Bijbel e kenki sma libi

SAN meki taki wan punkman di no ben bemui nanga sma, leri fu lobi trawan èn fu yepi den? San meki taki wan man na ini Meksikow no libi wan yayolibi moro? Fu san ede wan fu den moro bun man di ben strei rèi baisigri libi a sani dati na baka èn e du muiti now fu dini Gado? Luku san den sma disi e taki.

„Mi ben grofu, mi ben abi bigifasi, èn mi ati ben bron esi-esi.”​—DENNIS O’BEIRNE

A GEBORE NA INI 1958

KONDRE: INGRISIKONDRE

A BEN DE WAN PUNKMAN DI NO BEN BEMUI NANGA SMA

A LIBI FU MI FOSI: A famiri fu mi papa sei, ben de fu Ierland èn wi ben de fu wan Lomsu Kerki fu Ierland. Nofo tron mi ben musu go na kerki mi wawan, èn mi no ben lobi fu go. Ma toku, mi ben wani kon leri sabi moro fu Gado. Mi ben gwenti taki a Wi Tata begi èn mi e memre ete fa mi ben didon na bedi na neti e denki san a begi wani taki. Mi ben gwenti fu luku den difrenti pisi fu a begi èn mi ben pruberi fu frustan san ibri pisi ben wani taki.

Di mi ben de wan tini ete, mi ben de na ini a Rasta bribi. Mi ben wani sabi moro tu fu politiek organisâsi, soleki na organisâsi di ben de teige den Nazi. Ma mi ben moksi furu nanga den punksma di ben opo densrefi teige wet èn di ben lobi arki rock poku. Mi ben gebroiki drugs, èn pikinmoro ibri dei mi ben smoko marwana. Mi no ben abi bisi nanga nowan sma, mi ben dringi furu sopi, mi ben du sani pe mi ben kan lasi mi libi, èn mi no ben broko mi ede nanga tra sma. Mi no ben bemui nanga sma èn soso te mi ben feni en fanowdu mi ben taki nanga wan sma. Mi no ben wani srefi taki sma meki fowtow fu mi. Te mi e prakseri now fa mi ben de, dan mi si taki mi ben grofu, mi ben abi bigifasi, èn mi ati ben bron esi-esi. Soso te mi ben de bun nanga wan sma, mi ben sori switifasi gi en èn mi ben du sani gi en.

Di mi ben abi 20 yari, mi ben wani sabi moro fu Bijbel. Wan mati fu mi di ben seri drugs, ben bigin leisi Bijbel di a ben de na srafu-oso èn wi ben abi langa takimakandra fu difrenti bribi, fu Kerki èn fu a krakti di Satan abi tapu grontapu. Mi ben bai wan Bijbel èn mi bigin studeri en mi wawan. Mi nanga a mati fu mi ben gwenti leisi difrenti pisi fu Bijbel, wi ben kon makandra fu taki fu den sani di wi ben leri, èn wi ben taki fa wi ben si den sani dati. Wi ben du disi furu mun langa.

Wan tu fu den sani di wi ben kon sabi di wi leisi Bijbel, na taki wi e libi na ini den lasti dei fu a grontapu disi. Boiti dati, Kresten musu preiki a bun nyunsu fu Gado Kownukondre, den no musu de wan pisi fu grontapu, èn den no musu teki prati na politiek afersi. Wi ben kon si tu taki Bijbel e gi bun rai fa fu tyari wisrefi na wan fasi di fiti. Wi ben kan si krin taki tru tori skrifi na ini Bijbel èn taki wan tru bribi musu de. Ma sortu bribi na a tru bribi? Wi ben denki den bigi kerki, nanga ala den pranpran èn den sani di den gwenti du. Wi ben prakseri sosrefi fa den kerki disi de  na ini politiek èn wi ben si taki Yesus no ben du dati kwetikweti. Wi ben sabi taki Gado no ben feni den bun, sobun wi bosroiti fu luku fa a de nanga wan tu fu den pikinpikin kerki.

Wi ben kon makandra nanga memre fu sonwan fu den kerki dati èn wi ben poti wan tu aksi gi den. Wi ben sabi san Bijbel e taki fu ibriwan fu den aksi dati. Na so wi ben kan si wantewante efu den piki di den ben gi, ben kruderi nanga Gado Wortu. Baka den konmakandra disi, dan ala ten mi ben begi Gado: ’Efu den sma dati ben abi a tru bribi, dan grantangi meki mi kisi na angri fu miti den baka.’ Ma wan tu mun baka di mi ben go na den sortu konmakandra dati, mi no ben feni a kerki ete di ben man piki den aksi fu wi nanga yepi fu Bijbel. Boiti dati, mi no ben wani miti nowan fu den sortu sma disi moro.

Te fu kaba, mi nanga mi mati miti Yehovah Kotoigi. Wi poti den srefi aksi gi den di wi ben gwenti poti gi den kerkisma, ma den ben gi piki nanga yepi fu Bijbel. Den sani di den ben taki ben de a srefi leki san wi ben leri kaba. Sobun, wi ben poti moro aksi gi den fu di wi no ben feni ala piki na ini Bijbel ete. Fu eksempre, wi ben aksi den fa Gado e denki fu a smoko di sma e smoko èn fu drugs. Den ben piki wi baka nanga yepi fu Gado Wortu. Wi ben agri fu go na wan konmakandra na a Kownukondre zaal.

A ben muilek gi mi fu go na wan konmakandra. Fu di mi no ben bemui nanga sma, meki mi no ben lobi en di ala den sma dati di ben abi switifasi èn di ben weri krosi na wan fasi di fiti, ben kon taki nanga mi. Mi ben denki taki a musu de so taki sonwan fu den no ben denki bun fu mi di den ben kon taki nanga mi. Fu dati ede mi no ben wani go na nowan fu den konmakandra moro. Ma soleki fa mi ben gwenti, dan mi ben begi Gado fu meki mi abi na angri fu miti den sma disi baka efu den abi a tru bribi. Mi ben kon abi na angri trutru fu studeri Bijbel nanga den Kotoigi.

A FASI FA BIJBEL KENKI MI LIBI: Mi ben sabi taki mi ben musu tapu fu gebroiki drugs èn mi ben man tapu nanga dati wantewante. Ma a ben muilek srefisrefi fu tapu fu smoko sikaret. Furu leisi mi pruberi fu tapu nanga smoko, ma mi no ben man. Di mi yere taki na trowe tra sma ben musu trowe den sikaret nomo èn baka dati den no smoko noiti moro, dan mi taki nanga Yehovah fu a sani disi. Bakaten, nanga yepi fu Yehovah, mi ben man tapu nanga a smoko di mi ben e smoko sikaret. Mi kon si o prenspari a de fu taki krin san de na tapu mi ati te mi e begi Yehovah.

Wan tra bigi kenki di mi ben tyari kon na a fasi fa mi ben weri krosi èn den sani di mi ben du nanga mi wiwiri. A fosi leisi di mi ben go na a konmakandra na a Kownukondre zaal, mi wiwiri ben de dyukudyuku èn a ben abi wan blaw strepi na ini. Bakaten, mi ferfi en wan faya redi kloru. Mi ben weri jeans bruku èn wan leri dyakti pe sani ben skrifi na tapu. Mi no ben feni en fanowdu fu kenki dati, srefi di den Kotoigi ben taki na wan switi fasi nanga mi fu a sani disi. Te fu kaba, mi ben prakseri fu 1 Yohanes 2:15-17 pe skrifi: „No lobi grontapu nanga den sani fu grontapu. Efu wan sma lobi grontapu, dan a lobi fu a Tata no de na ini en.” Mi ben kon frustan taki a fasi fa mi ben weri krosi èn a wiwiri fu mi, ben sori taki mi lobi a grontapu disi. Efu mi ben wani sori taki mi lobi Gado, dan mi ben musu kenki. Na dati mi du.

Bakaten, mi kon frustan taki a no den Kotoigi wawan ben wani taki mi kon na den Kresten konmakandra. Hebrewsma 10:24, 25 sori mi taki na Gado ben wani mi fu du disi. Baka di mi bigin go na ala den konmakandra èn mi kon leri sabi den sma moro bun, dan mi bosroiti fu gi misrefi abra na Yehovah èn teki dopu.

DEN WINI DI MI KISI: A sani di naki mi ati trutru na taki Yehovah e gi wi pasi fu abi wan bun matifasi nanga en. A fasi fa Yehovah e sori sari-ati èn a fasi fa a e broko en ede nanga mi, gi mi deki-ati fu teki na eksempre fu en nanga en Manpikin, Yesus Krestes (1 Petrus 2:21). Mi leri taki aladi mi e du muiti fu abi den fasi di wan Kresten musu abi, toku mi kan de misrefi. Mi e du muiti fu sori lobi gi trawan èn fu sori taki mi e broko mi ede nanga trawan. Mi e pruberi fu de leki Krestes na a fasi fa mi e handri nanga mi wefi èn mi manpikin. Boiti dati, mi lobi mi brada nanga sisa na ini a tru anbegi. Fu di mi teki na eksempre fu Krestes, meki mi firi warti, mi abi lespeki gi misrefi, èn mi man sori lobi gi trawan.

 „Den sori lespeki gi mi.”​—GUADALUPE VILLARREAL

A GEBORE NA INI 1964

KONDRE: MEKSIKOW

A BEN DE WAN SMA DI BEN E LIBI WAN YAYOLIBI

A LIBI FU MI FOSI: Mi ben de wan fu den seibi pikin na ini mi famiri èn mi gro kon bigi na Hermosillo, na ini Sonora, Meksikow, wan presi pe furu sma ben pôti. Mi papa dede di mi ben de wan pikin boi, sobun mi mama ben musu wroko fu sorgu gi wi. Nofo tron mi ben waka nanga soso futu fu di wi no ben abi moni fu bai susu. Aladi mi ben yongu ete, mi bigin wroko fu yepi sorgu a famiri. Neleki furu osofamiri, wi ben libi nanga furu sma na ini wan pikin oso.

A moro bigi pisi fu a dei, mi mama no ben de na oso fu luku wi. Di mi ben abi 6 yari, dan wan ogri sani miti mi. Wan boi fu 15 yari ben abi seks nanga mi èn a sani disi go doro fu wan langa pisi ten. Wan fu den bakapisi ben de taki mi no ben abi wan yoisti denki fu seks. Mi ben denki taki a no fowtu fu abi seksfiri gi mansma. Di mi ben suku yepi na datra èn na kerki fesiman, dan den sori taki mi no abi fu broko mi ede fu di noti no fowtu nanga mi èn den firi di mi abi.

Di mi ben abi 14 yari, mi teki a bosroiti fu sori sma krin taki mi na wan homo. Mi tan du disi 11 yari langa èn mi ben libi srefi nanga difrenti man na a ten dati. Te fu kaba, mi go leri seti wiwiri gi sma èn mi ben drai wan kapsalon. Ma toku mi no ben de koloku. Mi ben sari fu di nofo tron sma ben du hati sani nanga mi èn den ben bedrigi mi. Mi firi taki a sani di mi ben du, no ben bun. Mi bigin aksi misrefi: ’Nowan bun sma de na grontapu di mi kan frutrow trutru?’

Mi ben prakseri mi bigi sisa. A ben bigin studeri Bijbel nanga Yehovah Kotoigi èn te fu kaba a teki dopu. A ben gwenti taigi mi san a ben e leri, ma mi no ben poti prakseri na den sani dati. Ma toku, mi ben feni en moi fu si taki sani ben go bun nanga en èn taki a abi wan bun trowlibi. Mi ben kan si taki en nanga en masra trutru ben lobi makandra èn taki den abi lespeki gi makandra. Den ben sori switifasi gi makandra. Bakaten, wan fu den Kotoigi fu Yehovah bigin studeri Bijbel nanga mi. Na a bigin di mi ben e studeri, mi no ben de fayafaya. Ne sani kon kenki.

A FASI FA BIJBEL KENKI MI LIBI: Di den Kotoigi gi mi wan kari fu go na wan fu den konmakandra, dan mi go. Noiti ete mi ben ondrofeni a sani dati. Nofo tron sma ben e lafu mi, ma den Kotoigi no ben du dati. Na wan switi fasi den taki mi odi èn den sori lespeki gi mi. Disi ben naki mi ati.

Di mi ben go na wan bigi konmakandra, dan mi ben kisi moro warderi gi den Kotoigi. Mi ben si taki srefi efu den sma disi de na ini bigi grupu, den ben de leki mi sisa. Iya, den abi trutru lobi èn den de krin-ati sma. Mi ben aksi misrefi efu disi na a grupu fu bun sma di mi kan frutrow trutru èn di mi ben suku langa ten kaba. Mi ben fruwondru fu si a lobi nanga a wánfasi fu den. Boiti dati, den ben gebroiki Bijbel fu gi piki tapu ibri aksi. Mi ben kon frustan taki na Bijbel ben meki taki sani go bun na ini den libi. Mi kon si tu taki mi ben abi fu tyari furu kenki kon fu man tron wan fu den.

Fu taki en leti, mi ben musu tyari bun bigi kenki kon, fu di mi ben de leki wan umasma. Mi ben musu kenki a fasi fa mi ben taki, fa mi ben du, den krosi di mi ben weri, a fasi fa mi wiwiri ben de, èn mi ben musu suku tra mati. Den mati di mi ben abi fosi, bigin spotu mi èn den ben taki: „Fu san ede yu e du disi? Yu ben bun kaba leki fa yu ben de. No studeri Bijbel. Yu abi ala sani kaba.” Ma den moro muilek sani di mi ben musu kenki, na den sani di mi ben e du na ini a yayolibi fu mi.

 Ma toku mi ben sabi taki sma man tyari bigi kenki kon, fu di den wortu fu Bijbel na ini 1 Korentesma 6:9-11 ben naki mi ati. Drape skrifi: „San! Unu no sabi taki onregtfardiki sma no sa kisi a kownukondre fu Gado? No kori unsrefi. Sma di e huru, sma di e anbegi kruktugado, sma di e du sutadu, mansma di e meki tra mansma gebroiki den fu abi seks nanga den, mansma di abi seks nanga tra mansma . . . no sa kisi a kownukondre fu Gado. Toku sonwan fu unu ben de den sortu sma dati. Ma na ini a nen fu wi Masra Yesus Krestes èn nanga a yeye fu wi Gado, unu wasi kon krin.” Yehovah ben yepi sma na a ten dati fu tyari kenki kon èn a yepi mi tu. A ben teki wan tu yari èn mi ben abi fu du tranga muiti, ma a rai nanga a lobi di den Kotoigi sori, yepi mi trutru.

DEN WINI DI MI KISI: Tide na dei, mi abi wan bun libi. Mi trow, èn mi nanga mi wefi e leri a boi fu wi fu libi soleki fa Bijbel e sori wi. A fasi fa mi ben libi fosi, pasa langa ten kaba èn mi abi furu wini nanga grani na ini a tru anbegi. Mi e dini leki owruman na ini a gemeente èn mi ben man yepi trawan fu kon leri sabi den tru tori fu Gado Wortu. Mi mama breiti so te taki mi tyari kenki kon na ini mi libi, taki a bigin studeri Bijbel èn a tron wan dopu Kresten. Wan pikin sisa fu mi di ben libi wan yayolibi fosi, tron wan Kotoigi fu Yehovah tu.

Srefi den sma di sabi fa mi ben e libi fosi, kon si now taki mi kenki èn mi abi wan moro bun libi. Èn mi sabi san meki taki mi ben man tyari den kenki disi kon. Fosi, mi ben suku yepi na datra, ma mi no ben kisi bun rai kwetikweti. Ma Yehovah yepi mi trutru. Aladi mi ben firi leki mi no warti noti, toku a poti prakseri na mi, a handri na wan lobi-ati fasi nanga mi èn a ben abi pasensi nanga mi. Fu di so wan kefalek koni èn lobi-ati Gado poti prakseri na mi, èn wani taki mi abi wan moro bun libi, meki mi ben man tyari ala den kenki disi kon.

„Mi no ben de tevrede, mi ben firi leki mi de mi wawan èn mi no ben de koloku.”​—KAZUHIRO KUNIMOCHI

A GEBORE NA INI 1951

KONDRE: YAPAN

A BEN DE WAN MAN DI BEN LOBI STREI RÈI BAISIGRI

A LIBI FU MI FOSI: Mi gro kon bigi na wan tiri foto na ini a distrikt Shizuoka, na Yapan, pe wan lanpe ben de. Drape a famiri fu wi fu aiti sma ben libi na ini wan pikin oso. Mi papa ben drai wan wenkri pe a ben seri èn meki baisigri. Sensi di mi ben yongu mi papa ben tyari mi go na wan presi pe sma ben strei rèi baisigri èn na so mi kon lobi a sport dati. Na a ten dati, mi papa bigin seti sani so taki mi ben kan teki prati na den strei dati. Di mi ben de na lagiskoro ete, a bigin meki mi oefen fayafaya. Di mi ben de na middelbaar skoro, dan mi wini na alayari strei fu a kondre, dri yari baka makandra. Mi kisi na okasi fu go na universiteit, ma mi ben bosroiti fu go langalanga na a skoro di e gi leri na sma di e teki prati na strei. Di mi ben abi 19 yari, dan strei rèi baisigri ben kon tron mi wroko.

Na a ten dati, mi ben wani tron a moro bun man di e strei rèi baisigri na ini Yapan. Mi ben wani meki furu moni so taki mi ben kan sorgu taki mi famiri ben kan abi ala sani.  Mi ben du tranga muiti fu oefen. Te mi ben frede fu di mi ben musu oefen hebi, noso fu di wan pisi fu a strei ben muilek, dan ibri tron baka mi ben taigi misrefi taki mi gebore fu strei rèi baisigri èn taki mi ben musu go doro awinsi san e pasa. Èn na dati mi ben du. Te fu kaba mi ben kisi wini fu a tranga muiti di mi ben du. Na ini a fosi yari, mi ben wini a strei pe den nyun sma ben teki prati na a strei. Na ini a di fu tu yari, mi ben man go na ini a strei di ben o sori suma na a moro bun man di e strei rèi baisigri na ini Yapan. Siksi leisi mi ben kon na a di fu tu presi na ini a strei dati.

Fu di mi ben tan de wan fu den moro bun man na ini den strei, meki sma ben kon sabi mi leki den tranga futu fu Tokai, wan presi na ini Yapan. Mi ben wani wini nomonomo. Bakaten, sma ben frede mi fu di te mi ben de na ini a strei, dan mi no ben broko mi ede nanga nowan sma, ma mi ben du ala san mi man fu wini. Mi ben meki moro moni èn mi ben kan bai iniwan sani di mi wani. Mi bai wan oso di ben abi wan kamra nanga den moro bun masyin fu oefen. Mi bai wan kefalek wagi na tra kondre di ben diri a srefi leki wan oso. Fu di mi ben wani mi libi waka bun, meki mi bigin bai gron nanga oso èn mi ben poti mi moni na ini bisnis.

Ma toku, mi no ben de tevrede, mi ben firi leki mi de mi wawan èn mi no ben de koloku. Na a ten dati, mi ben trow kaba èn mi ben abi pikin, ma nofo tron mi no ben abi pasensi nanga mi osofamiri. Mi ati ben bron nanga den fu pikinpikin sani ede. Te mi ben de na oso, dan den ben senwe-senwe èn den ben luku mi fesi fu si efu mi ben de nanga atibron baka.

Bakaten, mi wefi bigin studeri Bijbel nanga Yehovah Kotoigi. A sani disi tyari furu kenki kon. A ben taki dati a ben wani go na den konmakandra fu den Kotoigi, èn fu dati ede mi bosroiti taki wi ben o go leki osofamiri. Mi kan memre a neti ete di wan owruman kon na mi oso èn a bigin studeri Bijbel nanga mi. Den sani di mi ben leri, naki mi ati trutru.

A FASI FA BIJBEL KENKI MI LIBI: Noiti mi o frigiti fa a ben abi krakti na mi tapu di mi leisi Efeisesma 5:5. Drape skrifi: „Nowan huruman, noso sma di e libi wan morsu libi, noso sma di abi bigi-ai, dati wani taki wan sma di e anbegi falsi gado, sa kisi a kownukondre fu Krestes èn fu Gado.” Mi ben kon si taki strei rèi baisigri ben abi fu du nanga dòbel èn taki a sport disi meki taki sma kon gridi. Mi konsensi bigin fon mi. Mi ben kon si taki efu mi wani plisi Yehovah, dan mi musu tapu fu strei rèi baisigri. Ma a ben de wan muilek bosroiti fu teki.

Mi ben abi a moro bun yari na ini a strei èn mi ben wani moro. Ma mi ben kon si taki te mi studeri Bijbel, dan mi ben abi wan korostu firi èn dati ben de heri tra fasi leki fa mi ben firi te mi ben wani wini den strei. Baka di mi bigin studeri, mi ben teki prati na wan strei dri leisi nomo, ma na ini mi ati mi no ben libi a sani disi na baka. Mi no ben sabi tu fa mi ben o sorgu gi mi osofamiri. Mi no ben sabi san fu du, fu di mi no ben go na fesi èn den famiri fu mi bigin gens mi fu di mi ben studeri Bijbel. Mi papa ben sari fu di a no ben man bribi san mi ben du. Mi ben brokosaka fu di mi no ben sabi san fu du èn mi ben broko mi ede so te taki mi kisi wan sweri na mi maag.

A sani di yepi mi na ini a muilek ten dati, na taki mi studeri Bijbel go doro èn mi tan go na den konmakandra fu Yehovah Kotoigi. Safrisafri mi kon kisi wan moro tranga bribi. Mi aksi Yehovah fu arki den begi fu mi èn fu yepi mi fu si taki a e arki mi trutru. Mi no ben broko mi ede so furu moro di mi wefi gi mi a dyaranti taki a no abi fu libi na ini wan bigi oso fu man de koloku. Safrisafri mi go na fesi.

DEN WINI DI MI KISI: Mi leri taki den wortu fu Yesus di skrifi na ini Mateyus 6:33, tru. A ben taki: „Tan suku a kownukondre nanga En regtfardikifasi fosi, dan unu sa kisi ala den tra sani tu.” Noiti a pasa taki wi ben mankeri den „tra sani” di Yesus ben taki fu den. Dati na den moro prenspari sani di wi abi fanowdu na ini wi libi. Aladi a moni di mi ben meki fosi di mi ben strei de 30 tron moro leki san mi kisi now, toku mi nanga mi famiri no mankeri noti na ini den 20 yari di pasa.

Te mi e du sani di abi fu du nanga na anbegi èn te mi de nanga den Kresten brada nanga sisa fu mi, dan mi e prisiri èn mi de tevrede trutru. A gersi leki a ten e frei pasa, fu di mi abi so furu fu du na ini a tru anbegi. Na osofamiri libi fu mi kon moro bun. Ala den dri manpikin fu mi nanga den wefi fu den, tron anbegiman fu Yehovah.