Ia Aʻoaʻo Lau Fanau

Po ua E Lagona le Fefe ma Peiseaʻī ua Tuua na o Oe?

E TOʻATELE tagata i aso nei, e lagona e pei ua leai se isi e alofa iā i latou. O lagona na e masani ona iai i tagata matutua. Ae e toʻatele foʻi tamaiti e faapena, e aofia ai ma auauna a le Atua. Faamata o le ā le māfuaaga?— *

E tele māfuaaga. Seʻi tatou vāai i se tagata na ola e tusa ma le afe tausaga a o leʻi fanau mai Iesu. O lona igoa o Elia. Na ola o ia i le taimi ua lē toe tapuaʻi ai Isaraelu iā Ieova le Atua moni. O le toʻatele o i latou ua tapuaʻi iā Paala le atua sesē. Na faapea mai Elia: “E na o aʻu lava ua totoe.” Ae faamata e moni ua na o Elia le auauna a Ieova o loo iai i lenā taimi?—

E lē o iloa e Elia, ae sa iai foʻi isi tagata Isaraelu o loo tapuaʻi pea i le Atua moni. Ae ua lalafi ona o le fefefe. Aiseā ua fefefe ai?—

O le tupu o Isaraelu e igoa iā Aapo, e lē tapuaʻi iā Ieova, ae tapuaʻi i le atua pepelo o Paala, le atua o lana avā amioleaga o Iesepela. Sa taumafai i laʻua e saʻilia uma tagata e auauna iā Ieova e fasiotia, aemaise lava Elia. O le māfuaaga lenā o le sola o Elia. E tusa ma le 300 maila (483 km) le mamao o le toafa i Horepa na sola i ai. E taʻu foʻi lea nofoaga o Sinai. I le faitau selau tausaga muamua atu, sa tuu atu ai e Ieova Tulafono e Sefulu i lona nuu i inā. O inā sa lafi ai Elia i se ana. Pe sa tatau ona fefe Elia?—

 O loo taʻua i le Tusi Paia e faapea, a o leʻi sola Elia, sa faaaogā o ia e Ieova e faia ni vavega tetele. Na tali mai Ieova i le tatalo a Elia, ia auina mai le afi mai i le lagi e faamū ai le taulaga, ma faamaonia ai, o Ieova le Atua moni, ae e lē o Paala. A o iai Elia i le ana, na talanoa atu Ieova iā te ia.

Na fesili Ieova iā Elia: “O le ā lau mea lenā e fai i inā?” Na tali atu Elia ʻE na o aʻu lava ua totoe o i latou e tapuaʻi iā te oe.’ Na faasaʻo ma le alofa e Ieova Elia i le faapea atu, ʻUa ou faatotoeina foʻi le toʻafitu afe o ē e auauna iā te aʻu.’ Na faatonu e Ieova Elia e toe foʻi, ona e tele isi galuega e manaʻomia ona faia mo Ia.

O le ā ua tatou aʻoaʻoina mai i le faaaʻoaʻoga a Elia?— O nisi taimi, e lagona ai foʻi e auauna a Ieova le fefe. O lea, e tatau iā i tatou uma o ē lāiti ma matutua, ona faalagolago atu iā Ieova e fesoasoani mai. Ua folafola mai e le Tusi Paia: “E latalata Ieova iā i latou uma e valaau atu iā te ia.”

E iai foʻi ma se isi lesona: E toʻatele o tatou uso ma tuafāfine e alolofa iā Ieova ma alolofa foʻi iā i tatou. Ua faapea mai le Tusi Paia: “O mea lava ia o loo faapuapuagatia ai foʻi lo outou ʻauuso atoa i le lalolagi.” Pe e te lē fiafia la i le iloa, e lē taitai ona tuua na o i tatou?​—

Faitau i lau Tusi Paia le

1 Tupu 19:3-18

Teuteronome 5:1-22

Salamo 145:18

1 Peteru 5:9

[Faaopoopoga i lalo]