Yu kan libi na ini a ten te den owruwan o si fa ’den skin o kon moro moi leki di den ben yongu’. Fu san ede yu no e leri moro fu dati?
A bun fu leisi a pisi disi fu Bijbel na ini april:
[Futuwortu]
^ paragraaf 3 A wortu „lusu-paiman” wani taki „fu tapu wan sani”. Na ini a tori fu Yob, a lusu-paiman ben kan de wan meti di a ben tyari leki ofrandi, èn di Gado ben o teki fu tapu a fowtu di Yob meki. Na so Yob ben kan kon bun baka nanga Gado.—Yob 1:5.