DAKOL ngonyan an nakakamate na nagsosolo sinda; an pagmate ninda mayo nin siisay man na talagang nagmamakolog sa sainda. Arog kaini an parateng pagmate nin mga may edad na. Alagad an dakol na aki ngonyan, dawa an dakol na naglilingkod sa Dios, nakakamate na sinda nagsosolo asin natatakot. Aram mo daw kun taano?— *

Dakol an puedeng dahelan kaiyan. Halimbawa, may sarong tawo na nabuhay kaidtong haloy nang panahon—haros sangribong taon bago mamundag si Jesus. Sia si Elias. Nabuhay sia kaidtong an mga tawo sa nasyon nin Israel magpondo sa paglilingkod sa tunay na Dios, si Jehova. An kadaklan nagpoon nang sumamba sa falsong dios na si Baal. Si Elias nagsabi: “Ako na sana an natatada.” Alagad sa heling mo daw talagang si Elias na sana an naglilingkod ki Jehova?—

Minsan ngani dai aram ni Elias, igwa pa nin iba sa Israel na nagsasamba sa tunay na Dios. Alagad nagtago sinda. Natatakot sinda. Aram mo daw kun taano?—

Si Ahab, na hade nin Israel, dai naglilingkod ki Jehova; sia nagsasamba ki Baal, an falsong dios kan maraot na agom niang si Jezebel. Kaya pinagmaigotan ninda ni Ahab na hanapon an mga naglilingkod ki Jehova tanganing gadanon sinda, lalo na si Elias. Iyan an dahelan kaya nagdulag si Elias. Nagbaklay sia nin 483 kilometros sa desierto pasiring sa Horeb, na inaapod man sa Biblia na Sinai. Sa lugar na idto, ginatos na taon bago kan panahon ni Elias, itinao ni Jehova  sa saiyang banwaan an Sampulong Togon asin an iba pang kabtang kan Ley nia. Si Elias solong nagtago sa sarong kueba sa Horeb. Sa heling mo, dapat daw matakot si Elias?—

Ipinapaheling kan Biblia na bago kaidto ginamit ni Jehova si Elias sa paggibo nin dakulang mga milagro. Sinimbag kaidto ni Jehova an pamibi ni Elias na magpadara nin kalayo hale sa langit tanganing tumtomon an sarong atang. Paagi kaiyan, pinatunayan ni Jehova na Sia an tunay na Dios, bakong si Baal. Dangan, mantang si Elias nasa kueba, kinaolay sia ni Jehova.

“Ano an ginigibo mo digdi?” an hapot ni Jehova. Sa pagkakataon na idto sinabi ni Elias, ‘Ako na sana an natatada sa mga nagsasamba sa saimo.’ Dangan, si Jehova may kabootan na itinanos si Elias, na nagsasabi, ‘Igwa pa ako nin pitong ribo na naglilingkod sa sako.’ Si Elias pinabalik ni Jehova asin ipinaliwanag sa saiya na dakol pa an ipapagibo Nia sa saiya.

Ano sa heling mo an manonodan niato sa halimbawa ni Elias?— Dawa an mga naglilingkod ki Jehova natatakot man kun beses. Kaya kaipuhan na girumdomon niato gabos, hoben man o gurang, na magdolok ki Jehova para sa tabang. An Biblia nanunuga: “Si Jehova harani sa gabos na nag-aarang sa saiya.”

May saro pang leksion: Igwa kita nin mga tugang sa gabos na lugar na namomoot ki Jehova asin sa sato. An Biblia nagsasabi: “An arog kaiyan na mga kasakitan nangyayari man sa bilog na kasararoan kan [satong] mga tugang sa kinaban.” Dai ka daw naoogmang maaraman na kita nungka talagang nagsosolo?—