Ang Biblia Nagapabag-o sang Kabuhi

NGAA natun-an sang isa ka indi mainabyanon nga rakista nga palanggaon kag buligan ang mga tawo? Ngaa gintalikdan sang isa ka tawo sa Mexico ang iya imoral nga pagkabuhi? Ngaa ginbiyaan sang isa sa mga nagapanguna nga racer sa Japan ang pagkarera sing bisikleta para mag-alagad sa Dios? Binagbinaga ang ila ginsiling.

“Arogante Ako sadto, Maakigon, kag Wala sing Ginarespeto.”—DENNIS O’BEIRNE

NATAWO: 1958

PUNGSOD: ENGLAND

KABUHI SANG UNA: RAKISTA

ANG AKON NAGLIGAD: Taga-Ireland si Tatay, gani Irish ang amon pamilya. Nagdaku ako nga Katoliko. Nagamatumato ako kadto sa simbahan, bisan pa indi ko ini gusto. Pero, uhaw ako sa espirituwal nga mga butang. Pirme ko ginapangamuyo ang Amay Namon. May bes nga nagahigda na ako, ginapanumdom ko pa kon ano ang buot silingon sini. Ginbinagbinag ko kon ano ang kahulugan sang kada bahin sini.

Sang tin-edyer ako, nag-entra ako sa hublag sang mga Rastafarian. Nangin interesado man ako sa mga kawsa sa pulitika pareho sang Anti-Nazi League. Pero mas gusto ko mag-upod sa mga rebelyuso nga hublag sang mga rakista. Nangin adik ako, ilabi na sa marijuana, nga ginasuyop ko halos kada adlaw. Wala ako sing labot sa iban, nangin palahubog, kag ginabutang ko sa katalagman ang akon kabuhi. Indi ako mainabyanon kag wala ako nagaistorya sa iban magluwas lang kon may pulos ang ginaistoryahan. Indi ko gani gusto nga kodakan ako. Arogante ako sadto, maakigon, kag wala sing ginarespeto. Mabuot lang ako kag mahinatagon sa mga suod sa akon.

Sang manug-20 anyos ako, nangin interesado ako sa Biblia. Ginbasa sang isa ko ka amigo nga pusher ang Biblia sang napriso sia, kag madamo kami sing naistoryahan parte sa relihion, Simbahan, kag sa papel ni Satanas sa kalibutan. Nagbakal ako sing Biblia kag gintun-an ko ini mismo. Ginabasa namon sang akon amigo ang mga bahin sini, ginabinagbinag ang amon natun-an, kag nagahimo sing mga konklusion. Binulan namon ini nga ginhimo.

Ini ang pila namon ka konklusion: nagakabuhi kita sa katapusan nga mga adlaw sining kalibutan; ang mga Cristiano dapat magwali sing maayong balita sang Ginharian sang Dios; indi sila dapat mangin bahin sining kalibutan, pati na sa pulitika; kag ang Biblia nagatudlo sing maayo nga mga prinsipio sa moral. Napamatud-an namon nga husto ang Biblia kag may ara gid matuod nga relihion. Pero nakita namon ang luho, seremonya, kag pag-entra sa pulitika sang dalagku nga mga  relihion, kag indi gid amo sini si Jesus. Nahibaluan namon nga indi sila ang ginagamit sang Dios, gani nagdesisyon kami nga usisaon ang pagpati sang magagmay nga mga relihion.

Nakigkita kami sa mga miembro sang pila ka relihion kag ginpaarakan sila sing pamangkot. Nahibaluan na namon ang sabat sang Biblia sa amon pamangkot, gani mabal-an dayon namon kon nabase sa Pulong sang Dios ang ila sabat. Pagkatapos sini nga mga paghambalanay, nagapangamuyo ako sa Dios, ‘Kon sila ang matuod nga relihion, palihug kumbinsiha ako nga makigkita liwat sa ila.’ Pero binulan na ang nakaligad, wala gihapon sing grupo nga makasabat sang amon pamangkot halin sa Biblia; ukon nakumbinse ako nga makigkita liwat sa ila.

Sang ulihi, naistorya namon ang mga Saksi ni Jehova, kag amo gihapon ang amon ginpamangkot sa ila, pero ginsabat nila ini halin sa Biblia. Ang ila ginsiling pareho gid sa amon natun-an. Gani namangkot kami sang wala pa namon nahibaluan sa Biblia, halimbawa, parte sa pagtamod sang Dios sa pagpanigarilyo kag pagdroga. Sa gihapon, nasabat nila ini paagi sa Pulong sang Dios. Nagpasugot kami nga magkadto sa ila Kingdom Hall.

Indi ini mahapos. Tungod indi ako mainabyanon, indi ko gusto nga istoryahon sang mabuot kag disente nga mga tawo. Nagpensar ako nga ang iban sa ila may malain nga motibo, gani indi ko na gusto magtambong liwat. Pero nangamuyo ako sa Dios nga kon sila ang matuod nga relihion, kumbinsihon niya ako nga makigkita liwat sa ila, kag nangin interesado gid ako magtuon sa Biblia upod sa mga Saksi.

KON PAANO GINBAG-O SANG BIBLIA ANG AKON KABUHI: Nabal-an ko nga dapat ko untatan ang pagdroga, kag nahimo ko ini. Pero nabudlayan gid ako nga untatan ang pagpanigarilyo. Gintinguhaan ko ini sing pila ka beses. Kon mabatian ko nga kahapos lang sa iban nga untatan ang pagpanigarilyo, nagapangamuyo ako kay Jehova. Sa bulig niya, nauntatan ko gid man ang pagpanigarilyo. Narealisar ko nga importante gid nga isugid kay Jehova ang tanan paagi sa pangamuyo.

Ginbag-o ko man ang akon pamayo kag pamustura. Sa una ko nga pagtambong sa Kingdom Hall, nagatiskog ang akon buhok kag may blue nga stripe. Ginlugom ko man ini sing masili nga orange. Nagamaong ako kag nagasuksok sing dyaket nga may islogan. Wala ko ini ginabag-o, bisan pa mainayuhon ako nga ginalaygayan sang mga Saksi. Ginbinagbinag ko sang ulihi ang 1 Juan 2:15-17: “Indi ninyo paghigugmaa ang kalibutan ukon ang mga butang sa kalibutan. Kon ang bisan sin-o nagahigugma sa kalibutan, ang gugma sa Amay wala sa iya.” Pero ginapakita sang akon hitsura ang gugma sa kalibutan, kag para mapakita ko ang gugma sa Dios, dapat ko ini bag-uhon, kag ginhimo ko ini.

Sang ulihi, narealisar ko nga indi lang mga Saksi ang gusto nga magtambong ako sa Cristiano nga mga pagtilipon. Suno sa Hebreo 10:24, 25, amo ini ang gusto sang Dios nga himuon ko. Sang nagatambong na ako sa tanan nga pagtilipon kag nakilala ko na ang mga Saksi, nagdesisyon ako nga simbuluhan ang akon dedikasyon kay Jehova paagi sa pagpabawtismo.

MGA BENEPISYO: Natandog gid ako kon paano kita ginabuligan ni Jehova nga makigsuod sa iya. Ang iya kaluoy kag pag-ulikid nagpahulag sa akon nga ilugon sia kag ang iya Anak, nga si Jesucristo. (1 Pedro 2:21) Narealisar ko nga magabag-o ako kon tinguhaan ko nga sundon ang Cristiano nga mga kinaiya. Ginpanikasugan ko nga mangin mapinalanggaon kag mainulikdon. Gin-ilog ko si Jesus sa pagpakig-angot sa akon asawa kag anak. Kag ginaulikdan ko man ang pareho ko nga mga Saksi. Sang ginsunod ko si Jesus, natigayon ko ang dignidad kag natun-an ko nga higugmaon ang iban.

 “Ginarespeto Nila Ako.”—GUADALUPE VILLARREAL

NATAWO: 1964

PUNGSOD: MEXICO

KABUHI SANG UNA: IMORAL

ANG AKON NAGLIGAD: Pito kami ka mag-ulutod. Nagdaku kami sa Hermosillo, sa Sonora, Mexico, diin grabe ang kaimulon. Napatay si Tatay sang gamay pa ako, gani si Nanay na lang ang nagbuhi sa amon. Pirme lang ako nagatiniil kay wala kami inugbakal sapatos. Bata pa ako, nagaobra na ako para makabulig sa amon galastuhan. Pareho sa iban nga pamilya, nagaginutok kami sa isa ka balay.

Halos bilog nga adlaw nga wala si Nanay, gani indi niya kami maproteksionan. Sang 6 anyos ako, gin-abusuhan ako sang 15 anyos nga lalaki. Naglawig ini asta nga naligban ako parte sa sekso. Abi ko normal lang nga maluyag sa mga lalaki. Sang ginpamangkot ko ang mga doktor kag mga lider sang relihion, nagsiling sila nga wala ini sing problema kag normal lang ang akon ginabatyag.

Sang 14 anyos ako, ginpakilala ko ang akon kaugalingon nga isa ka agi. Amo sini ang akon pagkabuhi sa sulod sang 11 ka tuig, kag nakigrelasyon ako sa lainlain nga lalaki. Nag-eskwela man ako para mangin hair stylist kag nagpatindog sing parlor. Pero indi ako malipayon. Pirme lang ako nagaantos kag ginaluiban. Nabatyagan ko nga indi husto ang akon ginahimo. Ginpamangkot ko ang akon kaugalingon, ‘May maayo pa ayhan nga mga tawo?’

Nadumduman ko ang akon utod nga babayi. Nagtuon sia sa Biblia upod sa mga Saksi ni Jehova kag nagpabawtismo. Ginasugid niya sa akon ang iya natun-an, bisan wala ako nagapamati. Pero nagadayaw gid ako sa iya kag sa ila pag-asawahay. Nakita ko nga nagapalanggaanay gid sila sang iya bana kag ginarespeto nila ang isa kag isa. Maayo gid ang ila pagtamdanay. Sang ulihi, gintun-an ako sa Biblia sang isa sa mga Saksi ni Jehova. Sa umpisa, ginapasundan ko lang ini kay wala ako sing gana. Pero nagbag-o ini.

KON PAANO GINBAG-O SANG BIBLIA ANG AKON KABUHI: Gin-agda ako sang mga Saksi nga magtambong sa isa nila ka pagtilipon, kag nag-upod ako. Amo ko pa lang ini naeksperiensiahan. Indi pareho sa iban, wala ako ginalangolango sang mga Saksi, kundi ginabugno kag ginarespeto nila ako. Natandog gid ako sa sini.

Nagdayaw pa gid ako sa mga Saksi sang nagtambong ako sa isa ka asembleya. Bisan sa daku nila nga pagtilipon, ini nga mga tawo sinsero gid pareho sang akon utod. Nagpensar ako nga basi sila na ang maayo nga mga tawo nga ginapangita ko sadto pa. Nagdayaw gid ako sa ila gugma kag paghiusa, kag sa paggamit nila sing Biblia sa pagsabat sa mga pamangkot. Narealisar ko nga ginagiyahan sang Biblia ang ila pagkabuhi, kag kadamo sang dapat ko bag-uhon para mangin isa sa ila.

Ang matuod, kinahanglan ko ang daku nga pagreporma, kay binabayi ang akon pagkabuhi. Kinahanglan ko pilion ang akon mga abyan, bag-uhon ang akon panghambal, hulag, pamayo, kag buhok. Ginsilingan ako sang mga abyan ko sadto: “Nag-anuano ka imo ‘ya? Wala ka sing dapat bag-uhon. Ngaa matuon ka sa Biblia kay ara na sa imo ang tanan?” Pero ang pinakamabudlay bag-uhon amo ang akon imoral nga pagkabuhi.

 Nahibaluan ko nga posible ini, kay natandog gid ako sa ginasiling sang Biblia sa 1 Corinto 6:9-11: “Ano! Wala bala kamo makahibalo nga ang di-matarong nga mga tawo indi makapanubli sang ginharian sang Dios? Indi pagtuguti nga mapatalang kamo. Wala sing mga makihilawason, ukon mga nagasimba sa mga idolo, ukon mga makihilahion, ukon mga lalaki nga ginahuptan para sa di-kinaugali nga mga katuyuan, ukon mga lalaki nga nagahulid sa mga lalaki . . . nga makapanubli sang ginharian sang Dios. Apang amo sina anay ang pila sa inyo. Apang ginhugasan na kamo.” Pareho sini nga mga tawo, ginbuligan man ako ni Jehova nga magbag-o. Tinuig ko ini nga ginpakigbatuan, pero nabuligan gid ako sang giya kag gugma sang mga Saksi.

MGA BENEPISYO: Normal na ang kabuhi ko subong. May asawa na ako, kag ginatudluan namon ang amon bata nga magkabuhi suno sa mga prinsipio sang Biblia. Nagbag-o na gid ako subong kag madamo ako sing espirituwal nga pagpakamaayo kag mga pribilehiyo. Isa ako ka elder sa amon kongregasyon, kag nabuligan ko ang iban nga matun-an ang kamatuoran sa Pulong sang Dios. Nalipay gid si Nanay sa akon pagbag-o, gani nagtuon man sia sa Biblia kag nagpabawtismo. Nangin Saksi ni Jehova man ang manghod ko nga babayi nga imoral sang una.

Bisan ang mga nakakilala sa akon sang una nagsiling nga nagbag-o na gid ako. Kag nahibaluan ko kon sin-o gid ang nakabulig sa akon. Wala ako nabuligan sang mga eksperto, pero ginbuligan gid ako ni Jehova. Bisan pa nagabatyag ako nga wala sing pulos, gin-ulikdan niya ako, ginhigugma, kag ginpasensiahan. Gusto gid sining dalayawon, maalam, kag mahigugmaon nga Dios nga mangin maayo ang akon kabuhi. Ang iya pag-ulikid amo gid ang nagpabag-o sa akon.

“Indi Ako Kontento kag Indi Malipayon.”—KAZUHIRO KUNIMOCHI

NATAWO: 1951

PUNGSOD: JAPAN

KABUHI SANG UNA: RACER

ANG AKON NAGLIGAD: Nagdaku ako sa isa ka malinong nga banwa nga may pantalan sa Shizuoka Prefecture, Japan, diin ang amon pamilya nagaistar sa gamay nga balay. May shop sang bisikleta si Tatay. Sang gamay pa ako, ginadala niya ako sa mga karerahay sang bisikleta. Nangin interesado ako sa sini nga sport kag ginhanas na niya ako sang ara pa lang ako sa middle school (13 asta 16 anyos). Sang hayskul ako, tatlo ka sunodsunod nga tuig nga nagdaug ako sa national athletic contests nga ginahiwat kada tuig. Gintanyagan ako nga mag-eskwela sa unibersidad, pero nagdesisyon ako nga mag-eskwela sa isa ka racing school. Sang 19 anyos ako, propesyonal na ako sa sini nga sport.

Handum ko gid sadto nga mangin nagapanguna nga racer sa Japan. Gusto ko magdamo  ang akon kuarta para mangin maayo ang kabuhi sang akon pamilya. Nagpraktis ako sing maayo. Kon kapoy na gani ako kag ginabudlayan, ginapensar ko dayon nga natawo ako para magkarera sing bisikleta kag dapat ko ini padayunon ano man ang matabo! Kag maayo gid ang resulta sini. Sa una ko nga tuig, ako ang nanguna sa bag-uhan nga mga racer. Sa ikaduha nga tuig, nakaentra ako sa karera para sa panguna nga racer sa Japan. Anom ka beses ako nga nangin pangduha sa amo nga karera.

Pirme lang ako nagadaug, gani nakilala ako bilang mabakod nga tiil sang Tokai, nga isa ka lugar sa Japan. Mabudlay ako pierdihon. Ginkahadlukan ako sang ulihi kay kabaris sa akon magkarera. Nagmanggaranon ako, kag mabakal ko na ang tanan ko nga gusto. Nagbakal ako sing balay nga may kuarto para sa ehersisyo kag may de-kalidad nga mga gamit nga pang-ehersisyo. Nagbakal man ako sing salakyan nga ang bili isa na ka balay. Namakal man ako sing kadutaan kag mga share sa stock market.

Pero, indi ako kontento kag indi malipayon. May asawa na ako kag kabataan, pero naugot ako pirme sa ila. Ginaakigan ko dayon sila bisan sa gamay lang nga butang. Mabal-an na nila sa akon hitsura kon bala akig na naman ako.

Sang ulihi, nagtuon sing Biblia ang akon asawa upod sa mga Saksi ni Jehova. Daku gid ang epekto sini. Nagsiling sia nga gusto niya magtambong sa mga pagtilipon sang mga Saksi, gani nagdesisyon ako nga matambong kami nga pamilya. Nadumduman ko ang gab-i nga gintawgan ako sang isa ka elder kag gintun-an namon ang Biblia. Natandog gid ako sa akon natun-an.

KON PAANO GINBAG-O SANG BIBLIA ANG AKON KABUHI: Napahulag gid ako sang ginbasa ko ang Efeso 5:5, nga nagasiling: “Wala sing makihilawason ukon mahigko nga tawo ukon makagod nga tawo—nga buot silingon nagasimba sa mga idolo—ang may palanublion sa ginharian ni Cristo kag sang Dios.” Narealisar ko nga ang pagkarera isa ka sugal kag nagatudlo ini sing kakagod ukon kasakon. Ginkonsiensia gid ako. Nagbatyag ako nga dapat ko untatan ang pagkarera kon gusto ko pahamut-an si Jehova nga Dios. Pero mabudlay ini himuon.

Grabe pa gid ang kadalag-an ko sadto nga tuig, kag madamo pa ako sing ginahandum. Pero malinong ang akon pensar kon magtuon ako sa Biblia, indi pareho sa panimuot ko kon gusto ko magdaug sa karera! Tatlo ka beses na lang ako nga nagkarera sugod sang nagtuon ako, pero ang matuod daw indi ko pa ini mabiyaan. Ginpaligban ko man kon paano ko masagod ang akon pamilya. Indi ko kabalo kon ano ang himuon, kag ginahingabot ako sang akon mga paryente bangod sa bag-o ko nga pagtuluuhan. Grabe man ang kaakig ni Tatay. Naglibog gid ang akon ulo, kag sa sobra nga stress, gin-ulcer ako.

Sa bulig sang pagtuon pirme sa Biblia kag pagtambong sa mga pagtilipon sang mga Saksi ni Jehova, amat-amat nga nagbakod ang akon pagtuo. Ginpangabay ko si Jehova nga pamatian ang akon mga pangamuyo kag kumbinsihon ako nga nagapamati sia. Nabuhinan ang akon stress sang nagsiling ang akon asawa nga indi kinahanglan ang daku nga balay para mangin malipayon. Amat-amat ako nga nagbag-o.

MGA BENEPISYO: Matuod gid ang ginasiling ni Jesus sa Mateo 6:33: “Gani, padayon nga pangitaa anay ang ginharian kag ang iya pagkamatarong, kag ini tanan iban pa nga butang idugang sa inyo.” Wala gid kami ginkulang sang ginsiling ni Jesus nga “iban pa nga butang,” ukon panguna nga mga kinahanglanon. Bisan pa diutay katama ang akon kita subong sangsa nagakarera pa ako, wala gid kami nawad-an sang nagligad nga 20 ka tuig.

Isa pa, nabatyagan ko gid ang kalipay kag pagkakontento kon kaupod ko sa pagsimba ang akon mga masigkatumuluo. Kadasig lang sang mga inadlaw kag daku gid ang pag-uswag sang akon pamilya. Ang akon tatlo ka bata nga lalaki kag ang ila mga asawa nangin matutom man kay Jehova.