Nkonko ya babadi

Ngena mmuaba utubu bakengeshila bantu mu kapia anyi?

▪ Mu mukanda wa Matayo, wa Mâko, wa Luka ne wa Yone, Yezu udi udimuija bayidi bende bua kuepela dikenga dia dilumbuluisha mu Ngena. Kakuyi mpata, Yezu uvua musue bua bayidi bende bangate didimuija edi ne mushinga wa bungi. Kadi uvuaku wakula bua Iferno wa kapia mudi bantu ne bua kukenga kashidi ne kashidi anyi?​—Matayo 5:22.

Tshia kumpala, tuanji tukonkononayi muaku eu. Muaku wa tshiena Greke Geʹen·na udi upetangane ne wa tshiena Ebelu wa geh Hin·nomʹ. Muaku eu udi umvuija “tshibanda tshia Hinoma” anyi mu kuamba kuimpe geh veneh-Hin·nomʹ mmumue ne: “tshibanda tshia bana ba Hinoma.” (Yoshua 15:8; 2 Bakelenge 23:10) Muaba eu, udibu babikila lelu ne: Wadi er-Rababi, ntshibanda tshidi tshibumbakane ne tshiondoke tshivua ku Sud ne Sud-Ouest kua Yelushalema.

Mu tshikondo tshia bakalenge ba bena Yuda, kutuadijija mu bidimu bia 700 kumpala kua Yezu, muaba eu nguvua bantu bajikijila mikiya ya bampangano, ne bafila kabidi bana babu bu milambu ya kuosha mu kapia. (2 Kulondolola 28:1-3; 33:1-6) Muprofete Yelemiya wakadianjila kuamba ne: mu tshibanda tshimue tshimue etshi ke muvua bena Babulona ne bua kushipela bena Yuda bu dilumbuluisha dia kudi Yehowa bua malu mabi abu. *​—Yelemiya 7:30-33; 19:6, 7.

David Kimhi, mukebuludi wa malu a mu Bible muena Yuda (uvua ne muoyo bu mu 1160 too ne mu 1235) udi wamba ne: bakalua kukudimuna tshibanda etshi kuluatshi Diala divuabu bela butshiafu bua mu tshimenga tshia Yelushalema. Muaba eu ke uvuabu buoshila bintu; bavua benza bua kapia kikale anu katemamu bua kuosha butshiafu buvuabu belamu. Tshintu tshionso tshivuabu belamu tshivua tshivingutuka tshishala anu butue.

Bakudimunyi ba Bible ba bungi bakasungula bua kukudimuna muaku eu Geʹen·na ne: ‘Ngena wa kapia.’ (Matayo 5:22) Bua tshinyi? Bualu bavua bangata dilongesha dia bampangano dia ne: padi muntu ufua, yeye muntu mubi, badi bamukengesha mu kapia badisuikakaja ne kapia kavua mu tshibanda tshivua pambelu pa Yelushalema. Kadi Yezu yeye kavua muambe ne: bantu batu bakenga mu Ngena to.

Yezu uvua mumanye ne: Tatuende wa mu diulu Yehowa mmukine bikole dilongesha dia ne: batu buôsha bantu mu kapia. Pakamone Yehowa muvua bantu benze mudimu ne Ngena uvua mumanyike mu matuku a muprofete Yelemiya, wakamba ne: ‘Bakuasa bibumba bia Tofete bidi mu lupongo lua muana mulume wa Hinoma, bua kuoshapu bana babu ba balume ne bana babu ba bakaji mu kapia; badi benza bualu bundi tshiyi muele mukenji, bundi tshiyi muele meji bua bobu kubuenza.’ (Yelemiya 7:31) Bualu bukuabu: dilongesha dia ne: batu bakengesha bafue didi dibengangane ne ngikadilu ya dinanga ya Nzambi, dibengangane kabidi ne dilongesha dia mu Bible didi dileja patoke ne: “bafue kabena bamanye bualu bumue.”​—Muambi 9:5, 10.

“Ngena” uvua Yezu wakuila udi tshimfuanyi tshia kabutu ka tshiendelele kadi kikale bu dinyoka didi Nzambi ufila. Ngena udi ne diumvuija dia muomumue ne dia “dijiba dia kapia” didibu batela mu mukanda wa Buakabuluibua. Bionso bibidi bidi tshimfuanyi tshia kabutu ka tshiendelele kadi muntu kayi mua kubishibua to.​—Luka 12:4, 5; Buakabuluibua 20:14, 15.

[Mêyi adi kuinshi]