MADAMO ang nasubuan subong; abi nila wala gid sing nagaulikid sa ila. Amo sini pirme ang ginabatyag sang mga tigulang. Pero subong madamo nga bata, bisan ang mga nagaalagad sa Dios, ang nasubuan man kag nahadlok. Nabal-an mo bala kon ngaa?— *

May madamo nga rason. Halimbawa, may isa ka tawo nga nagkabuhi sang una mga isa ka libo ka tuig antes natawo si Jesus. Sia amo si Elias. Sang panahon niya, ang mga tawo sa Israel wala na nagasimba sa matuod nga Dios, nga si Jehova. Ginasimba sang kalabanan ang butig nga dios nga si Baal. Si Elias nagsiling: “Ako gid lamang, ang nabilin.” Pero sa banta mo, si Elias na lang bala ang nagaalagad kay Jehova?—

Wala kabalo si Elias nga may iban pa sa Israel nga nagasimba sa matuod nga Dios. Pero nagapanago sila kay nahadlok sila. Nabal-an mo bala kon ngaa?—

Si Ahab, nga hari sang Israel, wala nagasimba kay Jehova. Ginasimba niya si Baal, ang butig nga dios sang iya malain nga asawa, nga si Jezebel. Ginapangita nila nga duha ang mga nagaalagad kag Jehova para patyon, labi na si Elias. Gani nalagyo si Elias. Naglakbay sia sing halos 483 kilometros sa desyerto pakadto sa Horeb, nga ginatawag man sang Biblia nga Sinai. Ginatos ka tuig antes sang panahon ni Elias, didto ginhatag ni Jehova sa iya katawhan ang Napulo ka Sugo kag ang iban pa niya nga  Kasuguan. Isa lang si Elias nga nanago sa kueba sa Horeb. Nahadlok man bala sadto si Elias?—

Suno sa Biblia, gingamit sadto ni Jehova si Elias sa paghimo sing mga milagro. Ginsabat man sadto ni Jehova ang iya pangamuyo paagi sa pagpadala sing kalayo halin sa langit nga nagsunog sa halad. Sa sini, ginpamatud-an ni Jehova nga Sia ang matuod nga Dios, kag indi si Baal. Gani sang ara sa kueba si Elias, si Jehova nakighambal sa iya.

“Ano bala ang ginahimo mo diri?” pamangkot ni Jehova. Sini na nga tion nga nagsiling si Elias, ‘Ako na lang ang nabilin nga nagasimba sa imo.’ Mainayuhon nga gintadlong ni Jehova si Elias, nga nagasiling, ‘May pito ka libo pa nga nagaalagad sa akon.’ Ginsilingan ni Jehova si Elias nga may ipaobra pa Sia sa iya.

Ano sa banta mo ang matun-an naton kay Elias?— Ang mga nagaalagad kay Jehova mahimo nahadlok man kon kaisa. Gani dapat naton dumdumon tanan, bata man ukon tigulang, nga mangayo sing bulig kay Jehova. Ang Biblia nagpromisa: “Ang GINOO malapit sa tanan nga nagapanawag sa iya.”

May isa pa ka leksion: Madamo kita sing kauturan nga lalaki kag babayi nga nagahigugma sa aton kag kay Jehova. Ang Biblia nagsiling: “Ang amo man nga mga pagpaantos ginahimo sa [aton] bug-os nga paghiliutod sa kalibutan.” Nalipay ka man bala nga wala kita nagaisahanon?—