An Biblia Nakakagbag-o han Kinabuhi

ANO an nakaaghat ha usa nga diri makisangkayon nga punk rocker nga mahibaro ha paghigugma ngan ha pagbulig ha iba? Ano an nagpagios ha usa nga Mexicano nga bayaan an imoral nga pagkinabuhi? Kay ano nga ginbayaan han usa nga sikat nga siklista ha Japan an iya karera basi mag-alagad ha Dios? Tagda an ira mga eksperyensya.

“Siga Ako, Hambog, Ngan Agresibo.”—DENNIS O’BEIRNE

NATAWO: 1958

NATAWHAN NGA NASUD: INGLATERA

DATI NGA PAGKINABUHI: PUNK ROCKER

NAGLABAY: An pamilya han akon tatay taga-Ireland, ngan nagdaku ako nga Katoliko. Agsob ako sumingba nga nag-uusahan la bisan kon diri ko ito karuyag. Kondi, maki-Dios ako. Pirme ako nangangadi han Amay Namon, ngan nahihinumdoman ko pa nga ginhuhunahuna ko an kahulogan hito samtang nahigda ha gab-i. Ginbabahin-bahin ko an mga pulong hito ngan nangangalimbasog nga masabtan an kahulogan han tagsa nga bahin.

Han tinedyer ako, umapi ako ha grupo nga Rastafarian ngan nagin interesado liwat ha mga organisasyon nga nakontra ha gobyerno sugad han Anti-Nazi League. Kondi, mas naimpluwensyahan ako han rebelyoso nga panhunahuna ngan panggios han grupo nga punk rocker. Haros adlaw-adlaw ako nagdudroga, labi na hin marijuana. Tungod kay ‘waray ako labot’ ha mga panhitabo, nagin parahubog ako, diri nagtatagad ha akon kinabuhi bisan kon mameligro, ngan haros diri napaid ha iba. Diri ako makisangkayon ngan diri nakikiistorya gawas la kon ha akon paghunahuna may pulos ito. Nadiri liwat ako magparetrato. Salit masisiring ko nga hadto, siga ako, hambog, ngan agresibo. Buotan la ako ngan mahinatagon ha mga duok ha akon.

Han hirani na ako mag-20 anyos, nagkainteres ako ha Biblia. Usa nga pusher nga akon sangkay an nagbinasa han Biblia samtang priso, ngan maiha kami nga nag-inistorya mahitungod ha relihiyon ngan ha bahin ni Satanas ha kalibotan. Pinalit ako hin Biblia ngan personal nga gin-adman ito. Ginbabasa ko ngan han akon sangkay an mga bahin hito, ginhihisgotan an amon hinbaroan, ngan naghihimo hin mga konklusyon. Ginbuhat namon ini ha sulod hin mga bulan.

Ini an pipira han amon nagin konklusyon: nga nagkikinabuhi na kita ha kataposan nga mga adlaw; nga sadang isangyaw han mga Kristiano an maopay nga sumat han Ginhadian han Dios; nga diri hira sadang magin bahin han kalibotan, pati han politika; nga an Biblia naghahatag hin mag-opay nga giya ha moral. Amon nasantop nga tinuod an Biblia ngan may tinuod nga relihiyon. Kondi ano ito? Nahunahuna namon an dagku nga relihiyon ngan an ira magarbo nga mga seremonya pati an ira pakigbahin ha politika, kondi hinbaroan  namon nga waray makigbahin hito hi Jesus. Maaram kami nga diri hira inuuyonan han Dios, salit gin-usisa namon an pipira nga diri kilala nga relihiyon basi hibaroan kon ano an igintututdo hito.

Nakigkita kami ha mga membro hito nga mga relihiyon ngan namakiana ha ira. Maaram kami han baton han Biblia ha amon mga pakiana, salit masayon namon hibaroan kon uyon ha Biblia an ira baton. Katapos makigkita ha ira, nag-aampo ako, ‘Kon hira an tinuod nga relihiyon, pagiosa gad ako nga makigkita utro ha ira.’ Kondi paglabay hin pipira ka bulan, waray pa gihapon grupo nga nakabaton han amon mga pakiana gamit an Biblia ngan waray na ako ganahi nga makigkita utro ha ira.

Ha urhi, may nakaistorya kami nga mga Saksi ni Jehova. Iginbangon namon an amo gihap nga mga pakiana, ngan nabaton nira ito gamit an Biblia. An ira ginsiring haom gud han amon hinbaroan na. Salit, nagbangon kami hin mga pakiana nga waray pa namon mabilngi an baton ha Biblia—pananglitan, kon ano an panhunahuna han Dios ha pagsigarilyo ngan pagdroga. Gamit an Biblia, nabaton nira ito. Salit umuyon kami pagtambong ha Kingdom Hall.

Makuri ito para ha akon tungod kay diri ako makitawo ngan diri ko karuyag daupon hinin makisangkayon ngan desente an pamado nga mga tawo. Ginsuspetsahan ko an iba ha ira, ngan diri ko na gud karuyag tumambong pa hin mga katirok. Kondi sugad han pirme ko ginbubuhat, nag-ampo ako nga kon hira an tinuod nga relihiyon, maghingyap unta ako nga makigkita utro ha ira—ngan naghingyap gud ako nga mag-aram han Biblia ha ira.

KON PAONAN-O NABAG-O HAN BIBLIA AN AKON KINABUHI: Maaram ako nga kinahanglan ko umundang pagdroga, ngan nabuhat ko dayon ito. Pero, nakurian ako pag-undang ha pagsigarilyo. Damu ka beses nga ginsarihan ko ito, pero napakyas ako. Ngan kon nabati ako nga masayon la para ha iba an pag-undang, nag-aampo ako kan Jehova mahitungod hito. Waray pag-iha, nakaundang ako ha bulig ni Jehova. Hinbaroan ko nga importante gud an pagin tangkod ngan pagin prangka ha pag-ampo kan Jehova.

Daku liwat nga pagbag-o an akon ginhimo ha akon pamado ngan pag-ayos. Ha akon siyahan nga pagtambong ha Kingdom Hall, nakamaong ako ngan nakadyaket hin anit nga may eslogan. Tusok-tusok an akon buhok nga may highlight nga asul. Waray pag-iha, gintina ko ito hin orange. Para ha akon waray ko kinahanglan bag-uhon, bisan kon mahigugmaon nga ginhisgotan ito han mga Saksi ha akon. Kondi ha urhi, nahunahuna ko an 1 Juan 2:15-17: “Ayaw niyo higugmaa an kalibotan, bisan an mga bagay ha kalibotan. Kon may tawo nga maghigugma ha kalibotan, an gugma han Amay waray dida ha iya.” Nasantop ko nga an akon hitsura nagpapakita nga nahigugma ako hini nga kalibotan, ngan kinahanglan ko magbag-o basi maipakita an gugma ha Dios. Salit nagbag-o ako.

Nasantop ko ha urhi nga diri la an mga Saksi an naruruyag nga tumambong ako ha Kristiano nga mga katirok. Iginpapakita han Hebreo 10:24, 25 nga ito liwat an karuyag han Dios. Han natambong na ako ha ngatanan nga katirok ngan nakilala ko na an mga Saksi, nagdesisyon ako ha pagdedikar han akon kinabuhi kan Jehova pinaagi han bawtismo.

MGA KAOPAYAN NGA AKON NAPAHIMULSAN: Nabantad gud ako nga gintutugotan kita ni Jehova nga magkaada duok nga relasyon ha iya. An iya pagpaid ngan pagtagad nagpagios ha akon nga subaron hiya ngan an iya Anak, hi Jesu-Kristo. (1 Pedro 2:21) Hinbaroan ko nga bisan kon nangangalimbasog ako nga makultibar an Kristiano nga mga kalidad, puydi pa gihapon ako magkaada kalugaringon nga pangirilal-an. Nangangalimbasog ako nga magin mahigugmaon, matinagaron, ngan masubad hi Kristo ha akon pagtratar ha akon asawa, anak, ngan ha akon kabugtoan ha pagtoo. Tungod han akon pagsunod kan Kristo, nagkaada ako dignidad, pagtahod ha kalugaringon, ngan gugma ha iba.

 “Gin-abiabi Nira Ako Ngan Matinalahuron nga Gintratar.”—GUADALUPE VILLARREAL

NATAWO: 1964

NATAWHAN NGA NASUD: MEXICO

DATI NGA PAGKINABUHI: IMORAL

NAGLABAY: Usa ako han pito nga anak nga nagdaku ha Hermosillo, Sonora, Mexico, usa nga lugar nga pobre hinduro. Namatay hi Papa han gutiay pa ako, salit kinahanglan magtrabaho hi Mama basi suportahan kami. Agsob nga nakatiil la ako kay waray kami iparalit hin tsinelas. Samtang bata pa, natrabaho na ako basi makabulig ha amon pan-gasto. Pariho han damu nga pamilya, naghuhuruot kami ha balay.

Haros bug-os nga adlaw nga waray hi Mama ha pagbantay ha amon. Han 6 anyos ako, nagin biktima ako han seksuwal nga pag-abuso hin 15 anyos nga lalaki. Nagpadayon ini hin maiha nga panahon. Tungod hini nawurok ako, kahuna ko normal la nga maruyag ha igkasi-lalaki. Han nagpabulig ako ha mga doktor ngan mga klero, ginpasarig nira ako nga normal la an akon gin-aabat.

Han 14 anyos ako, nagdesisyon ako nga diri na itago nga bayot ako. Nagin sugad ako hito ha sulod hin 11 ka tuig, ngan nagkarelasyon pa ngani hin iba-iba nga lalaki. Ha urhi, nag-eskwela ako basi magin hair stylist ngan nagkaada parlor. Kondi diri ako malipayon. Agsob nakukurian ako ngan gintatraydor, ngan naabat ko nga sayop an akon ginbubuhat. Salit nagpakiana ako ha akon kalugaringon, ‘May-ada pa ba mag-opay ngan masasarigan nga mga tawo?’

Nahinumdoman ko hi Ate. Nag-aram hiya han Biblia ha mga Saksi ni Jehova ngan nabawtismohan. Ginsusumatan niya ako han iya hinbabaroan kondi diri ako namamati. Bisan pa hito, bilib ako ha paagi han iya pagkinabuhi ngan han iya relasyon ha iya bana. Nakikita ko nga hinigugma ngan tinahod gud nira nga mag-asawa an kada tagsa, ngan buotan liwat hira ha usa kag usa. Inabot an panahon, gindumarahan ako hin pag-aram ha Biblia han usa nga Saksi. Ha siyahan, diri gud ako interesado. Pero nabag-o ito.

KON PAONAN-O NABAG-O HAN BIBLIA AN AKON KINABUHI: Gin-imbitar ako han mga Saksi ha ira katirok, ngan tinambong ako. Nabag-ohan ako tungod kay kasagaran nga ginhihimo la ako nga pataraw-an han mga tawo, kondi waray ito buhata han mga Saksi. Gin-abiabi nira ako ngan matinalahuron nga gintratar. Nabantad gud ako hito.

Mas bumilib pa ako ha mga Saksi han tinambong akon hin asembleya. Nakita ko nga bisan ha daku nga grupo tinuod hira ngan sinsero, pariho kan Ate. Ginpakianhan ko an akon kalugaringon kon hira ba an mag-opay ngan masasarigan nga mga tawo nga maiha ko na nga ginbibiniling. Bilib gud ako ha ira gugma ngan pagkaurosa, pati ha ira paggamit han Biblia ha pagbaton ha mga pakiana. Nasantop ko nga an Biblia an rason han ira maopay nga pagkinabuhi, ngan kinahanglan ko magbag-o basi magin usa ha ira.

Ha pagkamatuod, kinahanglan ko an bug-os nga pagbag-o tungod kay nagkikinabuhi ako sugad nga babaye. An akon panyakan, panggawi, pamado, estilo han buhok, ngan kasangkayan kinahanglan ko bag-uhon. Ginhimo ako nga pataraw-an han dati ko nga kasangkayan, ngan nasiring: “Kay ano nga kinahanglan mo ini buhaton? Okey ka na man unta. Diri mo na kinahanglan mag-aram han Biblia. Aada na ha imo an ngatanan.” Pero an akon imoral nga pagkinabuhi an pinakamakuri bag-uhon.

 Kondi maaram ako nga makakagbag-o gud ako tungod kay nabantad an akon kasingkasing han 1 Korinto 6:9-11: “O waray ba niyo hibaroi nga an diri mga matadong diri makakapanunod ha ginhadian han Dios? Diri kamo kalimbongan; bisan an mga makihihilawason, masingbahon ha mga dios-dios, bisan an mga manlilibog, bisan an mga babayin-on, bisan an mga Sodomanhon [nakikighilawas ha igkasi-lalaki], . . . diri makakapanunod ha ginhadian han Dios. Ngan an iba ha iyo mga sugad hini: Kondi mga lininisan [na] kamo.” Ginbuligan ni Jehova an mga tawo hadto nga magbag-o, ngan ginbuligan liwat niya ako. Nangalimbasog gud ako ha sulod hin pipira ka tuig, kondi an paggiya ngan gugma han mga Saksi daku an naibulig ha akon.

MGA KAOPAYAN NGA AKON NAPAHIMULSAN: Yana normal na an akon kinabuhi. May asawa na ako, ngan amon gintututdoan an amon anak nga magkinabuhi uyon ha mga prinsipyo ha Biblia. Iba na gud an akon pagkinabuhi yana, ngan damu nga espirituwal nga bendisyon ngan pribilehiyo an akon nakarawat. Nag-aalagad ako sugad nga tigurang, ngan nakabulig ha iba nga mahibaro han kamatuoran ha Pulong han Dios. Nalipay gud hi Mama ha akon pagbag-o, salit nag-aram liwat hiya han Biblia ngan nagpabawtismo, ngan an akon manghod nga imoral an pagkinabuhi hadto, nagbag-o ngan Saksi na yana.

Naobserbaran liwat han mga nakilala ha akon hadto an akon daku nga pagbag-o. Ngan maaram ako kon kay ano nga nahimo ko ito. Hadto nangaro ako hin sagdon ha mga eksperto, pero waray pulos an ira mga sagdon. Kondi, ginbuligan gud ako ni Jehova. Bisan kon inabat ako hin kawaray-pulos, mahigugmaon hiya ngan mapailubon ha akon. Nakabulig gud ha akon an paghibaro nga an maopay hinduro, intelihente, ngan mahigugmaon nga Dios nagtatagad ha akon ngan naruruyag nga maghingaopay ako.

‘Diri La Gihapon Ako Kontento, Ngan Naabat La Gihapon hin Kasubo.’—KAZUHIRO KUNIMOCHI

NATAWO: 1951

NATAWHAN NGA NASUD: JAPAN

DATI NGA PAGKINABUHI: PROPESYONAL NGA SIKLISTA

NAGLABAY: Nagdaku ako ha mamingaw nga bungto ha Shizuoka Prefecture, Japan, diin kami nga walo ha amon pamilya naukoy ha gutiay nga balay. Hi Tatay may shop hin bisikleta. Tikang ha pagkabata, gin-uupod na niya ako ha mga rumba hin bisikleta salit nagkainteres ako hito. Karuyag niya nga magin propesyonal ako nga siklista. Ha pag-ikatarapos han elementarya, duro na an iya pagbansay ha akon. Han hayskul, sagunson nga nagdaog ako hin tulo ka beses ha tinuig nga kompetisyon han mga atleta ha bug-os nga nasud. Tungod hito, gintanyagan ako nga magin eskolar ha usa nga unibersidad, kondi mas ginpili ko nga umiskwela ha racing school. Salit han 19 anyos ako, propesyonal na ako nga siklista.

Tikang hito, nagin ambisyon ko nga magin sikat nga siklista ha Japan. Karuyag ko magkaada damu nga kwarta basi magin mahimyang an kinabuhi han akon pamilya. Salit nagpokus ako ha training. Kon  nakukurian ako hito o ha rumba, pauroutro nga ginsisidngan ko an akon kalugaringon nga igin-anak ako basi magin pararumba salit kinahanglan ko magpadayon. Ngan nagbunga an akon pangalimbasog. Han siyahan nga tuig, nakuha ko an siyahan nga premyo para ha bag-ohan nga siklista. Han sumunod, naapi ako ha kompetisyon para han numero uno nga siklista ha Japan. Unom ka beses nga nagin ikaduha ako hito nga rumba.

Han naapi ako ha kategoriya han mga nangunguna nga pararumba, nagin kilala ako sugad nga an makusog nga bitiis ha Tokai, usa nga lugar ha Japan. Ha kompetisyon, diri ako napapirde. Salit ha urhi, ginkahadlokan ako tungod han waray ko kalooy nga pakigrumba. Nagdaku an akon kita salit napapalit ko an tanan ko nga karuyag. Pinalit ako hin balay nga may gym nga may moderno nga mga equipment ngan hin imported nga awto nga haros pariho an kantidad hin balay. Basi liwat magin establisado ha pinansyal, namuhunan ako ha real estate ngan ha stock market.

Bisan pa hito, diri la gihapon ako kontento, naabat la gihapon hin kasubo ngan kawaray-pulos. Hito nga panahon, may asawa na ako ngan mga anak, kondi agsob nga naaaringit ako ha ira. Nasisina ako bisan ha simple la nga mga butang. Salit, nahahadlok hira ha akon ngan gin-oobserbaran kon may busyo ba ako o waray.

Ha urhi, nag-aram an akon asawa han Biblia ha mga Saksi ni Jehova. Tungod hito, nagkaada damu nga pagbag-o. Nagsiring hiya nga karuyag niya tumambong ha katirok han mga Saksi, salit nagdesisyon ako nga tumambong kami sugad nga pamilya. Nahinunumdoman ko pa an gab-i nga bumisita ha amon an usa nga tigurang ngan nagtikang magdumara hin pag-aram ha Biblia ha akon. Nakasulod gud ha akon kasingkasing an akon hinbaroan.

KON PAONAN-O NABAG-O HAN BIBLIA AN AKON KINABUHI: Diri ko gud mahingangalimtan an epekto ha akon han Efeso 5:5. Ito nasiring: “An makihihilawason, bisan an mahugaw nga tawo, bisan an aawaon nga tawo, nga nagsisingba ha mga dios-dios, hiya waray panurundon ha ginhadian ni Kristo ngan Dios.” Nasantop ko nga an pakigrumba pariho hin huygo ngan nag-aaghat ha usa nga magin hakog. Nagtikang ako makonsensya. Nasantop ko nga kon karuyag ko mapalipay hi Jehova, kinahanglan ko umundang ha pakigrumba. Kondi makuri gud ito para ha akon.

Katatapos pa la han pinakamalampuson nga tuig han akon karera, ngan naghihingyap ako hin dugang pa. Kondi nakita ko nga tungod han akon pag-aram ha Biblia, nagkaada ako murayaw ngan kalmado nga hunahuna—nga naiiba gud ha disposisyon nga kinahanglan ha pagdaog hin rumba! Makatulo na la ako api hin rumba tikang han nag-aram ako han Biblia, kondi ha akon kasingkasing waray pa gud ito mawara. Dugang pa, diri ako maaram kon paonan-o ko masusuportahan an akon pamilya. Baga hin waray ako mahihimo, ngan ginpakurian liwat ako han akon mga paryente tungod han akon bag-o nga gintotoohan. Nasina gud hi Tatay. Tungod kay diri ako maaram han akon bubuhaton, nadepres ako ngan nagka-ulcer.

Durante hiton makuri nga kahimtang, nakabulig ha akon an padayon nga pag-aram han Biblia ngan pagtambong ha mga katirok. Hinay-hinay nga nagrig-on an akon pagtoo. Nanginyupo ako kan Jehova nga batunon an akon mga pag-ampo ngan buligan ako nga makombinse nga pinamamatian niya ako. Naibanan an akon ginkakabarak-an han nagsiring an akon asawa nga diri niya kinahanglan umukoy ha daku nga balay basi magin malipayon. Hinay-hinay nga nag-uswag ako.

MGA KAOPAYAN NGA AKON NAPAHIMULSAN: Napamatud-an ko nga tinuod an siring ni Jesus ha Mateo 6:33: “Kondi pamilnga niyo siyahan an ginhadian han Dios, ngan an iya katadongan; ngan ngatanan ini nga mga butang mahidudugang ha iyo.” Waray gud kami mawad-i han iba nga “mga butang” nga ginsiring ni Jesus, an nangunguna nga panginahanglan. Bisan kon an akon kita yana mga tres porsyento la kay han akon kita hadto, waray gud ako o an akon pamilya mawad-i han amon panginahanglan ha naglabay nga 20 ka tuig.

Labaw ha ngatanan, kon kaupod ko an akon igkasi-tumuroo ha mga buruhaton ha pagsingba ha Dios, nagkakaada ako kalipay ngan kakontento nga waray ko gud maeksperyensyahi hadto. Ha paglabay han mga adlaw nag-uswag gud an akon pamilya. An akon tulo nga anak upod an ira mga asawa nagin matinumanon nga surugoon ni Jehova.