Biblia okinpatili innemilis

¿TLEN okipaleui se tlakatl tlen sapanoua okualaniaya makintlasojtla oksekimej uan makinpaleui? ¿Tlen okichi se telpochtli tlen chanti México makipatla inemilis uan ayakmo maauilnemi? ¿Tleka se telpochtli tlen chanti Japón okika ciclismo? Timitsyoleuaj xikita tlen okichijkej.

“Amo onikatka niyolkuali, onimoueyinekiaya uan sapanoua onikualaniaya” (DENNIS O’BEIRNE)

ONESKI ITECH XIUITL: 1958

UEYI ALTEPETL: INGLATERRA

OKSEKI TLAMANTLI: PUNK TLEN AMO OMOUIKAYA INUAN OKSEKIMEJ

TLEN ONIKCHIUAYA: Onimoskalti ken católico irlandés porque notajtsin okatka irlandés. Amo onechpaktiaya ijkuak nofamilia onechtitlaniaya maniuia noselti teopan. Pero onechpaktiaya nimomachtis Biblia. Ik non, nochipa onikijtouaya padrenuestro ijkuak yinikochiskia uan onimokuayejyekouaya tlen kijtosneki tlen ompa okijtouaya.

Ijkuak onikatka ok nitelpochtli onimokajkalaki inmiuan akinmej opouiayaj itech rastafari, noijki onimokajkalaki itech política uan amo otikinpaleuiayaj nazis. Pero okachi onechpaktiaya nimouikas inmiuan akinmej opouiayaj itech punk. Nochipa onikmotlaliliaya drogas pero okachi marihuana. Sapanoua onitlauanaya, amo onikpatioitaya nonemilis uan amo onechtekipachouaya tlen okinpanouaya oksekimej. Amo onimouikaya nion onimotlapouiaya inmiuan oksekimej uan amo onechpaktiaya manechkixtilika fotos. Ijkuak nikilnamiki tlen onikchiuaya, nikajsikamati amo onikatka niyolkuali, onimoueyinekiaya uan sapanoua onikualaniaya. San onikintlasojtlaya noyolikniuan.

Ijkuak onikpiaya 20 xiuitl okachi onimomachti tlen kijtoua Biblia. Se noyolikni tlen okinemakaya droga opejki kitlajtoltia Biblia kanin otsaktoka, se tonal opejki timotlapouiaj itech religión, teopan uan tlen kichiua Diablo nikan tlaltikpak. Onikmokoui se Biblia uan opejki niktlajtoltia. Noyolikni uan ne amo san sekan otiktlajtoltiayaj Biblia pero satepan san sekan otimonechikouayaj para tikitaskej tlen otimomachtijkej. Ijkon otikchijkej itech seki metstli.

Otikajsikamatkej tikatej itlamian tonalmej, akinmej kijtouaj kichiuaj ken Cristo moneki tetlapouiskej itech iTekiuajkayo toTajtsin Dios, amo moneki mokajkalakiskej itech política uan Biblia techiluia tlen uelis tikchiuaskej para tikpiaskej chipauak tonemilis. Otikneltokayaj Biblia tlamachtia tlen melauak, ik non, otimokuayejyekouayaj onka se religión tlen tlamachtia tlen melauak. Pero amo otikmatiayaj katli religión tlen melauak. Otikitakej tlen religión omokajkalakiaya itech política uan ken oiluichiuayaj. Noijki otikitakej amo okichiuayaj ken Jesús otlamachti. Otikajsikamatkej toTajtsin Dios amo okinseliaya non religiones, ik non, otikinmitakej okseki religiones tlen amo okachi okinmixmatiayaj.

Otikintlajtlanijkej tlen melauak tlamachtia Biblia sekimej tlen opouiayaj itech non religión. Tejuan otikmatiayaj tlen tlamachtia Biblia, ik non, otikitayaj kox tlen okijtouayaj mouika ika tlen kijtoua Biblia. Ijkuak inmiuan onimotlapouiaya oniktlatlaujtiaya toTajtsin Dios manechpaleui para uelis nikitas kox tlamachtiaj tlen melauak uan oksepa niknekis inmiuan nimotlapouis. Opanok seki metstli uan amikaj otechnankiliaya ika Biblia tlen otikintlajtlaniayaj, noijki ayakmo oniknekiaya inmiuan nimotlapouis.

Satepan otimotlapouijkej inmiuan iTlaixpantijkauan Jehová. Ijkuak itlaj otikintlajtlaniayaj nochipa otechnankiliaya ika Biblia. Tlen otechiluiayaj okatka ijkon ken tejuan yotikmatiayaj. Ik non, otikintlajtlanijkej seki tlamantli tlen ayamo otikmatiayaj, otikintlajtlanijkej ken kita toTajtsin Dios drogas uan tabaco. Yejuan otechnankilijkej ika Biblia. Otikinmiluijkej inmiuan otimonechikoskiaj itech kali kanin monechikouaj.

Onikitak oui inmiuan nimonechikos. Amo onechpaktiaya nimotlapouis inmiuan oksekimej, ik non, ijkuak tokniuan onechtlajpalouayaj amo onechpaktiaya. Ayakmo oniknekiaya nimonechikos porque onimotlajtlaniaya tleka kuali omotlakentiayaj uan kuali onechtlapouiayaj. Pero oksepa oniktlatlaujti toTajtsin Dios para manechpaleui oksepa inmiuan manimonechiko tla yejuan tlamachtiaj tlen melauak. Satepan opejki nikneki nimomachtis Biblia inmiuan iTlaixpantijkauan Jehová.

BIBLIA OKIPATLAK NONEMILIS. Onikmatiaya omonekiaya nikkauas drogas uan san niman ijkon onikchi. Pero onikitak oui nikkauas tabaco. Maski miak uelta onimochijchika, ok onitlachichinaya. Ijkuak onechiluijkej sekimej san niman okikajkej tabaco uan ayakmo otlachichinayaj, oniktlatlaujti Jehová manechpaleui uan satepan ayakmo oksepa onitlachichinki. Onikitak sapanoua ipati niktlatlaujtis Jehová ika nochi noyolo.

Noijki onikpatlak ken onimotlakentiaya uan ken onimoyektlaliaya. Ijkuak yikin onia kanin monechikouaj iTlaixpantijkauan Jehová, notsonkal omajkoktoka, okatka azul pero satepan oniktlapalui naranja. Onikpiaya se pantalón vaquero, chaqueta tlen chijchitok ika cuero uan okipiaya seki letras. Maski iTlaixpantijkauan Jehová onechiluiayaj manikpatla ken onimoyektlaliaya, ne onechpaktiaya ken onimotaya. Satepan onimokuayejyeko tlen kijtoua 1 Juan 2:15-17: “Ayakmó xiktlasojtlakah tlan onka itech nin tlaltíkpaktli nion tlan nika mochiwa. Tla aka kiwilita kichijtinemis tlan kichiwah n tlaltikpaktlakah tlajtlakolejkeh, non tlakatl amo milák kitlasojtla n Totajtsi Dios”. Onikajsikamatki ken onimotlakentiaya okiteititiaya niktlasojtla tlen onka itech tlaltikpak uan omonekiaya nikpatlas para nikteititiskia niktlasojtla toTajtsin Dios uan ijkon onikchi.

Satepan onikajsikamatki iTlaixpantijkauan Jehová amo onechiluijtokaj inmiuan manimonechiko, ye toTajtsin Dios onechiluijtoka ijkon ken kijtoua Hebreos 10:24, 25. Ijkuak opejki nimonechikoua uan opejki nikinmixmati tokniuan, onechyolini nimotemakas ixpan Jehová uan nimoapolaktis.

TLATEOCHIUALISTLI TLEN YONIKSELI. Sapanoua nechyolchikaua ijkuak nimokuayejyekoua Jehová techkauilia iuan matimouikakan. Nikneki nikchiuas ken Jehová uan Jesús ijkuak nikita ken teiknomatij uan tetlasojtlaj (1 Pedro 2:21). Yonikitak uelis nikpatlas nonemilis uan nimochijchikauas nikchiuas ken Cristo. Axkan nimochijchikaua nikintlasojtlas oksekimej uan amo san niman nikualanis, noijki ijkuak nika iuan nosiua uan nokone nikchiua ken Cristo. Nechtekipachoua tlen kinpanoua tokniuan. Axkan okachi nikpatioita nonemilis, niyolpaki uan nikintlasojtla tokniuan porque nikchiua ken Cristo.

“Kuali onechselijkej” (GUADALUPE VILLARREAL)

ONESKI ITECH XIUITL: 1964

UEYI ALTEPETL: MÉXICO

OKSEKI TLAMANTLI: OAUILNEMIAYA

TLEN ONIKCHIUAYA: Onimoskalti inmiuan chikuase nokniuan ompa altepetl Hermosillo (Sonora, México), amo otikpiayaj tlen ika timopanoltiskej. Notajtsin oixpoliuik ijkuak onikatka nichokotsin, ik non, nonantsin opejki tekipanoua para techmakas tlen ika timopanoltiskiaj. Maski onikatka ok nichokotsin noijki opejki nitekipanoua para nikpaleuis nonantsin, pero amo otikpiayaj tomin para tikkouaskiaj tokakuan. Tinochtin san sekan otichantiayaj.

Nonantsin nochipa otekipanouaya, ik non, amo okitaya tlen otechchiuiliayaj oksekimej. Satepan se telpochtli tlen okipiaya 15 xiuitl opejki nechchiualtia iuan manimoteka, opejki ijkuak onikpiaya chikuase xiuitl uan ijkon okichi miak xiuitl. Tlen onechchiuili non telpochtli onechijtlako porque opejki nimokuayejyekoua uelis nimotekas inmiuan tlakamej. Ijkuak onimotlapoui inmiuan teopixkej uan tepajtijkej onechiluijkej amo tlajtlakoli tla oniknekiaya nimotekas inmiuan tlakamej.

Ijkuak onikpiaya catorce xiuitl onikijto nikneki nimosiuakopas. Kanaj once xiuitl onimotekak inmiuan miakej tlakamej. Onimomachti ken nitetsonkaltekis uan oniktlali kanin nitekipanos. Pero onitlajyouiaya uan amo oniyolpakiaya. Onimokuayejyekouaya amo kuali tlen onikchiuaya uan onimotlajtlaniaya kox katej tlakamej uan siuamej tlen tetlasojtlaj.

Onikilnamik se nokni siuatl omomachti Biblia uan satepan omoapolakti ken iTlaixpantijka Jehová. Ye nochipa onechiluiaya tlen omomachtiaya pero ne amo onikkakiaya. Pero oniktlakaitaya porque kuali tlen okichiuaya uan oyolpakiaya iuan inamik. Nokni uan inamik omotlasojtlayaj, omotlakaitayaj uan amo omokualaniayaj. Satepan opejki nimomachtia Biblia iuan se iTlaixpantijka Jehová. Onimomachtiaya porque omonekiaya ijkon nikchiuas pero satepan opejki nechpaktia nimomachtis.

BIBLIA OKIPATLAK NONEMILIS. Ijkuak onimonechiko inmiuan iTlaixpantijkauan Jehová onikitak yejuan amo ken oksekimej. Miakej onechpinauiayaj pero yejuan amo ijkon okichiuayaj. Yejuan kuali onechselijkej uan okiteititijkej nechtlasojtlaj uan kuali onimomachili.

Ijkuak onia itech ueyi nechikol noijki onechititijkej nechtlasojtlaj ijkon ken nokni. Onikijto: “Yejuan yolkualmej uan tetlasojtlaj ijkon ken yiuejkika oniknekiaya”. Sapanoua onechtlajtlachialti porque omotlasojtlayaj uan san sekan okatkaj, noijki okitekitiltiayaj Biblia para nechnankiliskej tlen onikintlajtlaniaya. Onikitak yejuan okichiuayaj tlen omomachtiayaj itech Biblia. Onikajsikamatki omonekiaya nikpatlas miak tlamantli para nimochiuas niiTlaixpantijka Jehová.

Omonekiaya nikpatlas nochi nonemilis porque onikchiuaya uan onichantiaya ken se siuatl. Omonekiaya nikpatlas ken onitlajtouaya, onimoliniaya, onimotlakentiaya, onimoyektlaliaya uan noijki noyolikniuan. Akinmej okatkaj noyolikniuan opejki nechiluiaj: “¿Tleka ijkon tikchiua? Kuali tlen otikchiuaya. Ayakmo ximomachti Biblia. Amitlaj mitspoloua”. Onikmachili oui ayakmo niauilnemis.

Tlen kijtoua 1 Corintios 6:9-11 onechpaleui uan onikajsikamatki uelis nikpatlas tlen onikchiuaya. Ompa kijtoua: “¿Mach amo nonkimatih akimeh amo yolchipawakeh amo weletis kalakiskeh kan Dios tlanawatijtok? Amo manomechkajkayawakah; porke nochteh akimeh kochtinemih itech tlajtlákoli, akimeh kinweyiliah diosmeh non kinmachijchiwah, akimeh momekatijtinemih, akimeh kichijtinemih tlan pitsotik iwa tetlajyalti, n tlakah non kinmelewiah n tlakah [...] mach kalakiskeh kan Dios tlanawatijtok. Sikimeh de nomejwah achto ijkó ononkichijtinemiah. Pero axa ya nonyolchipawake”. Yiuejkika Jehová okinpaleui sekimej makipatlakan innemilis, ik non, noijki uelis nechpaleuis. Opanok miak xiuitl uan sapanoua onimochijchika para nikpatlas nonemilis, noijki onechpaleuijkej iTlaixpantijkauan Jehová porque onechititiayaj melauak nechtlasojtlaj uan onechpaleuiayaj manikpejpena tlen okachi kuali.

TLATEOCHIUALISTLI TLEN YONIKSELI. Axkan nosiua uan ne tikmachtiaj tokone makintlakamati principios bíblicos tlen katej itech Biblia. Axkan ayakmo nikchiua tlen achto onikchiuaya uan kuali nimouika iuan Jehová, noijki nitlapaleuia itech tlanechikol. Nitlapaleuia ken tlayekanki uan yonikinpaleui oksekimej makixmatikan Jehová uan iTlajtol. Noijki nonantsin opejki momachtia Biblia uan omoapolakti porque okitak ken Biblia onechpaleui manikpatla nonemilis. Se nokni tlen oauilnemiaya noijki okipatlak inemilis uan omoapolakti ken iTlaixpantijka Jehová.

Motlajtlachialtiaj akinmej onechiluiayaj amo manimomachti Biblia porque axkan kitaj Biblia melauak onechpaleui. Nikmati akin melauak onechpaleui. Yiuejkika oniktemo ikaj manechpaleui pero san Jehová onechpaleui, onechyoltila uan onechititi melauak nechtlasojtla. ToTajtsin Dios melauak tetlasojtla uan ixtlamatki porque onechpaleui okachi maniyolpaki.

“Amo oniyolpakiaya uan onimomachiliaya noselti” (KAZUHIRO KUNIMOCHI)

ONESKI ITECH XIUITL: 1951

UEYI ALTEPETL: JAPÓN

OKSEKI TLAMANTLI: ONIKIXNEKIAYA TOMIN UAN ONECHPAKTIAYA CICLISMO

TLEN ONIKCHIUAYA: Onimoskalti itech se altepetl tlen itoka Shizuoka (Japón), otikatkaj chikueyi itech nofamilia uan otichantiayaj itech se kali tlen amo okatka ueyi. Notajtsin okinemakaya bicicletas uan ijkuak onikatka ok nichokotsin onechuikaya manikinmita oksekimej ken motlalouaj itech bicicleta, ik non, opejki nechpaktia ciclismo. Notajtsin okinekiaya maniyeto ciclista profesional, ik non, ijkuak onikpiaya 14 xiuitl opejki nechmachtia. Ijkuak onikpiaya 16 uan 18 xiuitl oniktlanki eyi títulos porque onikintlanili oksekimej ijkuak inmiuan onimauilti. Se universidad onechseli para ompa manimomachti, pero ne onikpejpenki nias itech okse universidad. Ijkuak onikpiaya 19 xiuitl yonikatka ciclista profesional.

Oniknekiaya manechixmatikan uan makitakan okachi kuali nimauiltia ika bicicleta ompa Japón. Oniknekiaya niktlanis miak tomin para nofamilia kuali mayeto, ik non, okachi opejki nimomachtia ken nimauiltis. Ijkuak onimoyolkokouaya uan ayakmo oniknekiaya nikchiuas ejercicios, noselti onimoyolchikauaya uan onikijtouaya amo nimosotlauas porque onineski para nimauiltis ciclismo. Onechpejpenkij para manimauilti itech ciclismo uan ijkuak onitlatlanki onechiluijkej manimauilti para niyetos campeón ompa Japón. Chikuase uelta san oniktlanki segundo lugar.

Nochipa onimochijchikauaya uan ijkon okachi onitlatlaniaya, ik non, opejki nechiluiaj Locomotora de Tokai itech non altepetl. Sapanoua onikixnekiaya tomin uan oksekimej amo okinekiayaj nouan mauiltiskej porque nochipa onikintlaniliaya. Oniktlaniaya miak tomin, ik non, san onimoyolpaktiaya. Onikmokoui se kali tlen okipiaya miak tlamantli para nikchiuas ejercicio, noijki onikmokoui se carro tlen sapanoua patio. Para nochipa nikpias tomin onikchi seki tlamantli uan onikmokoui miak kalmej.

Maski onikpiaya miak tlamantli amo oniyolpakiaya uan onimomachiliaya noselti. Yonikpiaya nosiua uan eyi konemej. Nochipa onimokualaniaya iuan nosiua uan nokoneuan, ik non, yejuan yokimatiayaj ijkuak onikualaniaya.

Se tonal nosiua opejki momachtia Biblia inmiuan iTlaixpantijkauan Jehová, ik non, okipatlak se tlamantli itech tofamilia. Ijkuak okijto kineki monechikos inmiuan iTlaixpantijkauan Jehová, ne san niman onikilui moneki san sekan tiaskej ken familia. Nikilnamiki ijkuak se tlayekanki ouala para nechmachtis ika Biblia. Oajsik itech noyolo tlen onimomachti.

BIBLIA OKIPATLAK NONEMILIS. Amo keman nikilkauas ijkuak oniktlajtolti Efesios 5:5. Tlen kijtoua: “Tla aka momekatia, noso kichijtinemi tlajtlákoli, noso kitlawelneki tomi, kijtosneki kemi kiweyilijtoskia se “dios” non san kimachijchiwah, nochteh akimeh ijkó kichiwah, amo kalakiskeh kan tlanawatia Cristo iwa Dios”. Onikajsikamatki itech ciclismo san okichiuayaj apuestas uan miakej san okixnekiayaj miak tomin, ik non, notlalnamikilis opejki nechkuejsoua. Noijki tla oniknekiaya nikyolpaktis Jehová, omonekiaya nikkauas ciclismo, maski oui ijkon nikchiuaskia.

Sapanoua onechpaktiaya ijkuak onimauiltiaya ciclismo uan san oniknekiaya nimauiltis. Ijkuak onimomachtiaya Biblia kuali onimomachiliaya, pero ijkuak onimauiltiaya san oniknekiaya nitlatlanis. San eyi uelta onimauilti ijkuak opejki nimomachtia Biblia, pero nochipa san onimokuayejyekojtoka oksepa nimauiltis. Noijki amo onikmatiaya ken nikchiuas para nikinmakas nofamilia tlen ika mopanoltiskej. Sapanoua onimotekipachouaya porque nofamilia amo okinekiaya maniyeto iTlaixpantijka Jehová. Notajtsin omoyolkoko porque ayakmo onimauiltiaya ciclismo. Melauak onimotekipachouaya uan opejki nimokokoua.

Nochipa onimomachtiaya Biblia uan onimonechikouaya inmiuan iTlaixpantijkauan Jehová, non onechpaleui para manitlaxiko. Satepan okachi opejki nikneltoka toTajtsin Dios. Oniktlatlaujti Jehová manechpaleui manikita ken nechnankilia ijkuak niktlatlaujtia. Kuali onimomachili ijkuak nosiua onechilui amo okinekiaya se ueyi kali para yolpakis. Satepan okachi opejki niktekichiuilia toTajtsin Dios.

TLATEOCHIUALISTLI TLEN YONIKSELI. Melauak yonechpaleui tlen okijto Jesús itech Mateo 6:33: “Nomejwah moneki achto xikchiwakah tlan Dios nomechnawatia iwa xikchiwakah tlan Ye kimonekiltia. Iwa ijkó Dios nomechmakas nochi tlan nomechpolos”. Nochipa tikpiaj tlen ika timopanoltiskej uan amitlaj techpoloua ijkon ken okijto Jesús. Axkan ayakmo niktlani miak tomin, maski yikipia 20 xiuitl ayakmo nimauiltia ciclismo, pero nochipa tikpiaj tlen ika timopanoltiskej.

Sapanoua niyolpaki uan kuali nimomachilia porque niktekichiuilia toTajtsin Dios inmiuan tokniuan. Noijki kuali nimouika iuan nofamilia. Axkan eyi notelpochuan iuan insiuauan kitekichiuiliaj Jehová.