Binago kan Biblia an Saindang Buhay

Ano an nakaimpluwensia sa sarong bakong makiamigo na punk rocker na makanood na mamotan an mga tawo asin maghingoang tumabang sa iba? Ano an nakamotibar sa sarong lalaking taga Mejico na talikdan an imoral na pamumuhay? Taano an saro sa pinakamatitibay na siklista sa Hapon ta binayaan an pakikipagkarera sa paghihingoang maglingkod sa Dios? Estudyare an sasabihon ninda.

“Ako Daing Modo, Arogante, Asin Agresibo Kaidto.”—DENNIS O’BEIRNE

TAON NIN PAGKAMUNDAG: 1958

GINIKANAN NA NASYON: INGLATERA

DATING BAKONG MAKIAMIGO NA PUNK ROCKER

AN BUHAY KO KAIDTO: Taga Ireland an pamilya kan ama ko, asin nagdakula akong Irish na Katoliko. Minsan siring, sa parate kaipuhan kong magsimba nin solo, dawa ngani habo kong gibohon iyan. Pero, gutom ako sa espirituwal na mga bagay. Regular akong namimibi kan Pamibi kan Kagurangnan, asin nagigirumdoman ko pa an pag-isip-isip sa kahulogan kaiyan mantang nakahigda sa kama kun banggi. Binabarangabanga ko iyan sa haralipot na kabtang asin pinagmamaigotan kong saboton an kahulogan kan kada saro kaiyan.

Kan ako nasa kabangaan na nin pagkatin-edyer, nakiayon ako sa mobimientong Rastafarian. Nagin interesado man ako sa politikal na mga mobimiento arog kan Anti-Nazi League. Alagad, ako nagin grabe karebelde huli sa mobimientong punk rock. Nagdroga ako, lalo na an marijuana, na haros aroaldaw kong pigsisigarilyo. Huli sa pagkaigwa nin kaisipan na “mayo akong pakiaram,” makosog akong uminom nin arak, isinapeligro an mismong buhay ko, asin mayong gayong pakiaram sa iba. Bako akong makiamigo, asin dai nanggad nakikipag-olay sa siisay man apuera sana kun iniisip ko na magigin makahulogan an pag-oolay. Habo ko nganing magparetrato. Kun ginigirumdom ko an nakaagi, narerealisar ko na ako daing modo, arogante, asin agresibo kaidto. Ako maboot asin matinao sana kun an saro dayupot sa sako.

Kan ako mga 20 anyos na, nagin interesado ako sa Biblia. An sarong amigo na dating nagpapabakal nin droga nagdesisyon na magbasa kan Biblia mantang nakapreso, asin nagin halawig an pag-oolay mi dapit sa relihion, Simbahan, asin papel ni Satanas sa kinaban. Nagbakal ako nin Biblia asin pinonan kong pag-adalan iyan nin solo. Binabasa ming mag-amigo an mga kabtang kan Biblia, pinag-oolayan an nanodan mi, dangan naggigibo nin mga kongklusyon. Nagpadagos ini nin dakol na bulan.

Ini an nagkapira sa nagin mga kongklusyon mi base sa nabasa niamo: na kita nabubuhay na sa huring mga aldaw kan kinaban na ini; na an mga Kristiano dapat na maghulit kan maogmang bareta kan Kahadean nin Dios; na sinda dai dapat magin kabtang kan kinaban na ini, pati kan politika kaiyan; asin na an Biblia nagtatao nin marahay na paggiya dapit sa moral. Malinaw ming nasabotan na totoo an Biblia asin na siertong igwa nin tunay na relihion. Alagad arin? Inisip-isip mi an dapit sa mayor na mga relihion na magarbo asin may seremonya saka nakikilabot sa politika, patin nasabotan mi na si Jesus bakong arog kaiyan. Aram mi na sinda dai ginagamit nin Dios, kaya nagdesisyon kaming siyasaton an nagkapira sa bakong gayong midbid na  mga relihion tanganing maheling kun ano an ikakatao ninda.

Nakikipag-olay kami sa mga miembro nin siring na mga relihion asin nagpapalataw nin sunod-sunod na hapot sa sainda. Aram mi an sinasabi kan Biblia dapit sa kada hapot, kaya madali ming naaaraman kun baga kaoyon kan Tataramon nin Dios an simbag ninda. Pagkatapos kaiyan, pirme akong namimibi sa Dios, ‘Kun an mga tawong idto an nagrerepresentar sa tunay na relihion, logod pahiroa man tabi akong makipag-olay giraray sa sainda.’ Alagad pakalihis nin dakol na bulan nin pakikipag-olay, dai pa man giraray ako nakakanompong nin grupo na nasimbag base sa Biblia an samong mga hapot; ni nagmawot akong makipag-olay liwat sa siisay man sa sainda.

Sa katapustapusi, nakaolay ming mag-amigo an mga Saksi ni Jehova. An iyo man sanang mga hapot an ihinapot mi arog kan pirme ming ginigibo, alagad nagsimbag sinda base sa Biblia. An sinabi ninda kaoyon nanggad kan nanodan na niamo. Kaya nagpalataw kami nin mga hapot na dai mi pa nakukua sa Biblia an simbag—halimbawa, an dapit sa pagmansay nin Dios sa paninigarilyo asin pagdodroga. Sa giraray, nakasimbag sinda gamit an Tataramon nin Dios. Nag-oyon kaming mag-atender sa sarong pagtiripon sa Kingdom Hall.

Para sa sako, masakit an pag-atender sa pagtiripon. Bako nanggad akong makiamigo, kaya dai ko gusto na dinodolok ako kan gabos na yaon duman, na makiamigo asin marahay magbado. Nag-isip ako na may salang motibo an nagkapira sa sainda, kaya habo ko nang mag-atender sa ano man na mga pagtiripon. Alagad arog kan pirme kong ginigibo, namibi ako sa Dios na logod tawan ako nin pagmawot na makaolay giraray an mga tawong idto kun sinda an nagrerepresentar sa tunay na relihion, dangan nakamate ako nin makosogon na pagmawot na makipag-adal sa Biblia sa mga Saksi.

KUN PAANO BINAGO KAN BIBLIA AN SAKONG BUHAY: Aram ko na kaipuhan kong magpondo sa pagdodroga, asin nagibo ko tolos iyan. An talagang masakit pondohon iyo an sigarilyo. Nagkapirang beses akong nagprobar na magpondo sa paninigarilyo alagad dai nagin mapanggana. Kun nababaretaan ko na an iba itinapok sana an sigarilyo ninda asin nungka nang nanigarilyo giraray, ipinakikipag-olay ko iyan ki Jehova. Pagkatapos, sa tabang ni Jehova, nakaya kong pondohon an paninigarilyo. Nanodan ko an halaga nin pagigin onesto asin prangka sa pamimibi ki Jehova.

An saro pang dakulang pagbabago na ginibo ko iyo an may koneksion sa sakong pagbado asin pagpakarhay sa sadiri. Kan enot akong makipagtipon sa Kingdom Hall, an buhok ko garo mga tunok na kolor asul arog sa peacock. Pagkatapos, tinina ko iyan nin nakakasulang kolor orange. Nagsusulot ako nin maong na pantalon asin diaket na gibo sa anit na may naka-stencil na mga slogan. Mayo akong naheling na dahelan tanganing magbago, dawa ngani maboot na nakikipangatanosan sa sako an mga Saksi. Pero, sa katapustapusi, pinag-isipan ko an 1 Juan 2:15-17: “Dai kamo mamoot sa kinaban o sa mga bagay na nasa kinaban. Kun an siisay man namomoot sa kinaban, an pagkamoot kan Ama mayo sa saiya.” An nagin kongklusyon ko iyo na paagi sa sakong itsura, nagpapaheling ako nin pagkamoot sa kinaban na ini, kaya tanganing ikapaheling ko an pagkamoot sa Dios, dapat akong magbago. Ini an ginibo ko.

Pag-abot nin panahon, narealisar ko na bako sanang mga Saksi an gusto na ako umatender sa Kristianong mga pagtiripon. Ipinaheling sa sako kan Hebreo 10:24, 25 na iyan sarong bagay na gusto nin Dios na gibohon ko. Pagkatapos na ponan kong mag-atender sa gabos na pagtiripon asin talagang mamidbid an mga yaon duman, nagdesisyon akong simbolisaran an sakong pagdusay ki Jehova paagi sa pagpabautismo.

KUN PAANO AKO NAKINABANG: Napahiro nanggad an boot ko sa kun paano kita tinotogotan ni Jehova na magkaigwa nin dayupot na relasyon sa saiya. Huli sa saiyang pagmalasakit asin pagmakolog, napahiro akong arogon sia asin sunodon an saiyang Aki, si Jesu-Cristo, bilang sakong modelo sa buhay. (1 Pedro 2:21) Nanodan ko na mientras na pinagmamaigotan kong magkaigwa nin Kristianong personalidad, may sadiri pa man giraray akong midbidan. Hiningoa kong pataluboon an pagigin mamomoton asin mapagmakolog. Pinagmamaigotan kong magin arog-Cristo sa pagtratar sa sakong agom asin aking lalaki. Asin nagmamakolog akong marhay sa sakong mga kapagtubod. Huli sa pagsunod ki Cristo, nagkaigwa ako nin dignidad, paggalang sa sadiri, asin abilidad na ipaheling sa iba an pagkamoot.

 “Trinatar Ninda Ako na May Dignidad.”—GUADALUPE VILLARREAL

TAON NIN PAGKAMUNDAG: 1964

GINIKANAN NA NASYON: MEJICO

DATING IMORAL AN PAMUMUHAY

AN BUHAY KO KAIDTO: Saro ako sa pitong aki, na pinadakula sa Hermosillo, sa Sonora, Mejico, sarong lugar na grabe nanggad an kadukhaan. Nagadan an ama ko kan ako sadit pa, kaya kaipuhan kan ina ko na magtrabaho tanganing masustentohan kami. Parate akong nakabitis huli ta mayo kaming pambakal nin sapatos. Mantang hoben pa, nagpoon akong magtrabaho tanganing makatabang sa gastos kan pamilya. Arog nin dakol na pamilya, surusoan kami sa harong.

Sa haros bilog na aldaw, mayo an ina ko na maprotehir sa samo na mga aki. Kan ako 6 anyos na, nabiktima ako nin sarong 15 anyos na solterito na pinonan akong abusohon sa seksuwal na paagi. Nagpadagos ini sa halawig na panahon. An sarong resulta iyo na ako naribaraw na gayo dapit sa sekso. Paghona ko normal sana an magkagusto sa mga lalaki. Kan humagad ako nin tabang sa mga doktor o padi, sinierto ninda sa sako na mayo man akong problema asin na normal sana an pagmate ko.

Kan ako 14 anyos na, nagdesisyon akong humiro asin magbado siring sa homoseksuwal. Arog ako kaiyan sa laog kan suminunod na 11 taon, na nakikirelasyon pa ngani sa nagkapirang lalaki durante kaiyan. Pag-abot nin panahon, nagkua ako nin kurso tanganing magin hair stylist asin nagkaigwa nin sadiring beauty shop. Minsan siring, mamondo ako. Parate akong nasasakitan asin nakakamate na tinatraydoran. Namatean ko na sala an ginigibo ko. Pinonan kong hapoton an sadiri ko, ‘Igwa pa daw nin marahay asin mapapahalagahan na mga tawo?’

Naisip ko an tugang kong babae. Nagpoon siang makipag-adal sa Biblia sa mga Saksi ni Jehova asin nagpabautismo pag-abot nin panahon. Sinasabi nia sa sako an nanonodan nia, alagad dai ako nagtataong atension. Pero, hinahangaan ko sia huli sa saiyang pamumuhay asin pagigin may agom. Naheheling ko na sindang mag-agom talagang nagkakaminootan asin may paggalang sa lambang saro. Maboot an pagtratar ninda sa lambang saro. Pag-abot nin panahon, saro sa Mga Saksi ni Jehova an nagpoon na adalan ako sa Biblia. Kan primero, nagpapaonra sana ako—na mayong entusiasmo. Dangan nagbago an mga bagay-bagay.

KUN PAANO BINAGO KAN BIBLIA AN BUHAY KO: Inimbitaran ako kan mga Saksi na umatender sa saro sa mga pagtiripon ninda, kaya nagduman ako. Para sa sako, bagong eksperyensia idto. An kadaklan pinagngingisihan ako, alagad an mga Saksi dai. Maboot ninda akong tinino, asin trinatar ninda ako na may dignidad. Napahiro an boot ko.

Ruminarom an marahay na impresyon ko sa mga Saksi kan mag-atender ako nin asamblea. Naheling ko na pati sa darakulang grupo, sinda kapareho kan tugang kong babae—tunay asin sinsero. Hinapot ko an sadiri ko kun baga ini na an grupo nin marahay asin mapapahalagahan na mga tawo na haloy ko nang hinahanap. Napangalas ako sa pagkamoot asin pagkasararo ninda, siring man sa paggamit ninda kan Biblia sa pagsimbag sa gabos na hapot. Narealisar ko na an Biblia an marahay na impluwensia sa buhay ninda. Asin naheling ko man na kaipuhan kong gumibo nin dakol na pagbabago tanganing magin saro sa sainda.

Sa katunayan, kaipuhan kong biyong magbago, huling ako namumuhay siring sa babae. Kaipuhan na bagohon ko gabos an sakong pagtaram, pinagkatodan na hiro-hiro, pagbado, estilo nin buhok, asin pagpili nin mga amigo o amiga. Pinonan akong tuyaon kan dati kong mga amigo, na nagsasabi: “Taano man ta ginigibo mo ini? Dati ka man bagang marahay. Dai ka mag-adal nin Biblia. Yaon na saimo gabos.” Pero, an pinakamasakit bagohon iyo an imoral na pamumuhay ko.

 Pero, aram ko na posible an dakulang mga pagbabago, huli ta nakaabot sa puso ko an mga tataramon kan Biblia sa 1 Corinto 6:9-11: “Ano! Dai kamo nakakaaram na an mga bakong matanos dai magmamana kan kahadean nin Dios? Dai kamo magpalagalag. Bakong mga parapakisaro, ni mga parasamba sa idolo, ni mga parasambay, ni mga lalaki na ginagamit sa bakong natural na seksuwal na mga gibo, ni mga lalaki na minadorog sa kapwa lalaki . . . an magmamana kan kahadean nin Dios. Alagad ta arog kaiyan kaidto an nagkapira sa saindo. Alagad kamo lininigan na.” Tinabangan ni Jehova an mga tawo kaidtong panahon na gumibo nin mga pagbabago, asin ako tinabangan man nia. Nagkaipo iyan nin nagkapirang taon asin darudakulang paghihingoa, alagad nakatabang na marhay sa sako an paggiya asin pagkamoot kan mga Saksi.

KUN PAANO AKO NAKINABANG: Ngonyan, normal na an buhay ko. May agom na ako, asin tinotokdoan ming mag-agom an samong aking lalaki na mamuhay sono sa mga prinsipyo sa Biblia. Haloy ko nang tinalikdan an dati kong pamumuhay, kaya nagkaigwa ako nin dakol na pribilehio asin espirituwal na kapakinabangan. Naglilingkod ako bilang magurang sa kongregasyon, asin natabangan ko an iba na manodan an katotoohan kan Tataramon nin Dios. Ikinaogmang marhay kan ina ko an mga pagbabagong ginibo ko sa sakong buhay, kaya nag-ako sia nin pag-adal sa Biblia asin nagin bautisadong Kristiano poon kaidto. An saro kong tugang na babae na dating imoral an pamumuhay nagin saro man sa Mga Saksi ni Jehova.

Pati an nagkapira sa mga tawong bisto ako huli sa dati kong pamumuhay nag-aadmitir na ako nagbago na para sa ikakarahay. Asin aram ko an dahelan kan mga pagbabagong idto. Kan nakaagi, nagpatabang ako sa mga propesyonal, alagad maraot na sadol sana an itinao sa sako. Minsan siring, talagang tinabangan ako ni Jehova. Dawa ngani sa pagmate ko mayo akong kuenta, ako narisa nia asin trinatar na may pagkamoot asin pasensia. Dakulang bagay nanggad para sa sako an marisa nin siring karahay, kaintelihente, asin kamamomoton na Dios na gusto akong magkaigwa nin mas marahay na buhay.

“Ako Bakong Kontento, Mamondo, Asin Mayong Halaga.”—KAZUHIRO KUNIMOCHI

TAON NIN PAGKAMUNDAG: 1951

GINIKANAN NA NASYON: HAPON

DATING NAKIKIKOMPETISYON NA SIKLISTA

AN BUHAY KO KAIDTO: Nagdakula ako sa sarong toninong na banwaan na may duongan sa Shizuoka Prefecture, Hapon, na duman nakaistar sa sarong sadit na harong an samong pamilya na may walong miembro. An ama ko may sadiring tindahan asin pahirahayan nin bisikleta. Poon kan ako sadit pa, pig-iiba nia ako sa mga karera nin mga siklista asin hiningoa niang magin apisyon ko an isport na iyan. Dangan, pinonan kan ama kong magplano para sa sako tanganing ako magin propesyonal na siklista. Kan ako nasa middle school pa, pinonan nia akong sanayon nin torotoohan. Sa high school, nanggana ako nin tolong sunod-sunod na title sa taonan na nasyonal na atletikong kompetisyon. Inalok akong mag-adal sa sarong unibersidad, alagad nagdesisyon akong mag-adal sa racing school mismo. Sa edad na 19, nagin akong propesyonal na siklista.

Kan panahon na idto, nagin pasohan ko sa buhay an magin pinakamatibay na siklista sa Hapon. Plinano kong magganar nin dakol na kuarta tanganing matawan ko an samong pamilya  nin buhay na may seguridad asin pagkakontento. Naghingoa akong marhay sa sakong pagsasanay. Kun pinangluluyahan ako nin boot huli sa masakit na pagsasanay o depisil na parte nin karera, paorootro kong sinasabi sa sadiri ko na ako namundag tanganing magin siklista, kaya kaipuhan ko nanggad na magpadagos minsan paano! Asin iyo nanggad. Nakinabang ako sa sakong pagpapagal. Kan enot na taon, nanggana ako nin rookie title. Kan ikaduwang taon, nakualipikar ako na magbale sa karera na iyo an madeterminar kan numero unong siklista sa Hapon. Sa anom na magkakalaen na panahon, nag-ikaduwa ako sa karerang iyan.

Mantang saro ako sa pinakamatitibay na siklista na pirmeng napepremyohan, namidbid ako bilang an makokosog na tabay kan Tokai, sarong lugar sa Hapon. Mahilig akong makipagkompetisyon. Pag-abot nin panahon, kinatakotan ako huli sa pagigin agresibo mantang nakikipagkarera. Naglangkaw an ginaganar ko, asin nadiskobre ko na kaya kong bakalon ano man an magustohan ko. Nagbakal ako nin harong na may kuarto para sa pag-ehersisyo, na kompleto sa pinaka de kalidad na mga aparato. Nagbakal ako nin imported car na an kantidad haros kapareho nin sarong harong. Para sa seguridad, pinonan kong mangapital sa pagbenta nin daga asin edipisyo saka sa stock market.

Pero, ako bakong kontento, mamondo, asin mayong halaga. Kan panahon na iyan, ako may agom na asin mga aki, alagad parate akong nawawaran nin pasensia sa sakong pamilya. Naaanggot ako sa sakong agom asin mga aki dawa sa saradit na bagay. Tanganing masierto ninda kun baga mainit na naman an timplada kan payo ko, may pagkatakot nindang inoobserbaran nguna an ekspresyon kan lalawgon ko.

Pero, pag-abot nin panahon, pinonan kan agom ko na mag-adal sa Biblia sa mga Saksi ni Jehova. Nagresulta iyan sa dakol na pagbabago. Nagsabi sia na gusto niang umatender sa mga pagtiripon kan mga Saksi, kaya nagdesisyon akong magduman kami bilang pamilya. Nagigirumdoman ko pa kan bangging magduman sa samong harong an sarong magurang sa kongregasyon asin ponan akong adalan sa Biblia. Nagin hararom an epekto sa sako kan nanodan ko.

KUN PAANO BINAGO KAN BIBLIA AN BUHAY KO: Nungka kong malilingawan an nagin epekto sa sako kan mabasa ko an Efeso 5:5. Iyan nagsasabi: “Mayo nin parapakisaro o marigsok na tawo o mahanab na tawo—na nangangahulogan nin pagigin parasamba sa idolo—na may mamanahon sa kahadean kan Cristo asin nin Dios.” Nasabotan ko na an pakikipagkarera konektado sa pagsugal asin na an isport na iyan nagsusuportar sa kahanaban. Nakonsensia ako. Namatean ko na kun boot kong paogmahon si Jehova Dios, kaipuhan kong pumondo sa pakikipagkarera. Alagad, para sa sako masakit na desisyon iyan.

Katatapos ko pa sana kan sakong pinakanakakakontentong taon sa pakikipagkarera kasuarin man, asin nagmamawot ako nin orog pa. Pero naeksperyensiahan ko na huli sa pag-adal kan Biblia, nagin matoninong asin kalmado an sakong isip—laen nanggad sa kaisipan na kaipuhan ko tanganing manggana sa mga karera! Tolong beses na sana akong nakipagkarera poon kan ako mag-adal, alagad sa puso ko dai ko pa lubos na binayaan an pakikipagkarera. Dai ko man aram kun paano susustentohan an pamilya ko. Garo ako naguot, na dai makaabante o makaatras, asin pinapasakitan nanggad ako kan mga paryente ko huli sa sakong bagong pagtubod. Grabe an pagkadesganar kan ama ko. Huling dai ko aram an gigibohon, orog pa akong natension kaya nagkaulser ako.

An padagos kong pag-adal sa Biblia asin pag-atender sa mga pagtiripon kan Mga Saksi ni Jehova an nakatabang sa sako na makayanan an masakit na panahon na idto. Luway-luway na mas kuminosog an pagtubod ko. Nakiolay ako ki Jehova na dangogon an mga pamibi ko asin tabangan akong maheling na dinadangog nia iyan. Orog pang nainaan an tension ko kan siertohon sa sako kan agom ko na dai nia kaipuhan mag-istar sa dakulang harong tanganing magin maogma. Luway-luway akong nag-oswag.

KUN PAANO AKO NAKINABANG: Nanodan ko na talagang totoo an sinabi ni Jesus sa Mateo 6:33. Sabi nia: “Kun siring, padagos na hanapon nguna an kahadean asin an saiyang katanosan, asin ini gabos na ibang bagay idadagdag na sana sa saindo.” Nungka kaming nagkulang kan “ibang bagay” na sinambit ni Jesus, an pangenot na mga pangangaipo sa buhay. Minsan ngani an ginaganar ko mga ika-30 parte sana kan ginaganar ko kaidto bilang siklista, dai kami nagkulang kan sakong pamilya kaining nakaaging 20 taon.

Orog pa ngani dian, kun ako naghuhulit o nagsasamba kaiba kan mga kapagtubod ko, ako nakakamate nin kagayagayahan asin pagkakontento na nungka kong naeksperyensiahan kaidto. Marikas nanggad na minaagi an mga aldaw. Dakula man an pag-oswag kan buhay kan pamilya ko. An tolo kong aking lalaki asin an saindang agom gabos nagin maimbod na lingkod ni Jehova.