E Veisautaka na Bula na iVolatabu

A VEISAU vakacava me dauloloma qai dauveivuke e dua e sega ni dau veimaliwai, e taleitaka na ivakatagi na punk? Na cava a uqeta e dua na turaga mai Mexico me biuta na ivakarau ni bula dukadukali? Na cava a biuta kina na veitau basikeli e dua mai Japani ni saga me qarava na Kalou? Wilika mada na ka eratou tukuna.

“Au sega ni veidokai, au dokadoka, qai voravora.”—DENNIS O’BEIRNE

SUCU: 1958

VANUA: IGILADI

KA E KILAI KINA: SEGA NI DAUVEIMALIWAI, TALEITAKA NA IVAKATAGI NA PUNK

NOQU BULA E LIU: Keitou kai Ailadi ni cavutu mai kina o tamaqu, au susu tale ga ena lotu Katolika. Au lai lotu taudua ena levu na gauna au qai sega ni taleitaka. Ia au se vinakata tiko ga meu kila na veika vakayalo. Au cavuta wasoma na Masu ni Turaga au qai dau vakasamataka na kena ibalebale ena bogi niu sa davo toka ena loga. Au vida na qaqanimasu qo au qai dau vakilakila na kedra ibalebale yadua.

Niu sa itabagone, au lai curu ena dua na isoqosoqo ni lotu e vakatokai na Rastafarian. Au taleitaka tale ga na sasaga vakapolitiki me vaka na Anti-Nazi League. Ia e vakamuai au vakalevu na rai ni vakaduduile ni isoqosoqo na punk rock. Au vakayagataka na wainimate gaga, vakabibi na mariwana, au voleka ni kania e veisiga. Ni sa tiko tale ga vei au na rai “meu kua ni kauaitaka e dua tale,” au mani gunu vakasivia, cakava na ka e leqataki kina na noqu bula au qai sega ni veikauaitaki. Au sega ni dau veimaliwai, au na vosa ga vua e dua keu kila ni yaga na ka e veivosakitaki. Au sega sara mada ga ni vinakata e dua me tabaki au. Niu vakasamataka lesu, au kila niu sega ni veidokai, au dokadoka, qai voravora. Au na yalovinaka qai lomana ga e dua ke keirau veikilai.

Au tekivu taleitaka na iVolatabu niu yabaki 20. E dua na noqu itokani dau volitaki wainimate gaga a wilika na iVolatabu ni curu tu e valeniveivesu, keirau qai dau veivosakitaka sara vakabalavu na lotu kei na veika e cakava tiko o Setani e vuravura. Au mani volia e dua na iVolatabu au qai vulica vakataki au. Ni keirau dui wilika e dua na wase ni iVolatabu kei na noqu itokani, keirau na sota me keirau veivosakitaka na ka keirau vulica kina. Keirau cakava tiko qori me vica na vula.

Qo eso na ka keirau kila ena neirau dau wili iVolatabu: eda sa bula tiko ena iotioti ni veisiga kei vuravura; mera vunautaka na itukutuku vinaka ni Matanitu ni Kalou na lotu vaKarisito; mera kua ni vakavuravura, era na sega ni vakaitavi ena veika vakapolitiki, e tu tale ga ena iVolatabu na idusidusi yaga e vauca na itovo kilikili. E macala vakasigalevu vei keirau ni dina na iVolatabu, ena rairai tiko tale ga na lotu dina. Ia na lotu cava? Keirau vakasamataka na matalotu era kilai levu, na nodra soqo kei na veika era dau vakaraitaki ira kina, vaka kina nodra  vakaitavi ena veika vakapolitiki, keirau qai liaca ni a sega ni cakava qo o Jisu. Keirau kila kina ni sega ni vakayagataki ira tiko na Kalou, keirau mani nanuma me keirau dikeva mada eso na lotu era sega so ni kilai levu me keirau raica na ka era vakavulica.

Ni keirau sotavi ira na lewenilotu qo, keirau na tarogi ira ena vica na taro. Keirau sa kila rawa tu na ka e tukuna na iVolatabu me baleta na taro qori, ena totolo kina na neirau kila ke salavata kei na Vosa ni Kalou na nodra isaunitaro. Ni oti na veitalanoa va qori, au dau masulaka vua na Kalou: ‘Ke ra lewena na lotu dina o ira qori, kerekere moni uqeti au meu veivosaki tale kei ira.’ Ia ni oti e vica na vula, e sega ni dua vei ira qori e sauma vakaivolatabu na neirau taro; au sega tale ga ni vinakata meu veitalanoa tale kei ira.

Ia keirau qai sotavi ira na iVakadinadina i Jiova. Keirau taroga na taro vata ga keirau a taroga vei ira na lotu keirau sotava e liu, ia o ira na iVakadinadina era sauma na neirau taro ena iVolatabu. E sota vinaka na ka era tukuna kei na veika keirau sa kila rawa tu. Keirau taroga tale ga eso na ka keirau se bera ni kunea na kena isau ena iVolatabu, me vaka na rai ni Kalou me baleta na vakatavako kei na wainimate gaga. A rawa tale ga mera sauma qo ena Vosa ni Kalou. Keirau mani vakadonuya me keirau lako ena dua na nodra soqoni na iVakadinadina i Jiova ena nodra Kingdom Hall.

Sa bau dredre dina vei au na tiko ena soqoni. Niu sega ni taleitaka na veimaliwai, au sega gona ni vinakata mera vosa vei au o ira era yaloyalovinaka qai maqosa na nodra isulusulu. Au kila ni cala nodra rai eso era vosa vei au, au sega gona ni via lako tale ena soqoni. Ia me vaka ga na kena ivakarau, au masulaka vua na Kalou ke lotu dina oya, me uqeti au meu veivosaki tale kei ira—au qai vakila ni gu dina na lomaqu meu vulica na iVolatabu kei ira na iVakadinadina.

VEISAUTAKI AU NA IVOLATABU: Au kila ni dodonu meu muduka noqu vakayagataka na wainimate gaga, a rawarawa sara meu muduka qori. Ia sa bau dredre ga meu biuta na vakatavako. Au saga vakavica vata meu muduka, ia e sega ni rawa. Niu rogoca eso era sega tale ni qai vakatavako ena gauna era biuta kina, au mani masu vei Jiova. Ena nona veivuke au sega tale ni vakatavako. Au vulica tale ga ni bibi meu vosa vakadodonu vei Jiova qai talaucaka vua na lomaqu.

E dua tale na veisau levu au cakava, na noqu isulusulu kei na sasauni. Ena imatai ni noqu soqoni ena Kingdom Hall, e codrocodro na drauniuluqu qai dua na kena iwase e drokadroka karakarawa. Oti vakalailai, au bena me roka seninawanawa. Au vaka tarausese jeans kei na jakete leca e kesai tu kina eso na ivosavosa. Era vakamacalataka vakavinaka vei au na iVakadinadina ni gadrevi meu veisau, ia au nanuma ni sega ni gadrevi qori. Au qai vakasamataka na ka e tukuni ena 1 Joni 2:15-17: “Ni kua ni lomani vuravura se na ka e tu e vuravura. O koya e lomani vuravura, ena sega ni lomani koya o Tamada.” Au sa qai kila ni kequ irairai e vakaraitaka tiko niu lomani vuravura, ia e dodonu meu veisau me vakaraitaka niu lomana na Kalou. Qori sara ga na ka au cakava.

Au qai kila ni sega ni o ira ga na iVakadinadina era vinakata meu dau tiko ena soqoni vaKarisito. E tukuni sara ga ena Iperiu 10:24, 25, ni oya na ka e vinakata na Kalou meu cakava. Niu sa sega ni calata na soqoni kece au qai veikilai vinaka kei ira ena soqoni, au sa qai vakatulewataka meu vakaraitaka noqu yalayala vei Jiova ena noqu papitaiso.

KENA YAGA: E tarai au vakalevu na nona vakadonuya o Jiova meda veiwekani voleka kei koya. Na nona yalololoma kei na veikauaitaki e uqeti au meu vakatotomuri koya, qai muria na ivakarau e laiva koto na Luvena o Jisu Karisito. (1 Pita 2:21) Au vulica ni noqu dua na lotu vaKarisito e sega ni kena ibalebale nida na tautauvata ena ka kece eda cakava. Au sa saga tale ga meu dauloloma, meu dau veikauaitaki. Ena noqu ivalavala vei rau na noqu veitinani, au saga meu vakatotomuri Jisu. Au kauaitaki ira vakalevu na taciqu kei na ganequ ena vakabauta. Niu sa dua na imuri i Karisito, au sa sega ni beci au, au sa rawa tale ga ni dauloloma.

 “Era Dokai Au.”—GUADALUPE VILLARREAL

SUCU: 1964

VANUA: MEXICO

KA E KILAI KINA: IVAKARAU NI BULA DUKADUKALI

NOQU BULA E LIU: Keitou le vitu na veitacini keitou susu mai Hermosillo, e Sonora, Mexico, na yasayasa e tara vakalevu na bula dravudravua. Niu se gonetagane lailai sa mate o tamaqu sa qai cakacaka o tinaqu me qaravi keitou. Au dau sega ni vakaivava ni sega na kena isau. Au mani tekivu cakacaka niu se gone meu veivuke ena neitou bula vakailavo. Me vaka ga e levu na vuvale ena vanua qo, keimami bula veiosoosoti.

Levu na gauna e sega ni tiko o tinaqu me taqomaki keitou na gone. Niu se qai yabaki 6, a vakasagai au e dua na cauravou yabaki 15. A yaco tiko qo ena loma ni dua na gauna balavu. E vakavuna gona noqu veilecayaki au qai nanuma ni donu noqu wedevi ira na tagane. Niu kere veivuke vei ira na vuniwai kei na italatala, era kaya ni sega ni cala oya qai sega ni dua na ka e leqa vei au.

Au mani vakatulewataka niu yabaki 14 meu vakaisulu qai ivukivuki vakayalewa. E va tu qori na ivakarau ni noqu bula me 11 na yabaki, e veiveisau tale ga na tagane au tiko kei ira. Ni toso na gauna, au lai vulica meu dau caka ulu, qai cicivaka e dua na sitoa ni sasauni. Ia au sega ni marau. Au dau rarawa ga au qai nanuma niu dabuitaki. Niu vakila ni cala na ka au cakava tiko, au tekivu vakataroga kina: ‘E tiko beka eso na tamata vinaka ra qai nuitaki?’

Au vakasamataki ganequ sara, a vuli iVolatabu kei ira na iVakadinadina i Jiova qai papitaiso. E dau tukuna vei au na veika e vulica, ia au sega ni via rogoca. Au dau qoroya na nona ivakarau ni bula kei na nona bula vakawati. Au raica ni rau veilomani dina vakaveiwatini, erau dau veidokai qai veinanumi. Ni toso na gauna, au vuli iVolatabu kei na dua na iVakadinadina i Jiova. Ni se qai tekivu, e sega sara ni lomaqu na vuli. Ia a veisau qori.

VEISAUTAKI AU NA IVOLATABU: Au a sureti ena dua na nodra soqoni na iVakadinadina i Jiova, au mani lako. Qori e vou dina vei au. O ira e taudaku era vakalialiai au, ia era sega ni cakava qori na iVakadinadina. Era kidavaki au ena loloma ra qai dokai au. Na ka era cakava qo e uqeti au sara ga.

Sa qai vinaka ga na noqu rai me baleti ira na iVakadinadina niu tiko ena dua tale na nodra soqo. Au raica nira tiko mada ga vakalelevu, o ira qo era vakataki ganequ ga—era dau veikauaitaki dina. Au mani kaya lo, rairai qo o ira na tamata vinaka qai nuitaki au qara voli ena dua na gauna balavu. Au drukataka na nodra veilomani kei na duavata, kei na nodra sauma na taro kece ena iVolatabu. Au qai kila ni vakavinakataka nodra bula na iVolatabu. Meu dua vei ira, au raica ni dodonu meu cakava tale ga e levu na veisau.

Io, niu viavia yalewa tiko, e dua na veisau vakaitamera meu na cakava. Me na veisau na noqu ivosavosa, ivukivuki, isulusulu, ikotikoti, kei na noqu digitaki ira na noqu itokani. Era vakalialiai au na noqu itokani e liu, era kaya: “Na cava o via cakava kina qo? Sa rauti iko tu ga na nomu bula e liu. Kua ni vulica na iVolatabu. E tu vei iko na ka kece.” Ia na ka e dredre duadua me veisau na noqu ivakarau ni bula dukadukali.

Au kila ni rawa na veisau, e tara saga ga na  lomaqu na ka e tukuna na iVolatabu ena 1 Korinica 6:9-11: “Oni lecava nira na sega ni rawata na matanitu ni Kalou na tawayalododonu? Ni kua ni vakacalai. O ira era dau veidauci, qaravi matakau, veibutakoci, vakasalewalewa, o ira na tagane era mocera na tagane, . . . era na sega ni rawata na matanitu ni Kalou. Eso sara ga vei kemuni oni a va tu ya. Ia oni sa vakasavasavataki.” A vukei ira ena gauna oya o Jiova mera veisau, e vukei au tale ga. E vica vata na yabaki noqu sasaga tiko, ia e vukei au vakalevu na nodra veidusimaki kei na nodra loloma na iVakadinadina.

KENA YAGA: Nikua, sa duatani sara na ivakarau ni noqu bula. Au sa vakawati, keirau qai vakavulica tiko na luvei keirau me bulataka na ivakavuvuli ena iVolatabu. Sa yawakalia sara na noqu ivakarau ni bula e liu, au marautaka tale ga e levu na veika vakayalo kei na itavi au lesi kina. Au sa dua tiko na qase ni ivavakoso au qai vakavulica eso tale ena ka dina ena Vosa ni Kalou. E marautaka o tinaqu na veisau e yaco ena noqu bula, mani vulica sara na iVolatabu qai dua na lotu vaKarisito papitaiso. A mai iVakadinadina i Jiova tale ga e dua na ganequ a muria voli na ivakarau ni bula dukadukali.

Eso era kila na ivakarau ni noqu bula e liu era raica ena gauna qo na vinaka ni veisau au cakava. Au kila vinaka na ka e vakavuna na veisau qori. Au a kerea na nodra veivuke na kenadau ena veigauna sa oti, ia a sega ni yaga na nodra ivakasala. O Jiova ga a vukei au. Au dau nanuma ni sega na kequ yaga, ia e kauaitaki au o Jiova, e lomani au tale ga. Na nona kauaitaki au na Kalou lagilagi, vuku, dauloloma, qai vinakata me vinaka na ivakarau ni noqu bula e vakavuna sara ga meu veisau.

“Au Sega ni Lomavakacegu, Au Galili, qai Sega ni Vakainaki Noqu Bula.”—KAZUHIRO KUNIMOCHI

SUCU: 1951

VANUA: JAPANI

KA E KILAI KINA: DAUVEITAU BASIKELI

NOQU BULA E LIU: Au susu ena taoni vakanomodi o Shizuoka Prefecture, na ikelekele ni waqa e Japani. Keitou tiko na walu na lewenivuvale ena dua na vale lailai sara. E dau volitaka na basikeli o tamaqu, e ripeataka tale ga. Niu se gone, e dau kauti au ina veitau basikeli, qai tekivu e kea meu taleitaka na qito qo. A lalawataka o tamaqu meu na dua na kenadau ena veitau basikeli. E gumatua ni terenitaki au niu se vuli tiko ena paraimari. Niu se vuli tiko ena sekeneri, au wini vakatolu ena veitau basikeli e caka e veiyabaki ra qai vakaitavi kina o ira na gole mai na veiyasa i Japani. Au sureti meu lai vuli ena univesiti, ia au vakatulewataka meu sa lako ga ina koronivuli ni veitau basikeli. Au kenadau ena veitau basikeli niu yabaki 19.

Ena gauna qori a noqu isausau meu jabeni ni veitau basikeli e Japani. Au lalawataka meu  rawata e levu na ilavo me ratou tiko vinaka kina na noqu vuvale. Au tereni sara vakaukaua. Niu yalolailaitaka na noqu tereni se dua na veitau e dredre toka, au vakadeitaka tiko ga e lomaqu niu a sucu meu dua na dau veitau basikeli, meu kua ni soro! Qori sara ga na ka au cakava. Sa tekivu vakavotukana na noqu cakacaka vakaukaua. Ena imatai ni yabaki ni veitau basikeli, au imatai vei ira na vakaitavi vou. Ena ikarua ni yabaki, a vakadonui meu curu ena dua na veitau basikeli me kilai kina na jabeni e Japani. E caka vakaono, ena gauna kece qori au karua ena veisisivi.

Niu vakaicocovi tu ga ena veitau basikeli, au kilai kina me “yava kaukaua ni vodo basikeli mai Tokai,” e dua na vanua e Japani. Dua na ka noqu dau via sivi ira na kena vo. Au rerevaki tale ga ena gauna qori niu sega ni dau via kila tale e dua ena gauna ni veitau. E tubu na kequ isau, sa rawa meu volia na ka ga au vinakata. Au volia e dua na vale e tiko kina na rumu ni vakaukaua yago kei na misini vinaka duadua. Na motoka au volia mai vanuatani e via tautauvata ga kei na isau ni vale. Au mani vakacuruilavo ena bisinisi ni volitaki vale kei na qele, kei na makete ni voli sea me maroroi kina na noqu ilavo.

Ia au sega ni lomavakacegu, au galili, qai sega ni vakainaki noqu bula. Au sa vakawati ena gauna qori qai tolu na luvequ, ia e dau totolo noqu katakatataki iratou noqu veitinani ena ka lalai sara mada ga. Eratou dau vakaraica na mataqu me ratou kila kina seu sa baci yaloca.

A tekivu vuli iVolatabu kei ira na iVakadinadina i Jiova o watiqu. Qo e yaco kina e levu na veisau. E tukuna ni via lako ina nodra soqoni na iVakadinadina, au mani vakatulewataka me keitou lako vakavuvale. Au se nanuma tiko ga na bogi a lako mai kina i vale e dua na qase ni ivavakoso qai vakavulici au ena iVolatabu. E tarai au sara ga na veika au vulica.

VEISAUTAKI AU NA IVOLATABU: Au na sega ni guilecava na kena tarai au na ka au wilika ena Efeso 5:5. E kaya: “O koya e dau veidauci se o koya e tawasavasava se o koya e kocokoco—e kena ibalebale qori ni qaravi matakau—ena sega ni rawata na matanitu i Karisito kei na Kalou.” Au raica rawa kina ni veitau basikeli e tautauvata ga kei na veimauilavo e vakavurea na yalokocokoco. Qori e vakaleqa na noqu lewaeloma. Keu via vakamarautaka na Kalou o Jiova, au kila ni dodonu meu biuta na veitau basikeli. Ia e dredre dina na vakatulewa qo.

Se qai oti ga e dua na yabaki au rawaka kina vakalevu, ia au sega ga ni lomavakacegu. Au raica ni noqu vulica na iVolatabu e vakaceguya, e galala tale ga kina na noqu vakasama—e duidui sara mai na yalo e curumi au meu wini ena veitau basikeli! Niu tekivu vulica na iVolatabu, au veitau basikeli ga vakatolu, ia au se taleitaka tiko ga na veitau basikeli. Au leqataka tale ga meu na qarava vakacava noqu vuvale. Au sega ni kila na ka meu cakava ra qai saqata na wekaqu na noqu vakabauta vou. E rarawataki au vakalevu o tamaqu. Au sa qai nuiqawaqawa ga vakalevu qai tauvi au na alasa (ulcer).

Na gauna dredre qori e vukei au noqu vulica tiko ga na iVolatabu kei na noqu tiko ena nodra soqoni na iVakadinadina i Jiova. E tekivu dei mai vakamalua na noqu vakabauta. Au kerei Jiova me rogoca noqu masu, me vukei au tale ga meu raica ni na cakava na ka au kerea. E seavu vakamalua na noqu nuiqawaqawa ni tukuna o watiqu ni sega ni gadrevi me tiko ena dua na vale levu me marau kina. Au sa tekivu toso vakayalo tale ga.

KENA YAGA: Au vakadinadinataka na ka e tukuna o Jisu ena Maciu 6:33. E kaya: “Moni vakaliuca tiko ga na matanitu ni Kalou kei na nona yalododonu, ena qai soli vei kemuni na ka kece qo.” Keitou sega vakadua ni bau leqa ena ‘veika’ tale eso me keitou bula kina a cavuta o Jisu. Na kequ isau ena gauna qo e lailai sara mai na kena au rawata ena veitau basikeli, ia ena 20 na yabaki sa sivi e sega ni bau leqa na noqu vuvale ena veika e gadrevi me keitou bula kina.

Niu vakaitavi kei ira na noqu itokani ena vakabauta ena veika e vauca na noqu sokalou, au vakila na marau kei na lomavakacegu au sega ni bau vakila e liu. E toso totolo na gauna niu ogaoga ena veiqaravi vei Jiova. E sa vinaka sara na neitou bula vakavuvale. Eratou qaravi Jiova tiko ena yalodina na tolu na luvequ tagane kei na dui watidratou.