Ti Biblia cüme elcünutueyu ñi mongen

QUIÑE hueche punk chengelu, ¿chumngelu eluhui ñi piuqueyecheal ca duamtucheal? ¿Chumngelu quiñe México hueche elcünui tañi pod mongen? Quiñe ciclista Japón tuulu, ¿chumngelu elcünui tañi cüdau? Feula quimafuiñ.

“Mallma chengefun, duamtuchequelafun ca illcufengefun” (DENNIS O’BEIRNE)

TRIPANTU ÑI CHOYÜNGEEL: 1958

CHEU ÑI TUHUN: INGLATERRA

ÑI RUPAN: TAÑI PUNK CHENGEN MU AYÜQUELAFUI PU CHE

TAÑI CUIFI MONGEN: Tañi chau Irlanda mu tuhui. Feimu pichicalu, quimelelngen ti religion católica. Tañi pu che huercüquefeneu tañi quisu amual iglesia mu. Rüfcünu ayülafun, huelu ayüquefun Chau Dios ñi dungu. Fill pun ngillatuquefun ti padrenuestro, raquiduamquefun chem quimeltuafeneu tüfachi llellipun.

Hueche huentru nielu, ayüfun ñi quimafiel pu rastafari ca pu politico chaftuquefilu pu nazi. Huelu pu punk ñi pofolcachequen doi ayüquefiñ. Fill antü drogatuquefun, rume ayüquefun ti marihuana. Rume putuquefun, cuñihun mu tucuquefun tañi mongen ca duamtuchequelafun. Ayüquelafun pu che, eluucülelafun ñi entufotongeal ca rume pichi nütramcachequefun. Mallma chengefun, duamtuchequelafun ca illcufengefun. Tañi pu hueni mu müten cüme chengefun.

Eluhun tañi doi quimafiel ti Biblia 20 tripantu nielu. Niefun quiñe hueni fendequefulu droga, fei carcel mu mülelu eluhui ñi papeltuafiel Biblia. Quiñe antü müna cüme nütramcayu fillque religion meu ca ti Huecüfü ñi femqueel mapu mu. Feimu ngillan quiñe Biblia ca eluhun tañi chillcatuafiel. Tañi hueni iñchiu fentren cüyen mu quisuque papeltuquefuyu Biblia ca nütramcaquefuyu chem tayu quimürpuel.

Tüfa tayu quimürpuel: epe afcülei huesaque dungu mapu mu, pu cristiano mülei ñi amuldungual ca connoal politica dungu mu, tati Biblia hulquei cümeque ngülam. Quimniefuyu ñi rüfngen Biblia tañi feipin ca ñi mülen quiñe rüf religion, huelu ¿chuchi am? Ngüneduamfiyu tati fütraque religion conqueingün politica dungu meu ayüqueingün tañi afmatungeal ca inaniequelaingün Jesús tañi quimeltun. Quimfali tañi ayühuelquenofiel Chau Jehová. Feimu ngüneduamfiyu pichique religion.

Nütramcaquefiyu quiñeque che inaniequefilu feichi pichique religion. Fillque dungu ramtufiyu Biblia mu. Iñchiu quimniefuyu ti huiñoldungun, fei ngüneduamfiyu ñi huelulcaucülen engün. Ngillatuquefiñ ta Chau Dios “Rüf religion niele engün, quelluen tañi cüpa petuafiel”. Fentren cüyen rupai, huelu inei no rume huiñoldungulai taiñ ramtun Biblia mu ca iñche ayülafun tañi huiño petuafiel engün.

Quiñe antü quimfiyu pu Dunguquelu Ineingen Jehová. Biblia mu huiñoldungueyumu tayu ramtun. Tañi feipin engün trüri tayu quimürpuel mu, fei ramtufiyu quiñeque dungu tayu quimnofel. Quiñe tüfa, chem pilei Biblia droga mu ca pütremtun mu. Fei ca huiñoldungueyumu Biblia mu. Fei feipicünuyu tayu amual trahun mu.

Rume cüdautun ñi femal. Pu testigo cüme piuquengeingün ca cüme tucutuucüleingün. Huelu iñche ayüquelafun pu che, feimu ngünayeleneu tañi chalieteu engün, cangentufiñ engün. Feimu amuhuelan trahun mu. Huelu huiño ngillatufiñ ta Chau Ngünechen “Rüf religion niele, eluen tañi cüpa petuafiel engün”. Fei rume duamürpun chillcatual Biblia pu testigo engün.

TI BIBLIA CÜME ELCÜNUTUENEU ÑI MONGEN: Pürüm müten elcünun ti droga, huelu rume cüdautun tañi pütremtuhuenoal. Quimelelngen quiñeque che ütrüftuingün müten pu pütrem. Ngillatufiñ ta Jehová tañi ca femngechi femal, fei pütremtuhuelan. Ngüneduamün fente ñi falin-ngen ngillatuafiel ta Jehová com piuque mu.

Ca mülefui ñi caletuleal chumngechi ñi tucutuuquen. Hue amulu iñche trahun mu, duchilefui ca callfülefui ñi cal lonco quiñe alca reque. Tucutuuquefun blue jeans mu ca quiñe chaqueta de cuero fillque huirintucun nielu. Fentren rupa ngülamtungen tañi doi cüme tucutuhual, huelu iñche duamcülelafun. Fei raquiduamün ñi feipin 1 Juan 2:15-17, feipi: “Inei rume doi piuqueyefile ta tüfachi mapu meu mülechi dungu, fei piuqueyelafi ta Chau Ngünechen”. Fei quimtucun tañi femngechi tucutuucülen mu pengelmequefun tañi piuqueyefiel mapu müleyechi dungu. Fei ñi pengelal ñi rüf piuqueyefiel ta Chau Dios, cüme elcünutun com tañi mongen.

Cafei ngüneduamün Chau Ngünechen tañi feipieteu ñi amual trahun mu, chumngechi pengeli Hebreos 10:24, 25. Amual trahun meu ca quimafiel tañi pu peñi ca lamngen yafültucueneu tañi fautizahual.

CHEM CÜMELCAN LLOHUN: Jehová elueiñmu taiñ hueniyeafiel, tüfa pürapapiuqueleneu. Ngüneduamfiel Jehová tañi piuqueyechen ca cutranduamyechen, eluucülen tañi inayentuafiel ca quisu ca tañi Fotüm (1 Pedro 2:21). Eluuli tañi inayentuafiel ta Jesús, duamfalngelai tañi elcünual tañi chumngechi chengen. Yafüluuquen tañi poyechefengeal ca inayentuquefiñ ta Cristo tañi cüme yeucüleal tañi domo ca fotüm iñchiñ. Cafei duamtuquefiñ tañi pu peñi ca pu lamngen. Tañi inaniefiel mu ta Cristo, quisu piuqueyeuquen ca piuqueyechefengen.

“Yamün meu duamtungen” (GUADALUPE VILLARREAL)

TRIPANTU ÑI CHOYÜNGEEL: 1964

CHEU ÑI TUHUN: MÉXICO

ÑI RUPAN: POD MONGEN YENIEQUEFUI

TAÑI CUIFI MONGEN: Tañi pu peñi ca pu lamngen iñchiñ tremiyiñ México mapu mu. Taiñ lof Hermosillo, Sonora pingei, fei rume pofrelequei che. Petu pichicalu iñche, tañi chau lai, feimu tañi ñuque mülefui ñi cüdahual. Pichin tripantu niefun, conün ñi cüdahual ñi quelluntucuafiel tañi ñuque. Amuquefun ñi cüdahual, triltrangcülei tañi namun, nielafuiñ ta plata. Pichicalu am ti ruca, huelu rentrüucülequefuiñ.

Tañi ñuque am com antü cüdauquelu, pepi cuñiutucuquelaeiñmeu. Feimu nielu iñche cayu tripantu müten, quiñe hueche mari quechu tripantu nielu nüntueneu. Tunten tripantu chi rupan feitichi dungu mu. Femngechi ñi rupan mu, ayürpufiñ pu huentru. Pemefiñ doctor ca sacerdote tañi quelluaeteu, “Cümelcaleimi, dungu no tati” pieneu engün.

Mari meli tripantu nielu iñche, eluhun tañi homosexual ngeal. Mari quiñe tripantu femngechi yeniefun tañi mongen. Fentren ayün huentru niefun. Adümfun ñi peluquero ngeal, feimu nülanentun quiñe peluqueria. Huelu cutrancaumequen, nielan ayühun. Quimniefun tañi huesalcamequen, fei ramtuhun “¿Mülepei mai cümeque che mapu mu?”.

Fei raquiduamtucun tañi lamngen ñi testigongen. Quisu nütramcaeneu com tañi quimün Biblia mu, huelu iñche duamlafiñ. Huelu afmatuquefiñ chumngechi ñi yenieel tañi mongen ca tañi curehuen, quisu engu rume piuqueyeniehuingu ca yamniehuingu. Rupachi antü mu eluhun ñi chillcatual ti Biblia, huelu re quimal müten pifun. Rupai chi antü, fei caletui ñi raquiduam.

TI BIBLIA CÜME ELCÜNUTUENEU ÑI MONGEN: Amun quiñe Trahunhue Ruca mu, fei afmatufiñ tati pu che. Caquelu pu che ayentunieneu, huelu pu testigo cüme llohueneu, yamün meu duamtungen. Cüme chalingen, fei rume ayühui tañi piuque.

Amulu iñche quiñe fütra trahun mu, pütrün che mülefui rume, quimtucun ñi cüme chengen engün tañi lamngen reque. Fei raquiduamün ¿quintuyauquefun tüfachi pu che com tañi mongen meu? Afmatufiñ chumngechi tañi piuqueyehun engün ca fillque ramtun huiñoldungufingün Biblia mu. Quimtucun chumngechi Biblia mu cüme elcünutuingün tañi mongen. Duamfalngefui ñi caletual tañi mongen ñi müleal quisu engün mu.

Iñche domo reque mülefun, feimu mülefui ñi com cüme elcünutual tañi mongen. Fei duamfalngefui ñi elcünual chumngechi tañi dunguquen, chumngechi tañi trecaquen, tañi tacuhun, chumngechi ñi cupiluuquen, tañi pu compañ, com. “Cümelcaleimi, cüme feleimi, nieimi itrofillem”, piqueneu tañi pu hueni, “¿chumngelu chillcatuaimi ti Biblia?”. Cüdautun ñi elcünual com feitichi pod dungu.

Puhui tañi piuque mu ñi feipilen 1 Corintios 6:9-11, quellueneu ñi quimtucual ñi cüme elcünutuafel tañi mongen. Feipilei: “¿Quimlaimün am eimün tati huesaque mongen nielu coneltulayai ta Ngünechen ñi mülehue meu? Eluuquilmün tamün ngünencangeal. Fei Ngünechen tañi lonco ülmenngeelchi mülehue meu coneltulayai tati pu domo ca ti pu huentru re üñamyemequeule ca ti püramyequelu adentun pichique ngünechen ca ñihuaquelu no rume, cudumuuquelu chaf huentru engu no rume [...]. Fei femngechi chengequefuimün quiñequentu eimün ta cuifi meu, huelu feula deu liftungetuimün”. Chau Jehová quellufi tati pu che cuifi mu ñi cüme adcünual tañi mongen , ca femngechi quellueneu ta iñche. Pütrün tripantu rupai ñi cüme elcünual tañi mongen, huelu pu peñi ca pu lamngen rume quellueneu engün.

CHEM CÜMELCAN LLOHUN: Feula curengen, fei tañi domo iñchiu quimeltumequefiyu tañi fotüm ñi inayal tañi mongen mu Biblia ñi feipilen. Tüfa hula camapulei tañi cuifi mongen. Rume ayühuelqueneu cüdahuelafiel ta Chau Jehová. Loncolen trahunche mu ca quelluniefiñ fillque che ñi quimürpufiel ti Biblia. Peeteu tañi ñuque iñche ñi femün, eluhui ñi chillcatual ta Biblia, fei fautizahui. Ca tüfa hula quiñe lamngen yeniefulu huesaque mongen, testigongerpui.

Tati pu che ayünofulu tañi cüme elcünutual ñi mongen, feula hula quimtucuingün tañi cüme felen. Cuifi mu quintufun quellu, huelu re huesaque ngülam elungen. Jehová queta quellueneu. Fente tañi duamtueneu ca piuqueyeneu, iñche eluhun tañi cüme elcünutual tañi mongen.

“Ayüucülelafun, quisulelu troquiuquefun” (KAZUHIRO KUNIMOCHI)

TRIPANTU ÑI CHOYÜNGEEL: 1951

CHEU ÑI TUHUN: JAPÓN

ÑI RUPAN: RUME AYÜQUEFUI HUEHUAL CICLETATUN MU

TAÑI CUIFI MONGEN: Shizuoka mapu mu tremün, Japón mu mülelu. Pura chengefuiñ, quiñe pichi ruca mu mülefuiñ. Tañi chau fendequefui bicicleta. Pichicalu müten iñche, yequefeneu pu ciclista ñi carrera mu, feimu rume ayürpufiñ ti cicletatun. Nielu iñche mari meli tripantu, tañi chau pepicaeneu ñi ciclistangeal. Mülelu iñche liceo mu, huehun cüla fütraque carrera. Quiñe universidad mangeleneu ñi chillcatual üye mu, huelu iñche ayüfun ñi amual cheu ñi pepicangequen pu ciclista. Nielu iñche mari aylla tripantu ciclista profesional ngerpun.

Rume yafüluhun tati doi cüme ciclistangeal. Ayüfun ñi huehual fentren plata, fei ñi eluafiel tañi pu che com ñi duamnieel. Cansalefulu iñche quiñe carrera mu cam fente tañi pepicangen, feipiuquefun “Tati doi cüme ciclistangen, afeluulayan”. Cüme tripai fente tañi yafüluhun. Tañi hunen tripantu hueufiñ com tati pu hue ciclistalelu. Inalechi tripantu mu mangelngen quiñe falin carrera mu, tüfa mu conquefui pu doi cümeque ciclista com Japón mapu mu. Cayu rupa epe hueufiñ ti carrera.

Rume nehuen-ngefun ca fentren carrera huehun. Feimu tati nehuen chang Tokai mapu mu cüpalu feipieneu pu che. Rume ayüquefun ñi huehual ca cutranpiuqueyechequelafun, feimu pu caquelu ciclista llicaquefeneu. Fentren plata huehun, feimu chem rume ngillaquefun. Ngillan quiñe fütra ruca, niei quiñe gimnasio itrofill chemcün nielu, ca ngillan rume falichi auto. Cafei ngillan quiñeque ruca ca tucun plata fillque empresa mu.

Huelu ayüucülelafun, quisulelu troquiuquefun. Deu curengefun ca cüla fotüm nien. Illcufemquefun tañi pu che meu, feimu hune ngüneduamüñmaquefeneu engün tañi ange ñi quimal tañi chumlen.

Quiñe antü tañi domo eluhui ñi chillcatual Biblia pu Dunguquelu Ineingen Jehová engün. Cüpa amun trahun mu pieneu, fei com amuaiñ pifiñ iñche. Quiñe loncolelu pepaeneu tañi ruca mu tayu chillcatual Biblia. Chem tañi quimürpuel puhui tañi piuque mu.

TI BIBLIA CÜME ELCÜNUTUENEU ÑI MONGEN: Afmatulehuen papeltufiel Efesios 5:5, feipilei: “Inei rume ta huedhuedcaule ta domo meu cam ti femquelu chem huesaque dungu rume cam ti diñmangelu (fei tüfachi dungu ta adentun ngünechen reque mülei), fei tüfa engün ta pepi coneltulayai ta Cristo ca Ngünechen ñi lonco ülmen mülehue meu”. Ti pu cicletatuquelu ñi carrera nüucülei apuesta mu ca ngüchaltucuquefi pu che tañi diñmatufengeal. Fei huesa duamelqueneu ñi conün carrera mu. Feimu mülefui ñi conhuenoal carrera mu, femngechi ñi ayühuelafiel ta Jehová. Rume cüdautufun ñi femal.

Müna cüme amulefui tañi cicletatun, feimu rume ayüniefun tañi huiño conal carrera mu. Huelu chillcatual ta Biblia cüme duameleneu, femngechi femquelaeneu ti carrera. Eluulu hula ñi chillcatual ta Biblia, cüla carrera mu müten conün, huelu tañi piuque mu petu ayüquefun ti carrera. Fill raquiduamcülefun, conhuenoli carrera mu, ¿chumngechi eluafun ñi duamnieel tañi pu che? Cafei tañi pu pariente ayüquelafi iñche tañi hue religion, tañi chau rume lladcünagi. Com tañi rupan cutraneleneu.

¿Chem quellueneu? Fentecünulan tañi chillcatufiel Biblia ca amuquen trahun mu. Ñochiquechi doi maneluhun Chau Jehová mu, allcütuñmaen tañi ngillatun pifiñ ta Jehová, pengelelen tami allcütuquen pifiñ. Cafei tañi domo feipieneu “Duamlan quiñe fütra ruca tañi ayüucüleal”. Tüfa tüngduameleneu. Ñochiquechi cüme hueniyerpufiñ ta Jehová.

CHEM CÜMELCAN LLOHUN: Rüfngei Jesús ñi feipin Mateo 6:33 mu, feipi: “Doyümnieafimün Ngünechen tañi lonco ülmenngen ca tañi nor dungu ñi nien, fei com tamün duamtunieel ca femngechi llohuaimün”. Rüfcünui llemai nieiñ com taiñ duamnieel. Feula fentren plata hueuquelan, huelu deu yenien 20 tripantu tañi conün Jehová tañi troquiñche mu, turpu fillalafuiñ.

Rume ayühuelqueneu cüdahuelafiel ta Chau Ngünechen quiñentrür tañi pu peñi ca pu lamngen iñchiñ. Feula doi cüme yeucüleiñ tañi pu che iñchiñ. Tañi cüla fotüm curengei, com engün serfiniefingün ta Jehová.