Ua taui te Bibilia i to ˈu oraraa

EAHA te turai i te hoê taata au ore ia vetahi ê ia haapii i te here e ia tauturu ia vetahi ê? Eaha te turai i te hoê taata no Mehiko ia haapae i te hoê huru oraraa tano ore? No te aha te hoê aito taahi pereoo tataahi i Tapone i faarue ai i te reira e i tutava ˈi i te tavini i te Atua. A hiˈo eaha ta teie mau taata i parau.

“E taata parau ino, faateitei e teoteo vau.”—DENNIS O’BEIRNE

MATAHITI FANAURAA: 1958

FENUA: BERETANE

AAMU: TAATA AU ORE IA VETAHI Ê

NA MUA ˈˈE: I te pae o to ˈu metua tane, e Irelane to ˈu utuafare e ua paari au ei Katolika. Matau vau i te haere i te fare pure, eita ra vau e au. Tera râ, e hinaaro rahi to ˈu i te mau mea pae varua. E faahiti pinepine au i te pure a te Fatu, e te haamanaˈo ra vau te po a tarava ˈi au i nia i te roˈi to ˈu feruriraa i nia i to ˈna auraa. Ua tamata vau i te feruri no nia i te tuhaa tataitahi e i te taa i te auraa o te reira.

I to ˈu taurearearaa, ua ǒ vau i roto i te hoê pǔpǔ Rasta. Ua anaanatae atoa vau i te mau ohipa poritita, mai te pǔpǔ Patoi Nazi. Tera râ, ua au roa vau i te huru orure hau o te pǔpǔ Punk Rock. Ua rave au te raau taero, te marijuana iho â ra, ua puhipuhi au i te reira fatata te mau mahana atoa. Ua faaoti au i te haapao noa ia ˈu, i te inu hua e ua haafifi te reira i to ˈu oraraa ma te tâuˈa ore ia vetahi. E taata au ore au ia vetahi ê, e paraparau vau i te taata mai te peu râ aita e faufaa no ˈu, eita ïa. Aita vau e hinaaro ia patahia to ˈu hohoˈa. A feruri ai au i tera tau, ua taa ia ˈu e taata parau ino, faateitei e teoteo vau. E taata mǎrû vau e te aau horoa noa mai te peu mea piri te taata ia ˈu.

I te 20raa o to ˈu matahiti, ua anaanatae au i te Bibilia. Ua haamata te hoê hoa hoo raau taero to ˈu i te haapii i te Bibilia i te fare tapearaa. E ua paraparau maoro mâua no nia i te haapaoraa, te fare pure e te tiaraa o Satani i roto i te ao. Ua hoo mai au i te hoê Bibilia e ua haamata i te haapii i te reira o vau anaˈe. Ua taio mâua to ˈu hoa i te mau tuhaa o te Bibilia e ua aparau mâua no nia i ta mâua i haapii e i te huti mai i te mau faaotiraa. E rave rahi avaˈe i te na reiraraa.

Teie te tahi o te mau faaotiraa ta mâua i huti mai i roto i ta mâua taioraa: Te ora nei tatou i te mau mahana hopea o teie nei ao, e titauhia i te mau Kerisetiano ia poro i te parau apî oaoa o te Faatereraa arii a te Atua, eiaha ratou e apiti i teie nei ao, te ohipa poritita atoa, e horoa te Bibilia i te hoê aratairaa papu. No mâua mea papu, e parau mau te Bibilia e te vai ra te hoê haapaoraa mau. Tera râ, teihea roa? Ua manaˈo mâua i te mau haapaoraa atoa, e ta ratou mau peu e te mau oroa e oia atoa to ratou amuiraa i roto i te mau ohipa poritita e ua taa ia mâua aita ta Iesu e tuhaa i roto i te reira. Ua ite mâua aita te Atua e faaohipa ia ratou, ua faaoti ïa mâua e imi i roto te haapaoraa matau-ore-hia no te ite eaha ta ratou e horoa mai.

E amuimui mâua e te feia o teie mau haapaoraa e e uiui mâua e rave rahi uiraa. Ua ite aˈena mâua eaha te pahonoraa a te Bibilia no nia i teie mau uiraa. Mea ohie ïa no mâua ia taa ua tuea anei ta ratou pahonoraa i te Parau a te Atua. I muri iho i teie mau putuputuraa, e pure pinepine au i te Atua: “Mai te peu tei roto teie mau taata i te haapaoraa mau, a horoa mai ia ˈu te hinaaro no te farerei faahou ia ratou.” Tau avaˈe râ i muri iho, aita vau i ite mai i te hoê pǔpǔ tei pahono i ta mâua uiraa ma te faaohipa i te Bibilia, eita atoa vau i hinaaro e amui faahou i te tahi o ratou.

Farerei ihora mâua to ˈu hoa i te mau Ite no Iehova. Ua ui noa mâua i te hoe â mau uiraa, ua pahono râ ratou ma te rave i te Bibilia. Ua tano maitai ta ratou i parau no nia i ta mâua i haapii. Ua ui atoa mâua te mau uiraa ta mâua aita i ite i te mau pahonoraa, ei hiˈoraa, te manaˈo o te Atua no nia i te avaava e te raau taero. Ua pahono faahou ratou ma te faaohipa i te Parau a te Atua. Ua farii mâua i te haere i te putuputuraa i te Piha a te Basileia.

E ere i te mea ohie no ˈu ia apiti i te hoê putuputuraa. Mea au ore hoi na ˈu ia vetahi ê, ua au ore roa vau i te tapiriraa mai teie feia maitai e mea maitai to ratou faaahuraa. Ua faatupu vau i te manaˈo oti noa no vetahi. Aita vau i hinaaro e haere i te tahi atu mau putuputuraa. Tera râ, mai ta ˈu i matau, ua pure au i te Atua ia horoa mai i te hinaaro e farerei faahou i teie mau taata mai te peu tei roto ratou i te haapaoraa mau. Ua hinaaro roa vau i te haapii i te Bibilia i te mau Ite.

UA TAUI TE BIBILIA I TO ˈU ORARAA: Ua taa ia ˈu e titauhia ia faaea vau i te rave i te raau taero e ua ohie no ˈu ia na reira. Te mea fifi roa no ˈu o te avaava ïa. Ua tamata vau e rave rahi taime i te faaea i te puhipuhi, aita râ i manuïa. I to ˈu faarooraa ua faaea ohie noa vetahi i te avaava e ua ore roa i te reira, ua pure au ia Iehova no nia i te reira. I muri iho, maoti te tauturu a Iehova, ua manuïa mai au. Ua haapii au i te faufaaraa ia pure ia Iehova ma te aau tae.

Te tahi atu tauiraa rahi ta ˈu i rave, o to ˈu ïa faaahuraa. I ta ˈu putuputuraa matamua i te Piha a te Basileia, e rouru ninamu etaeta to ˈu. I muri iho, ua peni au i to ˈu rouru ma te û puatou. E piripou avae roa to ˈu e te hoê pereue nanaˈohia. Aita e faufaa no ˈu ia rave i te tauiraa, noa ˈtu ua paraparau mai te mau Ite no Iehova ma te hamani maitai. Feruri atura vau i nia i te Ioane 1, 2:15-17: “Eiaha e nounou i teie nei ao e te mau mea a teie nei ao. Te taata e nounou i teie nei ao, aita ïa o ˈna e here ra i te Metua.” Ua taa ˈtura ia ˈu te faaite ra to ˈu haerea i to ˈu here i teie nei ao e ia hinaaro vau e faaite i to ˈu here i te Atua, mea titauhia ia ˈu ia taui. Ta ˈu ïa i rave.

I muri iho, ua taa ia ˈu e ere noa te mau Ite no Iehova te hinaaro nei ia haere au i te mau putuputuraa Kerisetiano. Ua faaite mai te Hebera 10:24, 25, eaha ta te Atua e hinaaro ia rave au. I muri iho, ua haamata vau i te haere i te mau putuputuraa atoa e i te haamatau i te taata, ua faaoti au i te pûpû i to ˈu ora no Iehova ma te bapetizo ia ˈu.

TO ˈU FAUFAARAAHIA: Ua putapû roa vau i to Iehova vaiihoraa ia faatupu tatou i te hoê auhoaraa piri e o ˈna. Ua turai to ˈna aroha e to ˈna haapao maitai ia ˈu ia pee ia ˈna e i ta ˈna Tamaiti, Iesu Mesia ei hiˈoraa no ˈu i roto i to ˈu oraraa. Ua haapii au i te tutava no te faatupu i te huru taata Kerisetiano, ia nehenehe au e tapea i to ˈu tiaraa taata. Ua tutava vau i te faatupu i te here e te aumihi. E tamata vau i te pee i te hiˈoraa ta Iesu i vaiiho mai ma te hamani maitai i ta ˈu vahine e ta ˈu tamaiti. Te manaˈonaˈo rahi nei au no to ˈu mau taeae e tuahine i roto i te parau mau. Ua aratai te peeraa i te Mesia ia ˈu i te faatura, faatura ia ˈu iho e i te faaite i te here ia vetahi ê.

“Ua faaite ratou i te faatura ia ˈu.”—GUADALUPE VILLARREAL

MATAHITI FANAURAA: 1964

FENUA: MEHIKO

AAMU: HURU ORARAA TANO ORE

NA MUA ˈˈE: O vau hoê o ˈna tamarii e hitu tei ora na i Hermosillo i Sonora i Mehiko, hoê tuhaa mea veve roa. Ua pohe to ˈu papa i to ˈu nainairaa e ua rave to ˈu mama i te ohipa no te aupuru ia matou. E haere noa vau e aita to ˈu e tiaa no te mea aita e moni ta matou no te hoo i te reira. I to ˈu apîraa, ua rave au i te ohipa no te tauturu i te mau haamâuˈaraa o to ˈu utuafare. Mai te mau utuafare e rave rahi, ua otaa noa matou i te fare.

I te rahiraa o te mahana, aita to ˈu mama i pihaiiho ia matou no te paruru mai. I te onoraa o to ˈu matahiti, ua haamata te hoê tamaroa 15 matahiti to ˈna i te rave ino ia ˈu. Ua tamau te reira e rave rahi taime. Te faahopearaa, aita vau e taa faahou mea here anei na ˈu i te tane aore ra i te vahine. E manaˈo vau mea tano ia faahinaaro i te mau tane. To ˈu imiraa i te tauturu a te mau taote e te mau tia haapaoraa, ua haapapu mai ratou aita to ˈu e fifi e mea tano to ˈu huru aau.

I te 14raa o to ˈu matahiti, ua rave au i te faaotiraa e haa e e faaahu mai te mau mahu. Ua ora vau 11 matahiti mai tera, ua faaea vau e rave rahi tane i tera roaraa matahiti. Ua rave au i te faaineineraa no te riro mai ei taata tâpû rouru e ua iriti vau i te hoê fare faaneheneheraa. Tera râ, aita vau e oaoa ra. Ua î to ˈu oraraa i te mauiui e te taiva. Ua manaˈo vau e ere mea tano ta ˈu e rave ra. Ua haamata vau i te ui ia ˈu iho: ‘Te vai ra anei te mau taata maitai e o te nehenehe e tiaturi?’

Ua manaˈo vau to ˈu tuahine. Ua haamata o ˈna i te haapii te Bibilia e te mau Ite no Iehova e i te bapetizo ia ˈna. Ua paraparau mai o ˈna ia ˈu i ta ˈna e haapii ra, aita râ vau i tâuˈa ˈtu. Noa ˈtura, ua faahiahia roa vau i to ˈna oraraa e to ˈna faaipoiporaa. Ua ite maite au to raua here e faatura te tahi i te tahi. Ua faaite raua i te hamani maitai te tahi i te tahi. I muri iho, ua haapii au i te Bibilia na muri i te hoê Ite no Iehova. I te haamataraa, ua pee noa vau ma te anaanatae ore. I muri iho râ, ua taui.

UA TAUI TE BIBILIA I TO ˈU ORARAA: Ua titau manihini mai te mau Ite i te hoê o ta ratou putuputuraa e ua haere au. E tupuraa apî teie no ˈu. Te rahiraa o te taata e faaooo mai ratou ia ˈu, aita râ te mau Ite. Ua hamani maitai ratou ia ˈu e ua faatura mai. Ua putapû roa vau.

Ua tano ta ˈu hiˈoraa maitai no te mau Ite i to ˈu haereraa i te hoê tairururaa. Ua ite au, noa ˈtu ei pǔpǔ rahi, hoê â to ratou huru mai to to ˈu tuahine e te haavare ore. Ua ui vau ia ˈu iho, e ere anei o ratou te pǔpǔ ta ˈu i imi noa na, te mau taata maitai e nehenehe e tiaturi. Ua maere roa vau i to ratou here e autahoê, mai ta ratou faaohiparaa i te Bibilia no te pahono i te mau uiraa atoa. Ua taa ia ˈu o te mana o te Bibilia te tumu i maitai ai to ratou oraraa. Ua ite atoa vau e titauhia ia ˈu ia rave e rave rahi tauiraa no te riro mai hoê ǒ ratou.

Oia mau, mea tia ia taui roa to ˈu huru rapaeau no te mea te ora nei au mai te hoê vahine te huru. Mea titauhia ia taui ta ˈu huru paraparau, te mau peu, faaahuraa, faaneheneheraa e te maitiraa i te mau hoa. Ua haamata to ˈu mau hoa tahito i te faaooo mai ia ˈu, ma te parau mai: “No te eaha oe e na reira ˈi? Mea au roa oe na mua ˈˈe. Eiaha e haapii i te Bibilia. Te vai ra ta oe mau mea atoa.” Te fifi rahi roa, o te faarueraa ïa i ta ˈu mau peu tano ore.

Noa ˈtura, ua ite au e nehenehe e rave i te mau tauiraa rahi, te parau ra hoi te Bibilia i roto i te Korinetia 1, 6:9-11 tei haaputapû i to ˈu aau: “Eaha! Aita outou i ite e eita te feia parau-tia ore e fatu i te Faatereraa arii a te Atua? Eiaha outou e vare. Eita roa ˈtu te feia o te rave i te mau peu taotoraa tia ore, e te haamori idolo, e te faaturi, e te peu mahu, e te tane e taoto i te tane . . . e fatu i te Faatereraa arii a te Atua. Mai te reira na hoi vetahi o outou. Ua tamâ-roa-hia râ outou.” Ua tauturu Iehova i te mau taata ia rave i te mau tauiraa e ua tauturu atoa mai oia ia ˈu. E rave rahi matahiti to ˈu tutava-noa-raa, tera râ, ua tauturu rahi mai te aratai e te here o te mau Ite ia ˈu.

TO ˈU FAUFAARAAHIA: I teie mahana, e oraraa maitai to ˈu. Ua faaipoipo vau e te haapii ra vau e ta ˈu vahine i ta mâua tamaiti ia ora ia au i te mau faaueraa tumu Bibilia. Tei muri roa te oraraa ta ˈu i ora na. Te oaoa nei au i te mau haamaitairaa pae varua e te mau hopoia e rave rahi. Te tavini nei au ei matahiapo i roto i ta ˈu amuiraa e ua nehenehe ïa vau e tauturu ia vetahi ia haapii i te parau mau i roto i te Parau a te Atua. No te oaoa o to ˈu mama i te mau tauiraa ta ˈu i rave, ua farii o ˈna i te hoê haapiiraa Bibilia e ua riro mai ei Kerisetiano bapetizohia. Hoê o to ˈu tuahine e huru oraraa tano ore to ˈna, tei riro atoa mai ei Ite no Iehova.

Te tahi o te mau taata tei ite i to ˈu oraraa tahito e tei ite i teie nei, ua taui au e ua maitaihia. E ua ite au te mau tutavaraa i titauhia ia ˈu ia rave no teie mau tauiraa. Na mua ˈˈe ua imi au i te tauturu a te feia aravihi, tera râ, ua horoa mai ratou i te manaˈo tano ore. Ua tauturu mau râ Iehova ia ˈu. Noa ˈtu ua manaˈo vau aita to ˈu e faufaa ua haapao oia ia ˈu e ua aupuru oia ia ˈu ma te here e te faaoromai. No te mea ua haapao te hoê Atua faahiahia, maramarama e te here ia ˈu e ua hinaaro oia ia maitai to ˈu oraraa, tera ïa te taa-ê-raa rahi.

“Aita vau e mauruuru, o vau anaˈe e te faufaa ore.” —KAZUHIRO KUNIMOCHI

MATAHITI FANAURAA: 1951

FENUA: TAPONE

AAMU: HOÊ AITO TAAHI PEREOO TATAAHI

NA MUA ˈˈE: Ua paari au i te hoê oire tapearaa pahi i Shizuoka i Tapone. E vaˈu matou i roto i to ˈu utuafare e ora ra i roto i te hoê fare nainai. E fare hooraa pereoo tataahi ta to ˈu papa. I to ˈu apîraa, ua afai o ˈna ia ˈu i te mau tataˈuraa taahiraa pereoo tataahi e ua faatupu te reira i roto ia ˈu te anaanatae no tera tuaro. Ua turai o ˈna ia ˈu ia riro ei aito no te taahi pereoo tataahi. I te haapiiraa tuarua, ua haamata o ˈna i te faaineine maitai ia ˈu. I te haapiiraa tuatoru, ua noaa ia ˈu e toru tiaraa i roto i te tataˈuraa tuaro i to ˈu vahi. Ua pûpûhia mai hoê parahiraa i te haapiiraa teitei, ua faaoti râ vau e haere i te hoê haapiiraa no te taahi te pereoo tataahi. I te 19raa o to ˈu matahiti, ua riro mai au ei aito taahi pereoo tataahi.

Teie nei, ta ˈu fa i roto to ˈu oraraa ia riro ei aito taahi pereoo tataahi no Tapone. Ua faaoti au ia rahi ta ˈu moni ia nehenehe to ˈu utuafare ia ora ma te hau e te papu. Ua haapuai au i roto i ta ˈu faaineineraa. I te mau taime atoa e ani-rahi-hia ia ˈu te faaineineraa aore ra te hoê fifi roto i te hororaa, e parau na vau ia ˈu iho, ‘ua fanauhia vau no teie tuaro e e titauhia ia na reira noa. Ta ˈu ïa i rave.’ Ua ite au i te mau haamaitairaa i to ˈu tutava-noa-raa. I te matahiti matamua, ua haru mai au te parahiraa matamua. I te piti o te matahiti, ǒ atura vau i roto i te tataˈuraa no te ite o vai te numera hoê no Tapone. E ono taime to ˈu haruraa i te piti o te parahiraa i roto i teie hororaa.

I te mea e tei nia roa vau i te anairaa o te mau aito, ua piihia vau: “Avae puai aˈe no Tokai” te hoê tuhaa no Tapone. Ua faatupu vau i te hoê feruriraa tataˈu. I tera taime, ua mǎtaˈuhia vau no te mea ua puai roa vau i roto i te mau hororaa. Ua rahi ta ˈu moni e ua ite au e nehenehe au e hoo i ta ˈu e hinaaro. Ua hoo mai au i te hoê fare e te vai ra te hoê piha faaineineraa e te mau matini maitai aˈe. Ua hoo mai au i te hoê pereoo mea moni aˈe i te hoê fare. No te haapapu i to ˈu oraraa, ua faaohipa vau ta ˈu moni no te hoo mai i te fare e te tapihooraa.

Noa ˈtu râ, aita vau e mauruuru ra, o vau anaˈe e te faufaa ore. I tera taime, ua faaipoipo vau e e tamarii ta ˈu. Tera râ, e pinepine e ere au i te mea faaoromai i nia i to ˈu utuafare. Pinepine au e riri hanoa i ta ˈu vahine e te mau tamarii no te tahi mau mea faufaa ore. Ua haamata ratou i te hiˈo i nia i to ˈu hohoˈa mata ua riri anei au.

I te hoê taime, ua haamata ta ˈu vahine e haapii i te Bibilia e te mau Ite no Iehova. Ua rave o ˈna e rave rahi tauiraa. Ua faaite o ˈna i to ˈna hinaaro e apiti i te mau putuputuraa a te mau Ite, e ua faaoti ïa vau e haere e to ˈu utuafare taatoa. Te haamanaˈo noa ra vau i te po i te haereraa mai te hoê matahiapo i to ˈu fare e a haamata ˈi i te haapii i te Bibilia na muri ia ˈu. Ua putapû roa vau i ta ˈu i haapii.

UA TAUI TE BIBILIA I TO ˈU ORARAA: Aita roa vau e haamoˈe i ta ˈu i taio i roto i te Ephesia 5:5 o te na ô ra: “Eita roa te taata o te rave i te mau peu taotoraa tia ore, te peu viivii aore ra te taata nounou o te au i te haamori idolo, eita roa ïa e fatu i te Faatereraa arii a te Atua ta te Mesia e faatere.” Ua ite au ua faaauhia te tataˈuraa taahi pereoo tataahi i te hauti pere e e turai teie tuaro ia faatupu i te hoê feruriraa nounou. Ua haamata to ˈu manaˈo haava e huru ê. Ua taa ia ˈu mai te peu e hinaaro vau e faaoaoa i te Atua ra Iehova, e titauhia ia ˈu ia faarue i teie tuaro. Tera râ, e faaotiraa fifi teie no ˈu.

No oti noa mai ra ta ˈu matahiti faahiahia mau no te hororaa. E ua hinaaro vau hau atu â. Ua ite au e te faatupu ra ta ˈu haapiiraa Bibilia te mǎrû e te hau i roto ia ˈu, tei taa-ê-roa i te huru feruriraa tei titauhia ia ˈu no te upootia i te mau hororaa. E toru noa taime to ˈu hororaa i muri mai i to ˈu haamataraa i te haapii, tera râ, i roto i to ˈu aau aita vau i faarue roa i tera hororaa. Ua feaa roa vau, eita vau e taa faahou nafea ia aupuru i to ˈu utuafare. Aita ˈtura vau i taa nafea ra. E ua haamata to ˈu mau fetii i te au ore ia ˈu no nia i ta ˈu faaroo apî. Ua inoino roa to ˈu papa. Horuhoru roa vau, no te haapeapea rahi, ua roohia vau i te aai.

I roto i tera taime fifi, na te haapiiraa Bibilia e te apitiraa i te mau putuputuraa a te mau Ite no Iehova i tauturu ia ˈu. Ma te haere mǎrû ua puaihia mai to ˈu faaroo. Ua ani au ia Iehova ia faaroo mai i ta ˈu mau pure e ia tauturu mai ia ˈu ia ite i ta ˈna e rave ra. Ua iti mai to ˈu hepohepo a haapapu ai ta ˈu vahine ia ˈu, aita o ˈna e hinaaro e ora i roto i te hoê fare rahi no te ite i te oaoa. Ua haere mǎrû noa vau i mua.

TO ˈU FAUFAARAAHIA: Ua haapii au e mea mau te mau parau ta Iesu i faahiti i roto i te Mataio 6:33: “No reira, a tamau i te imi na mua i te Faatereraa arii a te Atua e ta ˈna parau-tia, e e horoahia mai teie mau mea atoa na outou.” Aita matou i ere noa ˈˈe i te “mau mea atoa” ta Iesu i parau no te mau mea hinaarohia o te oraraa. Noa ˈtu hoê noa tuhaa i nia e 30 ta ˈu moni avaˈe i teie nei, aita roa vau e to ˈu utuafare i ere noa ˈˈe i te hoê mea i te roaraa ona 20 matahiti.

Hau atu â, ia haamori au e to ˈu mau hoa Kerisetiano, ua ite au te oaoa e te mauruuru ta ˈu i ore i ite na mua ˈˈe. Mea tere te mau mahana. Ua maitai roa mai te oraraa o to ˈu utuafare. Ua riro mai ta ˈu na tamaroa e toru e ta ratou mau vahine ei mau tavini taiva ore na Iehova.