Mga Magbabasa Nangutana . . .

Ang Gehenna ba Usa ka Nagkalayong Dapit sa Pagsakit?

▪ Sa mga asoy sa ebanghelyo, gipasidan-an ni Jesus ang iyang mga tinun-an nga magbantayng dili makaagom sa paghukom sa Gehenna. Buot gayod ni Jesus nga kini pabilhan sa iyang mga tinun-an. Apan, ang iya bang gipasabot mao ang nagkalayong impiyerno sa walay kataposang pagsakit?—Mateo 5:22.

Una, atong susihon ang kahulogan niining pulonga. Ang Gregong pulong nga Geʹen·na katumbas sa Hebreohanong pulong nga geh Hin·nomʹ, nga nagkahulogang “walog sa Hinnom,” o sa kabug-osan geh veneh-Hin·nomʹ, “walog sa mga anak nga lalaki ni Hinnom.” (Josue 15:8; 2 Hari 23:10) Kining dapita, nga nailhan karon nga Wadi er-Rababi, maoy lawom ug hiktin nga walog nga anaa sa habagatan ug sa habagatan-kasadpan sa Jerusalem.

Panahon sa mga hari sa Juda, gikan sa ikawalong siglo B.C.E., kining dapita gigamit alang sa paganong mga rituwal, lakip ang pagsunog sa mga anak ingong halad. (2 Cronicas 28:1-3; 33:1-6) Gitagna ni Jeremias nga anha sa maong walog pamatyon sa mga Babilonyanhon ang mga taga-Juda ingong paghukom sa Diyos sa ilang pagkadaotan. *—Jeremias 7:30-33; 19:6, 7.

Sumala sa Hudiyong eskolar nga si David Kimhi (c. 1160-c. 1235 C.E.), ang walog sa ulahi gihimong tambakanag basura sa siyudad sa Jerusalem. Nagsilbi kining sunoganag basura diin ang kalayo kanunayng magdilaab. Bisan unsang butang nga ilabay dinhi bug-os gayong maut-ot, mahimong abo.

Gihubad sa daghang maghuhubad sa Bibliya ang Geʹen·na ingong “impiyerno.” (Mateo 5:22, King James Version) Ngano? Tungod kay ang literal nga kalayo sa walog sa gawas sa Jerusalem ilang gilangkit sa paganong ideya nga sa laing kalibotan ang mga daotan hukman pinaagig pagpaantos sa kalayo. Apan, wala gayod gilangkit ni Jesus ang Gehenna sa pagpaantos.

Si Jesus nahibalo nga bisan lang gani ang paghunahuna nga ang mga tawo sunogong buhi maoy dulumtanan alang sa iyang langitnong Amahan, si Jehova. Sa paghisgot kon giunsa paggamit ang Gehenna sa panahon ni Jeremias, ang Diyos miingon: “Ilang gitukod ang hatag-as nga mga dapit sa Topet, nga anaa sa walog sa anak ni Hinnom, aron sa pagsunog sa ilang mga anak nga lalaki ug sa ilang mga anak nga babaye diha sa kalayo, usa ka butang nga wala nako isugo ug nga wala motungha sa akong kasingkasing.” (Jeremias 7:31) Dugang pa, ang pagpaantos sa mga patay kasumpaki sa mahigugmaong hiyas ni Jehova ug sa tin-awng pagtulon-an sa Bibliya nga ang patay “walay nahibaloan nga bisan unsa.”—Ecclesiastes 9:5, 10.

Gigamit ni Jesus ang terminong “Gehenna” sa pagsimbolo sa bug-os nga kalaglagan ingong paghukom gikan sa Diyos. Busa ang “Gehenna” susamag kahulogan sa “linaw nga kalayo,” nga gihisgotan sa basahon sa Pinadayag. Kini parehong nagsimbolo sa walay kataposang kalaglagan diin wala nay pagkabanhaw.—Lucas 12:4, 5; Pinadayag 20:14, 15.

[Footnote]