Кʹьтеба Пироз Жийина Мәрьва Дьгӧһезә

ЧЬ СӘР мәрьвәки панк рокер һʹӧкӧм бу, ԝәки һин бә мәрьва һʹьз бькә у али ԝан бькә? Чь мерәки жь Мәксикайе һелан кьр, ԝәки тʹәрка бенамусийе бьдә? Чьрʹа мәрьвәки жь Жапонйайе, кӧ бь һостәти бисиклет дажот, тʹәрка ве спорте да у дәстпекьр Хԝәдерʹа хьзмәт кә? Ԝәрә дина хԝә бьдьне, кӧ әԝ мәрьв дәрһәԛа хԝә чь гьли дькьн.

«Әз Йәки Сәрт, Бәрзәԛ у Һерс Бум». ДЕНИС ОБЕРН

САЛА БУЙИНЕ: 1958

ԜӘЛАТ: ИНГЛИСТАН

БӘРЕ: ПАНК РОКЕР

ЖИЙИНА МЬНӘ БӘРЕ: Баве мьн жь Ирләндайе бу, ләма жи жь бьчʹуктайе әз ча Католике Ирләнди дьһатьмә мәзьнкьрьне. Әз тʹьме тʹәне дьчумә дере, у рʹаст бежьм әв йәк мьн хԝәш нәдьһат. Ле диса жи һʹәԝщәтийа мьнә рʹӧһʹани һәбу. Мьн һәргав Дӧайе Хӧдан дьԝәкʹьланд у һʹәта ньһа те бира мьн, ча шәв нав щийада, әз дәрһәԛа мәʹна ве дӧакьрьне дьфькьрим. Мьн әв дӧа сәр чәнд пʹара пʹарәвәдькьр у дәрһәԛа һәр пʹарәке кʹур дьфькьрим.

Чахе әз һьнәки мәзьн бум, әз кʹәтьмә бәр байе һинкьрьнед Растафарийа. Хенщи ве йәке Лигайа Анти-Натсиста жи гәләк мьн хԝәш дьһат. Ле ахьрийе әз кʹәтьмә кʹома панк рока, йед кӧ әʹйан бун ча мьԛабьл. Мьн ӧса жи дәстпекьр наркотика бьдьмә хәбате, илаһи марихуанайе, бейи кʹижани мьн рʹожәке жи тәйах нәдькьр. Принсипа жийина мьн әв бу: «Хәма мьн нинә». Ләма жи мьн гәләк ичʹкә вәдьхԝар, жийина хԝә дькьрә бьн ԛәзийе у һьндава мәрьвада бетʹалаш бум. Мьн хԝә жь мәрьва дур дьгьрт у һʹьз нәдькьр тʹәви ԝан хәбәр дьм. Әз тʹәне тʹәви ԝан мәрийа дькʹәтьмә хәбәрдане, тʹәви кʹижана мьнрʹа һʹәԝас бу. Һьм жи мьн һʹьз нәдькьр шькьле хԝә бькʹьшиньм. Чахе әз жийина хԝәйә бәре тиньм бира хԝә, әз фәʹм дькьм кӧ әз йәки бәрзәԛ, ԛӧрʹә у һерс бум. Әз тʹәне тʹәви мәрьв у һәвалед хԝәйә незик ԛәнщ у мәрʹд бум.

Чахе әз ԝәкә 20 сали бум, һʹәԝаса мьн һьндава Кʹьтеба Пироз пешда һат. Һәваләки мьн, йе кӧ наркотика дьфьрот, чахе кәледа бу Кʹьтеба Пироз дьхԝәнд. Мә тʹәвайи бь сьһʹәта дәрһәԛа религийайе, Дере у һʹӧкӧмтийа Мире-щьна хәбәр дьда. Мьн Кʹьтеба Пироз кʹьрʹи у дәстпекьр хԝәха леколин кьм. Мьн тʹәви һәвале хԝә башԛә-башԛә пʹарәкә жь Кʹьтеба Пироз дьхԝәнд, паше жи мә тʹәвайи шеԝьр дькьр у нетед сәрәкә тедәрдьхьст. Ӧса мә бь мәһа бәрдәԝам дькьр.

Ԝәʹде леколине әм һатьн сәр ԝан нета: әм рʹожед ахьрийа ве дьнйайеда дьжин; Мәсиһи гәрәке мьзгинийа хере дәрһәԛа Пʹадшатийа Хԝәде мәрьварʹа гьли кьн; әԝана гәрәке пʹара ве дьнйайе нибьн у нәкʹәвьнә нав шьхӧле политикайе; Кʹьтеба Пирозда ширәтед керһати һәнә дәрһәԛа нав-намусийе. Мә әшкәрә дьдит, ԝәки Кʹьтеба Пирозда рʹасти һәйә у ԝәки гәрәке религийа рʹаст һәбә. Ле гәло әв кʹижан религийа йә? Чахе әм дәрһәԛа религийед сәрәкә у әʹрф-әʹдәтед ԝан фькьрин, у ӧса жи дәрһәԛа ԝе йәке, кӧ әԝана дькʹәвьнә нава политике, мә фәʹм кьр, кӧ Иса тʹәви ԝан нинә. Әм һатьнә сәр ԝе нете, кӧ нав ԝан религийада Хԝәде тʹӧнә, ләма жи мә сафи кьр религийед ӧса леколин кьн, кӧ гәләкарʹа нас нибун.

Әм рʹасти сәрԝеред щурʹә-щурʹә религийа дьһатьн у гәләк пьрс дьда ԝан. Мә заньбу, кӧ Кʹьтеба Пироз ча щаба һәр пьрсәке дьдә у ләма жи мәрʹа чәтьн нибу тедәрхьн, һәла щабед ԝан сәр һʹиме Хәбәра Хԝәде нә йан на. Паши хәбәрданед ви щурʹәйи мьн Хԝәдерʹа ӧса дӧа дькьр: «Һәрге әԝ мәрьв нав религийа рʹастда ньн, лава дькьм али мьн бькә, кӧ әз диса бьхԝазьм рʹасти ԝан бем». Чәнд мәһ дәрбаз бун, у мьн нә жи дит мәрьвед ӧса, кʹижан кӧ бь Кʹьтеба Пироз щаба пьрсед мьн бьдана. Ле мьн нәдьхԝәст диса рʹасти ԝан мәрийа бем, тʹәви кʹижана мьн хәбәр дабу.

Ахьрийа-ахьрийе әз у һәвале мьн, әм тʹәви Шәʹдед Йаһоԝа бунә нас. Мә әԝ пьрс данә ԝан жи, ле ԝана сәр һʹиме Кʹьтеба Пироз щаба мә дьдан. Готьнед ԝан у әԝ йәк чь кӧ мә ида заньбу, һәв дьгьртьн. Һьнге мә дәстпекьр ԝан пьрса бьдьнә ԝан, щаба кʹижана мә Кʹьтеба Пирозда нәдитьбу. Мәсәлә, Хԝәде ча дьньһерʹә сәр кʹьшандьна щьхаре у хәбьтандьна наркотикайе. Диса жи ԝана бь Кʹьтеба Пироз щаба мә дьдан. Әм ԛайил бун һәрʹьн Ода Щьвата, кʹидәре кӧ әԝана тʹоп дьбун.

Мьнрʹа чәтьн бу һәрʹьм щьвате, чьмки мьн хԝә жь мәрийа дур дьгьрт, у мьн хԝәш нәдьһат, кӧ мәрьвед һәвалһʹьз незики мьн дьбун, йед кӧ бь тʹәрбәти хԝәкьри бун. Әз дӧдьли дьбум ԝе йәкеда, кӧ нетед ԝан һьнәка тʹәмьз ьн у мьн ида нәдьхԝәст диса һәрʹьм сәр щьвате. Ле ча һәргав, мьн Хԝәдерʹа дӧа кьр, сәва кӧ хԝәстьна мьн һәбә әз диса рʹасти ԝан бем. Паши ԝе йәке хԝәстьнәкә мәзьн щәм мьн пешда һат, кӧ тʹәви Шәʹдед Йаһоԝа Кʹьтеба Пироз һин бьм.

ЧАԜА КʹЬТЕБА ПИРОЗ ЖИЙИНА МЬН ГӦҺАСТ: Мьн фәʹм дькьр кӧ гәрәке тʹәрка наркотикайе бьдьм у мьн һеса тʹәрьканд. Ле мьнрʹа гәләк чәтьн бу тʹәрка щьхаре бьдьм. Мьн чәнд щара ԛәԝат дьда хәбате, ле щәм мьн нәдьһатә стандьне. Чахе мьн дьбьһист дәрһәԛа ԝан мәрийа, йед кӧ тʹәрка щьхаре данә у ида тʹӧ щар хԝә ль ве йәке нәгьртьнә, мьн дәстпедькьр аликʹарийе жь Йаһоԝа бьхԝазьм. Ԝәʹдә шунда мьн карьбу тʹәрка щьхаре бьдьм. Һьнге мьн фәʹм кьр, ԝәки чьԛас фәрз ә бь дьл Йаһоԝарʹа дӧа бькьн у дьле хԝә ԝирʹа вәкьн.

Хенщи ԝе йәке мьн гәрәке гӧһастьнед мәзьн бькьра нав кʹьнщхԝәкьрьн у хәмьландьна хԝәда. Чахе әз щара пешьн чумә Ода Щьвата, мьн пʹорʹе хԝә тʹик дабу сәкьнандьне, ортʹеда жи хәзәкә ԛальм рʹәнге шин бу. Паше мьн пʹорʹе хԝә сор рʹәнг кьр. Мьн кʹьнщед щинс у кӧртьке чʹәрмийә бь ньвисара ль хԝә дькьр. Рʹаст ә, Шәʹдед Йаһоԝа дәрһәԛа кʹьнщхԝәкьрьн у хәмьландьна мьн бь нәрми тʹәви мьн хәбәр дьдан, ле диса жи әз нәдьфькьрим кӧ гәрәке ве йәкеда тьштәки бьгӧһезьм. Щарәке әз фькьрим дәрһәԛа 1 Йуһʹәнна 2:15-17, кʹидәре кӧ ӧса те готьне: «Дьнйайе һʹьз нәкьн, нә жи ԝан тьштед кӧ дьнйайеда нә. Һәгәр йәк дьнйайе һʹьз дькә, һʹьзкьрьна Баве нава ԝида тʹӧнә». Әз һатьмә сәр ԝе нете, кӧ кʹьнщхԝәкьрьна мьн һʹьзкьрьн һьндава ве дьнйайе әʹйан дькә. Сәва кӧ мьн һʹьзкьрьна хԝә һьндава Хԝәде бьда кʹьфше, мьн гәрәке кʹьнщхԝәкьрьна хԝә бьгӧһаста. Мьн һәма ӧса жи кьр.

Ԝәʹдә шунда мьн дит, ԝәки нә кӧ тʹәне Шәʹдед Йаһоԝа дьхԝазьн кӧ әз бемә щьвата, ле ӧса жи Хԝәде дьхԝазә. Гьлийе жь Ибрани 10:24, 25 ԝе йәкеда әз дамә баԝәркьрьне. Паши ԝе йәке, кӧ әз дьчумә сәр һʹәму щьвата у һе рʹьнд мәрьвед щьвате нас кьр, мьн хԝәст жийина хԝә тʹәсмили Йаһоԝа кьм у бемә ньхӧмандьне.

ЧЬ КʹАР МЬН СТАНД: Гәләк дьле мьн гьрт әв фькьр, кӧ Йаһоԝа мәщале дьдә мә, ԝәки тʹәви ԝи бьбьмә достед незик. Хәмкьрьн у дьлшәԝатийа ԝи әз һелан кьрьм чʹәʹв бьдьмә ԝи у пәй кӧрʹе ԝи, Иса Мәсиһ, һәрʹьм (1 Пәтрус 2:21). Мьн фәʹм кьр, чахе мәрьв һʹӧнӧред Мәсиһити бал хԝә пешда тинә, әԝ найе һʹәсабе кӧ әԝ шәхсийәта хԝә ӧнда дькә. Мьн гәләк ԛәԝат дьда хәбате, сәва кӧ һʹьзкьрьн у дьлшәԝатийе һьндава мәрийа бьдьмә кʹьфше. Һʹәта ньһа әз дьхәбьтьм кӧ һьндава жьна хԝә, кӧрʹе хԝә у хушк-бьред щьвате ӧса бьм, чаԝа кӧ Иса һьндава мәрьвада бу. Әв йәк кӧ әз пәй Иса дьчьм, али мьн кьр ԛәдьре хԝә бьзаньбьм у һʹьзкьрьне мәрьварʹа әʹйан кьм.

«Әԝана Һьндава Мьнда бь Ԛәдьр Бун». ГВАДАЛУПЕ ВИЛЙАРЕАЛ

САЛА БУЙИНЕ: 1964

ԜӘЛАТ: МӘКСИКА

БӘРЕ: БЬ ЖИЙИНӘКӘ БЕНАМУС ДЬЖИТ

ЖИЙИНА МЬНӘ БӘРЕ: Әз бажаре Һермосилойеда (Штата Сонорайе, Мәксика) һатьмә буйине, кʹидәре кӧ һʹәчʹи зәʹф мәрьв кʹәсибийеда дьжитьн. Баве мьн мьр чахе әз бьчʹук бум. Әм һʹәфт зарʹ бун, ләма жи дийа мьн гәләк дьхәбьти кӧ мьԛати мә бә. Пʹәре мә тʹӧнә бу кӧ сола хԝәрʹа бькʹьрʹьн, ләма жи әз тʹьме пʹехас дьгәрʹийам. Мә гьшка тʹәвайи дьжит. Әз жь бьчʹуктайе дьхәбьтим, сәва дийа хԝәрʹа кʹомәке бьбьм, кӧ әʹбура малбәте бькьн.

Дийа мә зәʹф дьхәбьти, ләма жи әм зарʹ гәләк ԝәʹдә тʹәне у бехԝәйи дьман. Чахе әз 6 сали бум, гәдәки 15 сали алийе сексуалида зорбәти мьн кьр. Әв йәк бь сала бәрдәԝам дьбу. Ахьрийе ньһерʹандьна мьн сәр сексе нәрʹаст бу. Ида бал мьн һәст һьндава мерада пешда дьһатьн у әз дьфькьрим кӧ әв тьштәкә нормал ә. Чахе мьн аликʹари жь дохдьра у кʹәшиша дьхԝәст, ԝана жи мьнрʹа дьгот, ԝәки проблемед мьн тʹӧнә нә у һәстед мьн тʹәбийәти нә.

Чахе әз 14 сали бум мьн дәстпекьр ча һомосексуал хԝә бьдьмә кʹьфше у мьн кʹьнще жьна хԝә дькьр. Мьн 11 сала хԝә ӧса дьда кʹьфше у тʹәви щурʹә-щурʹә мера дьжит. Ԝәʹдә шунда әз пʹешәки һин бум кӧ пʹорʹа чекьм у мьн салона бәдәԝбуне вәкьр. Ле диса жи әз бәхтәԝар нибум. Әʹмьре мьн бь кӧл-дәрда у нәмамийе тʹьжә бу. Мьн фәʹм дькьр, ԝәки кьред мьн нәрʹаст ьн. Мьн пьрс дьда хԝә: «Гәло ԛә мәрьвед баш у бь итʹбар һәнә?»

Әз дәрһәԛа хушка хԝәйә мәзьн фькьрим. Әԝ тʹәви Шәʹдед Йаһоԝа Кʹьтеба Пироз һин дьбу у һатә ньхӧмандьне. Әԝе мьнрʹа гьли дькьр дәрһәԛа ԝе йәке чь кӧ педьһʹәсийа, ле мьнрʹа һʹәԝас нибу. Ле диса жи әз ԝерʹа у малбәта ԝерʹа фьрнаԛ дьбум. Мьн дьдит, кӧ әԝ у мере ԝе һәв һʹьз дькьн, ԛәдьре һәв заньн у һьндава һәвда ԛәнщ ьн. Ахьрийа-ахьрийе мьн жи дәстпекьр тʹәви Шәʹдед Йаһоԝа Кʹьтеба Пироз һин бьм. Пешийе мьн бе дьл әв йәк дькьр, ле паше һәр тьшт һатә гӧһастьн.

ЧАԜА КʹЬТЕБА ПИРОЗ ЖИЙИНА МЬН ГӦҺАСТ: Шәʹдед Йаһоԝа әз тʹәглифи щьвата хԝә кьрьм у әз чум. Мәрьв тʹьме мьн дькʹәнийан, ле Шәʹдед Йаһоԝа ӧса нибун. Әв тьштәкә тʹәзә бу бона мьн. Ԝана бь дьлгәрми әз сьлав дькьрьм у һьндава мьнда бь ԛәдьр бун. Әве йәке гәләк дьле мьн гьрт.

Ле чахе әз чумә щьвата мәзьнә Шәʹдед Йаһоԝа, әз һе зедә ԝанарʹа фьрнаԛ бум. Мьн гәләк мәрьвед мина хушка хԝә дит, демәк мәрьвед дьлтʹәмьз у дьлсах. Мьн пьрс да хԝә: «Дьбә кӧ һәма әԝана нә әԝ мәрьвед баш у бь итʹбар, кʹижан мьн һаԛас ԝәхт дьгәрʹийа?» Әз әʹщебмайи мам, гава мьн һʹьзкьрьн у йәкти нав ԝанда дит, ӧса жи кӧ ԝана бь Кʹьтеба Пироз щаба һʹәму пьрсед мьн дьдан. Мьн фәʹм кьр, ԝәки әԝана бь сайа Кʹьтеба Пироз бунә мәрьвед ӧса баш. Һьнге әз һатьмә сәр ԝе нете, кӧ гәрәке бь тʹәмами жийина хԝә бьгӧһезьм, сәва кӧ бьбьмә йәк жь ԝан.

Мьн хԝә мина жьна дьда кʹьфше, ләма жи мьн гәрәке һәр тьшт нав хԝәда бьгӧһаста. Мәсәлә, хәбәрдан, жест, кʹьнщхԝәкьрьн, стила пʹорʹ у һәвалед хԝә. Һәвалед мьни бәре мьн дькʹәнийан у дьготьн: «Тӧ чьма әве йәке дьки? Тӧ ӧса мә хԝәш дьһати. Һинбуна Кʹьтеба Пироз чи тәрʹа нә?» Мьнрʹа һеса нибу тʹәрка жийина хԝәйә бәре бьдьм.

Ле мьн заньбу ԝәки мәрьв дькарьн гӧһастьнед мәзьн нав хԝәда бькьн у ԝе йәкеда гьлийе жь 1 Корьнтʹи 6:9-11 әз дамә баԝәркьрьне. Ԝедәре ньвисар ә: «Чьма һун ньзаньн кӧ йед нәһәԛ ԝе Пʹадшатийа Хԝәде ԝар нәбьн? Нәхапьн! Нә бенамус, нә пʹутпʹарьст, нә зьнекʹар, нә ԛӧндә, нә кʹонә, . . . Пʹадшатийа Хԝәде ԝе ԝар нәбә. У жь ԝә һьнәк ӧса бун. Ле һун жь гӧна һатьнә шуштьне». Әԝ гьли гәләк дьле мьн гьртьн. Йаһоԝа бәре али ԝан мәрийа кьрийә, кӧ бенә гӧһастьне у әԝи али мьн жи кьр. Әз чәнд сала сәр хԝә дьхәбьтим у мьнрʹа һеса нибу бемә гӧһастьне, ле ширәт у һʹьзкьрьна Шәʹдед Йаһоԝа ԝе йәкеда али мьн кьрьн.

ЧЬ КʹАР МЬН СТАНД: Ньһа әз бь жийинәкә нормал дьжим. Әз зәԝьщи мә у тʹәви жьна хԝә принсипед Кʹьтеба Пироз кӧрʹе хԝә жи һин дькьм. Мьн тʹәрка жийина хԝәйә бәре дайә, у иро әз гәләк кʹәрәма дьстиньм, жь бо чь жи гәләк ша мә. Әз рʹуспийе щьвате мә у мьн һәла һе али һьнә мәрийа жи кьрийә, кӧ рʹастийа Хԝәде ԛәбул кьн. Чахе дийа мьн дит, кӧ әз һатьмә гӧһастьне, һʹәсабе шабуна ԝе тʹӧнә бу, әԝ жи ԛайил бу һинбуна Кʹьтеба Пироз дәстпекә у һатә ньхӧмандьне. Хушка мьнә бьчʹук тʹәрка жийина хԝәйә бенамуси да у әԝ жи бу Шәʹде Йаһоԝа.

Әԝед кӧ заньбун, ԝәки мьн бәре бь жийинәкә чь щурʹәйи дьжит, дьбежьн ԝәки әз алийе башда һатьмә гӧһастьне. Ле әз заньм бь сайа чь әԝ гӧһастьн һатьнә стандьне. Бәре мьн аликʹари жь гәләка дьхԝәст, ле мьн ширәтәкә баш жь ԝана нәдьстанд. Бь рʹасти тʹәне Йаһоԝа али мьн кьр. Мьн хԝә бекер һʹәсаб дькьр, ле Йаһоԝа дина хԝә да мьн. Әԝи һʹьзкьрьн у сәбьр һьндава мьнда да кʹьфше. Әԝ йәк кӧ Хԝәдайе ӧса Һьмзор, билан у бь һʹьзкьрьне тʹьжә дина хԝә да мьн у али мьн кьр, сәва бемә гӧһастьне, гәләк сәр мьн һʹӧкӧм бу.

«Әз Һесир Бум у Мьн Тʹәнебун Тʹәхмин Дькьр». КАДЗУХИРО КУНИМОТИ

САЛА БУЙИНЕ: 1951

ԜӘЛАТ: ЖАПОНЙА

БӘРЕ: АЖОВАНЕ БИСИКЛЕТЕ ЛӘЩМӘЙДАНАДА

ЖИЙИНА МЬНӘ БӘРЕ: Әз шәһәрәки ль һәрема Сидзуокада (Жапонйа), мәзьн бумә. Әм һʹәйшт нәфәр маләкә бьчʹукда дьжитьн. Дькʹана баве мьн һәбу, әԝи бисиклет дьфьротьн. Жь бьчʹуктайе әԝи әз дьбьрьмә ләщмәйдана ажотьна бисиклета, у ӧса һʹәԝаса мьн һьндава ве спорте пешда һат. Баве мьн дьхԝәст, ԝәки әз жи бь һостәти бисиклете бажом у бькʹәвьмә ләща. Чахе әз һе мәкʹтәбеда һин дьбум, әԝи дәстпекьр ажотьна бь һостәти мьн һин кә. Мәкʹтәбеда, кʹомед бьльндда әз се щара пәй һәв ләщмәйданед мьләтийейә һәрсалида, ажотьна бисиклетеда сәр кʹәтьм. Һьнә ԝәʹдә шунда әз һатьмә тʹәглифкьрьне, ԝәки университетеда һин бьм, ле мьн инкʹар кьр, чьмки дьхԝәст бькʹәвьмә мәкʹтәба спорте. Чахе әз 19 сали бум, әз ида ажотьна бисиклетеда һостә бум.

Ԝи ԝәʹдәйида нетәкә мьн һәбу, мьн дьхԝәст бьбьмә ажоване бисиклетейи һәри баш Жапонйайеда. Мьн дьхԝәст гәләк пʹәрә ԛазанщ кьм, сәва кӧ малбәта хԝә ӧса хԝәй кьм, ԝәки әԝана һʹәԝще тʹӧ тьшти нибьн. Мьн тʹәмамийа ԝәʹде хԝә сәр ве спорте хәрщ дькьр. Чахе әз жь бо ве спорте ӧса дьԝәстийам кӧ ԛьдум дькʹәтьм, һәр щар мьн хԝәрʹа дьгот, ԝәки әз һатьмә буйине кӧ бьбьмә ажоване һостә у чь жи һәбә әз гәрәке пешда һәрʹьм! Мьн бәрдәԝам дькьр ве спортева мьжул бьм. Һеди-һеди мьн дәстпекьр кʹәда дәсте хԝә ԛазанщ кьм. Сала пешьн ләща тʹәви ажованед щаһьлда, мьн щийе йәке гьрт. Ле сала дьн әз һатьмә тʹәглифкьрьне сәр ԝе ләщмәйдане, кʹидәре ԝе сафи буйа, кӧ кʹе ԝе бьбә ԛәһрәмане Жапонйайе. Шәш щара мьн ләща ӧсада щийе дӧда дьгьрт.

Жь бо ԝе йәке кӧ мьн тʹьме щийед бьльнд дьгьрт, әз нав дькьрьм ча «ньгед Токайийи ԛайим» (Токай һәремәкә Жапонйайеда йә). Хәйсәте мьн гьран бу у ԝәʹде ләща әз гәләк сәрт бум, ләма жи ажованед дьн мьн дьтьрсийан. Мьн пʹәре ԛальм ԛазанщ дькьр у дькарьбу һәр тьшти хԝәрʹа бькʹьрʹьм, чь кӧ бьхԝазьм. Мьн маләк кʹьрʹи, кʹижанеда ода спорте бь тренажоред модерн һәбун. Мьн ӧса жи әʹрәбәкә ӧса бьһа хԝәрʹа кʹьрʹи, баһе кʹижане ԝәкә баһе маләке бу. Сәва кӧ пʹәре хԝә хԝәй кьм, мьн мал у кʹахазед ԛимәт дькʹьрʹин.

Ле диса жи әз һесир бум у мьн тʹәнебун тʹәхмин дькьр. Ԝи ԝәʹдәйи әз ида зәԝьщи бум у зарʹед мә һәбун, ле әз гәләк щар сәр нәфәред хԝә жь бо тьштед бьчʹук һерс дькʹәтьм. Әԝана гәләк жь мьн дьтьрсийан, ләма жи һәргав сәрчʹәʹве мьн дьньһерʹин, һәла бәшәра мьн ча нә.

Ԝәʹдә шунда жьна мьн һинбуна Кʹьтеба Пироз тʹәви Шәʹдед Йаһоԝа дәстпекьр. Әве йәке гӧһастьнед мәзьн пәй хԝә ани. Рʹожәке жьна мьн мьнрʹа гот, ԝәки дьхԝазә һәрʹә щьвата Шәʹдед Йаһоԝа, у мьн сафи кьр, ԝәки әм малбәтева гәрәке һәрʹьн. Һʹәта ньһа те бира мьн, ԝәки ча еварәке рʹуспик һатә мала мә у тʹәви мьн һинбуна Кʹьтеба Пироз дәстпекьр. Чь кӧ әз пеһʹәсийам, гәләк дьле мьн гьрт.

ЧАԜА КʹЬТЕБА ПИРОЗ ЖИЙИНА МЬН ГӦҺАСТ: Әзе тʹӧ щар бира нәкьм, ԝәки гьлийе жь Әфәси 5:5 ча сәр мьн һʹӧкӧм бун. Ԝедәре ньвисар ә: «Һун ве йәке заньбьн кӧ тʹӧ ԛав, йан һʹәрам, йан тьмакʹар (кӧ пʹутпʹарьст ә) Пʹадшатийа Мәсиһ у Хԝәдеда ԝар набә». Мьн фәʹм кьр, ԝәки ләще ажотьне хӧмарбазийева гьредайи йә у тьмайе пешда тинә. Исафа мьн дәстпекьр мьн бьчәрчьринә. Мьнрʹа зәлал бу кӧ һәрге әз дьхԝазьм дьле Йаһоԝа Хԝәде ша кьм, әз гәрәке тʹәрка ве спорте бьдьм. Ле һеса нибу әԝе сафикьрьне биньм сери.

Тʹәзә ләщед кӧ мьнрʹа һәв дьһатьн, хьлаз бьбун у мьн дьхԝәст бьгьһижьмә һе зедә сәркʹәтьна. Ле мьн дина хԝә дьдайе, ԝәки бь сайа һинбуна Кʹьтеба Пироз һʹьше мьнда әʹдьлайи йә у дьле мьн рʹьһʹәт ә. Әв һʹӧнӧр гәләк щӧдә дьбьн жь ԝан һʹӧнӧра, кӧ бона сәркʹәтьне мьнрʹа лазьм бун! Паши ԝе йәке кӧ мьн һинбуна Кʹьтеба Пироз дәстпекьр, әз тʹәне се щара кʹәтьмә ләщмәйдане, ле диса жи мьнрʹа чәтьн бу тʹәрка ве спорте бьдьм. Әз тʹәвиһәв дьбум, мьн ньзаньбу әзе ча әʹбура малбәта хԝә бькьм. Әз хальфи бум, нә дькарьбум пешда бьчума, нә жи пашда. Хенщи ԝе йәке бьра-пьсмамед мьн мьԛабьли баԝәрийа мьнә тʹәзә бун. Баве мьн гәләк дьлтәнг бьбу у жь мьн хәйди бу. Әз ӧса бәрхԝә дькʹәтьм кӧ жь бо стресе нәхԝәш кʹәтьм.

Ԝи ԝәʹде гьранда, леколина Кʹьтеба Пироз у щьватед Шәʹдед Йаһоԝа гәләк али мьн кьрьн. Баԝәрийа мьн һеди-һеди ԛәԝи дьбу. Мьн жь Йаһоԝа һиви дькьр, гӧһ бьдә дӧайед мьн у али мьн бькә, ԝәки щаба дӧайед хԝә бьвиньм. Мьн хԝә дьһа баш тʹәхмин кьр, гава жьна мьн гот, ԝәки сәва кӧ әԝ бәхтәԝар бә, нә лазьм ә маләкә мәзьнда бьжи. Гав пәй гава әз рʹӧһʹанида мәзьн дьбум.

ЧЬ КʹАР МЬН СТАНД: Әз рʹастийа гьлийе Исада избат бум, кʹижан кӧ Мәтта 6:33-да ньвисар ә: «Бәре пешьн ль Пʹадшатийа Хԝәде бьгәрʹьн у бькьн кӧ рʹастийа ԝи бьԛәдиньн у әԝ һʹәмуйе ԝәрʹа бенә дайине». Чаԝа кӧ Иса соз дайә, щәм мә тʹьме һәр тьштед бона жийине лазьм, һәнә. Рʹаст ә, пʹәре кӧ әз иро ԛазанщ дькьм 30 щара кемтьр ә жь ԝан пʹәра, кʹижан кӧ мьн бәре ләщада ԛазанщ дькьр, ле диса жи нав ԝан 20 салед пашьнда тʹӧ тьшт жь малбәта мьн кем нәдьбу.

Хенщи ԝе йәке, ньһа әз шабунәкә мәзьн дьстиньм кӧ бона шьхӧле Хԝәде һәвкʹарийе тʹәви хушк-бьра дькьм. Ԝәʹдә ӧса зу дәрбаз дьбә, ԝәки әз нә жи тедәрдьхьм. Ӧса жи малбәтеда һәләԛәтийа мә баш буйә. Се кӧрʹед мьн тʹәви жьнед хԝә бь амьни Йаһоԝарʹа хьзмәт дькьн.