Taui te Pipiria i te Oraanga

EAA tei akakeu i tetai tangata punk rock oaoa kore kia akaari i te aroa e kia tauturu i etai ke? Eaa tei akakeu i tetai tangata i Mexico kia akaruke i tona oraanga tau kore? Eaa tetai tangata rongonui i akaruke ei i te taemoemo takatakai patikara kia rauka iaia i te tavini i te Atua? Akamanako ana i te tuatua a teia au tangata.

“E Tangata Tuatua Kino Au, Akatietie e te Riririri.”​—DENNIS O’BEIRNE

MATAITI ANAU: 1958

ENUA ANAU: PERITANE

ORAANGA: TANGATA PUNK ROCK OAOA KORE

TOKU ORAANGA I MUA ANA: I te tua o toku metua tane, e kopu tangata Ireland matou, e kua utuutuia au i roto i te akonoanga Katorika. Ko au anake ua te ka aere ki te pure, kare ra au e inangaro ana i te aere. Noatu rai, e kaki toku i te au mea pae vaerua. E pure putuputu ana au i te Pure a te Atu, te maara nei iaku me takoto au i te po i te akamanako eaa te aiteanga o te reira. Kua akamata au i te akamanako tatakitai i te tuanga o te reira e te kimi anga i te aiteanga o te reira.

I toku mapu mai anga, kua o atu au ki roto i te pupu Rastafari. Kua akara katoa au i te au pupu i te pae poritiki mei te pupu Anti-Nazi League. Inara, ko te pupu taku i o atu ki roto ko te pupu akatietie o te punk rock. Kua kai au i te au apinga akakona, mei te marijuana, e kua kai au i te reira i te au rā ravarai. No toku tu “kare au e kea atu,” kua inu maata au, kua o au ki roto i te kino, e kare i manako atu ana i tetai ke. Kare au e oaoa ana, kare e tuatua ki te tangata, inara me e pukapuka puapinga tetai ka tuatua au. Kare au e inangaro kia neneiia au. Me akamanako au i teianei, kua kite mai au e e tangata tuatua kino au, akatietie e te riririri. Te aronga tei piri vaitata mai kiaku ka akaari au i te aroa takinga meitaki.

E 20 oku mataiti, kua inangaro au i te tatau i te Pipiria. Ko tetai oa tei okooko ana i te au apinga akakona, kua akamata aia i te tatau i te Pipiria iaia i roto i te are auri, e kua uriuri manako maua no runga i te au akonoanga, te Ekaretia, e ta Satani tuanga i teianei ao. Kua oko mai au i tetai Pipiria e kua tatau i te reira ko au ua. Kua tatau maua ko toku oa i tetai au ngai o te Pipiria, e ka uriuri i ta maua i kite mai, e oti kua akanoo i ta maua i akamanako mai. Kua rave maua i teia no tetai au marama.

Ko teia tetai au manako ta maua i kite mai i roto i ta maua tatauanga: te noo nei tatou i te tuatau openga o teianei ao; ka tutu aere te au Kerititiano i te nuti meitaki o te Patireia o te Atua; kare ratou i to teianei ao, e kare e o atu ki te angaanga poritiki; e te oronga maira te Pipiria i te aratakianga tau meitaki. Papu meitaki ia maua e e tuatua mou tikai ta te Pipiria e e akonoanga mou tetai. Inara ko teea te akonoanga mou tikai? Kua akamanako maua i te au akonoanga maata, e ta ratou peu e te akaepaepaanga, pera katoa to ratou pirianga ki te au angaanga poritiki, kua kite mai maua e kare a Iesu i aite mei te reira rai. Kua kite maua e kare te Atua e āriki ia ratou, no reira kua iki maua i te kimi i te au akonoanga matau koreia i te akara e eaa ta ratou ka oronga mai.

Ka aravei maua i te aronga o taua au akonoanga kia ui i ta maua uianga. Kua kite maua i ta te Pipiria pauanga no taua au uianga, no reira kua papa ua maua i te kite e me kua tano rai ta ratou pauanga ki te Tuatua a te Atua. I muri ake i taua au uriurianga, kua pure au ki te Atua, ‘Me tei roto teia au tangata i te akonoanga mou, e akakeu mai iaku kia aravei akaou atu au ia ratou, ine.’ I muri mai i nga marama o taua au uriurianga, kare ake rai i kiteaia mai e au tetai pupu te ka pau mai i ta maua uianga no roto mai i te Pipiria; kare katoa au e inangaro i te aravei akaou atu ia ratou.

I muri mai, kua aravei maua i te Au Kite o Iehova. Kua ui akaou maua i taua au uianga, kua pau mai ratou mei roto mai i te Pipiria. Tano tikai ta ratou i akakite mai ki ta maua i apii ana. No reira kua uiui atu maua i te au uianga kare maua i kite eaa te au pauanga i roto i te Pipiria​—ei akaraanga, eaa to te Atua manako no te kai avaava e te kai i te au apinga akakona. Kua pau akaou mai ratou mei roto i te Tuatua a te Atua. Kua āriki maua i te aere ki te uipaanga i ko i te Are Uipaanga Patireia.

E mea ngata iaku i te aere ki te uipaanga. No toku tu oaoa kore, kare roa au e inangaro i taua aronga oaoa e te mako tikai kia aravei mai iaku. Kua manako kino au i tetai pae, e kare au e inangaro i te aere akaou ki te au uipaanga. Kareka ra, mei taku i matau ana, kua pure au ki te Atua kia akatupu mai aia i te anoano kia aravei akaou au i teia aronga me tei roto ratou i te akonoanga mou, e kua inangaro au i te apii i te Pipiria ki te Au Kite.

KUA TAUI TE PIPIRIA I TOKU ORAANGA: Kua kite au e ka anoanoia au kia akamutu i te kai i te apinga akakona, no reira kua rauka iaku i te akamutu i te reira. Te mea ngata roa atu i te akaruke ko te kai avaava. Kua tauta au i te au taime ravarai i te akamutu i te kai avaava kare ra i rauka ana. Toku kite anga e kua rauka i tetai pae i te titiri ua i ta ratou avaava e kare i kai avaava akaou ana, kua pure au kia Iehova no runga i te reira. I muri mai, na roto i ta Iehova tauturu, kua rauka iaku i te akamutu i te kai avaava. Kua kite mai au i te puapinga kia tuatua kia Iehova ma te ngakau tae na roto i te pure.

Tetai tauianga maata taku i rave, no runga te reira i toku kakau e te akamaneaanga. I toku aere mua anga ki te uipaanga i ko i te Are Uipaanga Patireia, e rouru taratara auika-matie toku. I muri mai kua kara au i toku rouru ki te makara maratea. Kua aao au i te au piripou jean e te pereue kiri manu ma te tataanga peni akairaia. Kare au e inangaro i te taui, noatu te au akamaroiroi anga takinga meitaki a te Au Kite kiaku. I muri mai, kua akamanako au ia 1 Ioane 2:15-17: “Auraka e anoano i teianei ao, e te au mea ravarai o teianei ao. Ko te tangata i anoano i teianei ao ra, kare te anoano o te Metua i roto iaia ra.” Kua kite mai au e no toku tu akaraanga, te inangaro ra au i teianei ao e me ka inangaro au i te Atua, ka anoanoia au kia taui. Kua rave au i teia.

I muri mai, kua kite mai au e kare ko te Au Kite anake ua te inangaro ra kia aere au ki te au uipaanga Kerititiano. Te akaari maira a Ebera 10:24, 25 e te inangaro maira te Atua kia rave au i te reira. I muri ake te oki akaou anga au ki te uipaanga e kia akamatau i teia iti tangata, kua iki au i te akatapu i toku oraanga kia Iehova na te papetitoanga.

KUA PUAPINGAIA AU: Kua akakeuia au te akatika anga a Iehova ia tatou kia akatupu i tetai pirianga vaitata kiaia. Kua akamaroiroiia au no tona tu tangi aroa kia aru iaia, e kia aru katoa i tana Tamaiti, ko Iesu Mesia, ei akaraanga meitaki i roto i toku oraanga. (1 Petero 2:21) Kua apii katoa au e iaku e tauta ra kia riro ei Kerititiano meitaki, ka vai rai toku uaorai tu ei tangata. Kua tauta pakari au i te akatupu i tetai vaerua aroa e te takinga meitaki. Kua tauta au i te aru i to Iesu tu me akono au i taku vaine e ta maua tamaiti. Akaperepere au i toku au taeake e te au tuaine i roto i te tuatua mou. Na te aru anga ia Iesu, kua oronga mai te reira i te tu ngateitei, e te tu tau kia aroa atu i etai ke.

“Akono Ratou Iaku ma te Tu Ngateitei.”​—GUADALUPE VILLARREAL

MATAITI ANAU: 1964

ENUA ANAU: MEXICO

ORAANGA: ORAANGA AKATURI

TOKU ORAANGA I MUA ANA: Ko au tetai o te itu tamariki, tei noo i Hermosillo, Sonora, i Mexico, e ngai putaua te reira. Kua takake toku papa i toku meangiti anga, no reira kua rave toku mama i te angaanga no te akono ia matou. E aere vaevae ua ana au no te mea kare a matou moni i te oko tamaka. Iaku e meangiti ra, kua akamata au i te angaanga ei tauturu i toku ngutuare tangata. Mei tetai au ngutuare, kua noo kapiti matou.

Maataanga o te au ra, kare toku mama i te kainga kia paruru ia matou tamariki. E 6 oku mataiti, kua kangaia au ma te āinga viivii e tetai tamaiti e 15 ona mataiti. Kua roa toku takinokinoia anga. Tei tupu mai, kua akamata au i te manako tuke ei tane. Manako mai au e mea tau ua i te inangaro i te tane. I toku aere anga i te pati tauturu a te au taote me kore te au orometua, kua karanga mai ratou e kare oku manamanata e te meitaki ua ra toku manako.

E 14 oku mataiti, kua manako au i te akakite ki te katoatoa e e tangata homosexual au. E 11 mataiti teia oraanga noku, e tukeke taku au tane e piri ana. Kua apii au i te pakoti rouru e kua akono i tetai are toa akamanea anga. Inara, kare au e mataora ana. E oraanga mamae tikai toku e te pikikaa. Kua kite au kare i te mea tau taku e rave ra. Kua akamata au i te ui kiaku uaorai, ‘Te vaira ainei tetai au tangata meitaki tikai?’

Kua akamanako au i toku tuaine. Kua akamata aia i te apii i te Pipiria ma te Au Kite o Iehova e kua papetitoia aia. Ka akakite mai aia i tana i apii ana, kare ra au e inangaro i te akarongo atu. Noatu ra, kua mataora tikai au i tona oraanga e tona akaipoipo. Kua kite au i to raua inangaro e te akangateitei i tetai e tetai. Kua akaari raua i te aroa takinga meitaki ki tetai e tetai. I muri mai kua akamata tetai o te Au Kite o Iehova i te apii i te Pipiria kiaku. I te akamataanga, kua rave ua au i te reira​—kare ra au i mataora ana. I muri roa mai kua taui te reira.

KUA TAUI TE PIPIRIA I TOKU ORAANGA: Kua pati mai te Au Kite kia aere au ki tetai o ta ratou uipaanga, e kua aere atu au. E mea ou teia kiaku. E aviri ana te tangata iaku, kare ra te Au Kite e akapera ana. Kua āriki aroa mai ratou iaku, e kua akono ratou iaku ma te tu ngateitei. Kua akakeuia toku ngakau.

Te aere anga au ki tetai akaputuputuanga kua umere tikai au i te Au Kite. Kua kite au e noatu i roto i te au pupu maata, kua aite ratou mei toku tuaine rai​—ma te tu meitaki e te ngakau tae. Kua ui au kiaku uaorai e penei ko teia te pupu tangata meitaki tikai taku i kimi ua ana. Umere tikai au i to ratou tu aroa e te tu taokotai, e te taangaanga i te Pipiria ei pau i te au uianga. Kua kite mai au e ko te Pipiria te akakeu anga maata i roto i to ratou oraanga. Kua kite katoa au e ka anoanoia au kia rave i te au tauianga kia riro mai ko tetai ia ratou.

Koia tikai, e maata taku tauianga ka rave, no te mea te noo ra au i te oraanga akavaine. Taku tuatua, toku tu, te kakau, toku rouru, e te au oa, ka anoanoia te taui anga. Kua aviri mai toku au oa iaku, te karanga anga: “Eaa koe i rave ei i teia? Meitaki ua ra koe. Eiaa e apii i te Pipiria. Kua rauka ia koe te au mea ravarai.” Te mea ngata roa atu i te taui, ko taku au peu i toku oraanga akaturi.

Noatu rai, kua kite au e ka rauka te tauianga, no te mea kua akakeuia toku ngakau e te au tuatua a te Pipiria i roto ia 1 Korinetia 6:9-11: “Kare ainei kotou i kite e, kare te aronga tuatua-tika kore e noo i te basileia o te Atua? Auraka e vavare: kare te kanga, e te akamori idolo, e te akaturi, e te akavaine, e te aronga sodoma . . . kare anake ïa e noo i te basileia o te Atua. Mei te reira oki tetai papaki o kotou na: kua oreiia ra kotou.” Kua tauturu a Iehova i te au tangata i te reira tuatau kia taui, e kua tauturu katoa aia iaku. Kua roa te au mataiti e toku taitaia anga, inara kua riro te tauturu e te aroa o te Au Kite ei akamaroiroi iaku.

KUA PUAPINGAIA AU: I teia rā, e oraanga meitaki toku. Kua akaipoipo au, e te apii nei maua ko taku vaine i ta maua tamaiti kia aru i te au kaveinga a te Pipiria. Kua akaruke au i toku oraanga o mua ana, e te mataora nei au i te au akameitakianga e te au angaanga pae vaerua. Te tavini nei au ei tangata pakari i roto i te putuputuanga, e kua tauturu au i tetai ke kia apii i te tuatua mou o te Tuatua a te Atua. Mataora tikai toku mama no te au tauianga i toku oraanga, i āriki ei aia i te apii i te Pipiria e i teianei kua riro mai ei Kerititiano papetitoia. Ko tetai o toku tuaine tei noo ana i te oraanga akaturi, kua riro katoa mai aia ei Kite no Iehova.

Ko tetai aronga tei matau i toku oraanga i mua ana kua kite katoa i toku tauianga maata. E kua kite au akapeea taua au tauianga i tupu ei. I mua ana kua kimi au i te tauturu a te au taote e te au orometua, inara e tauturu tau kore ta ratou. Inara, kua tauturu meitaki mai a Iehova iaku. Noatu toku manako puapinga kore, kua kite mai a Iehova iaku e kua akono mai iaku ma te aroa e te tu akakoromaki. No te mea e te manako maira te Atua umere, kite e te aroa iaku e kia rauka tetai oraanga meitaki, kua riro mai te reira ei mea puapinga tikai kiaku.

“Kare Au e Mataora Ana, Akamaromaroa, e te Puapinga Kore.”​—KAZUHIRO KUNIMOCHI

MATAITI ANAU: 1951

ENUA ANAU: TIAPANI

ORAANGA: TAEMOEMO PATIKARA TAKATAKAI

TOKU ORAANGA I MUA ANA: Kua maata mai au i roto i tetai oire ngai tapae anga no te paî ko Shizuoka Prefecture, i Tiapani, e toko varu matou i toku ngutuare, ma te are meangitika ua. E are toa okooko patikara takatakai ta toku papa. Mei toku meangiti anga e apai ana aia iaku ki te ngai taemoemo patikara, e kua inangaro au i te reira tipoti. Kua akamata toku papa i te akateateamamao iaku kia riro mai ei tangata taemoemo. Iaku i te apii tua rua, kua akamata aia i te tereni pakari. Iaku i te apii tua toru, e toru aku re i rauka mai i roto i te taemoemo anga o te mataiti. Kua tae mai tetai patianga kia aere au ki te apii teitei, inara kua iki au i te apii terenianga taemoemo. E 19 oku mataiti, kua riro mai au ei tangata taemoemo.

I te reira taime, toku akakoroanga i te oraanga koia oki kia riro mai ei tangata taemoemo patikara takatakai rongonui roa atu i Tiapani. Kua parani au i te akaputu maata i taku moni kia rauka tetai oraanga tau e te tinamou no toku ngutuare tangata. Kua tauta pakari au i roto i taku terenianga. I te tuatau e manako taitaia ra au no te tereni pakari anga me kore e ngata tetai tuanga o te taemoemo, e karanga ua ana au kiaku uaorai e, kua anauia mai koe no teia taemoemo patikara e kia rave ua rai i te reira! Ko taku ïa i rave. Kua kite mai au i te meitaki no taku tauta anga pakari. I te mataiti mua o te taemoemo, kua peke mai iaku te taoonga mua ei mema. Te rua o te mataiti, kua o atu au ki tetai taemoemo te ka akapapu mai e koai te tangata taemoemo numero tai o Tiapani. E ono taime, kua peke mai iaku te rua o te re o taua taemoemo anga.

No te mea tei roto au i te pupu taemoemo rongonui roa atu, kua kitea meitakiia au ei tangata vaevae maroiroi no Tokai, e ngai te reira i Tiapani. E vaerua taemoemo toku. E mataku ana te tangata iaku i te reira tuatau, no te mea kare au e manako atu ana ia ratou me taemoemo matou. Maata tikai taku moni i rauka mai, e ka rauka iaku i te oko mai i taku i inangaro. Kua oko mai au i tetai ākā are ma te pia akaetaeta uaua e te au matini meitaki tikai. Kua oko mai au i tetai motoka, maata atu tona moni i to te are. Ei akono i toku oraanga kua oko mai au i te au are e kua tuku i tetai o taku moni ki roto i te stock market.

Noatu ra, kare au e mataora ana, akamaromaroa, e te puapinga kore. I te reira tuatau kua akaipoipo au e e tamariki taku, inara kare oku tu akakoromaki ki toku ngutuare. Ka riri au i taku vaine e ta maua tamariki no tetai au mea rikiriki ua. Kua akamata ratou i te akara ua mai i toku nga mata me te riri ra au.

Inara, kua akamata taku vaine i te apii i te Pipiria ma te Au Kite o Iehova. E maata te au tauianga i tupu mai. Kua akakite mai aia e ka inangaro aia i te aere ki te uipaanga a te Au Kite, no reira kua akatika au e ka aere matou pouroa ei ngutuare. Maara nei iaku te atoro mai anga tetai tangata pakari iaku i te kainga i tetai po e kua akamata i te apii i te Pipiria kiaku. Reka tikai au i taku i kite mai.

KUA TAUI TE PIPIRIA I TOKU ORAANGA: Kare rava au e ngaropoina i taku i tatau i roto ia Ephesia 5:5 tei akakeu iaku. Karanga ra e: “Kare a te akaturi, e te tangata viivii ra, kare a te noinoi apinga ra, e akamori idolo ïa, kare anake a ratou tuanga i te basileia o te Mesia ra e te Atua.” Kua kite mai au e te akaaiteia ra te taemoemo patikara ki te pere moni e ka akatupu i te vaerua noinoi. Taitaia tikai toku akava ngakau. Kua manako mai au e me ka inangaro au i te akamareka i te Atua ko Iehova, ka anoanoia au kia akamutu i te taemoemo. E ikianga ngata teia kiaku.

Koi oti ua ake iaku te taemoemo puapinga maata rava o te mataiti, e kare au e inangaro ana i te akamutu. Kua kite mai au e na te apii anga i te Pipiria i rauka ai iaku te manako au e te maru​—e tuke teia ki te tu taku e inangaro ra kia re i te taemoemo! E toru ua taime toku taemoemo anga i te akamataanga au i te apii, inara i roto i toku ngakau kare au e akaruke i te taemoemo. Kua manamanata katoa au e ka akapeea me akono i toku ngutuare tangata. Kua taitaia tikai au, kare au i kite eaa taku ka rave, kua akamata toku kopu tangata i te tamanamanata mai iaku no runga i taku akonoanga ou. Kua ati ngakau tikai toku papa. No toku taitaia maata, kua tuia au e maki ulcer.

Kua riro taku apii Pipiria e te aere ki te au uipaanga a te Au Kite o Iehova ei tauturu iaku i taua tuatau manamanata. Aere ua rai, kua maroiroi mai toku akarongo. Kua pati au kia Iehova kia akarongo mai ki taku pure e kia tauturu mai iaku kia kite e te akarongo maira aia. Kua maru mai toku tu taitaia te akapapu mai anga taku vaine e kare aia e inangaro i te noo i roto i tetai ākā are kia mataora aia. Aere ua rai, kua meitaki mai toku tu.

KUA PUAPINGAIA AU: Kua kite mai au e tika tikai ta Iesu au tuatua i roto ia Mataio 6:33. Karanga ra aia: “E na mua ra kotou i te kimi i te basileia o te Atua, e te tuatua-tika nana ra; e kapiti katoaia mai taua au mea katoa ra ia kotou.” Kare rava matou i ngere ana i “taua au mea katoa ra” ta Iesu i taiku mai, te au apinga ka anoanoia no te oraanga. Noatu kua topa maata taku moni ki raro i teianei mei taku i rauka ei tangata taemoemo, kare rava au e toku ngutuare i ngere ana i tetai apinga i te 20 mataiti i topa.

Tei meitaki roa atu, me angaanga au e me akamori taokotai ki toku au taeake irinaki, kua kite mai au i te rekareka e te mataora kare au i kite ana i mua ana. Te topa viviki nei te tuatau. Kua meitaki katoa mai toku oraanga ngutuare tangata. Kua riro mai ta maua nga tamariki tamaroa e toru e ta ratou au vaine ei au tavini akarongo mou no Iehova.