Magin Duok ha Dios

Kon an mga Lagas Bumalik Na ha Pagkabatan-on

HIN-O ha aton an naruruyag ha mga epekto han kalagas—kuros nga panit, kaharap, kabungol, ngan magluya nga bitiis? Bangin ka magpakiana, ‘Kay ano nga ginlarang kita han Dios nga may potensyal nga makapahimulos han kusog han pagkabatan-on kondi nahahadlok ha mga epekto han kalagas?’ Makalilipay nga diri ito an katuyoan han Dios para ha aton. Lugod, mahigugmaon nga naghimo Hiya hin paagi basi matalwas kita tikang ha mga epekto han kalagas. Tigamni an mga pulong para kan Job nga mababasa ha Job 33:24, 25.

Tagda an sitwasyon ni Job, usa nga maunungon nga tawo nga hinigugma ni Jehova. Diri maaram hi Job nga ginkwestyon ni Satanas an iya integridad ngan siniring nga nag-aalagad la hiya ha Dios tungod kay may napapahimulosan hiya. Gintugotan ni Jehova hi Satanas nga sarihan hi Job tungod kay natapod Hiya kan Job ngan may gahum Hiya ha pagbalik kan Job ha maopay nga kahimtang. Katapos, ginpasakitan ni Satanas “hi Job hin magsakit nga mga hubag tikang ha rapadapa han iya tiil ngadto ha iya alimpupuro.” (Job 2:7) An iya unod napuno hin ulod, an iya panit nagkaada mga kugang, nangitom, ngan nagbakbak. (Job 7:5; 30:17, 30) Nahahanduraw mo ba an iya kakurian? Bisan pa hito, nagpabilin hiya nga matinumanon ngan siniring: “Ngada han akon kamatay diri ko isasalikway tikang ha akon an akon pagkamaligdong.”—Job 27:5.

Bisan pa hito, hi Job may nabuhat nga seryoso nga sayop. Han kahuna niya mamamatay na hiya, mas ginpabilhan niya an iya kalugaringon ngan gintagad nga mas matadong kay ha Dios. (Job 32:2) Kondi, ginsaway hiya han paragyakan han Dios nga hi Elihu. Pero may maopay nga mensahe hi Elihu tikang ha Dios para kan Job: “Luwasa hiya [Job] tikang ha pagtipakadto ha uhang [lubnganan], hin-agian ko in lukat. An iya unod malalabi hin kapuraw kay han kanan bata; Hiya mabalik ha mga adlaw han iya pagkabatan-on.” (Job 33:24, 25) Sigurado nga nalipay hi Job hito nga mga pulong. Diri hiya mag-aantos tubtob ha kamatayon. Kon magbasol hiya, malilipay an Dios ha pagkarawat hin makakalukat ha iya, ngan luluwason hiya tikang ha iya kasakitan. *

Mapainubsanon nga ginkarawat ni Job an pagsaway ngan nagbasol. (Job 42:6) Matin-aw nga ginkarawat ni Jehova an lukat para kan Job, gintugotan ito nga makatabon han sala ni Job ngan makabulig nga maibalik hiya ha maopay nga kahimtang ngan kumarawat hin balos. ‘Ginbendisyonan ni Jehova an urhi nga kinabuhi ni Job labi kay han iya tinikangan.’ (Job 42:12-17) Handurawa an kalipay ni Job nga upod han iba pa nga bendisyon, nawara an iya makangingirhat nga sakit ngan naghamis an iya panit ngan nagin ‘puraw kay han kanan bata.’

An lukat nga nakarawat han Dios tikang kan Job limitado la an nahimo tungod kay nagpabilin hi Job nga diri hingpit ngan ha urhi namatay. Kondi may-ada kita mas maopay nga lukat. Mahigugmaon nga ginhatag ni Jehova an iya Anak nga hi Jesus sugad nga lukat para ha aton. (Mateo 20:28; Juan 3:16) An ngatanan nga natoo hito nga lukat may paglaom nga mabuhi ha waray kataposan ha paraiso nga tuna. Hiton tiarabot nga bag-o nga tuna, an magtinumanon diri na makakaeksperyensya han mga epekto han kalagas. Gindadasig ka namon nga mag-aram hin dugang basi hibaroan kon ano an mahimo buhaton basi mabuhi ha panahon diin makikita han mga lagas an ira ‘unod nga malalabi hin kapuraw kay han kanan bata.’

[Footnote]