Biblia jarhuataasti mójtakuni irekua

¿Ambe jarhuataspi kʼuiripuni ma enga no sési kámpienga paraka niárapiringa xénchpeni ka pendienti paani máteruechani? ¿Ambe jarhuataspi México anapu tumbini ma para jurajkuni ísku jándikua? ¿Andisï Japón anapu acheeti ma enga kánikua jorhenapka bisikleta jatani jurajkupi imeeri karrerani? Ju je exeani mókuntskuechani.

“No sési járhati uandakuechani úraasïreenga, kʼéramakuarhisïreenga ka no sési kámpini” (DENNIS O’BEIRNE)

UÉXURHINI ENGA ANDAJPENUKA: 1985

PAISI: INGLATERRA

MÁTERU AMBE: NO TSITISÏREENGA ESKAKSÏ MÁTERUECHA UANDAJPAPIRINGA

NA ENGANI IREKAPKA IÓNTKI: Ísï kʼuiripespka eska ma katoliku Irlanda anapu, jimbokaksï juchiiti taatiiri familia Irlanda anapueska. Nájkirukani ji no tsitienga iglesiarhu nirani, miásïnga eskani kʼóru tsitisïreenga Tata Diosïiri ambe. Xáni tsitisïreenga enga mándani chúrikua engani kamarhu jarheenguia, arhisïreenga padrenuestru. Ji jánguarhintasïreenga kurhanguni ambe arhikuekasïreeni ima ambe enga jima uandeenga.

Engani 16 uéxurhini jatiripka, uékaspka míteni ima grupueri ambe enga arhinheenga rastafari, ka ístuni uékasïreenga míteni politikeeri ambe, komu ima grupu enga arhinheenga liga antinazi. Joperu ambe engani ji sánderu tsitieenga, jindeespti grupu ma enga arhinheenga punk engaksï no nemani janhanharhienga. Sáno pauani pauani, droga ambe itsutasïreenga ka sánderu mariuana. Kánikua kauisïreenga, no sáni jukaparharasïreenga juchiiti tsípikuani ka no sáni pendienti pásïreenga máteruechani. No tsitisïreenga máteruecha jingoni jarhani ka kánikua ikiasïreenga parajtsïni fotu ma pʼitani. No nemani jingoni uandontskuarhesïreenga solu jiáni enga kánikua jukaparhakua ambeepiringa. Engani miántajka iámindu imani ambe, exesïnga eska no sési járhati uandakuechani úrasïreenga, kʼéramakuarhisïreenga ka no sési kámpini. Juchiiti amiguecha jingontkuni ambakiti kʼuiripuespka.

Engani 20 jatiripkia, ueenaspka tsitini Biblieri ambe. Amigu ma enga droga ambe ataranteenga, ueenaspti Bibliani arhintani enga ónhakuarhetini japka. Ma jurhiatikua, sáno chúskutaspkachi uandontskuarheni relijioniiri ambe, iglesieri ka ambe enga xáni úni jaka Noambakiti parhakpinirhu. Piáspka Bibliani ma ka ueenaspka arhintani. Juchiiti amigu ka ji táchanisïchi arhintasïreenga Bibliani ka tátsekuachi márku uandontskuarhesïreenga ambe engachi arhinteenga ka na engachi kurhanguenga. Uánikua mesiicha jimbo ísïchi úspka.

I jindeesti máru ambe engachi niárapka kurhanguni: eskachi irekaxaka últimu jurhiatikuecha jimbo, eskaksï kristianuecha jatsiska para aianhpini Tata Diosïiri Reinueri ambe, eskaksï no jatsiska para i parhakpini jingoni úkuarhini ni politikarisï inchamukuni ka eskajtsïni Biblia ambakiti konsejuechani íntskuasïnga engajtsïni jarhuatajka ambakiti jángua ma jatsini. Niáraspkachi exeni eska Biblia jurhimbikua uandasïnga iámindu ambe ka eska májkusï relijioni jaka enga jurhimbitiika. Peruchi no mítespka nákiispi. Exespkachi eskaksï ima relijionicha engaksï sánderu kʼépka, mámaru ambeksï úsïreendi paraksï kʼéri exekuarhini ka eskaksï kánikua inchamukusïreenga politikarhu, ka ini ambe jimbochi exespka eskaksï no ísï úxapka eska Jesúsi na uandapka. Kuenta íntskukuarhespkachi eska Tata Diosï no jaiapanheantasïreenga ini relijionichani. Jiájkani ueenaspkachi exeani máteru relijioniichani engaksï no xáni mítekateepka parachi exeni ambeksï úsïreeni.

Uandontskuarhespkachi máru kʼuiripuecha jingoni engaksï ini relijionicharhu jámeenga ka uánikua ambechi kurhamarhiaspka Biblieri ambe. Jucha mítespkia ambe enga uandeenga Biblia, jimbochisï kuenta íntskukuarheenga sini ambe engaksï uandeenga terukuntasïreeni Biblia jingoni o nómbe. Méni engachi uandontskuarheenga imeechani jingoni, kurhakusïreenga Tata Diosïni eska enga ima jindeepka relijioni jurhimbiti, eskani tsitipiringa ménderu exeantani. Uánikua mesiichani jimbo ísï úspka ka no ma grupuni exentasïreenga engareni mókuchiantapiringa kurhamarhikuechani Bibliani jingoni, ka nójtuni tsitisïreenga ménderu uandontskuarheni imeechani jingoni.

Peru niáraspti jurhiatikua ma engachi uandontskuarhepka Jeobaeri testiguecha jingoni. Mismu kurhamarhikuechanchi úkuaspka ka imeechajtsïni Biblia jingoni mókuchintaspti. Ambe engajtsïni mókuchintapka, májkuenispti eskachi na jorhenguarhipka Bibliarhu. Jiájkani úkuaspkachi kurhamarhikuechani engachi no míteapka mókuntskuechani, komu na enga exejka Tata Diosï droguechani ka sigarruni. Ka ménderuksï úraspti Bibliani parajtsïni mókuchiantani kurhamarhikuechani. Arhispkachi eskachi nipiringa tánguarhikuarhu Kʼumanchikua Reinuerirhu.

Ima amberini úkua jukachespti jimbokani no tsitisïreenga eskajtsïni máteruecha uandajpapiringa. Engajtsïni jupka andarhierani ima kʼuiripuecha engaksï xáni sési xukuparheenga ka sésiksï uandani, no agustu pʼikuarheraspka. Mámaru ambe eratsespka imeecheri ambe ka nóteruni uékaspkia nirani tánguarhikuecharhu. Peru jimbokani méntkisï kurhakusïreenga Tata Diosïni eskani tsitipiringa imani kʼuiripuecha jingoni jarhani engaksï jatsipka jurhimbiti relijionini. Jiájkani niáraspka kánikua tsitini Biblieri ambe, Jeobaeri testiguechani jingoni.

NA ENGARINI BIBLIA MÓJTAKUCHEKA IREKUA: Mítespka eskani jatsispka parani jurajkuani droguechani ka jirejiresï ísï úspka. Joperu ambe engani sánderu úkua jukanchapka jurajkuni jindeespti sigarruni. Mémindu jámaspka jurajkuni peruni no úsïreenga. Peru engajtsï aiangupka na engaksï máru sóntku úpka jurajkuni sigarruni ka nóteruksï méni itsutania, kurhakuspka Jeobani eskarini jarhuatapiringa. Ka desde jiájkani, nóteru méni itsutaskia. Jorhenguarhispka na enga xáni jukaparhakueka mintsita jingoni kómarhikuarhini Jeobani.

Máteru ambe engani jatsipka para mójtakurhini jindeespti na engani xukuparheenga ka na engani tsitienga xarharani. Primeru uelta engani inchapka Kʼumanchikua Reinuerirhu ma jimbo, juchiiti jauiri kolori asuliispti ka iámu iótakuarhisï anhantsïspka, tátsekua anaranjadu atajtsïntaspka. Ima járhati pantaloniichani jukasïreenga engani jukeenga para ánchikuarhini ka chaketa ma enga sïkuiriiriipka ka letreechani jukanharhiani. Ísï exesïreenga eskani no uétarhincheeni mójtakuni juchiiti xukuparhakuani, nájkirukajtsïni testiguecha mémindu arhieenga eskani jatsispka para mójtakuni. Peruni niáraspka eratseni ambe enga arhijka 1 Juanu 2:15-17, (TNM): “Asï jáma je xénchani parhakpinini ka níjtu parhakpini anapu ambe. Ima enga xénchajka parhakpinini, no xénchasïndi Taatini”. Kuenta íntskukuarhespka eska na engani xukuparhani japka xarhataxapka eskani tsitixapka ini parhakpini anapu ambe. Ka eska parani xarhatani eskani ji xénchasïnga Tata Diosïni, jatsipka para mójtakuni ka ísïini úspka.

Tátsekua kurhanguspka eska no Jeobaeri testiguechajtsïnisï arhini japka eskani nipiringa tánguarhikuecharhu, sino mismu Tata Diosï. Eska na arhijka Ebreu 10:24, 25. Engani ueenapkia nirani iámindu tánguarhikuecharhu ka sánderu sési míteani erachiichani, uékaspka aiakukuarheni Tata Diosï Jeobani ka itsï atakuarhini.

NÁKI KÓNTPERATECHANI INTSÏNHAASKIA: Kánikuarini sési pʼikuastasïndi na enga Tata Diosï Jeoba újka ambe ma parachi úni ambakiti pájperakua ma jatsini imani jingoni. Na enga ima xáni pʼamojpejka ka xénchpeni ústi eskani jíjtuni uékapiringa májkueni úni eska ima ka chúngumani Jesukristueri ejempluni (1 Pedru. 2:21). Jorhenguarhiska eska nájkirukani jánguarhintani jauaka para ísïini eska Tata Diosï na jaiapanhentajka, uaaka mámaru ambe úni engani tsitijka. Jánguarhintasïnga sési kámpini ka xénchpeni ka ísï kámani juchiiti uarhiitini ka juchiiti sapini eska Jesukristu na kaapiringa. Ístu jánguarhintasïnga pendienti páni erachiichani. Chúngumani Kristueri ejemplu jarhuatastirini parani jukaparharani juchiiti tsípikuani, parani sési pʼikuarhinheni ka para xénchaani máteruechani.

“Sésijtsïni kámaspti” (GUADALUPE VILLARREAL)

UÉXURHINI ENGA ANDAJPENUKA: 1964

PAISI: MÉXICO

MÁTERU AMBE: ÍSKU JÁNDIKUA AMBE ÚSÏREENGA

NA ENGANI IREKAPKA IÓNTKI: Kʼuiripespka juchiiti seisi ermanuechani jingoni Hermosillo (Sonora México), lugari ma engaksï sáno iáminduecha pobriipka. Juchiiti taati uarhisti engani ji apenasi sapichu japka, ísï jimbo juchiiti naandi ánchikuarhisïreendia parajtsïni tʼirerani. Ka ji sapichu ueenaspka ánchikuarhini para úni jarhuatani juchiiti naandini. Peru sáno méntkisï no jukasïreenga sapatuechani jimboka no jarhaspka sentabu para piárani. Májkueni eska uánikua familiecha, no sáni kóndespti jima engachi irekapka.

Juchiiti naandi sáno chúskutasïreendi ánchikuarhini ka nójtsïni úsïreendi kuájchakuni parajtsïni máteruecha no no sési ambe úchini. Seisi uéxurhini jatirispka engareni tumbi 15 uéxurhini jatiri ma ueenapka biolarini ka iónirini inde ambe úchispti. Inde ambe úspti eskani no úpiringa sési kurhangupiringa seksueri ambe. Eratsesïreenga eska inde ambe normalispka engani ji tatakeechani tsitiauenga. Uandontskuarhespka doktoriichani ka saserdotiichani jingoni parakajtsïni jarhuataapiringa, joperu imeechajtsïni arhispti eskani no ma ambe no sési úxapka eska ima ambe engani ji pʼikuarhereenga normalispka.

Engani katorse uéxurhini jatiriipka aianguaspka iáminduechani eskani ji tatakeechani tsitiasïreenga. Onse uéxurhini ísï seguiriispka ini ambe úni, ka niáraspka uánikua parejeechani jatsiani. Jorhenguarhiska kuinajpini ka jauiri pʼikujpini jimbosïni mítapka lokali ma para jima ánchikuarhini. Joperu i ambe no úsïreendi eskani ji sési pʼikuarherapiringa, sino kómu pʼikuarherasïreenga ka ísï exesïreenga enajkijtsïni máteruecha traisionariini japi. Pʼikuarherasïreenga eska no sési jarhaspka ambe engani úni japka ka uandasïreenga: ¿jaki ambakiti kʼuiripu ini parhakpinini jimbo?

Jiájkani miántaspka juchiiti ermanani enga Jeobaeri testiguechani jingoni jorhenguarhipka Biblieri ambe ka itsï atakuarhini. Imarini uandontskuarhechisïreendi ambe enga jorhenguarhini japka joperu ji no kasu úkusïreenga. Nájkiruka ísïipka, ji tsitisïreenga na enga irekani japka ka na engaksï kámbereenga temungurhiri, xénchperani ka respetuksï xarhatatsperani. Tátsekua uénaspka jorhenguarhini Biblieri ambe Jeobaeri Testigu ma jingoni, ueenakuarhu jorhenguarhisïreenga nomasi para no arhini eska nómbe, peru tátsekua mójtakurhisti i ambe.

NA ENGARINI BIBLIA MÓJTAKUCHEKA IREKUA: Tánguarhikuarhu ma niraspka Jeobaeri Testiguecha jingoni ka jima exespka ambe ma enga no méni exeni japka. Kʼuiripuechajtsïni teresmarhusïreendi joperu jima no nema ísï úspti, imeechajtsïni sési uandajpaspti ka respetu jingontsïni kámaspti. Kánikuani sési pʼikuarheraspka jima jarhani.

Niáraska sánderu sési exeani Jeobaeri Testiguechani jiáni enga exepka eska kʼérati tánguarhikuechani jimbojtu ima kʼuiripuechaksï májkueni sési kámberasïreenga ka ambakitinksï ísï eska juchiiti ermana. Ji kurhamarhikuarhisïreenga: ¿Íksï jindee ima ambakiti kʼuiripuecha engani ji uékani japka míteani? Ískujtsïni pakatasïreendi na engaksï xáni xénchpereenga ka májku kʼéri jarhani. Ístu na engaksï úreenga bibliani para mókuantani kurhamarhikuechani. Kuenta íntskukuarheska eska Tata Diosïiri karakatasï ueenga eskaksï imeecha xásïipiringa ka eska engani uékapiringa imeecha jingoni úkuarhini, jatsispka parani mójtakukuarhini.

Ka ísïispti uánikua ambe jatsispka para mójtakuni, jimbokani ísï irekaxapka enajkini nanaka máepi. Uétarhinchasïreenga mójtakuni na engani uandeenga, manakuarhini, juchiiti xukuparhakuani, jauirini, juchiiti amiguechani, méntku iámindu ambe. Imeecha engaksï jindeepka juchiiti amiguecha ueenasptijtsïni arhini: ¿Andisïiri ísï úni jaki? Sánderuri sési jarhaspka antesi, ásteru jorhenguarhia biblieri ambe, jatsiskaria iámu ambe engari uétarhinchajka. Joperu ambe enga sánderu úkua jukanchapka jurajkuni jindeespti ísku jándikueri ambe.

Ambe enga arhijka 1 Korintu 6:9-11 mintsitarhurini niárachesti, kurhanguspka eskani úpiringa mójtakurhini. Jimini arhisïndi: “Andi, ¿nójtsï míteski eskaksï no niáraka Diosïiri juramukuarhu imeecha engaksï no jurhimbitku jámajka? Asï jáma je kʼarhakuarini. Jimbokaksï no niáraka Diosïiri juramukuarhu ísku jándiicha ka ni imeecha engaksï ídolueechani kómarhiajka ka nijtu imeecha engaksï ísku irekajka ka níjtu imeecha engaksï jurajkutakuarhiijka para mámaru ambe úni ka ni acheetiicha engaksï ísku ambe útsperajka. Ka márujtsï indeni ambe uriispka peru iásïjtsï juparhiminhantaskia chaari mintsiteechani”. Tata Diosï Jeoba jarhuataaspti ióntki anapu kʼuiripuechani paraksï mójtakurhini ka jíndenturini ísï jarhuataaspti. Parani úni mójtakurhini uánikua uéxurhini nitamaspti ka jatsispka para kánikua jánguarhintani. Perujtsïni kánikua jarhuatasti Jeobaeri Testiguecheri konsejuecha ka na engajtsïni xáni sési kámeenga.

NÁKI KÓNTPERATECHANI INTSÏNHAASKIA: Iásï sési irekasïngia, tembuchatika ka juchiiti uarhiiti jingoni jorhendasïngachi juchaari sapini para ísï irekani eska BIblia na uandajka. Iauani ménderueni irekasïngia. Iásï tsípikua jingoni irekaxaka ka uánikua kóntperateechani jatsiaska Jeobaeri kúnguarhikua jimbo. Orhejtsïkutiiska Jeobaeri testiguecheri kúnguarhikuarhu ma jimbo. Ka uánikua kʼuiripuechani jarhuataaskia paraksï jorhenguarhini jurhimbikua ambe enga Tata Diosïiri karakatarhu jaka. Ambe engani xáni mójtakuka juchiiti irekuarhu ústi eska juchiiti naandijtu uékapiringa jorhenguarhini Biblieri ambe. Ka tátsekua niáraspti itsï atakuarhini. Ístu juchiiti ermana ma enga ísku jándikua ambe niáteenga niáraspti mójtakurhini ka Jeobaeri testigu úkuarhisti.

Ka máru kʼuiripuecha engajtsïni arhienga eska seguiripiringa ísï jámani iásïksï exesïndia eskarini sánderu sési nichenixakaia. Peru ji míteska amberinisï jarhuataka para ísï úni. Ióntki doktoriicha jingoni jámasïreenga parajtsïni jarhuataani, joperu imani ambejtsïni arhistachisïreendi enga no marhuauenga. Perurini Jeoba kʼóru jarhuatasti. Nájkirukani ísï pʼikuarhereenga enajkini no sáni jukaparhakuepi, imarini exespti ka uékperakua ka tekaantskua jingonireni kámaspti. Ka i amberinisi ísku pakatapti: exeni eska tata Diosï ma enga xáni uékpitiika ka jánhastiini jíndeni exepiringa ka eskarini uékaapiringa jarhuataani parani sánderu sési irekani.

“Jandiajkuni pʼikuarherasïreenga ka no felisiispka” (KAZUHIRO KUNIMOCHI)

UÉXURHINI ENGA ANDAJPENUKA: 1951

PAISI: JAPÓN

MÁTERU AMBE: KÁNIKUANI TSITISÏREENGA BISIKLETEERI KARRERECHARHU CHʼANANI

NA ENGANI IREKAPKA IÓNTKI: Kʼuiripeska Shizuokarhu kʼéri ireta ma Japón anapu enga marirhu ísï jaka. Ochuespkachi juchiiti familiarhu ka kʼumanchikua sapichu ma jimbochi irekaspka. Juchiiti taati atarantasïreendi bisikletechani ka engani sapiipka pasïrendirini karrereechani exeani, jimbosïni niárapka kánikua tsitini bisikleteri karrerechani. Ima uékasïreendi eskani ji niárapiringa profesionali máeni bisikleteeri karrereecharhu, jimborinisï ueenapti jorhendaani engani 14 ísï jatiriipka. Ka engani 16 ka 18 ísï jatiripka tanimu títuluechani andaaspka kompetensia ma jimbo enga iámu paisirhu úkuarhipka. Ísï jimbo, unibersidadirini ma pʼímarhispti parani jima nirani jorhenguarhini, peruni ji erakuspka sánderuni entrenarini parani bisikleteeri karrerechani chʼanani. Ka engani 19 jatiripka profesionali máespkia bisikleteeri.

Jiáni ísï ambe engani ji uékeenga, jindeespti sánderu ámbakitiini imeecheri engaksï bisiklecheri karrerecharhu chʼaneenga iámu Japón. Uékasïreenga kánikua sentabu andani paraka juchiiti familia sési irekapiringa ka nóksï ma ambe kueratanchani jimbosïni méntkuni entrenariini jarheenga. Engani ísï exenga enajki kánikua úkua jukeeni entrenarini jarhani o karrerarhu ma, jandiajkuni miákuarhisïreenga eskani jimbosïni andajpenuepka parani bisikletercharhu karrerecharhu chʼanani ka eskani no jatsispka parani kuatantani. Ísï no ióni jimbo, ueenasptirini sési nicheni. Engani ueenapka chʼanani primeru lugari andaspka entre imeecha engaksï ueenapka chʼanani, tátsekua úspka imeechani jingoni chʼanani engaksï uékani japka andani iámu Japón anapuechani. Ka seisi uelta úspkani segundu lugari andani.

Kánikua uinhapikua jatsispka, ka jísïni sánderu karrereechani andauenga jimbosïni niáraka mítekateeni komu ima enga sánderu uinhajtarhaka Tokai anapu. Méntkisï uékasïreenga andani ka máteruechajtsïni chérhisïreendi jimbokani néna uéjkini jámasïreenga parani andani ka no nemani pʼamojkusïreenga. Jimbokani sánderu ka sánderu andasïreenga sentabu, piákuarhisïreenga ambe engani ji uékeenga. Piákuarhispka kʼumanchikua ma jimnasio jingoni ka enga sánderu ambakiti aparatuechani jatsispka ka ístu máteru paisirhu anapu karruni ma enga sáno májkueni jukaparhapka eska kʼumanchikua. Ka parani seguru jatsini juchiiti sentabuni, piáspka máru ambe engani tátsekua úpiringa atarantani ka sánderu andani.

Joperu nájkirukarini xáni sési nicheni japka, jandiajkuni pʼikuarherasïreenga ka no felisiispka. Jiánisï tembuchatixapkia ka tanimu sapiichanchi kaasïreenga. No úsïreenga pʼíngukuarhini ka ambe uéjki jimbo ikiasïreenga juchiiti uarhiti ka sapiicha jingoni, imeechajtsïni pʼindesptia ísï exeni jarhani, ísï jimbo imajtsïni orheta exesïreendi antedejtsïni uandajpani.

Ma jurhiatikua, juchiiti uarhiti ueenaspti jorhenguarhini Biblieri ambe Jeobaeri testiguecha jingoni ka inde ambe uánikua ambe mójtakuspti. Enga ima uandapka eska ima uékasïreenga nirani imeechani jingoni tánguarhini ji arhispka eska iámu familia nipiringa. Útasïni miásïnga enga kúnguarhikuarhu anapu orhejtsïkuti ma jupka pʼorhembini parareni Biblieri ambe jorhendani. Ka mintsitarhurini niárachespti ambe engani jorhenguarhipka.

NA ENGARINI BIBLIA MÓJTAKUCHEKA IREKUA: No méni mirikurhiaka ambe engani arhintapka Efesu 5:5 (TNM) jimini arhisïndi: “No pʼiuaka Kristueri ka Tata Diosïiri Reinuni ima kʼuiripu enga ísku jándikua ambe niátajka, enga ikichakueni jásï ambe újka ka enga tsititspeni jámajka jimboka ísïiska komueska ima kʼuiripu enga diosï úkatechani kómarhiajka”. Ji mítespka eskaksï kʼuiripuecha apostarisïreenga bisikleteri karrerecha jimbo ka eska i ambe úsïnga eskaksï kánikua tsitiaka sentabuni, jimbosïni ueenapka kánikua no sési pʼikuarherani. Mítespka eskani engani uékeenga sési pʼikuastani Jeobani, jatsispkani parani jurajkuni kompetensia ambe ka inde ambe kánikua úkua jukaspti para ji.

Jiánisï kʼamaraspkia sánderu ambakiti karrerani engani jatsipka ka uékaxapkia ménderu uéntani máteruni. Peru ístuni mítespka eska Bibliani jorhenguarhini usïreenga eskani agustu ka sési pʼikuarhinhepiringa, méntku ménderueni eska karrerecharhu. Engani na ueenapkia Biblieri ambe jorhenguarhini tanimu ueltajku ménderu chʼanaspka karrerecharhu, joperu sési jimbo no úxapka nóteru tsitinia kompetensia ambe. Ístuni no jánhaskaxapka ambe ánchikuarhini para familiani kéndani. Nóteru chʼanasïreenguia karrerecharhu, jope ístuni no xáni jánguarhintasïreenga para Tata Diosïiri ambe jingoni. Ka ístu juchiiti parientichaksï no sési exespti ambe engani jorhenguarhini japka. Ka juchiiti taati kánikua no sési pʼikuarheraspti ini ambe jimbo engani ji úni japka. I xáni uánikua ambe engari uandanhiatani japka, ulsera ma pʼiraspka.

Ambe engari jarhuatapka jiáni engani xáni úkua jukanchani japka jindeespti seguiriini jarhani jorhenguarhini Biblieri ambe ka no kueratani tánguarhini Jeobaeri testiguecha jingoni. Sánhani arhispka sánderu mintsikani Tata Diosï Jeobani. Kurhakuspka eskani kurhaajchapiringa ka eskarini jarhuatapiringa exeni eska ima kurhauasïnga juchaari kómarhikuechani. Ístu, juchiiti uarhiitirini kánikua jarhuataspti engareni arhipka eska no uétarhinchasïreenga xáni kʼéri kʼumanchikua ma sési irekani. Ka ísï sánhani arhispka sánderuni marhuakuni Tata Diosïni.

NÁKI KÓNTPERATECHANI INTSÏNHAASKIA: Ji exeskia eska sési jimboeska ambe enga Jesúsi uandapka ixú Mateu 6:​33 (TNM) enga arhijka: “Seguirii je orhetku peerani Tata Diosïiri Reinuni ka ístu imani ambe enga ima uandajka eska sési jarhaska, ka ísï úparini, ístujtsï intsïnhaaka iámindu ini ambe”. Nóchi méni kueratanchaxaka “iámindu ini ambe” enga Jesúsi uandapka enga jindeeska ambe engachi pauani pauani uétarhinchajka para úni irekani. Nájkirukani iásï nóteru xáni andakia eska antesi ini beinte uéxurhini jimbo, nóchi méni kueratanchaska ambe ma.

Kánikuarini sési pʼikuastasïndi marhuakuni Tata Diosïni kúnguarhikuarhu anapu erachiicha jingoni ka no jamberi kuenta pásïnga na enga nitamajka tiempu. Familiarhu, kánikuachi sési irekaskia. Ístu, juchiiti tanimu tatakeecha sésiksï marhuakuxati Tata Diosï Jeobani imeeri témbeecha jingoni.