BATHO ba bantši lehono ba lewa ke bodutu; ba bona eka ga go na motho yoo a nago le taba le bona. Batho ba bagolo gantši ba ikwa ka tsela ye. Eupša bana ba bantši lehono, gaešita le ba bantši bao ba hlankelago Modimo, le bona ba lewa ke bodutu le go boifa. Na o tseba lebaka?— *

Go ka ba le mabaka a mantši. A re ele hloko mohlala wa monna yo a phetšego kgale—mo e nyakilego go ba nywaga e sekete pele Jesu a belegwa. Leina la gagwe e be e le Eliya. O phetše nakong ya ge batho ba setšhaba sa Isiraele ba tlogetše go hlankela Modimo wa therešo, Jehofa. Ba bantši ba be ba thomile go rapela modimo wa maaka e lego Baali. Eliya o itše: “[Ke] nna ke šetšego ke nnoši.” Eupša na o nagana gore Eliya e be e le yena feela yo a bego a šetše a hlankela Jehofa?—

Gaešita le ge Eliya a be a sa tsebe, go be go sa na le ba bangwe kua Isiraele bao ba bego ba rapela Modimo wa therešo. Eupša ba be ba utamile. Ba be ba boifa. Na o tseba lebaka?—

Ahaba, kgoši ya Isiraele, o be a sa hlankele Jehofa; o be a hlankela Baali, modimo wa maaka wa mosadi yo kgopo wa Ahaba, e lego Isebele. Ka baka leo, yena le Ahaba ba be ba nyaka go hwetša batho bao ba hlankelago Jehofa gomme ba ba bolaye, kudukudu Eliya. Ke ka baka leo Eliya a ilego a tšhaba. O ile a tšhabela bokgoleng bja mo e nyakilego go ba dikhilomithara tše 483 leganateng la Horebe, e lego lefelo leo gape le bitšwago Sinai ka Beibeleng. Nywaga e makgolo pele ga mehla ya Eliya, Jehofa o  be a ile a fa batho ba gagwe Melao e Lesome gotee le Molao wa gagwe ka moka gona moo. Eliya o ile a utama ka leweng moo thabeng ya Horebe a nnoši. Na o nagana gore Eliya o be a swanetše go boifa?—

Beibele e bontšha gore pejana Jehofa o be a ile a diriša Eliya go dira mehlolo e megolo. Jehofa o be a kile a araba thapelo ya Eliya ya gore a romele mollo go tšwa legodimong gore o tšhume sehlabelo. Ka tsela yeo, Jehofa o ile a hlatsela gore ke Yena Modimo wa therešo, e sego Baali. Bjale, ge Eliya a utamile ka leweng, Jehofa o ile a bolela le yena.

Jehofa o ile a botšiša ka gore: “O nyaka eng mo?” Ke moo Eliya a ilego a araba ka gore: ‘Ke nna ke šetšego ke nnoši go bao ba go hlankelago.’ Ke moka Jehofa o ile a phošolla Eliya ka botho a re: ‘Ke sa na le ba dikete tše šupago bao ba ntlhankelago.’ Jehofa o ile a botša Eliya gore a boele morago, a mo hlalosetša gore O sa na le modiro o montši wo a tlago go mo nea wona.

O nagana gore re ka ithuta’ng mohlaleng wa Eliya?— Gaešita le bao ba hlankelago Jehofa ba ka ikwa ba boifa ka dinako tše dingwe. Ka gona ka moka ga rena, ba banyenyane le ba bagolo, re swanetše go gopola go kgopela thušo go Jehofa. Beibele e holofetša ka gore: “Jehofa o kgauswi le bohle bao ba mmitšago.”

Thuto e nngwe še: Re na le bana babo rena le dikgaetšedi lefaseng ka bophara bao ba ratago Jehofa e bile ba re rata. Beibele e re: “Ditlaišego tše di swanago di kgotlelelwa ke ba bangwe mokgatlong ka moka wa bana babo [rena] lefaseng.” Na ga o thabišwe ke go tseba gore le ka mohla ga re noši?—