MAATA te tangata i teia tuatau e maromaroa ana; te manako ra e kare e tangata e manako tikai maira ia ratou. E manako akapera ua ana te aronga pakarikari. Maata ra te au tamariki i teia tuatau, pera katoa te aronga e tavini ra i te Atua, e manako maromaroa ana e te mataku. Kite koe eaa te tumu?— *

Maata atu te au tumu. Mei te akaraanga o tetai tangata tei ora ana no tetai tuatau roa i topa—vaitata rai e tauatini ua atu mataiti mua ake ka anau ei a Iesu. Ko Elia tona ingoa. I ora ana aia te kore anga te iti tangata o Iseraela i tavini i te Atua mou ko Iehova. Maata tei akamata i te akamori i te au atua pikikaa o Baala. Kua tuatua a Elia e: “Ko au anake nei tei toe.” Te manako ra ainei koe e ko Elia anake ua te tavini ra ia Iehova?—

Noatu ra, kare a Elia i kite e te akamori ra rai tetai pae i roto ia Iseraela i te Atua mou. Inara kua pipini ratou no te mataku. Kite koe eaa te tumu?—

Kare a Ahaba te ariki o Iseraela e tavini ana ia Iehova; te akamori ra aia ia Baala, te atua pikikaa o tana vaine kino, ko Iezebella. No reira kua tauta raua ko Ahaba i te kimi i te aronga e tavini ra ia Iehova e te tamate atu ia ratou, ia Elia tikai. No reira a Elia i oro ei. Kua oro aia vaitata rai e 300 maire (483 kiro mita), e tae rava atu ki roto i te metepara i Horeba, e ngai tei kapiki katoaia e ko Sinai i roto i te Pipiria. Anere ua atu mataiti i mua ake i to Elia tuatau, kua oronga a Iehova ki te iti tangata i te Ture Ngauru e te katoa anga o tana Ture. Kua pipini a Elia ki roto i tetai ana i  Horeba koia anake ua. Toou manako e tau ainei a Elia kia mataku?—

Kua akaari mai te Pipiria i mua ana e kua taangaanga a Iehova ia Elia kia rave i te au temeio umere tikai. Kua pau mai a Iehova i te pure a Elia na te tuku mai anga i tetai ai mei te rangi kia takore atu i te atinga. Kua akapapu a Iehova na roto i te reira tu e Koia te Atua mou, kare ko Baala. I teianei, ia Elia i roto i te ana, kua tuatua mai a Iehova kiaia.

“Te akapeea ua na koe i ko na?” i ui mai ei a Iehova. Kua tuatua atu a Elia e: ‘Ko au anake ra tei toe i te aronga e akamori ra ia koe.’ E kua akatikatika maru atu a Iehova ia Elia, te na ko anga e e ‘itu tauasani tangata te tavini nei iaku.’ Kua akakite atu a Iehova kia Elia kia oki, te akamaramaanga e maata atu Tana angaanga ka rave.

Eaa toou manako ta tatou ka kite mai mei to Elia akaraanga?—E mataku katoa ana te aronga e tavini ana ia Iehova i tetai taime. No reira kia akamaara tatou katoatoa, te au mapu e te aronga pakarikari, kia uri kia Iehova no te tauturu. Te taputou maira te Pipiria e: “Te vaitata mairā Iehova i te aronga i kapiki atu iaia.”

E apiianga katoa tetai: E au taeake e te au tuaine to tatou i te au ngai ravarai e inangaro ra ia Iehova e ia tatou. Te karanga ra te Pipiria e: “Ko tei patoi atu ïa ma te akarongo turori kore, kua kite oki [tatou] e, tei to [tatou] au taeake katoa i te ao nei taua au mate ra.” Kare ainei koe e mataora ana i te kite e kare rava tatou e noo ua ko tatou anake ua?—