Ibangat Yo Iray Anak Yo

Kasin no Maminsan et Maermen tan Natatakot Ka?

DAKEL a totoo natan so maer-ermen; say pakalikna ra et anggapoy mangaaro’d sikara. No arum, ontan so nalilikna na saray baleg la. Balet dakel met ya ugugaw so naeermenan tan natatakot no maminsan, anggano mandadayew ni ra ed Dios. Antam no akin?— *

Nandurumay rason. Nengnengen ta pay alimbawa na sakey ya lakin nambilay nensaman, manga sanlibon taon antis nin nianak si Jesus ed dalin. Say ngaran to et Elias. Diad saman a panaon et tinmunda lan nandayew ed tuan Dios a si Jehova so bansan Israel. Amin da lawari et nandayew la’d si Baal ya aliwan tua ya dios. Kanian imbaga nen Elias: ‘Bukbukor ko lay atilak.’ Balet talaga kasin bukbukor la nen Elias so mandadayew ed si Jehova?—

Ag-amta nen Elias ya wala ni ray Israelitan mandadayew ed tuan Dios. Onaamot labat ira, ta natatakot ira. Antam no akin?—

Say ari na Israel ya si Ahab et agmandadayew ed si Jehova. Say dadayewen to et si Baal, ya dios na mauges ya asawa ton si Jezebel. Kanian paaanap di Ahab tan Jezebel iray mandadayew ed si Jehova pian pateyen ira, lalo lay Elias. Katon batik si Elias. Ngalngali 483 kilometro so kaarawi nakar to. Asabi toy desierto ya anggad Horeb, a tatawagen met ed Biblia ya Sinai. Nilasus taon antis a nianak si Elias et ditan inter nen Jehova so Ten  Commandments tan arum ni ran Ganggan ed totoo to. Inmamot ya bukor si Elias ed kuweba diad Horeb. Dapat kasin ontakot si Elias?—

Ibabaga na Biblia ya dati et imbaki nen Jehova si Elias ya manggawa na saray milagro. Aminsan et inebatan nen Jehova so pikakasi nen Elias ya mangipelag na apuy manlapud tawen pian napoolan so bagat. Kanian impanengneng nen Jehova ya Sikato so tuan Dios, aliwan si Baal. Nen wala la’d kweba si Elias, akitongtong si Jehova ed sikato.

‘Antoy gagawaen mo dia, Elias?’ so intepet nen Jehova. Diad saman la imbaga nen Elias ya ‘bukbukor ko lay mandadayew ed sika.’ Insan maar-aron imbaga nen Jehova ed sikato, ‘wala ni pitonlibo ya mandadayew ed siak.’ Ingganggan nen Jehova si Elias ya ompawil, ta dakel ni pagawa To.

Antoy naaralan tayo ed si Elias?— Anggan saray mandadayew ed si Jehova et natatakot met no arum. Kanian tandaan tayon amin, ugaw man o matatken, ya kaukolan tayoy patulongan ed si Jehova. Ibabaga na Biblia ya: “Si Jehova asingger ed amin ya ontawag ed sikato.”

Wala ni sakey ya naaralan tayo: Anggan iner et walaray agagi tayon mangaaro’d si Jehova tan ed sikatayo. Inkuan na Biblia ya: “Nagagawa met iray onian ir-irap ed amin ya agagi yo diad interon mundo.” Maliket ka kasin naamtaan ya agmo bukbukor?—

Basam ed Bibliam

1 Arari 19:3-18

Deuteronomio 5:1-22

Salmo 145:18

1 Pedro 5:9

[Paimano ed leksab]