Il-Bibbja Tbiddel il-Ħajjiet
X’INFLUWENZA lil punk rocker antisoċjali biex jitgħallem iħobb lin-nies u jirsisti biex jgħin lil oħrajn? X’qanqal lil raġel fil-Messiku biex iwarrab ħajja immorali? Wieħed li kien minn taʼ quddiem fit-tlielaq tar-roti fil-Ġappun, għala ħalla t-tlielaq warajh fi sforz biex jaqdi lil Alla? Ikkunsidra x’għandhom x’jgħidu dawn in-nies.
“Kont Bniedem Pastaż, Arroganti, u Aggressiv.”—DENNIS O’BEIRNE
SENA TAT-TWELID: 1958
POST TAT-TWELID: L-INGILTERRA
STORJA: PUNK ROCKER ANTISOĊJALI
IL-PASSAT TIEGĦI: Il-familja tiegħi min-naħa taʼ missieri hi Irlandiża, u jien trabbejt bħala Kattoliku Irlandiż. Però, ġeneralment kien ikolli mmur il-knisja waħdi, u ma kontx nieħu pjaċir immur. Xorta waħda, kelli għatx għall-affarijiet spiritwali. Kont ngħid it-Talba tal-Missierna regolarment, u għadni niftakarni mimdud fuq is-sodda billejl naħseb dwar is-sinifikat tagħha. Kont naqsamha fi frażijiet separati u nipprova nifhem xi tfisser kull frażi.
Bħala adoloxxent, kont involut fil-moviment Rastafaru. Kont interessat ukoll f’ideali politiċi bħal-Lega Anti-Nazi. Imma involvejt ruħi sew fl-attitudni ribelluża tal-moviment punk rock. Kont nieħu d-drogi, speċjalment il-marijuana, li kont inpejjipha kważi kuljum. Billi adottajt l-attitudni taʼ “x’jimpurtani,” kont nixrob ħafna, nirriskja ħajti, u ftit li xejn kien jimpurtani minn nies oħrajn. Kont antisoċjali; bilkemm kont inkellem lil xi ħadd sakemm kien jidhirli li d-diskussjoni kienet bis-sens. Saħansitra kont nirrifjuta li jittiħduli ritratti. Meta issa nħares lura, nistaʼ nara li kont bniedem pastaż, arroganti, u aggressiv. Maʼ min kien qrib tiegħi biss kont qalbi tajba u ġeneruż.
Meta kelli madwar 20 sena, bdejt nieħu interess fil-Bibbja. Ħabib tiegħi, traffikant tad-droga, kien beda jaqra l-Bibbja waqt li kien il-ħabs, u kellna diskussjoni twila dwar ir-reliġjon, il-Knisja, u l-irwol taʼ Satana fid-dinja. Xtrajt Bibbja u bdejt nistudjaha waħdi. Jien u sieħbi konna naqraw siltiet mill-Bibbja, niltaqgħu flimkien biex niddiskutu dak li konna tgħallimna, u mbagħad naslu għal konklużjonijiet. Dan baqaʼ għaddej xhur sħaħ.
Dawn huma xi ftit mill-konklużjonijiet li wasalna għalihom minn dak li qrajna: li qed ngħixu fl-aħħar jiem taʼ din id-dinja; li l-Kristjani għandhom jippritkaw l-aħbar tajba tas-Saltna t’Alla; li m’għandhom ikunu ebda parti minn din id-dinja, inkluż il-politika tagħha; u li l-Bibbja toffri gwida morali f’lokha. Stajna naraw b’mod ċar li l-Bibbja hi vera u li bilfors hemm reliġjon vera. Imma liema? Ħsibna dwar il-knejjes l-aktar popolari bil-pompa u ċ-ċerimonji tagħhom kif ukoll dwar l-involviment tagħhom fil-politika, u rajna li Ġesù ma kien jagħmel xejn minn dan. Konna
nafu li Alla ma kienx qed juża lilhom, u għalhekk iddeċidejna li nikkunsidraw xi reliġjonijiet inqas magħrufin biex naraw x’kellhom x’joffru.Konna niltaqgħu maʼ membri taʼ reliġjonijiet bħal dawn u nistaqsuhom serje taʼ mistoqsijiet. Konna nafu x’tgħid il-Bibbja dwar kull mistoqsija, u għalhekk mingħajr diffikultà stajna nindunaw jekk kinux iwieġbu fi qbil mal-Kelma t’Alla. Wara laqgħat bħal dawn, kont dejjem nitlob lil Alla, ‘Jekk dawn in-nies jirrappreżentaw ir-reliġjon vera, jekk jogħġbok qanqalni ħalli nkun irrid nerġaʼ niltaqaʼ magħhom.’ Imma wara xhur sħaħ taʼ laqgħat bħal dawn, kont għadni ma sibtx grupp li wieġeb il-mistoqsijiet tagħna mill-Bibbja, u lanqas ma kelli x-xewqa li nerġaʼ niltaqaʼ maʼ xi ħadd minnhom.
Fl-aħħar, jien u sieħbi ġejna f’kuntatt max-Xhieda taʼ Ġeħova. Staqsejniehom l-istess mistoqsijiet bħas-soltu, u wiġbuna mill-Bibbja. Dak li qalu kien jaqbel perfettament maʼ dak li konna tgħallimna diġà. B’hekk, staqsejniehom mistoqsijiet li kien għad ma kellniex tweġiba għalihom mill-Bibbja—bħal pereżempju, dwar kif Alla jqis it-tipjip u d-drogi. Għal darb’oħra, setgħu jwieġbu billi jużaw il-Kelma t’Alla. Qbilna li mmorru laqgħa fis-Sala tas-Saltna.
Għalija kien diffiċli li nattendi laqgħa. Tant ma kontx soċjevoli li ma ħadtx pjaċir li ġew fuqi dawk in-nies kollha dħulin u lebsin pulit. Kont ċert li xi wħud minnhom kellhom motivi ħżiena meta ġew ikellmuni, u ma ridtx imur iktar laqgħat. Imma bħas-soltu, tlabt lil Alla biex inkun nixtieq nerġaʼ niltaqaʼ maʼ dawn in-nies jekk huma jirrappreżentaw ir-reliġjon vera, u jien ħassejt xewqa kbira ħafna biex nistudja l-Bibbja max-Xhieda.
KIF IL-BIBBJA BIDDLITLI ĦAJTI: Kont naf li kelli nieqaf nieħu d-drogi, u rnexxieli naqtagħhom faċilment. Il-vera sfida kienu s-sigaretti. Ipprovajt diversi drabi nieqaf inpejjep imma għalxejn. Meta smajt dwar oħrajn li sempliċement irmew is-sigaretti tagħhom u qatt iktar ma reġgħu pejpu, tlabt lil Ġeħova dwar il-kwistjoni. Minn dakinhar ’l hawn, bl-għajnuna taʼ Ġeħova, stajt nieqaf inpejjep. Kont tgħallimt il-valur taʼ li nitkellem bl-onestà u bis-sinċerità maʼ Ġeħova fit-talb.
Bidla kbira oħra li għamilt kienet tinvolvi l-ilbies u d-dehra tiegħi. Fl-ewwel laqgħa tiegħi fis-Sala tas-Saltna, xagħri kien imqajjem u kellu strixxa blu jgħajjat fih. Iktar tard, żbajt xagħri oranġjo jixgħel. Kont ilbist jeans u ġakketta tal-ġilda bi slogans fuqha. Ma ħassejtx li kelli għalfejn ninbidel, avolja x-Xhieda rraġunaw miegħi b’qalb tajba. Iżda, fl-aħħar, ħsibt dwar l-1 Ġwanni 2:15-17: “Tħobbux id-dinja u lanqas dak li hemm fid-dinja. Jekk xi ħadd iħobb id-dinja, l-imħabba tal-Missier mhix fih.” Wasalt għall-konklużjoni li bl-apparenza tiegħi kont qed nuri mħabba għal din id-dinja u li sabiex nuri l-imħabba tiegħi għal Alla, kelli bżonn ninbidel. U hekk għamilt.
Maż-żmien, irrealizzajt li ma kinux biss ix-Xhieda li riduni nattendi l-laqgħat Kristjani. Ebrej 10:24, 25 urieni li din kienet xi ħaġa li Alla riedni nagħmel. Wara li bdejt nattendi l-laqgħat kollha u nsir naf verament lin-nies, iddeċidejt li nissimbolizza d-dedikazzjoni tiegħi lil Ġeħova billi nitgħammed.
KIF IBBENEFIKAJT: Tqanqalt profondament mill-mod li Ġeħova jippermettilna jkollna relazzjoni intima miegħu. Il-ħniena u l-interess tiegħu ġegħluni nimitah u nsegwi lil Ibnu, Ġesù Kristu, bħala l-mudell tiegħi fil-ħajja. (1 Pietru 2:21) Tgħallimt li waqt li qed nistinka biex ikolli personalità Kristjana, xorta jistaʼ jkolli l-identità tiegħi stess. Ħdimt biex ikkultivajt spirtu taʼ mħabba u interess. Nipprova nkun bħal Kristu fil-mod kif nittratta lil marti u lil ibni. U jimpurtani ħafna minn ħuti fil-verità. Il-fatt li nsegwi lil Kristu tani d-dinjità, ir-rispett lejja nnifsi, u l-abbiltà li nuri mħabba għal oħrajn.
“Ittrattawni b’Dinjità.”—GUADALUPE VILLARREAL
SENA TAT-TWELID: 1964
POST TAT-TWELID: IL-MESSIKU
STORJA: ĦAJJA IMMORALI
IL-PASSAT TIEGĦI: Jien kont wieħed minn sebat itfal, u trabbejt f’Hermosillo, f’Sonora, il-Messiku, post mifni b’ħafna faqar. Missieri miet meta kont għadni naqra taʼ tifel, u għalhekk ommi kellha taħdem biex tmantnina. Ġeneralment kont inkun ħafi għax ma kellniex flus biex nixtru ż-żraben. F’età żgħira bdejt naħdem biex ngħin fl-ispejjeż tal-familja. Bħal ħafna familji, konna ngħixu ħafna nies f’dar żgħira.
Għall-biċċa l-kbira tal-ġurnata, ommi ma kinitx tkun hemm biex tipproteġi lilna t-tfal. Meta kelli 6 snin, sfajt vittma taʼ ġuvni taʼ 15-il sena li beda jabbużani sesswalment. Dan l-abbuż kompla għal żmien twil. Wieħed mill-effetti taʼ dan kien li sirt konfuż sesswalment. Ħsibt li kien normali li ninġibed lejn l-irġiel. Meta fittixt l-għajnuna taʼ tobba jew membri tal-kleru, assigurawni li ma kelli ebda problema u li s-sentimenti tiegħi kienu normali.
Meta kelli 14-il sena, iddeċidejt li naġixxi u nilbes bħal omosesswali. Bqajt hekk sa 11-il sena wara, u saħansitra għext maʼ diversi rġiel differenti matul dak iż-żmien. Eventwalment, ħadt kors biex insir stilista tax-xagħar u kont nimmaniġġa ħanut tas-sbuħija. Madankollu, ma kontx ferħan. Spiss batejt u ħassejtni tradut. Kont inħoss li dak li kont qed nagħmel ma kienx sewwa. Bdejt nistaqsi lili nnifsi, ‘Jeżistu nies tajbin u taʼ min jirrispettahom?’
Ħsibt dwar oħti. Hi bdiet tistudja l-Bibbja max-Xhieda taʼ Ġeħova u eventwalment tgħammdet. Kienet tgħidli dak li kienet titgħallem, imma ma kontx nagħti kas. Xorta waħda, kont nammira l-ħajja u ż-żwieġ tagħha. Stajt nara li hi u żewġha kienu verament iħobbu u jirrispettaw lil xulxin. Kienu jittrattaw lil xulxin b’qalb tajba. Maż-żmien, waħda mix-Xhieda taʼ Ġeħova bdiet tistudja l-Bibbja miegħi. Għall-ewwel kont sempliċement nagħmel l-istudju mingħajr entużjażmu, imma mbagħad l-affarijiet inbiddlu.
KIF IL-BIBBJA BIDDLITLI ĦAJTI: Ix-Xhieda stidnuni għal waħda mil-laqgħat tagħhom, u jien mort. Kienet esperjenza ġdida għalija. In-nies inġenerali kienu jiddieħqu bija imma x-Xhieda kienu differenti. Laqgħuni b’qalb tajba, u ttrattawni b’dinjità. Dan messli qalbi.
L-impressjoni tajba tiegħi tax-Xhieda ssaħħet meta attendejt assemblea. Rajt li anki fi gruppi kbar, dawn in-nies kienu bħal oħti—ġenwini u sinċieri. Staqsejt lili nnifsi jekk dan kienx il-grupp taʼ nies tajbin u taʼ min jirrispettahom li kont ilni nfittex. L-imħabba u l-unità tagħhom għaġġbuni, bħalma għaġġibni wkoll il-mod kif użaw il-Bibbja biex iwieġbu kull mistoqsija. Intbaħt li kienet il-Bibbja li kienet l-influwenza pożittiva f’ħajjithom. U indunajt ukoll li kien se jkolli nagħmel ħafna bidliet biex insir wieħed minnhom.
Fil-fatt, kelli nagħmel trasformazzjoni sħiħa, għax kont qed ngħix ħajja femminili. Il-kliem, il-manjieri, l-ilbies, l-istil tax-xagħar, u l-għażla tal-ħbieb tiegħi kollha kelli bżonn inbiddilhom. Il-ħbieb li kelli qabel bdew iwaqqgħuni għaċ-ċajt, billi kienu jgħidu: “Għala qed tagħmel dan? Mhux tajjeb kont?
Tistudjax il-Bibbja. Ma jonqsok xejn.” Iżda l-iktar affarijiet diffiċli biex inbiddilhom kienu l-prattiki tal-ħajja immorali tiegħi.Minkejja dan, kont naf li bidliet kbar kienu possibbli, għax il-kliem tal-Bibbja fl-1 Korintin 6:9-11 kien messli qalbi: “X’inhu! Ma tafux li l-inġusti ma jirtux is-saltna t’Alla? Titqarrqux. La ż-żienja, la l-idolatri, la l-adulteri, la l-irġiel miżmumin għal skopijiet mhux naturali, la l-irġiel li jimteddu maʼ l-irġiel . . . ma jirtu s-saltna t’Alla. U madankollu, hekk kienu xi wħud minnkom. Imma ġejtu maħsulin.” Ġeħova għen lin-nies jinbidlu lura dak iż-żmien, u għen lili wkoll. Il-bidla ħadet diversi snin u kelli nissielet ħafna, imma l-gwida u l-imħabba tax-Xhieda għenuni ħafna.
KIF IBBENEFIKAJT: Illum, qed ngħix ħajja normali. Iżżewwiġt, u jien u marti qed ngħallmu lit-tifel tagħna biex jgħix fi qbil mal-prinċipji tal-Bibbja. Issa ilni ħafna li tlaqt il-ħajja li kelli qabel, u qed ingawdi ħafna benefiċċji u privileġġi spiritwali. Naqdi bħala anzjan fil-kongregazzjoni, u stajt ngħin lil oħrajn jitgħallmu l-verità tal-Kelma t’Alla. Il-bidliet li għamilt f’ħajti tant ferrħu lil ommi li hi aċċettat studju tal-Bibbja u minn dakinhar ’l hawn saret Kristjana mgħammda. Waħda minn ħuti li kienet tgħix ħajja immorali wkoll saret waħda mix-Xhieda taʼ Ġeħova.
Saħansitra xi wħud li kienu jafuni qabel issa jirrikonoxxu li nbdilt għall-aħjar. U jien naf x’kien hemm wara dawn il-bidliet. Fil-passat, fittixt għajnuna professjonali imma ngħatajt biss pariri ħżiena. Madankollu, Ġeħova verament għenni. Għalkemm ħassejt li ma kienx jixraqli, hu nnotani u ttrattani bl-imħabba u bil-paċenzja. Il-fatt li Alla tant meraviljuż, intelliġenti, u taʼ mħabba ta kasi u ried li jkolli ħajja aħjar kellu effett kbir fuqi.
“Ma Kontx Sodisfatt, u Ħassejtni Waħdi u Bla Siwi.”—KAZUHIRO KUNIMOCHI
SENA TAT-TWELID: 1951
POST TAT-TWELID: IL-ĠAPPUN
STORJA: ĊIKLISTA KOMPETITTIV
IL-PASSAT TIEGĦI: Trabbejt f’belt kwieta fi Shizuoka Prefecture, il-Ġappun, fejn il-familja tagħna, b’kollox tmienja, għexet f’dar żgħira. Missieri kien jimmaniġġa ħanut tar-roti. Minn mindu kont żgħir, kien jiħodni għat-tlielaq tar-roti u qanqalli l-interess fl-isport. Imbagħad missieri beda jippjana biex jien insir sewwieq professjonali tar-roti. Meta kont għadni fl-iskola sekondarja, beda jħarriġni bis-serjetà. Ftit snin wara, irbaħt il-kompetizzjoni nazzjonali tal-atletika tliet snin wara xulxin. Irċivejt offerta biex immur l-università, imma ddeċidejt li mmur direttament fi skola fejn iħarrġuk għat-tlielaq. Fl-età taʼ 19-il sena sirt ċiklista professjonali.
Sa dak iż-żmien, il-mira tiegħi fil-ħajja kienet li nsir l-aqwa ċiklista fil-Ġappun. Ippjanajt li naqlaʼ ħafna flus sabiex inkun nistaʼ nagħti lill-familja tiegħi ħajja
sigura u stabbli. Intfajt b’ruħi u ġismi fit-taħriġ tiegħi. Kull meta kont inħossni qalbi maqtugħa minħabba l-isfidi tat-taħriġ jew minħabba parti diffiċli taʼ tellieqa, kont ngħid lili nnifsi ripetutament li jien twilidt biex intellaq ir-roti u li b’xi mod kelli nippersisti f’dan. U hekk għamilt. Ix-xogħol iebes tiegħi beda jagħti l-frott. Fl-ewwel sena tiegħi, ħadt l-ewwel fost is-sewwieqa l-ġodda. Fit-tieni sena tiegħi, ikkwalifikajt biex nieħu sehem fit-tellieqa li kienet tiddetermina l-aqwa ċiklista tal-Ġappun. Sitt darbiet differenti ġejt it-tieni f’din it-tellieqa.Hekk kif bqajt fost l-aqwa sewwieqa, sirt magħruf bħala s-saqajn b’saħħithom taʼ Tokai, post fil-Ġappun. Kont kompetittiv ħafna. Maż-żmien, is-sewwieqa l-oħrajn kienu jibżgħu minni minħabba li kont bla ħniena fit-tlielaq. Id-dħul tiegħi kiber, u indunajt li stajt nixtri kulma kien jogħġobni. Xtrajt dar b’kamra tal-eżerċizzju mgħammra bl-aqwa magni. Xtrajt karozza barranija li kważi swiet daqs dar. Għas-sigurtà, bdejt ninvesti flusi fi proprjetà u fis-suq tal-ishma.
Xorta waħda, ma kontx sodisfatt, u ħassejtni waħdi u bla siwi. Sa dak iż-żmien kont miżżewweġ u kelli t-tfal, imma spiss kont bla sabar mal-familja tiegħi. Kont nitlef it-tempra maʼ marti u wliedi minħabba affarijiet żgħar. Huma bil-biżaʼ kienu jistudjaw l-espressjonijiet taʼ wiċċi biex jaraw jekk erġajtx kont burdata ħażina.
Imma, maż-żmien, marti bdiet tistudja l-Bibbja max-Xhieda taʼ Ġeħova. Dan wassal għal ħafna bidliet. Hi qaltli li riedet tattendi l-laqgħat tax-Xhieda taʼ Ġeħova, u għalhekk iddeċidejt li mmorru bħala familja. Għadni niftakar il-lejla meta anzjan ġie d-dar u beda jistudja l-Bibbja miegħi. Dak li tgħallimt ħalla impressjoni kbira fuqi.
KIF IL-BIBBJA BIDDLITLI ĦAJTI: Qatt ma se ninsa kif effettwatni l-Iskrittura taʼ Efesin 5:5. Din tgħid: “Ebda żieni jew bniedem mhux nadif jew rgħib—li jfisser li jkun idolatra—m’għandu wirt fis-saltna tal-Kristu u t’Alla.” Jien fhimt li t-tlielaq tar-roti kienu konnessi mal-logħob tal-ażżard u li l-isport kien jippromwovi spirtu rgħib. Il-kuxjenza tiegħi bdiet tniggiżni. Ħassejt li jekk ridt nogħġob lil Alla Ġeħova, kien se jkolli nieqaf nikkompeti. Imma din kienet deċiżjoni iebsa għalija.
Kont għadni kif spiċċajt l-iktar sena sodisfaċenti li qatt kelli fit-tlielaq, u xxennaqt għal iktar. Però, sibt li l-istudju tal-Bibbja kien iġegħelni nħossni kalm u trankwill—differenti ħafna mill-ispirtu li kelli bżonn biex nirbaħ it-tlielaq! Tellaqt biss tliet darbiet wara li bdejt nistudja, imma kien għad kelli qalbi xi ftit marbuta mat-tlielaq. Ukoll, ma kontx naf kif se mmantni lill-familja tiegħi. Ħassejtni staġnat, la stajt nimxi ’l quddiem u lanqas lura, u minħabba t-twemmin ġdid tiegħi, il-qrabati bdew jagħmluhieli diffiċli ħafna. Missieri kien diżappuntat għall-aħħar. Minħabba li ħassejtni maqsum, sirt saħansitra iktar stressat u żviluppajt ulċera.
Dak li għenni matul dak il-perijodu diffiċli kien li bqajt nistudja l-Bibbja u mmur il-laqgħat tax-Xhieda taʼ Ġeħova. Eventwalment, il-fidi tiegħi ssaħħet. Tlabt lil Ġeħova biex jismaʼ t-talb tiegħi u biex jgħinni nara li hu qed jismagħni. L-istress tiegħi naqas iżjed meta marti assiguratni li ma kellhiex bżonn tgħix f’dar kbira sabiex tkun kuntenta. Bil-mod il-mod għamilt progress.
KIF IBBENEFIKAJT: Tgħallimt li l-kliem taʼ Ġesù li nsibu f’Mattew 6:33 hu verament minnu. Hu qal: “Mela, ibqgħu fittxu l-ewwel is-saltna u s-sewwa tiegħu, u dawn l-affarijiet l-oħrajn kollha se jiżdidulkom.” Qatt ma naqsuna “l-affarijiet l-oħrajn” li Ġesù rrefera għalihom, jiġifieri, in-neċessitajiet bażiċi tal-ħajja. Għalkemm id-dħul tiegħi hu madwar terz taʼ dak li kont naqlaʼ bħala sewwieq, jien u familti ma naqasna xejn f’dawn l-aħħar 20 sena.
Aħjar minn hekk, meta naħdem jew inqim maʼ sħabi fit-twemmin, insib ferħ u sodisfazzjon li qatt ma kelli qabel. Il-ġranet lanqas narahom għaddejjin. Il-ħajja tal-familja tiegħi tjiebet ħafna wkoll. It-tliet uliedi u n-nisa tagħhom kollha saru qaddejja leali taʼ Ġeħova.