Bibliam vidankuta cambiarurqa

¿IMAM yanaparqa mana kuyapayakuq runata runamasinkunata kuyananpaq hinaspa yanapananpaq? ¿Imataq Mexicomanta mozota cambiarachirqa mana allin vidanta? ¿Imanasqataq Japón nacionniyoq runa saqerurqa bicicletawan llallinakuyta? Kaykunamantam yachasunchik qatiqnin willakuykunapi.

‘Hatunchakuq, piñakuqllaña, millay rimaqmi karqani’ (DENNIS O’BEIRNE)

NACESQAN WATA: 1958

NACIONNINMI: INGLATERRA

HUK WILLAKUYKUNA: AMISTAD MANA RURAY MUNAQ RUNA

ÑAWPAQ VIDAY: Taytaymi Irlanda lawmanta, chaymi wiñarqani paypa creencianman hina catolico. Mana munaptiypas achka kutita iglesiaman sapallay rinaypaqmi familiayqa kamachiwaq. Ichaqa munarqanim Diosmanta imallatapas yachayta. Chaymi sapa tuta rezakuq kani yayaykuta, camaypi tikrakuykuspaymi sapa palabrapa ima niy munasqanta entiendeyta munaq kani.

Mozoyasqaypim yachayta munarqani rastafari nisqankumantawan Hitlerpa gobiernonpa contranpi kaqkunamantapas. Ichaqa contrapi kaymanta punk nisqanku runakunapa kawsasqanman hinam kawsarqani. Marihuana drogatam yaqa sapa punchaw pitaq kani. Llumpaytam tomaq kani, yanqapunim vidayta wañuypa patanpi churaq kani, hukkunapiqa manapunim interesakuqchu kani. Manam munarqanichu amistadniyoq kayta, foto horqochikuyta nitaq piwan rimaytapas, gustoypaq hina kaptillanmi rimaq kani. Chayna kasqayta yuyarispaymi cuentata qokuni hatunchakuq, piñakuqllaña, millay rimaq kasqaymanta. Amigoykunallawanmi allin runaqa karqani.

Bibliapim interesakurqani 20 wataypi. Drogakunata rantikuq amigoymi Biblia leeyta qallaykusqa carcelpi, chaymi huk punchaw unayta rimarqaniku religionmanta, Iglesiamanta hinaspa Diablo kay pachapi ima rurasqanmanta. Hinaspam Bibliata rantiruspay estudiarqani. Sapakamam leeq kaniku, hinaspam ima yachasqaykumanta otaq entiendesqaykumanta parlaq kaniku. Chaynatam achka killa rurarqaniku.

Entienderurqanikum tukupay tiempopi kasqanchikta. Cristianokunaqa Diospa Gobiernonmanta allin noticia predicananta, kay pachapi kaqkunawan otaq politicawan mana chaqrukunanta hinaspa allin kawsanapaq Bibliapa consejasqanta. Segurom karqaniku Bibliapa nisqan cheqap kasqanmantawan cheqap religion kasqanmantapas. Ichaqa mayqen kasqanmantam tapukurqaniku. Repararqanikum reqsisqa religionkuna politicawan chaqrukusqankuta hinaspa imata yuyarispankupas tukuy ima rurasqankuta,  chaywanmi Jesuspa yachachisqanwan mana tupasqanta cuentata qokurqaniku. Manam Diospa agradonpaqchu karqa, chaymi mana ancha reqsisqa religionkuna ima yachachisqankumanta yachayta munarqaniku.

Chay religionkunapi kaqkunawanmi parlarqaniku hinaspa Bibliapa nisqanmanta tapurqaniku. Bibliapa imayna kutichisqanta yachasqaykuraykum chaylla cuentata qokuq kaniku niwasqanku Diospa Palabranwan tupasqanmanta otaq manapas. Sapa kutim chay runakunawan rimayta tukuruspay Diosta mañakuq karqani, paykuna cheqap religionpi kaptinqa kaqmanta tupayta munanaypaq. Achka killam paykunawan parlarqaniku ichaqa manam mayqanninpas Bibliapa nisqanmanta kutichiwarqakuchu, manataqmi paykunawan kaqmanta rimaytaqa munarqanichu.

Chaymantañam parlarqaniku Jehová Diospa testigonkunawan. Bibliapa nisqanman hina tapuptiykum chayman hina kutichiwarqaku. Imayna contestawasqankuqa yachasqaykuwanmi tupaqpuni. Chaymantam tapurqaniku drogamantawan cigarro pitayta Dios imayna qawasqanmanta, chaymantaqa manam yacharqanikuchu. Kaqmantam Bibliata servichikuspa kutichiwarqaku. Chaymi ninakurqaniku huñunakusqanku Salonman rinaykupaq.

Rinaypaqqa sasachakurqanim. Amistad rurayta mana munaq kasqayraykum mana gustawaqchu kuyakuywan allin pachasqa runakunapa saludawasqan. Chayna rurasqanku yanqa kasqanta piensaspaymi huñunakuyman riyta munarqaniñachu. Ichaqa Diostam hinalla mañakurqani cheqap religionpi kaptinkuqa paykunawan kaqmanta tupanaypaq. Chaymi anchata munarqani Testigokunawan estudiayta.

BIBLIAM VIDAYTA CAMBIARURQA: Yacharqanim drogakuyqa mana allin kasqanta chaymi chaylla saqerqani. Cigarro pitaytam ichaqa sasata saqerqani. Saqenaypaq achka kutita kallpanchakuspaypas manam atirqanichu. Willawarqakum cajachantin cigarrota wikaparuspa hukkunaqa haykapipas manaña pitasqankumanta, Jehová Diostam mañakurqani yanapawananpaq. Chaymantapacham manaña pitarqanichu. Tukuy sonqoywan Dios mañakuytam yacharurqani.

Cambiarqanim imayna pachakuyniypiwan allichakuyniypipas. Salonman chayllaraq rispayqa chukchaytam ñaqchakurqani gallopa titalanman rikchakuqta kancharichkaq azulwan teñispa, chaymantam teñirurqani naranja colorwan. Rakta pantalonwan hinaspa qellqayoq qara casacawanmi rirqani. Chayna pachakuyniyta cambianaypaq Testigokuna achka kutita niwaptinkupas manam munarqanichu. Ichaqa yuyaymanarqanim 1 Juan 2:15-17 nisqanpi: ‘Amayá kuyaychikchu kay pachapi mana allin ruraykunataqa [. . .], chaykunata kuyaqqa manam kuyanchu Diostaqa’. Chaymi imayna pachakuyniywan kay pachapi kaqkuna kuyasqayta lliwpi cambianay karqa Dios kuyasqayta qawachinaypaq. Chaytam rurarqani.

Chaymantam entienderurqani huñunakuyman rinaypaq Hebreos 10:24, 25 nisqanman hina Dios kamachisqanta, manam Testigokunachu niwarqa. Llapan huñunakuyman riyta qallaykusqay hinaspa wawqe-panikunata allinta reqsisqaymi kallpanchawarqa Jehová Diosman qokuspa bautizakunaypaq.

BENDICIONKUNA CHASKISQAYMANTA: Anchatam kusikuni Jehová Diosqa paywan amistad kanapaq yanapawasqanmanta. Llakipayakuq hinaspa kuyakuq kasqanmi kallpanchawan Churin Jesucristota qatipakunaypaq (1 Pedro 2:21). Jesucristota qatipakunaypaq kallpanchakusqaymi yanapawan imayna runa kanaypaq. Kallpanchakunim llakipayakuq hinaspa kuyakuq kanaypaq chaynataq señoraytawan churiytapas Cristo hina qawanaypaq. Iñiqmasiykunamantapas interesakunitaqmi. Cristota qatipakusqaymi yanapawan runamasiyta kuyanaypaq.

 “Respetawasqankutam qawachiwarqaku” (GUADALUPE VILLARREAL)

NACESQAN WATA: 1964

NACIONNINMI: MÉXICO

HUK WILLAKUYKUNA: HUCHALLIKUY VIDAPIM KAWSARQA

ÑAWPAQ VIDAY: Wiñarqanim 6 wawqe-paniykunawan Hermosillo llaqtapi (México), chaypiqa yaqa lliwmi wakcha kanku. Taytaymi wañukurqa taksallaraq kachkaptiy chaymi mamay mantienewarqaku. Taksaymantam llamkarqani wasiypi gastokunata pagaysinaypaq, yaqa sapa kutim qala chakilla riq kani zapatoypaq qollqe mana kaptin. Chaypi yaqa lliw runakuna hinam ñiti-ñiti kawsarqaniku.

Mamaymi yaqa tukuy punchaw llamkaq chaymi mana allin runakunamanta mana cuidawaqkuchu. 6 watachayoq kachkaptiymi 15 watayoq warma abusaruwarqa, chaytaqa unay watam rurawarqa. Chayraykum qari kasqaymanta iskayrayarqani. Piensarqanim qarimasiy gustawasqanqa allin kasqanta. Yanapakuyta maskaspaymi doctorkunatawan curakunata tapukurqani, paykunam niwarqaku chayna piensasqaymanta ama preocupakunaypaq.

Qarimasiy gustawasqantam sutillata qawachirqani 14 wataypi. Chaynam karqani 25 wataykama, achka qarimasiywantaqmi warmi-qari hina uywanakurqaniku. Chukchata allichaq hinaspa rutuq kanaypaqmi estudiarqani hinaspam huk localpi chayta ruraspay llamkarqani. Ichaqa manam kusisqachu karqani, aswanqa ñakariypiwan traicionasqam kawsarqani. Rurasqay mana allin kasqanpi piensaspaymi tapukurqani: ¿kanmanchu kay pachapi allin runakuna?, nispa.

Yuyarirurqanim Bibliata estudiaruspan Jehová Diospa testigon kananpaq paniy bautizakusqanmanta. Ima yachasqanmantam willawaq, ichaqa manam kaqpaqpas hapiqchu kani. Chaywanpas admirakuqmi kani casada vidanpi imayna kawsasqankumanta. Cuñadoywanmi sumaqllata rimapayanakuqku, kuyanakuqku hinaspa respetanakuqku. Tiempopa risqanman hinam huk Testigowan Bibliata estudiarqani. Qallariypiqa manam ganaswanchu estudiarqani aswanqa estudianay kaptillanmi, chayna estudiasqaytam cambiarurqani.

VIDAYTAM BIBLIA CAMBIARURQA: Testigokunapa huñunakuyninman rispaymi admirakurqani. Yaqa llapallan runakuna burlakuwaptinkupas paykunaqa manam burlakuwarqakuchu. Kuyakuywanmi saludawarqaku hinaspa respetawasqankutapas qawachiwarqakum. Allinmi sientekurqani.

Asambleaman rispapas chayna kasqankumantam cuentata qokurqani, hatun huñunakuypipas paniy hinam sonqomanta kuyakuq allin runakuna kasqaku. Tapukurqanim: “¿Kayna runakunatachu unayña maskachkani?”, nispa. Kuyakuywan huk sonqolla kayninku hinaspa ima tapukuytapas Bibliapa nisqanwan contestawasqankum admirachiwarqa. Cuentatam qokurqani imayna kawsanankupaq Diospa Palabran allinta yanapasqanmanta. Paykuna hina kayta munaspayqa vidaytam cambianay karqa.

Chaypaqqa qalaypaqmi vidayta cambianay karqa, ñoqaqa warmipas kayman hinam kawsarqani. Cambianaymi karqa warmi hina rimayniyta, puriyniyta, pachakuyniyta, chukchayta hinaspa amistadniykunatapas. Ñawpaq amistadniykunam niwaqku: “¿Imanasqam chayta ruranki? Ama Bibliata  estudiaychu. Allinmi kachkanki”, nispa. Huchapakuyta saqeymi aswan sasa karqa.

1 Corintios 6:9-11 nisqanqa sonqoykamam chayarurqa, chaymi piensarqani cambiay atinayta. Chaypim nin: “Amayá pantaychikchu, Diospa munaychakusqanmanqa manam yaykunqachu huchapakuypi puriqkunapas, taytacha-mamacha adoraqkunapas, casado kachkaspa hukwan kakuqkunapas nitaq qarimasinwan kaqkunapas [. . .]. Chaynamá karqankichik qamkunapas, ichaqa Diosmi mayllaykusurqankichik.” Jehová Diosmi ñawpaqpi runakunata yanaparqa vidankuta tikranankupaq, ñoqatapas yanapawarqam. Achka watakunapim anchata kallpanchakurqani, ichaqa Testigokunapa consejawasqankuwan kuyawasqankum yanapawarqa.

BENDICIONKUNA CHASKISQAYMANTA: Kunanqa casarasqañam kachkani, warmaykutam yachachiniku Bibliapa nisqanman hina kawsananpaq. Ñawpaq vidaytaqa saqeruniñam, kunanqa kusisqam tarikuni Dios servisqaypi achka rurayniyoq hinaspa bendicionkunata chaskispay. Congregacionpi ancianom otaq yachachiqmi kani, achka runakunatam yanaparqani Diosmanta cheqapta yachanankupaq. Ñawpaq vidayta saqesqaymi mamayta kallpancharqa Bibliata estudiananpaq hinaspa bautizakunanpaq. Huknin paniypas huchapakuyta saqespanmi Testigoña karqa.

Ama cambiaychu nispa wakin niwaqniykunapas kunanqa reqsikunkum viday allinyasqanmanta. Yachanim ima kallpanchawasqantaqa. Ñawpaqtaqa yachayniyoq runakunapa yanapakuyninta maskaspaypas mana allin consejokunatam tarirqani, Diosmi ichaqa allinta yanapaykuwarqa. Mana mereceptiypas Diosmi pacienciantawan kuyakuyninta qawachiwarqa, chaymi vidaytaqa cambiarqani llakipayawaspan allin vidata qoy munasqanwan.

“Llakisqa, sapallay hinaspa vidaypas yanqapaq hinam karqa” (KAZUHIRO KUNIMOCHI)

NACESQAN WATA: 1951

NACIONNINMI: JAPÓN

HUK WILLAKUYKUNA: BICICLETAWAN CARRERAPI LLALLIY MUNAQLLAÑA

ÑAWPAQ VIDAY: Lamar qochapa hichpan Shizuoka (Japón) lawpim wiñarqani, familiaypi 8 kaspaykupas taksa wasichapim yacharqaniku. Papaymi bicicletakunata rantikuq, chaymantapas bicicletawan kallpaqkunata qawaqmi pusawaq, chaymi bicicletawan kallpay gustawarqa. Payqa munarqam allin kallpaq kanayta, chaymi 14 wataypi allinta yachachiwarqa bicicletawan kallpayta. 16 wataymanta 18 wataykamam nacionniypi chayna llallinakuy kaptin 3 watantin ganarqani. Universidadpim estudianay karqa, ichaqa bicicletawan kallpanapaq allin preparaq sitiopi yanapachikuqmi rirqani. 19 wataypim allin kallpaqña karqani.

Japonpim pimantapas aswan allin kallpaq kayta munarqani. Aylluy mana sasachakunanpaqmi achka qollqeyoq kayta munarqani, chaymi astawanraq practicarqani.  Ejerciciota ruraspay otaq wakin sitiokunapi carrerapi llumpayta pisiparuspayqa kikiytam nikuq kani llallinaypaq nacesqayta hinaspa mana atipachikunayta. Kallpanchakusqayqa allinmi karqa. Qallariq llallinakuypim sutichawarqaku chayllaraq kallpay yachaqwan, qatiqninpiñataq akllawarqaku enteron nacionpi kaqkunawan llallinakunaypaq. 6 kutitam ganaqpa qepallanta chayarqani.

Kallpasapa hinaspa yaqa lliwpi ganaq kaptiymi sutichawarqaku Tokai llaqtamanta trenpa motornin nispa. Kallpaqmasiykunapas manchakuwaqkum pitapas mana llakipayaspa kallpasqayrayku. Achka qollqeta ganasqayraykum munasqayta ruraq kani. Rantirqanim ejerciciota ruranaypaq tukuy aparatoyoq wasita hinaspa wasipa chanin hina valorniyoq mosoq carrota. Qollqey mana tukunanpaqmi hukpa kapuqninkunata rantirqani, hatun negociokunapipas qollqeytam servichikurqani.

Chaywanpas llakisqa, sapallay hinaspa vidaypas yanqapaq hinam karqa. Chay tiempopaqqa casarasqaña hinaspa 3 churiyoqñam karqani. Yanqamantam señoraywan hinaspa churiykunawan piñakuq kani, paykunam piñasqa kasqaytaqa yachaqku rikchayniyta qawaspanku.

Esposaymi Jehová Diospa testigonkunawan Bibliamanta estudio chaskiyta qallaykurqa, hinaptinmi chayqa allinpaq karqa. Huñunakuykunaman rinanpaq niptinmi tantearqani llapallayku rinaykupaq. Yuyachkaniraqmi Bibliamanta yachachiwananpaq congregacionpi anciano wasiyman hamusqanta. Yachasqaymi anchata yanapawarqa.

VIDAYTAM BIBLIA CAMBIARURQA: Manam haykapipas qonqaymanchu Efesios 5:5 nisqantaqa. Chaypim nin: “Cristopa hinaspa Diospa munaychakusqanmanqa manam yaykunqachu huchapakuqkunaqa, millakuypaq hucha ruraqkunaqa hinaspa [. . .] kikillanpaq imapas munaqqa”, nispa. Entienderqanim llallinakuyqa runakuna apuestanankupaq hinaspa imatapas kikillankupaq munachiq kasqanta, chaymi concienciaypiqa mana hawkachu karqani. Musyarqanim Diosta kusichinaypaqqa kallpaspa llallinakuy saqenayta, chayqa llumpay sasam karqa.

Llallinakusqaypi allinnin tiempom tukururqa, kaqmantam qallariyta munarqani. Yacharqanitaqmi Bibliata estudiaspay hawka tarikusqaymanta, manam chaynachu karqa kallpaptiyqa. Estudiayta qallaykusqaymantam 3 kutillataña carrerapi kallparqani, ichaqa sonqoypim hinalla kallpayta munarqani. Manataqmi yacharqanichu familiay imayna mantieneytapas. Sasachakuypim tarikurqani, aylluykunapas manam allinpaqchu hapirqaku mosoq religionniyta. Taytaypas ñoqawanmi llumpayta hukmanyarqa. Chaymi wiksay ukupipas herida rikurirurqa.

Chayna sasachakuykunapi kaptiymi yanapawarqa Biblia estudiasqaywan Testigokunapa huñunakuyninman risqay. Pisi-pisimantam iñiyniypas yapakurqa. Mañakusqayta Jehová Dios uyariwasqanta yachanaypaqmi payta mañakurqani. Señoraypas kallpanchawarqam kusisqa kananpaq hatun wasita mana necesitasqanta niwaspan. Iñiyniypim hinalla astawan ñawparirqani.

BENDICIONKUNA CHASKISQAYMANTA: Reqsikunim Jesuspa kayna nisqan cheqap kasqanta: “Puntataqa maskaychik Diospa [gobiernontawan] paypa munasqan allin ruraytayá hinaptinqa qosunkichikmi tukuy ima pisipusuqnikichikta” (Mateo 6:33). Jesuspa nisqanman hinam mana haykapipas kawsanaykupaq ‘imaykupas pisipuwarqakuchu’. Manaña ñawpaqta hina ganaptiypas kay 20 wata pasaqpiqa manam imaykupas pisipuwarqakuchu.

Iñiqmasiykunawan Diosta servispaymi anchata kusikuni, tiempopa pasasqantapas manam reparanichu. Familiaywanpas aswan hawkañam tarikuni. 3 churiykunapas señorankuwanmi tukuy sonqonkuwan Jehová Diosta servinku.