Musi Vhalala Vha Tshi Ḓo Dovha Vha Vha Vhaswa
Sendelani Tsini Na Mudzimu
Musi Vhalala Vha Tshi Ḓo Dovha Vha Vha Vhaswa
NAA hu na muthu ane a ṱoḓa u vha mulala—u vha na lukanda lwo onyanaho, u sa vhona zwavhuḓi, u sa pfa zwavhuḓi, na u vha na magona ane a tou dedengela? Ni nga kha ḓi ḓivhudzisa uri, ‘Ndi ngani Mudzimu o ri sika ri vhathu vhane vha nga kona u ḓiphina nga u vha na maanḓa a vhuswa, fhedzi ra vho fheleledza ro no sokou sedzana na mvelelo dzi ṱungufhadzaho vhukuma dza vhulala?’ Zwi takadzaho ndi uri Mudzimu o vha a songo dzudzanya uri ri vhe vhalala. Ndi ngazwo o ita ndugiselelo ya lufuno u itela u ri vhofholola uri ri si tsha kegula kana u kalaha. Ṱhogomelani maipfi ane a wanala kha Yobo 33:24, 25 e a vhudzwa Yobo musimulalushaka.
Ṱhogomelani vhuimo he Yobo munna a fulufhedzeaho ane a funwa nga Yehova, a vha e khaho. Yobo o vha a sa zwi ḓivhi uri Sathane o vha a tshi khou timatima u fulufhedzea hawe, na uri o ri u shumela Mudzimu nga nṱhani ha zwiitisi zwa tseḓa. Yehova o tendela Sathane a tshi linga Yobo ngauri o vha a tshi fulufhela Yobo nahone a tshi ḓivha uri u na maanḓa a u fhelisa vhuṱungu vhune ha nga vha hone. Nga zwenezwo Sathane o mbo ḓi “rwa Yobo nga mamota a ṱhoṱhonaho, a bva kha muvhili woṱhe, a guma ṋayoni a guma na kha thovuma.” (Yobo 2:7) Muvhili woṱhe wa Yobo wo mbo ḓi vha na mamota, nahone lukanda lwawe lwo mbo ḓi vha na gwati, lwa swifhala nahone lwa ḓuvhudza. (Yobo 7:5; 30:17, 30) Naa ni nga elekanya nga ha vhuṱungu he a vhu pfa? Naho zwo ralo, Yobo o dzula a tshi fulufhedzea nahone o ri: “Ndi fa na ḽeneḽo ḽa u ri: A thi na tshe nda tshinya.”—Yobo 27:5.
Naho zwo ralo, hu na vhuṅwe vhukhakhi vhuhulwane he Yobo a vhu ita. A tshi humbula uri u tsini na u fa, o mbo ḓi vhilaelesa nga ha ene muṋe, “a ḓi ri a thi na mulandu, Mudzimu ha ngo ita zwone.” (Yobo 32:2) Elihu we a ambelela Mudzimu o khakhulula Yobo. Fhedzi Elihu o dovha a vhudza Yobo mulaedza wavhuḓi u bvaho ha Mudzimu a ri: “Nga a vhofhololwe; a songo tsela mulindini; tshipfumelelo tshawe ndo tshi vhona. Ndi hone ṋama yawe i tshi ḓo dovha ya khwaṱha ya fhira ya ḓafu, a vhuyelela maḓuvhani a vhutuka.” (Yobo 33:24, 25) Maipfi eneo a nga vha o ita uri Yobo a vhe na fulufhelo. O vha a sa ḓo bvela phanḓa a tshi tambula u swika a tshi fa. Arali Yobo a rembuluwa, Mudzimu o vha a tshi ḓo takalela u ṱanganedza tshipfumelelo tshawe na u mu vhofholola kha maṱungu awe. *
Yobo o mbo ḓi ṱanganedza ndayo, nahone a rembuluwa. (Yobo 42:6) Zwi tou vha khagala uri Yehova o ṱanganedza tshipfumelelo tshe tsha itelwa Yobo, a tendela tshi tshi fukedza hawe nahone tsha vula nḓila ya uri Mudzimu a mu fhodze na u mu lambedza. Yehova “o shudufhadza Yobo nga zwo ḓaho zwino, zwa fhira zwiḽa zwa kale.” (Yobo 42:12-17) Edzani humbula uri Yobo o ḓipfa o vhofholowa hani musi dwadze ḽawe ḽi tshi fhola nahone ‘ṋama yawe ya khwaṱha ya fhira ya ḓafu ḽa muswa’!
Tshirengululi tshe Mudzimu a tshi ṱanganedza a tshi itela Yobo tsho vha tshi tshi ḓo shuma lwa tshifhinganyana, nga nṱhani ha uri o ḓi bvela phanḓa e muthu a songo fhelelaho nahone o fheleledza o fa. Hu na tshiṅwe tshirengululi tsha khwine-khwine tshine ra vha natsho. Yehova o ri ṋekedza Murwa wawe nga lufuno uri a vhe tshirengululi tshashu. (Mateo 20:28; Yohane 3:16) Vhoṱhe vhane vha vha na lutendo kha tshenetsho tshirengululi vha na tshilavhelelwa tsha u tshila tshoṱhe paradisoni kha ḽifhasi. Kha shango ḽiswa ḽine ḽa ḓo ḓa hu si kale, Mudzimu u ḓo ita uri vhathu vha fulufhedzeaho vha si tsha kegula kana u kalaha. Ndi ngani ni sa gudi zwo engedzeaho nga ha tshifhinga tshine na ḓo vhona vhalala vha tshi vhona ‘ṋama yavho i tshi dovha ya khwaṱha ya fhira ya ḓafu ḽa muswa’?
[Ṱhaluso i re magumoni a siaṱari]
^ phar. 5 Ipfi “tshipfumelelo” ḽo shumiswaho henefha ḽi amba u fukedza. (Yobo 33:24) Kha mafhungo a Yobo tshipfumelelo tsho vha tshi tshi nga vha tshiṱhavhelo tsha tshifuwo, tshe Mudzimu a vha a tshi ḓo tshiṱanganedza u itela u hangwela kana u fukedza vhukhakhi ha Yobo.—Yobo 1:5.