Ombimbiliya Ipilulula Omwenyo Wovanthu

Omukwendye umwe ankho uhahande ovanthu pahe uhole ovanthu, ulikwatehila umwe alongese vakwavo Ombimbiliya. Omukwendye umwe ukala ko México, ankho ulala na valume vakwavo pahe wetyiyekapo. Omukwendye umwe ankho uhole unene okulitaata nomisikaleta wetyiyekapo akala epanga lya Huku. Oityi tyevekwatesako? Tanga onthele ei utyitale.

“Ankho ndyilwisa vala ovanthu.” — DENNIS O’BEIRNE

ENIMA ATYITWA: 1958

OTYILONGO ATYITILWA: INGLATERRA

EHIPULULO: ANKHO KAHANDE OVANTHU

OMUENYO WANGE KOHALE: Natyitilwa ko Inglaterra, tate owo ko Irlanda. Ovo tate ankho ovo katolika. Ame ankho ndyenda vala andyike kokapela, mahi ankho hihandeko-ale unene. Mahi ankho ndyihole umwe unene etyi Ombimbiliya ilongesa, atee pamwe ankho ndyilinga elikwambelo lya Tatekulu, otyo ndyisoka umwe nawa ku etyi onondaka ombo mbuhangununa.

Pwetyi nekula andyilipake mopulitika. Pahe andyihakalale vali nawa, ankho ndyipwena omakaya amwe atiwa maconha. Ankho hesukile-ale vali novanthu, ndyinwa vala unene, ankho ndyilinga vala ovipuka viahatiwa ovievi. Ankho hihande okukala povanthu, hihande okutomphola nomunthu nawike, petompho ndyipopia-po vala tyina nahanda. Tupu ankho hihande okupolwa ono foto. Ankho hikahi nawa,ndyilinga vala nawa ovanthu ndyii.

Etyi ndyina omanima 20, andyisuku umwe unene netyi Ombimbiliya ilongesa. Ankho ndyina epanga limwe lilandesa epangwe, etyi pakala apakwa mokaleya, mokaleya omo ahimbika okutanga Ombimbiliya. Etyi atunda-mo, ankho tuhipulula unene konthele yonongeleya novipuka Satanasi eli nokulinga mouye. Pahe andyihimbika okutanga Ombimbiliya andyike. Ame nepanga liange ankho tutanga Ombimbiliya, pahe atupopi etyi twelilongesa. Otyipuka otyo twetyilinga umwe ehimbwe.

Etyi twelilongesa Ombimbiliya atunoñgonoka okuti: mwaina tuli kononthiki mbahulilila; Ovakilisitau votyotyili vena okupopila vakwavo ovipuka oviwa mavikalingwa na Huku komutwe wandyila; kavalingi onthele youye; tupu atunoñgonoka okuti, etyi Ombimbiliya ipopia tyikwatesako omunthu okukala nonondunge. Twamona okuti Ombimbiliya ipopia umwe okuti kuna elongeso liotyili. Mahi ankho katulii olipi. Atuhimbika okutala ovipuka vilingwa momalongeso okwiiwe vali unene, mahi atumono okuti ovipuka valinga kavalandula Sesusi. Atukaovola vali momalongeso okweheiwe unene tutale evi vilingwa-mo.

Omakumbululo Ombimbiliya ankho tweiyale, mahi no ngotyo ankho tukaovola ovanthu vomalilongeso otyo tuvelinga omapulo tutale ine mavakumbulula umwe ngetyi Ombimbiliya ipopia. Apeho tyina ndyitunda-ko ankho ndyilikwambela ku Huku andyiti: ‘Ine ovanthu ava veli mongeleya yotyotyili mbambaavo nkhwateseko-vo ndyikondoke-ko vali.’ Twakala umwe ehimbwe tyitomphola vala novanthu ovo, mahi no ngotyo ankho katunevase ovanthu vakumbulula umwe nawa omapulo etu ngetyi Ombimbiliya ipopia; Tupu ankho momutwe wange katyiyamo-ale tyokukapopia vali navo.

Pahe atunoñgonoka Onombangi mba Siovaa. Atuvelingi omapulo tuhole-ale okulinga ovanthu tuvasa, mahi vana avakumbulula umwe ngetyi mwene nonthwe ankho twamona-le mo Mbimbiliya. Etyi twakala atuvepulu ovipuka ovikwavo ankho tuhanda umwe okunoñgonoka. Twevepulile oñgeni Huku akala tyina omunthu apwena omapangwe. Avetukumbulula umwe Nombimbiliya. Pahe atutavela okwenda keliongiyo.

Ame ankho hihande povanthu, etyi napita keliongiyo ovanthu ovanyingi aveya okunkhukuinya, otyipuka tyina atyinkhalesa omapita. Ankho hahandele vali okukondokako. Mahi andyilikwambela ku Huku andyiti, Ine ovanthu ava veli mongeleya yotyotyili mbambaavo nkhuateseko-vo ndyikondoke-ko vali. Pahe etyi nahimbika umwe okulongeswa Ombimbiliya no Nombangi mba Siovaa Andyihambukwa unene.

OÑGENI OMBIMBILIYA YAPILULULA OMWENYO WANGE: Etyi nanoñgonoka okuti okupwena omapangwe tyapenga andyityiyeke-po umwe liwa. Mahi tyemphuiyile unene okuyeka-po okupwena omakaya-kaya. Ankho ndyiti vala andyityiyeke-po andyityikondokela vali. Andyinoñgonoka okuti kuna ovanthu vamwe vetyivilile umwe okuyeka-po okupwena avehetyikondaukila umwe vali. Andyilikwambela ku Siovaa andyimupopila umwe atyiho tyili momutima wange. Ankhwatesako umwe andyityivili okutyiyeka-po.

Otyipuka otyikwavo nesukisile okuyeka-po ovikutu ankho ndyivala. Onthiki yotete naya keliongiyo, naile nomahuki ayangalala, andyiepake otinda ongole, novikutu vimwe viakuhauka vala omapita, notyikalasau tyo ndyinisi. Naapa umwe Onombangi mba Siovaa vapopile-ale naame, mahi kwaame ovikutu vina ankho vikahi vala nawa. Andyitange 1 Suau 2:15-17, yokwati: ‘Muhakalei nonthyole nouye nii novipuka vikahi mouye. Inkha omunthu umwe uhole ouye, opo kehole Tate.’ Etyi nasoka umwe nawa konondaka ombo andyiyeke-po ovikutu vina ankho ndyivala, mokonda vilekesa okuti ndyihole ouye.

Etyi natanga omukanda wo Ova Hebeleu 10:24, 25, andyinoñgonoka okuti ha Nombangi mba Siovaa vala vahanda ndyiende komaliongiyo, Huku nae otyo umwe ahanda. Andyihimbika umwe okwenda komaliongiyo aeho, andyinoñgonoka nawa vakwetu. Pahe andyilipakula ku Siovaa andyimbatisalwa.

OUWA PATYI NAPOLAKO: Siovaa ukahi nawa, wesuka noonthwe, uhanda tukale omapanga ae. Tyina ndyisoka ko otyo, ndyihanda okumuhetekela nokuhetekela omona wae Sesusi. (1 Petulu 2:21) Ndyilikwatehila umwe unene opo ndyitie umwe ame napama motyili, ame ndyihole vakwetu. Ndyitekula nawa omukai wange nomona wetu na vakwetu mewaneno, ngetyi ankho tyilinga Kilisitu. Okuhetekela Kilisitu tyankhwatesako okukala omunthu omuwa uhole vakwavo.

“Kavandingile omukuele.” — GUADALUPE VILLARREAL

ENIMA ATYITWA: 1964

OTYILONGO ATYITILWA: MÉXICO

EHIPULULO: ANKHO ULINGA OVIPUKA OVIVI

OMUENYO WANGE KOHALE: Natyitilwa kepunda-umbo litiwa Hermosillo ko México, motyilongo tyatyo omo, ankho muna vala ovanthu vahepa. Nonthwe ankho twahepa unene, ankho tukala vala mokandyuo ñga okatutu. Ankho ndyitupu onosapato ndyienda vala onomphai mbatyo pohi. Mee ankho uundapa unene opo etutekule mokonda tate wanyimale kohale pu etyi ankho ndyimututu. Ndyehimbika okuundapa ndyimututu na ndyikwateseko mee meumbo.

Mee ankho uhimama vala kovilinga, pondywo ankho tusala-po vala atwike. Etyi ndyina omanima 6, omukwendye umwe una omanima 15, ehimbika okulala naame. Wetyilinga umwe omanima omanyingi. Atyinkhalesa omapita, andyingwa-ngwana, pahe ankho hityiale ine ndyimulume ine ndyimuhikwena. Andyihimbika okusoka okuti omukwendye okulala na mukwendye mukwavo katyapengele-ale. Andyiende kosipitali nkhatalwe, kosipitali oko andyipopilwa okuti ndyitupu-ale otyitateka natyike, ndyikahi vala nawa.

Etyi natuukisa omanima 14, pahe andyilipake umwe mokulala novakwendye vakwetu, netyilinga omanima 11. Tupu Nalongesilwe okuvinda andyiikula ombalaka omu ndyivindila. Ankho nii ndyitupwale ehambu, ankho ndyili vala nokulimonesa ononkhumbi. Pamwe ankho ndyilisoka umwe ñga, andyimono okuti otyipuka ndyilinga katyaviukile. Mahi ankho ndyilipula okuti: ‘Mouye muno muna umwe ovanthu vekahi nawa, vayumbwa onthumbi?’

Omphange yange ankho ulongeswa Ombimbiliya no Nombangi mba Siovaa, nae akala umwe Ombangi ya Siovaa. Tyina ankho amphopila Ondaka ya Huku ame ankho nii vala hisukwale natyo, himutehelela-le. Mahi ankho ndyivehole unene mokonda, velihole unene nomulume wae, velivila nawa, velilinga onthilo. Etyi pakala naame andyitavela okulongeswa Ombimbiliya. Potete ankho hesukile-ale natyo, mahi pahe andyipiluluka.

OÑGENI OMBIMBILIYA YAPILULULA OMUENYO WANGE: Ame ankho hineende komaliongiyo Onombangi mba Siovaa, etyi nthiki imwe vankhonga, andyiende umwe. Otyipuka vanthambulile tyankhalesile nawa, ovanthu ankho vandinga unene omukwele, mahi Onombangi mba Siovaa vana kavandingile omukwele.

Ankho ndyityi-ale okuti Onombangi mba Siovaa ovanthu vekahi nawa. Mahi pahe andyityimono umwe vali nawa etyi napita Kotyionge tyavo. Namona okuti velihole, velikwata-po nawa, valinga vala ngoti velikwai. Ovipuka aviho vapopia vevipola umwe vala mo Mbimbiliya. Ankho ndyili-ale nokwovola ovanthu vekahi ngotyo, vayumbwa onthumbi. Vekahi nawa mokonda valinga umwe ovipuka valongeswa mo Mbimbiliya. Ame ankho nesukisa okuyekapo ovipuka ankho ndyilinga opo naame ndyikale omunthu omuwa ngavo.

Mokonda ndyalingile umwe omuhikwena, ankho ndyilinga vala ovipuka viovahikwena. Ankho ndyipopia ngomuhikwena, ndyienda ngomuhikwena, ndyivala ngomuhikwena, ndyivindwa, tupu ankho omapanga ange ovahikwena vala. Etyi nayekapo okulinga ovipuka ovio omapanga ange andingi omukwele. Ankho vamphopila okuti: “Oityi etyi ulinga? Ove ankho ukahi vali nawa, ankho una atyiho, pahe tala etyi ukahi, yekapo okulingesa Ombimbiliya.” Okuyeka-po ovipuka vina ovivi tyemphwilisile umwe unene.

Etyi tyipopia omukanda wa 1 Ova Kolindu 6:9-11, tyankhwatesileko unene andyityivili okuyeka-po ovipuka ovivi. Omukanda oo wati: ‘Ine kamutyii okuti vokulinga evi vihaviukile kavakapiñgana Ouhamba wa Huku? Muhayekei vakuenyi vemukembe. Vana valinga ovinepo viasila, vokufenda ovikahuku, vokulinga omaumbalehi, ovalume vahanda okulalwa novalume vakuavo, ovalume valala novalume vakuavo, . . . kavakapiñgana Ouhamba wa Huku. Iya vamwe pu onwe ankho ongotyo vekahi. Mahi onwe muakohua; onwe muasukukiswa.’ Siovaa wankhwatesako unene andyityivili okuyeka-po ovipuka ovivi ngetyi akwatesileko ovanthu vokohale. Opo ndyityiyeke-po pakalele omanima omanyingi, mahi ndyipandula unene Onombangi mba Siovaa vankhwatesileko unene.

OUWA PATYI NAPOLAKO: Pehepano ndyikahi nawa, ovipuka vina ovivi ankho ndyilinga hivilingi vali. Nanepa ndyina omona. Omona wetu tumulongesa nawa etyi Ombimbiliya ipopia. Pahe Ndyimukulu wewaneno, ndyilongesa vakwetu Ombimbiliya. Etyi nayeka-po ovipuka ovivi ankho ndyilinga mee ahambukwa unene, nae pehepano Ombangi ya Siovaa. Tupu omphange yange ankho ulinga vala ovipuka ovivi, nae wakala Ombangi ya Siovaa.

Ovanthu ankho vahahande ndyiyekepo ovipuka vina ankho ndyilinga, vetyiete okuti pahe ndyikahi vali nawa. Naile kosipitali ankho nahandavo okukwateswa-ko, mahi andyipopilwa vala ovipuka viehenale oku viapilukila, pahe ankho helihande-ale vali. Ankho ndyisoka okuti mokonda Siovaa omunene unene, omunongo kemesuku-ale na ame. Mahi Siovaa akala noluembia naame ankhwatesako. Otyipuka Siovaa andingila tyenthyika unene komutima.

“Ankho ndyina umwe atyiho, mahi ankho ndyitupu-ale ehambu.” — KAZUHIRO KUNIMOCHI

ENIMA ATYITWA: 1951

OTYILONGO ATYITILWA: JAPÃO

EHIPULULO: UHATEKA NOMUSIKALETA

OMUENYO WANGE KOHALE: Nekulila mepunda-umbo lyo Shizuoka, kotyilongo tyo Japão. Ankho tuna vala okandywo ñga okatutu, mahi ankho tukala-mo etyinana. Tate ankho ulandesa omisikaleta. Etyi ndyimona ankho twenda na tate okukatala ovanthu tyina velitaata nomisikaleta. Mokonda pahe ankho ndyityihole umwe unene, tate alingi umwe atyiho opo amphake mosikola yokutaha omisikaleta. andongesa umwe nawa oñgeni tyilingwa. Andyikongwa ndyikalongeswe mosikola imwe ñga, mahi ame andyianye andyiende vala mosikola yokutaha omisikaleta. Etyi natuukisa omanima 19, andyikala umwe omunongo.

Mokonda ankho nahanda okukwatesako ombunga yange andyililongesa umwe unene opo ndyilambe aveho ankho tutaha navo ko Japão. Pamwe tyina namatoko, natyina naponwa andyihande okuyekako, ankho ndyilipopila okuti ñga: ‘likwatehila wahayeke-ko ove otyo watyitilwa.’ Andyilikwatehila umwe unene. Menima liotete andyipopilwa okuti ndyityivila okutaha nawa. Menima lya vali atukataha opo tutale olie utyivila vali ko Japão, ame andyikala omunthu wavali povanthu vetyivila vali.

Mokonda yokweenda unene nomusikaleta andyikala novikalo ovinene, pahe ovanthu woko Tokai ankho vandyihana vala okuti owovikalo ovinene. Ankho ndyityihole unene tyokulityutya, pahe ovanthu ankho vanthila vala owoma. Etyi konombongo mbange kwayawiswa andyilande ondyuo imwe onene, ina umwe ovipuka aviho viokutelenala. Andyilande etukutu-tuku limwe lialanda vali onombongo ononyingi tyipona ondywo. Mokonda onombongo ankho mbandinga vala ononyingi, andyimbuavela vokulinga ononiñgoso vaundape nambo.

Namphila ankho ndyina umwe onombongo ononyingi, mahi ankho ndyitupu-ale ehambu. Ankho ndyinale omukai novana, mahi ankho hivetekulale nawa, ndyivekanda-ukila vala natyina valinga vala okapuka okatutu. Pahe ankho vanthila vala owoma, vatala umwe vala kotyipala tyange ine hono ndyili nawa.

Etyi pakala omuhikwena wange ehimbika okulongeswa Ombimbiliya no Nombangi mba Siovaa. Nthiki imwe amphopila okuti uhanda okwenda komaliongiyo onombangi mba Siovaa, andyiti opo naina hahe twende umwe atuho novana. Ndyihinangela umwe nawa onthiki omukulu umwe ahimbika okundongesa Ombimbiliya. Nahambukilwe unene novipuka andongesile.

OÑGENI OMBIMBILIYA YAPILULULA OMUENYO WANGE: Omukanda Ova Efesu 5:5, wankhwatesileko unene. Wati: ‘Nawike ulinga ovinepo vaisila, nawike ulinga etyi tyasila, nawike una elungavi, tyihangununa okufenda ovikahuku, makakala nepingo Mouhamba wa Huku, ukatuminwa na Kilisitu.’ Andyimono okuti otyipuka etyi ame ndyihole unene tyokulitaata nomisikaleta ankho ndyikahi vala ngovipuka ovikwavo ovanthu vayumba opo vamonene mu vakwavo, tupu tyikalesa omunthu nelungavi. Pahe andyikala vala omapita, andyikukuta umwe omutwe. Opo ndyikale epanga lya Huku ankho ndyina umwe okuyekapo ovipuka ovio. Mahi tyepwiyile unene.

Otyipuka etyi tyokulitaata nomusikaleta, opo ukale umwe omunongo, otyivili umwe nawa, una okulityutya navakwenyi. Mahi okulityutya tyieta elungavi. Na ame ankho otyo ndyikahi. Okulilongesa Ombimbiliya tyankhwatesako okukala omunthu ukahi nawa una ombembwa. Etyi nahimbika okulilongesa Ombimbiliya, kokulihataikisa nomisikaleta nayako vali vala tutatu andyityiyeke-po, mahi nkhele ankho ndyityihole unene. Pahe ankho ndyisoka vala opi mandyipolo onombongo mbokutekula vomeumbo liange. Andyihulilwa umwe unene, netyi vala ndyilinga ankho hityi-ale. Vetu avahimbika okundyayesa nokupopia okuti ñgeno ndyiyekapo okulilongesa Ombimbiliya. Tate anumana umwe unene. Otyipuka otyo atyinkhalesa umwe unene omapita etyi pakala atyitiwa ndyina ouvela umwe utiwa úlcera.

Okulilongesa Ombimbiliya nokwenda komaliongiyo tyankhwatesileko okuyumba vali onthumbi mu Siovaa. Andyilikwambela ku Siovaa ankhwateseko-vo amphopile-vo etyi ndyina okulinga. Omukai wange amphopila okuti opo ndyikale nehambu hesukisile okukala mondywo onene, otyipuka otyo atyinkhalesa umwe nawa andyitulu omutima. Etyi pakala vala katutu ovipuka pahe avikala umwe nawa.

OUWA PATYI NAPOLAKO: Namona okuti etyi Sesusi apopia tyivasiwa mu Mateusi 6:33, otyili umwe. Wati: “Tualeiko okuovola tete Ouhamba nouviuki wa Huku iya ovipuka ovio ovikuavo mamuviyawisilwa-ko.” Apeho ankho tuna umwe ‘ovipuka aviho’Sesusi apopia, katwakambele natyike. Movilinga omu pahe ndyikahi, hifetwa-le unene ngetyi ankho ndyifetwa kohale mokulitaata nomusikaleta, mahi tuna umwe atyiho twesukisa, meumbo lietu kamukambe natyike.

Tyina tulingila Siovaa kumwe na vakwetu, tyinkhalesa nawa, ndyikala nehambu limwe nehenekale-ale nalio. Ononthiki kambusete okulamba. Ovana vetu vetatu pahe vanepale, aveho novakai vavo vatualako okumbila Siovaa nehambu. Atuho pahe tukahi umwe nawa, tuna ehambu.