Tese Ônov Ou

I Lu Nahan Huan We shi Mciem Gba U Iyol Vee?

MTSWENEM kôr ior kpishi nyian; mba henen ér kwagh gba or sha kwagh ve ga. Mbabeenyol mba hembe henen nahan cii. Mbayev kpishi nyian kpa ka huan ve shi ka cier ve iyol, kua mba ve civir Aôndo mbara je kpaa. U fa ityôkyaa kpa?— *

Atôôkyaa nga kpishi. De se nenge ikyav sha kwagh u orgen u lu uma, anyom kar er dubu môm nahan cii ve, i va mase maren Yesu la. I yilan un ér Eliya. Lu uma sha shighe u ior mba ken tar u Iserael de u civir Yehova, Aôndo u mimi la. Mbakpishiv hingir u civir Baal, aôndo u aiegh. Eliya kaa ér: “Mo, m mase shin tswen.” Kpa u hen wer mimi je lu Eliya tseegh lu or u civir Yehova u mase shin yee?—

Ior mbagenev ken Iserael lu civir Aôndo u mimi her, kpa Eliya kera fa nahan ga. Kpa ve lu yeren. Mciem yange gba ve iyol. U fa ityôkyaa kpa?—

Ahaba, tor u Iserael, yange civir Yehova ga; lu or u civir Baal, aôndo u aiegh u Yesebel, kwase na u wan ifer la civir yô. Nahan un vea Ahaba cii ve lu keren mba civir Yehova a ku, hemban cii je yô, Eliya. Ka ityôkyaa i yange na ve Eliya yevese je la. A zende zende zurum er ukilomita 483 nahan, zan zan a za kar ken deserti a yem ken Horebi, ijiir i í yer i ken Bibilo kpaa ér Senai la. Yehova yange vande nan ior nav Atindi a Pue, kua Atindi na agen hen ijiir ne, anyom uderi imôngo ken ijime cii man shighe u Eliya la ye. Eliya yer ken bar ugen  hen Horebi, lu her tswen. U nenge wer ityôkyaa yange i lu i mciem ma a gba Eliya iyolo?—

Bibilo tese ér Yehova yange vande eren uivande mba vesen sha ikyev i Eliya. Shighe ugen la Yehova ungwa msen u Eliya er ér a tindi usu sha, u sen u va nande nagh la. Yehova yange er kwagh ne sha u tesen ér ka Wen Un lu Aôndo u mimi ye, ka Baal ga. Shighe u Eliya va lu ken bar ne, Yehova lam a na.

Yehova pine un ér: “Kanyi u eren heene?” Ka zum u Eliya kende kaa ér, ‘ken mbacivir we cii ka mo tswen m mase shin ye’ je la. Yehova maa venda a na sha imo i kundu kundu kaa ér, ‘m shi a mbacivir mo her kuma dubu utaankaruhar je.’ Yehova kaa a Eliya ér a hide, shi a pase un ér Un ngu a tom kpishi u un soo ér a̱ er yô.

U hen wer kanyi se fatyô u henen ken ikyav i Eliya nee?— Inja na yô mba ve civir Yehova je kpa ashighe agen mciem ka ma gba ve iyol. Sha nahan yô, sea bee iyol shin sea lu iyev kpa, gba u se cica cii se umbur u keren iwasen hen Yehova. Bibilo kaa a vese ér: “TER ngu ikyua ikyua a mba ve yer Un cii.”

Kwagh ugen kpa ngu u se hen sha kwagh ne yô: Se mba a anmgbianev mba nomso man mbakasev sha ajiir wue wue mba se doo ve ishima yô. Bibilo kaa ér: “Anmgbianev [asev] sha won cii kpaa i ver ve ican shon i môm i môm i [se] lu yan i ne vough.” Saan we iyol u fan er se lu tswen ga kpa?—

ÔR KEN BIBILO YOU

1 Utor 19:3-18

Duteronomi 5:1-22

Pasalmi 145:18

1 Peteru 5:9

[Ngeren u shin kpe]