Beibele e Fetoša Maphelo

KE ENG seo se tutueleditšego lejelathoko la mmino wa rock go ithuta go rata batho le go ikemišetša go ba thuša? Ke’ng seo se tutueleditšego monna wa kua Mexico gore a tlogele tsela e gobogilego ya go phela? Ke ka baka la’ng yo mongwe wa batho bao ba šianago ka dipaesekele ba Japane bao ba di gogago pele a ile a tlogela go šiana ka dipaesekele ka maikemišetšo a go hlankela Modimo? Ela hloko seo batho ba ba se bolelago.

“Ke be ke le Motho yo a Swarago ba Bangwe Makgwakgwa, ke Ena le Makoko e Bile ke le Bogale.”—DENNIS O’BEIRNE

NGWAGA WA MATSWALO: 1958

NAGA: ENGELANE

BOPHELO BJA PELE E EBA MOKRISTE: LEJELATHOKO LA MMINO WA ROCK

BOPHELO BJA KA BJA NAKONG E FETILEGO: Ka gabo tate ke ma-Ireland gomme nna ke gotše ke le Mokatholika wa mo-Ireland. Gantši ke be ke eya kerekeng ke nnoši gaešita le ge ke be ke sa rate go ya. Lega go le bjalo, ke be ke swerwe ke tlala ya moya. Ke be ke rapela Thapelo ya Morena ka mehla, gomme ke gopola ke patlame malaong ke ipotšiša gore e ra gore’ng. Ke be ke tlwaetše go e arola ka dikarolo le go leka go hwetša seo karolo e nngwe le e nngwe e se bolelago.

Bogareng bja nywaga ya ka ya mahlalagading, ke ile ka ba setho sa mokgatlo wa Marasta. Ke be ke kgahlegela mekgatlo ya dipolitiki e swanago le Lekgotla la go Ganetšana le Bonazi. Eupša ke ile ka nwelela mokgweng wa borabele wa mokgatlo wa majelathoko wa mmino wa rock. Ke be ke diriša dihlaretagi, kudukudu patše, yeo ke bego ke e kgoga mo e ka bago letšatši le lengwe le le lengwe. Ke ile ka thoma go ba le mokgwa wa go se sa hlwa ke ena le taba le selo, ke enwa kudu, ke bea le bophelo bja ka kotsing e bile ke se na taba le batho ba bangwe. Ke be ke le lejelathoko, ke sa bolele le motho ntle le ge e ba ke nagana gore poledišano e be e na le tlhaologanyo. Ke be ke sa nyake le go tšewa diswantšho. Ge ke lebelela morago ga bjale, ke a bona gore ke be ke le motho yo a swarago ba bangwe makgwakgwa, ke ena le makoko e bile ke le bogale. Ke be ke le botho le go fa ka seatla se se bulegilego feela go motho yo ke bego ke mo tlwaetše kudu.

Ge ke be ke ena le nywaga e 20, ke ile ka thoma go kgahlegela Beibele. Mogwera wa ka yo a gwebago ka dihlaretagi o be a thomile go bala Beibele a le kgolegong, gomme re ile ra ba le poledišano e telele mabapi le bodumedi, Kereke le tema yeo Sathane a e kgathago mo lefaseng. Ke ile ka reka Beibele gomme ka thoma go ipalela yona ka noši. Nna le mogwera wa ka re be re bala dikarolo tša Beibele, re kopana bakeng sa go ahlaahla seo re ithutilego sona gomme re itirela diphetho. Se se tšwetše pele ka dikgwedi tše dintši.

Tše ke tše dingwe tša diphetho tšeo re ilego ra di fihlelela mabapi le seo re se badilego: gore re phela mehleng ya bofelo bja lefase le; gore Bakriste ba swanetše go bolela ditaba tše dibotse tša Mmušo wa Modimo; gore ga se ba swanela go ba karolo ya lefase le, go akaretša le dipolitiki tša lona; le gore Beibele e nea tlhahlo e kwagalago ya boitshwaro. Re be re kgona go bona gabotse gore Beibele e a rereša le gore go swanetše go ba go ena le bodumedi bja therešo. Eupša e be e le bofe? Re ile ra nagana ka dikereke tše dikgolo ka bobotse le meletlo ya tšona gaešita le go tsenatsena ga tšona dipolitiking gomme  ra lemoga gore Jesu o be a se ka tsela yeo. Re be re tseba gore Modimo o be a sa di diriše, ka gona re ile ra phetha ka gore re tla hlahloba a mangwe a madumedi ao a sa tsebjego gakaalo go bona gore a re swaretše eng.

Re be re kopana le bao e lego ditho tša madumedi ao gomme re ba botšiša dipotšišo tše dintši. Re be re tseba seo Beibele e se bolelago mabapi le potšišo e nngwe le e nngwe, ka gona re be re kgona go bona ge e ba ba be araba ka go dumelelana le Lentšu la Modimo. Ka morago ga dipoledišano tše bjalo, ke be ke rapela Modimo ka gore: ‘Ge e ba batho bao ba emela bodumedi bja therešo, hle ntire gore ke nyake go kopana le bona gape.’ Eupša ka morago ga dikgwedi tše mmalwa ke kopana le batho ba bjalo, ke be ke sešo ka hwetša sehlopha seo se bego se araba dipotšišo tša rena go tšwa Beibeleng; e bile ke be ke sa kganyoge go kopana gape le ge e le sefe sa tšona.

Mafelelong, nna le mogwera wa ka re ile ra kopana le Dihlatse tša Jehofa. Re ile ra di botšiša dipotšišo tšona tšeo re bego re tlwaetše go di botšiša, eupša di ile tša di araba go tšwa Beibeleng. Seo di se boletšego se be se dumelelana gabotse le seo re bego re šetše re ithutile sona. Ka gona re ile ra tšwela pele go di botšiša dipotšišo tšeo re bego re sešo ra hwetša dikarabo tša tšona ka Beibeleng—ka mohlala, pono ya Modimo mabapi le go kgoga le dihlaretagi. Ka mo go swanago, di ile tša kgona go di araba di diriša Lentšu la Modimo. Re ile ra dumela go ya sebokeng Holong ya Mmušo.

Ke ile ka thatafalelwa ke go ya dibokeng. Ke be ke le lejelathoko e bile ke sa rate go batamelwa ke batho ba bao ka moka ba bego ba ena le bogwera e bile ba apere gabotse. Ke be ke nagana gore ba bangwe ba be ba ena le maikemišetšo a fošagetšego gomme ka se sa hlwa ke nyaka go ya dibokeng tše dingwe gape. Eupša bjalo ka tlwaelo, ke ile ka rapela Modimo gore a mphe kganyogo ya go kopana le batho ba gape ge e ba e be e le ba bodumedi bja therešo, gomme ke ile ka ba le kganyogo e matla ya go nyaka go ithuta Beibele le Dihlatse tša Jehofa.

KAMOO BEIBELE E FETOTŠEGO BOPHELO BJA KA: Ke be ke tseba gore ke be ke swanetše go kgaotša go diriša dihlaretagi gomme ke ile ka kgona go kgaotša go di diriša le semeetseng. Bothata bjo bogolo e be e le motšoko. Ke lekile go kgaotša ka makga a mantši eupša ka palelwa. Ge ke be ke ekwa ka ba bangwe bao ba ilego ba fo lahla motšoko wa bona gabonolo gomme ba se sa hlwa ba kgoga gape, ke ile ka rapela Jehofa mabapi le taba yeo. Ka morago ga moo, ke ile ka kgona go kgaotša go kgoga ka thušo ya Jehofa. Ke be ke ithutile mohola wa go boledišana le Jehofa ka potego le ka bolokologi ka thapelo.

Phetogo e nngwe e kgolo yeo ke e dirilego e be e akaretša tsela ya ka ya go itokiša le ya go apara. Sebokeng sa ka sa pele Holong ya Mmušo, moriri wa ka o be o emeletše e bile o ena le dintlhana le mothaladi wa mmala o motalalerata go swana le wa phikoko. Ka morago, ke ile ka o taya ka mmala wa namune o tagilego. Ke be ke apara pokate le baki ya letlalo yeo e bego e ena le mongwalo mo go yona. Ke be ke sa bone go nyakega gore ke fetoge, gaešita le ge Dihlatse di be di mpontšha mabaka ka botho. Lega go le bjalo, mafelelong ke ile ka nagana ka 1 Johane 2:15-17 e rego: “Le se ke la rata lefase goba dilo tše di lego lefaseng. Ge e ba motho a rata lefase, lerato la Tate ga le gona go yena.” Ke ile ka lemoga gore ke be ke bontšha go rata lefase ka ponagalo ya ka le gore ke be ke swanetše go fetoga e le gore ke bontšhe gore ke rata Modimo. Ke ile ka dira seo.

Ge nako e dutše e eya, ke ile ka lemoga gore e be e se Dihlatse feela tšeo di bego di nyaka gore ke ye dibokeng tša Bokriste. Baheberu 10:24, 25 e mpontšhitše gore ke Modimo yo a bego a nyaka gore ke be gona dibokeng. Ka morago ga gore ke thome go ba gona dibokeng tšohle ka mehla le go tlwaelana le batho, ke ile ka phetha ka go bontšha boineelo bja ka go Jehofa ka go kolobetšwa.

KAMOO KE ILEGO KA HOLEGA KA GONA: Ke kgomilwe kudu ke tsela yeo Jehofa a re dumelelago gore re be le tswalano ya kgauswi le yena. Kgaugelo le tlhokomelo tša gagwe di ntirile gore ke nyake go mo ekiša le go latela Morwa wa gagwe, Jesu Kriste, bjalo ka mohlala wa ka bophelong. (1 Petro 2:21) Ke ithutile gore nka kgona go ba seo ke lego sona gaešita le ge ke dutše ke katanela gore ke be le semelo sa Bokriste. Ke katanetše go hlagolela moya wa lerato le o borutho. Ke leka go ekiša Kriste tseleng yeo ke swarago mosadi wa ka le morwa ka yona. E bile ke tloga ke tshwenyega ka bana bešo le dikgaetšedi bao ba lego therešong. Go latela Kriste go mphile seriti, boitlhompho le bokgoni bja go bontšha ba bangwe lerato.

‘Di ile tša Ntshwara ka Tlhompho.’—GUADALUPE VILLARREAL

NGWAGA WA MATSWALO: 1964

NAGA: MEXICO

BOPHELO BJA PELE E EBA MOKRISTE: TSELA E GOBOGILEGO YA GO PHELA

 BOPHELO BJA KA BJA NAKONG E FETILEGO: Ke yo mongwe wa bana ba šupago bao ba godišeditšwego Hermosillo, yeo e lego Sonora, kua Mexico, lefelo leo le hlasetšwego ke bodiidi bjo bogolo. Tate o hwile ge ke be ke sa le mošemanyana, ka gona mma o ile a swanelwa ke go šoma gore a re hlokomele. Gantši ke be ke sepela ka dinao ka gobane re se na tšhelete ya go reka dieta. Ke thomile go šoma ke sa le yo monyenyane bakeng sa go thuša ka ditshenyagalelo tša lapa. Go etša malapa a mantši, re be re dula gotee re le ba bantši.

Mma o be a dula a se gona mo e ka bago letšatši ka moka bakeng sa go re šireletša. Ge ke be ke ena le nywaga e 6 ke ile ka ba mohlaselwa wa mošemane wa nywaga e 15 yoo a ilego a thoma go nkgoboša ka thobalano. Kgobošo ye e tšwetše pele ka nako e telele. Se se feleleditše ka gore ke gakanege ge go tliwa ditabeng tša thobalano. Ke be ke nagana gore ke ga tlhago gore ke ikwe ke kganyoga banna. Ge ke be ke nyaka thušo go dingaka le baruti, ba nkgodišitše ka gore ke be ke se na bothata e bile maikwelo a ka e be e le a tlhago.

Ge ke ena le nywaga e 14, ke ile ka dira phetho ya go itsebatša lefaseng ke le mosodoma. Ke bile mosodoma ka nywaga e 11 e latetšego, e bile ke dula le banna ba fapafapanego nakong yeo. Mafelelong, ke ile ka ithutela mošomo wa go lokiša moriri le go ba le lebenkele la go rekiša dilo tša basadi tša go itokiša. Lega go le bjalo, ke be ke se ka thaba. Ke be ke phela bophelo bja go tlaišwa le go ekwa. Ke be ke ekwa gore seo ke bego ke se dira se be se sa loka. Ke ile ka thoma go ipotšiša gore: ‘Na go na le batho ba ba lokilego le ba nago le mohola?’

Ke ile ka nagana ka kgaetšedi ya ka. O be a ile a thoma go ithuta Beibele le Dihlatse tša Jehofa gomme mafelelong a kolobetšwa. O be a fela a mpotša seo a ithutago sona, eupša ke sa mo theetše. Lega go le bjalo, ke be ke kgahlwa ke tsela yeo a bego a phela ka yona le lenyalo la gagwe. Ke be ke kgona go bona gore yena le monna wa gagwe ba be ba ratana le go hlomphana e le ruri. Ba be ba swarana ka botho. Ge nako e dutše e eya, yo mongwe wa Dihlatse tša Jehofa o ile a thoma go ithuta Beibele le nna. Mathomong, ke be ke ithuta feela—ke se na mafolofolo. Ke moka dilo di ile tša fetoga.

KAMOO BEIBELE E FETOTŠEGO BOPHELO BJA KA: Dihlatse di ile tša ntaletša go se sengwe sa diboka tša tšona gomme ke ile ka ya. E be e le selo seo ke bego ke thoma go se dira. Batho ka kakaretšo ba be ba nkwera eupša e sego Dihlatse. Di ile tša ntumediša ka botho tša ba tša ntshwara ka tlhompho. Ke ile ka kgomega.

Pono ya ka e botse ka Dihlatse e ile ya gola ge ke be ke le kopanong. Ke ile ka lemoga gore gaešita le ge ba be ba le ka dihlopha tše dikgolo, batho ba ba be swana le kgaetšedi ya ka—ba dira dilo ka tsela ya kgonthe le go tšwa pelong. Ke ile ka ipotšiša ge e ba ba e be e le sehlopha se se lokilego le seo se nago le mohola seo e bego e le kgale ke se tsoma. Ke ile ka makatšwa ke lerato le botee bja bona, go etša le tsela yeo ba dirišago Beibele go araba potšišo e nngwe le e nngwe. Ke ile ka lemoga gore Beibele e be e le yona yeo e ba matlafatšago bakeng sa go dira botse maphelong a bona. Le gona, ke ile ka bona gore ke be ke swanetše go dira diphetogo tše dintši gore ke tle ke be yo mongwe wa bona.

Ge e le gabotse, ke ile ka swanelwa ke go fetoga ka mo go feletšego, ka gobane ke be ke phela bophelo bja basadi. Ke ile ka swanelwa ke go fetoša tsela yeo ke bolelago ka yona, mekgwa ya ka, moaparo wa ka, moriri wa ka le bagwera bao ke ba kgethago. Bagwera ba ka ba nakong e fetilego ba ile ba thoma go nkwera ba re: “Ke ka baka la’ng o dira se? O be o lokile kamoo o bego o le ka gona. O se ke wa ithuta Beibele. O na le dilo ka moka.” Lega go le bjalo, dilo  tšeo go bego go le thata go di tlogela e be e le mekgwa ya ka ya bophelo bjo bo gobogilego.

Lega go le bjalo, ke be ke tseba gore go a kgonega go dira diphetogo tše dikgolo ka ge mantšu a Beibele go 1 Bakorinthe 6:9-11 a ile a nkgoma pelo ge a re: “Na ruri ga le tsebe gore batho ba ba sa lokago ba ka se je bohwa bja mmušo wa Modimo? Le se ke la timetšwa. Ge e le diotswa goba barapedi ba medimo ya diswantšho goba dihlotlolo goba banna ba ba boloketšwego merero yeo e sego ya tlhago goba banna ba ba robalago le banna . . . ba ka se je bohwa bja mmušo wa Modimo. Lega go le bjalo, seo ke se ba bangwe ba lena le bego le le sona. Eupša le hlatswitšwe la hlweka.” Jehofa o thušitše batho morago kua gore ba dire diphetogo gomme le nna o nthušitše. Go ile gwa tšea nywaga e mmalwa gaešita le go katana mo gogolo, eupša tlhahlo le lerato la Dihlatse di nthušitše kudu.

KAMOO KE ILEGO KA HOLEGA KA GONA: Lehono, ke phela bophelo bjo bo tlwaelegilego. Ke nyetše gomme nna le mosadi wa ka re ruta morwa wa rena go phela ka melao ya motheo ya Beibele. Bophelo bja ka bja nakong e fetilego ga bjale bo ile gomme ke thabela ditšhegofatšo tša moya le ditokelo tše dintši. Ke hlankela ke le mogolo ka phuthegong gomme ke kgonne go thuša ba bangwe go ithuta therešo ya Lentšu la Modimo. Diphetogo tšeo ke di dirilego bophelong bja ka di thabišitše mma kudu moo e lego gore o ile a amogela thuto ya Beibele gomme ga e sa le e le go tloga nakong yeo e bile Mokriste yo a kolobeditšwego. Kgaetšedi ya ka yoo le yena a bego a phela bophelo bjo bo gobogilego o ile a ba yo mongwe wa Dihlatse tša Jehofa.

Gaešita le batho bao ba bego ba tseba bophelo bja ka bja nakong e fetilego ga bjale ba a lemoga gore ke fetogile motho yo mokaone. Le gona ke a tseba gore ke eng seo se dirilego gore ke fetoge. Nakong e fetilego ke be ke ile ka nyaka thušo go ditsebi eupša ka hwetša keletšo e fošagetšego. Lega go le bjalo, Jehofa o ile a nthuša e le ruri. Gaešita le ge ke be ke ikwa ke se selo, o ile a nkela hloko, a ntshwara ka lerato le go se mphelele pelo. Taba ya gore Modimo yo botse, yo bohlale le yo lerato o ile a nkela hloko le go nyaka gore ke be le bophelo bjo bokaone ke yona e ilego ya dira diphetogo tše ka moka.

“Ke be ke se ka Kgotsofala, ke Lewa ke Bodutu e Bile ke Ikwa ke se Selo.”—KAZUHIRO KUNIMOCHI

NGWAGA WA MATSWALO: 1951

NAGA: JAPANE

BOPHELO BJA PELE E EBA MOKRISTE: MOPHADIŠANI WA GO ŠIANA KA PAESEKELE

BOPHELO BJA KA BJA NAKONG E FETILEGO: Ke goletše toropong e homotšego ya boemakepeng kua Seleteng sa Shizuoka, Japane, moo lapa lešo la ditho tše seswai le bego le dula ntlong e nyenyane. Tate o be a ena le lebenkele la dipaesekele. Go tloga ge ke sa le yo monyenyane, o be a sepela le nna diphadišanong tša go šiana ka dipaesekele gomme ke ile ka kgahlegela papadi yeo. Ke moka tate o ile a thoma go ntokišeletša gore ke be setsebi sa go šiana ka paesekele. Ge ke be ke sa le sekolong sa magareng, o ile a thoma go ntlwaetša a tiišitše. Sekolong se se phagamego ke ile ka thopa sefoka gararo ka go latelana diphadišanong tša naga tša mabelo. Ke ile ka newa sebaka sa go yo ithuta yunibesithing, eupša ke ile ka kgetha go ya sekolong sa go ithutela go šiana ka dipaesekele. Ke ile ka ba setsebi sa go šiana ka paesekele ge ke be ke ena le nywaga e 19.

Ka nako yeo, ke be ke ipeetše pakane ya go ba nkgwete ya go šiana ka paesekele kua Japane. Ke be ke rerile go dira tšhelete e ntši e le gore ke nee lapa lešo bophelo bo bobotse le bjo bo  šireletšegilego. Ke ile ka ineela go itlwaetšeng. Ge ke be ke ekwa go itlwaetša go le thata goba ke le phadišanong e thata, ke be ke ipotša leboelela gore ke tswaletšwe go šiana ka dipaesekele le gore ke swanetše go fo tšwela pele go sa šetšwe boima bjo ke bo kwago! Ke ile ka dira bjalo. Ke ile ka thoma go holwa ke modiro wa ka o thata. Ngwageng wa ka wa pele ke ile ka thopa sefoka gare ga bao e sa lego ba bafsa diphadišanong tša go šiana ka dipaesekele. Ngwageng wa ka wa bobedi, ke ile ka swanelega go tsenela diphadišano tšeo di bego di tla hlaola nkgwete ya Japane. Ke ile ka tšwa maemong a bobedi ka makga a tshelelago phadišanong yeo.

Bjalo ka ge ke ile ka dula ke le maemong a godimo a bathopasefoka, ke ile ka tsebja ke le maoto a go tia a Tokai, e lego lefelo la Japane. Ke be ke ena le moya wa phadišano. Ge nako e dutše e eya, ke ile ka boifša ka ge ke be ke sa šokele motho diphadišanong. Mogolo wa ka o ile wa oketšega gomme ke ile ka ikhwetša ke kgona go reka selo le ge e le sefe seo se bego se nkgahla. Ke ile ka reka ntlo yeo e bego e ena le phapoši ya go itlwaetša gaešita le metšhene ya maemo a godimo. Ke ile ka reka koloi ya go tšwa ntle yeo e bego e bitša tšhelete yeo e nyakilego e lekana le ya ntlo. Bakeng sa tšhireletšo ke ile ka thoma go beeletša tšhelete ya ka mafelong ao e lego dithoto le mebarakeng ya ditšhelete.

Lega go le bjalo, ke be ke se ka kgotsofala, ke lewa ke bodutu e bile ke ikwa ke se selo. Ka nako yeo, ke be ke nyetše e bile ke ena le bana ba bararo, eupša ke be ke felela lapa la ka pelo. Ke be ke befelela mosadi wa ka le bana ka dilo tše di sa rego selo. Ba ile ba thoma go ithuta go lebelela ponagalo ya ka ya sefahlego ka poifo go bona ge e ba ke se ka tsoga gabotse.

Lega go le bjalo, ge nako e dutše e eya, mosadi wa ka o ile a thoma go ithuta Beibele le Dihlatse tša Jehofa. Seo se ile sa lebiša diphetogong tše dintši. O ile a re o nyaka go ya dibokeng tša Dihlatse, ka gona ke ile ka phetha ka gore re tla ya re le lapa. Ke sa dutše ke gopola mantšiboa a ge mogolo a be a etla legaeng la ka gomme a thoma go ithuta Beibele le nna. Seo ke ithutilego sona se ile sa nkgoma kudu.

KAMOO BEIBELE E FETOTŠEGO BOPHELO BJA KA: Nka se tsoge ke lebetše kamoo go bala Baefeso 5:5 go ilego gwa nkgoma ka gona. E re: “Ga go na seotswa goba motho wa ditšhila goba motho wa megabaru—se se bolelago go ba morapedi wa medimo ya diswantšho—yo a nago le bohwa mmušong wa Kriste le wa Modimo.” Ke ile ka lemoga gore go šiana ka dipaesekele go be go tswakane le go petšha le gore papadi yeo e kgothaletša moya wa megabaru. Ke ile ka thoma go tshwenywa ke letswalo. Ke ile ka ipotša gore ge e ba ke nyaka go kgahliša Jehofa Modimo ke swanetše go kgaotša go šiana ka dipaesekele. Eupša e be e le phetho e thata go nna.

Ke be ke sa tšwa go fetša ngwaga wo o nkgotsofaditšego kudu wa go šiana ka dipaesekele gomme ke kganyoga go kgotsofala ka mo go oketšegilego. Lega go le bjalo, ke ile ka hwetša gore go ithuta Beibele go be go mpea boemong bja monagano bja khutšo le bjo bo fodilego—moya o fapanego kudu le woo ke bego ke o nyaka gore ke thope sefoka diphadišanong! Ke ile ka tsenela diphadišano gararo feela ka morago ga gore ke thome go ithuta Beibele, eupša pelong ya ka ke be ke sa rata go šiana ka dipaesekele. Ke be ke sa tsebe gore ke tla hlokomela lapa la ka ka tsela efe. Ke be ke sa tsebe gore pele le morago ke kae gomme ba leloko ba ile ba thoma go nthatafaletša bophelo mabapi le tumelo ya ka e mpsha. Tate o be a nyamile o šoro. Ke kwele bohloko kudu, ke ile ka thoma go gateletšega le go feta gomme ka ba ka tšwa le sešo ka teng (ulcer).

Seo se nthušitšego nakong ye e thata ke gore ke ile ka tšwela pele ke ithuta Beibele le go ya dibokeng tša Dihlatse tša Jehofa. Ganyenyane-ganyenyane tumelo ya ka e ile ya matlafala. Ke ile ka kgopela Jehofa gore a kwe dithapelo tša ka le go nthuša go bona gore o a di kwa. Kgateletšego ya ka e ile ya fokotšega ge mosadi wa ka a be a nkgodiša gore ga go nyakege gore a dule ntlong e kgolo gore a thabe. Ke ile ka dira tšwelopele ganyenyane-ganyenyane.

KAMOO KE ILEGO KA HOLEGA KA GONA: Ke ithutile gore mantšu a Jesu a lego go Mateo 6:33 ruri ke therešo. O itše: “Ka gona, tšwelang pele le tsoma Mmušo pele le toko ya gagwe gomme dilo tše tše dingwe ka moka le tla di okeletšwa.” Ga se ra ka ra hlaelelwa ke “dilo tše tše dingwe” tšeo Jesu a boletšego ka tšona, e lego dinyakwa tša motheo tša bophelo. Gaešita le ge moputso wa ka e le 30 lekgolong ya moputso woo ke bego ke o hwetša ge ke be ke sa šiana ka dipaesekele, nna le lapa la ka ga se ra ka ra hlaelelwa ke selo nywageng e 20 e fetilego.

Se sekaone gape ke gore ge ke šoma le ge ke rapela le badumedigotee le nna, ke hwetša lethabo le kgotsofalo tšeo ke sa kago ka ba le tšona pele. Matšatši a fo itshepelela ka go akgofa. Bophelo bja lapa la ka le bjona bo kaonafetše kudu. Barwa ba ka ba bararo ka moka gotee le basadi ba bona ke bahlanka ba botegago ba Jehofa.