Nán maan e fa Zoova i sulɛ’n e yo aɔwi
Nán maan e fa Zoova i sulɛ’n e yo aɔwi
“Sa’n kwlaa nun ɔ bɔbɔ yo sa ng’ɔ ti kpa’n, maan be nian ɔ liɛ’n su yo. [...] Nán fa yo aɔwi.”—TIT 2:7.
1, 2. ?Andɛ’n, ngue ti yɛ be ɲin su yiyilɛ’n yɛ ɔ ti sran sunman be cinnjin ɔn? ?Ɔ maan kosan benin mun yɛ e fa usa e wun ɔn?
NANWLƐ wafa nga lika’n w’a yo kekle andɛ’n, awlanmannun’n be nin a wunmɛn i sɔ le. Be nga be nin Zoova be afiɛn’n sɛman kpa’n, ‘lika mɔ w’a yo kekle’ yɛ’n i ɲrun kekle jranlɛ’n timan pɔpɔ be sa nun. (2 Tim. 3:1-5) Be bɔbɔ be awlɛn mɔ be tra’n ti yɛ kɛ é sé yɛ’n, be kwla jran kekle sa’m be ɲrun kanngan ɔn. Kɛ mɔ sran sunman be kunndɛman kɛ sa ng’ɔ o be su’n ɔ di be ti’n mlɔnmlɔn’n ti’n, be ɲin su yiyilɛ’n yɛ be kunndɛ i sa trilili ɔ.
2 Kpɛ sunman’n, kɛ ɔ ko yo naan sran’m b’a kwla jran kekle sa nga be sanngan be akunndan’n be ɲrun’n, be fa fɛ dilɛ’n be cici be ti. Sɛ Klistfuɛ’m b’a nianman be wun’n, be kwla yo kɛ be sa wie. ?Ngue yɛ ɔ kwla uka e naan y’a yoman sɔ wie ɔ? ?Ɔ fata kɛ e kpalo be ɲin su yiyilɛ ninnge’n kwlaa? ?E ɲin su yiyilɛ’n nun ɔ nin junman ng’ɔ fata kɛ e di’n nun’n, wafa sɛ yɛ e kwla si e jranwlɛ ɔ? ?Biblu’n nun mmla benin mun yɛ be kwla uka e naan kannzɛ ninnge cinnjin mun yɛ e yo be’n, y’a yoman sran m’ɔ boman nzɛmundɛ kaan sa ɔ?
Nán e klo fɛ dilɛ kɛ mɛn’n nunfuɛ’m be sa
3, 4. ?Wafa sɛ yɛ Biblu’n uka e naan y’a wun i wlɛ kɛ ɔ fata kɛ e nian nun e yo ninnge mun kpa ɔ?
3 Nán e kɛn i lele. Sran’m be ‘klo mɛn dilɛ’n’ lele tratra su. I sɔ’n yɛ ɔ ti be cinnjin kpa ɔ. (2 Tim. 3:4) Fɛ mɔ mɛn’n nunfuɛ’m be wlawla sran mun kɛ be di’n, ɔ kwla yo maan e nin Zoova e afiɛn’n saci. (Nya. 21:17) Akoto Pɔlu i fluwa ng’ɔ klɛli ko mannin Rɔmufuɛ mun’n, ɔ wla e fanngan kɛ e nian nun e yo ninnge mun. Fluwa sɔ’n i nun afɔtuɛ’m be su falɛ’n úka e naan y’a kloman fɛ dilɛ’n kɛ mɛn’n nunfuɛ’m be sa.—An kanngan Rɔmfuɛ Mun 12:8 nun.
4 Laa kpa’n, Salomɔn klɛli i kɛ sɛ sran kun yaci fɛ dilɛ’n i akunndan bulɛ trilili naan ɔ fa blɛ bu ninnge cinnjin’m be akunndan’n, ɔ ti ngwlɛlɛ aeliɛ lele. (Aku. 3:4; 7:2-4) I ndɛ yo fɛ afin e nguan ɲanman’n m’ɔ ti tika’n ti’n, ɔ fata kɛ e ‘mian e nyin’ naan y’a kwla fite nun. (Lik 13:24) I sɔ’n ti’n, ɔ fata kɛ ‘sa kwlaa nun e yo sa ng’ɔ ti kpa’n, maan be nian e liɛ’n su yo. Nán e fa yo aɔwi.’ (Tit 2:7) Yɛle kɛ like kwlaa ng’ɔ fata kɛ Klistfuɛ kun yo’n, nán maan e ɲin kpa wie fi su.
5. ?E mɛn dilɛ’n nun’n like benin yɛ ɔ fataman kɛ e fa kan ngowa ɔ?
5 I wie yɛle kɛ junman dilɛ’n nun’n Klistfuɛ’m be nian Zoova nin Zezi be liɛ’n su be yo. Yɛle kɛ be faman junman dilɛ’n be kanman ngowa. (Zan 5:17) I sɔ’n yo maan kpɛ sunman sran’m be yi Klistfuɛ kpa’m be ayɛ. Afin be tu be klun be di junman kpɛkun be kwla lafi be su. Awlobo kpɛn mun yɛ ɔ fata kɛ be tu be klun be di junman kpa naan b’a fa nian be awlobo’n i lika ɔ. Afin sɛ sran kun niɛnmɛn i awlobo’n i lika’n, nn “ɔ ti-man Nyanmiɛn sufuɛ”!—1 Tim. 5:8.
E faman Ɲanmiɛn sulɛ’n e kanman ngowa sanngɛ e di su aklunjuɛ
6. ?Wafa sɛ yɛ e si kɛ ɔ fataman kɛ e fa Zoova i sulɛ’n e kan ngowa ɔ?
6 Zoova liɛ’n ɔ ti cinnjin kɛ e su i titi kɛ ng’ɔ nin i fata’n sa. Like ng’ɔ kle sɔ’n yɛle kɛ i nun mɔ Izraɛlifuɛ’m be te nanti Moizi Mmla’n su’n, sɛ b’a suman Zoova kɛ ng’ɔ nin i fata’n sa’n, kekle dan kpa tɔ be su. (Zoz. 23:12, 13) Klistfuɛ klikli’m be blɛ su’n, ɔ nin i fatali kɛ Klist i sɔnnzɔnfuɛ’m be bo manndrɛn kpa naan sran’m be like klelɛ tɛtɛ nin be aeliɛ tɛtɛ’m b’a saciman Ɲanmiɛn sulɛ kpafuɛ’n. (2 Zan 7-11; Ngl. 2:14-16) Andɛ kusu’n Klistfuɛ kpa’m be faman Ɲanmiɛn sulɛ’n be kanman ngowa wie.—1 Tim. 6:20.
7. ?Wafa sɛ yɛ Pɔlu siesieli i wun naan w’a ko bo jasin fɛ’n niɔn?
7 Jasin fɛ’n i bolɛ’n ti aklunjuɛ like. Sanngɛ sɛ e waan é dí aklunjuɛ titi jasin fɛ’n i bolɛ’n nun’n, ɔ fata kɛ e dun mmua e bu i akunndan kpa naan e siesie e wun ka naan y’a wɔ i bolɛ. Pɔlu yiyili wafa nga ɔ buli be ng’ɔ kle be like’n be akunndan’n i nun. Ɔ klɛli i kɛ: “Sran wafa’n kwlaa bɔ n to be’n, kɛ n ko yo naan m’an de be’n, n yo min wun kɛ be sa, yɛ n yo like kwlaa nga n kwlɛ i yo’n. N yo i kwlaa sɔ’n jasin fɛ’n ti naan like kwlaa nga be nyɛn i jasin fɛ’n ti’n, n liɛ a tran nun wie.” (1 Kor. 9:22, 23) Kɛ Pɔlu uka sran mun mɔ be nin Ɲanmiɛn be afiɛn sɛ’n, ɔ yo i fɛ. Yɛ wafa ng’ɔ kwla niɛn i ndɛ tiefuɛ’m be tinuntinun’n be lika kpa’n, ɔ dun mmua buli i akunndan. I sɔ’n ti’n, ɔ kwla wlali be fanngan kɛ be su Zoova.
8. (a) ?Ɲanmiɛn junman’n i dilɛ’n nun’n, wafa sɛ yɛ ɔ fata kɛ e bu be nga e kle be like’n niɔn? (b) ?Wafa sɛ yɛ sran’m be Biblu’n nun like klelɛ’n kwla yo maan e di aklunjuɛ ɔ?
8 ?Ɲanmiɛn junman i dilɛ m’ɔ yoli cinnjin mannin Pɔlu’n ti’n, ngue yɛ ɔ yoli ɔ? Yɛle kɛ Zoova nin be nga bé tíe i nanwlɛ ndɛ’n be ti’n, ɔ yoli i wun “kanga.” (Rɔm. 12:11; 1 Kor. 9:19) ?Kɛ e fa ajalɛ kɛ é klé sran’m be Ɲanmiɛn Ndɛ’n, maan ɔ yo be awlo lɔ o, annzɛ e aɲia’m be bo o, annzɛ kusu e awlo lɔ Ɲanmiɛn sulɛ’n nun o, e wun i wlɛ kɛ like cinnjin yɛ ɔ fata kɛ e yo e man be ɔ? Atrɛkpa’n, e bu i kɛ sran’m be Biblu’n nun like klelɛ’n ti kɛ trɔ nɔnninnɔnnin wie sa e sa nun. I yo, ɔ ti su kɛ sɛ e waan é yó sɔ’n, ɔ fata kɛ e yaci e bɔbɔ e ninnge wie’m be yolɛ naan e fa blɛ e uka sran uflɛ mun. I sɔ yolɛ’n nin Zezi i ndɛ nga i waan “sɛ a cɛ sran like’n, ɔ ti kpa tra kɛ be cɛ wɔ like’n,” be ti kun. (Yol. 20:35) Sɛ e bɔbɔ e kle sran mun be ti ɲanlɛ atin’n, aklunjuɛ nga é dí’n, like uflɛ fi tomɛn i.
9, 10. (a) ?Kɛ be se kɛ e faman e junman’n i dilɛ’n e kanman ngowa’n, i sɔ kle kɛ e kwlá yiyiman e ɲin su annzɛ e nin sran e boman nzɛmundɛ? An yiyi nun. (b) ?Ngue yɛ ɔ́ úka asɔnun kpɛnngbɛn kun naan sran’m b’a kwla fa be wun b’a mɛntɛn i naan w’a wla be fanngan ɔn?
9 Kɛ be se kɛ e faman e junman’n i dilɛ’n e kanman ngowa’n, ɔ kleman kɛ e kwlá yiyiman e ɲin su annzɛ e nin sran mun e boman nzɛmundɛ. E kwla fa blɛ e kle sran’m be like. Sanngɛ kusu e kwla fa wie e yiyi e ɲin su yɛ e nin sran uflɛ mun e tra janvuɛ. Zezi yɛ ɔ kleli e i sɔ’n i yolɛ kpa’n niɔn. (Lik 5:27-29; Zan 12:1, 2) Asa ekun’n, kɛ be se kɛ e nian nun e yo ninnge mun’n, ɔ kleman kɛ e nin sran e kwlá diman aɔwi kaan sa. Sɛ ɔ ti kɛ Zezi i junman m’ɔ bu i cinnjin’n ti’n i ɲrun’n ti ɲanɲan’n cɛn kwlaa’n, nn sran’m b’a faman be wun b’a mɛntɛnmɛn i. Sanngɛ Zezi i wun yoli ba kanngan mun bɔbɔ be fɛ. (Mar. 10:13-16) ?Wafa sɛ yɛ e kwla yo ninnge’m be nuan su sɛsɛ kɛ Zezi sa ɔ?
10 Aniaan bian kun kannin asɔnun kpɛnngbɛn kun ndɛ kɛ: “Ɔ miɛn i ɲin kpa naan w’a yoman sa tɛ, sanngɛ ɔ seman sran’m be mlɔnmlɔn kɛ saan fii be yo kɛ i sa.” ?Be kwla se kɛ amun ti sɔ wie? Ɔ ti kpa kɛ ninnge nga sran’m be kwlɛ i yo’n yɛ e kunndɛ kɛ be yo ɔ. I wie yɛle kɛ like nga ba’m be kwla yo’n, ɔ nin sa nga be si i’n, sɛ i su yɛ siɛ nin niɛn’m be nian be se be kɛ be yo ninnge wie mun’n, be kwla uka be naan b’a ɔ be ɲrun. I kunngba’n, asɔnun kpɛnngbɛn’m be kwla wla asɔnun’n nunfuɛ’m be fanngan naan be nin Ɲanmiɛn be afiɛn’n w’a sɛ kpa. Kpɛkun ajalɛ trele ng’ɔ fata kɛ be fa’n, be kwla kle be i nuan su like yolɛ. Asa ekun’n, sɛ asɔnun kpɛnngbɛn kun yomɛn i wun kpakpa’n, ɔ́ kwlá wlá sran’m be fanngan kpɛkun bé kwlá fá be wun mɛ́ntɛn i. (Rɔm. 12:3) Aniaan bla kun waan: “N kloman kɛ asɔnun kpɛnngbɛn kun fa like kwlaa di aɔwi. Sanngɛ sɛ ɔ diman aɔwi kaan sa’n, sran su kwlá fɛmɛn i wun mɛntɛnmɛn i.” Kun ekun waan ɔ yo i kɛ asɔnun kpɛnngbɛn wie’m “be yo sro sa. Afin blɛ kwlaa nun’n be ɲrun’n ti ɲanɲan.” Ɲanmiɛn i sufuɛ’m be kwlaa be wun i wlɛ kɛ Zoova m’ɔ ‘di aklunjuɛ’n’ i sulɛ ti aklunjuɛ like. Ɔ fataman kɛ asɔnun kpɛnngbɛn kun sa kunndɛ kɛ ɔ́ kpɛ́ i sɔ aklunjuɛ’n su.—Jue. 104:31.
Maan e di junman asɔnun’n nun
11. ?Sɛ sran kun “klo kɛ” ɔ́ dí junman asɔnun’n nun’n, ngue yɛ ɔ fata kɛ ɔ yo ɔ?
11 Kɛ Pɔlu wlali yasua nga be o asɔnun’n nun’n be fanngan kɛ be mian be ɲin naan be di junman dan ekun asɔnun’n nun’n, nán dunman kunndɛlɛ ti ɔ. Sanngɛ ɔ klɛli i kɛ: ‘Sran ng’ɔ klo kɛ ɔ́ yó asɔnun sunianfuɛ’n, wuun ɔ klo junman b’ɔ ti kpa.’ (1 Tim. 3:1, 4) Klistfuɛ yasua nga be “klo kɛ” bé dí i sɔ junman’n, ɔ fata kɛ be yi nzuɛn nga Ɲanmiɛn klo be’n be nglo naan be fa nian be niaan’m be lika. Ninnge ng’ɔ fata kɛ aniaan yasua kun yo naan b’a sie i asɔnunfuɛ’m be lika nianfuɛ’n be o 1 Timote 3:8-13 nun. Sɛ be yoli aniaan yasua kun i batɛmu w’a di afuɛ kun tra su naan ɔ miɛn i ɲin yia i sɔ ninnge’m be nuan kɛ ng’ɔ nin i fata’n sa’n, be kwla fɛ i sɔ junman’n be mɛn i. Maan e sie i nzɔliɛ kɛ ndɛ mma 8 se weiin kɛ: ‘Asɔnunfuɛ’m be lika nianfuɛ’m be kusu, maan be yo sran nanwlɛfuɛ [nán be fa junman’n be di aɔwi].’
12, 13. Wafa nga aniaan kanngan’m be kwla kunndɛ junman be di i asɔnun’n nun’n, an yiyi nun.
12 ?Amun ti aniaan kun mɔ w’a ɲin, mɔ b’a yo i batɛmu, mɔ Ɲanmiɛn sulɛ’n ti i cinnjin ɔn? Sɛ ɔ ti sɔ’n, Ɲanmiɛn junman fanunfanun nga amun kwla kunndɛ i dilɛ’n be sɔnnin. I kun yɛle kɛ maan amun si jasin fɛ’n i bo kpa. ?Amun ti sran m’ɔ klo kɛ ɔ nin aniaan’m be kwlaa bé bó jasin fɛ’n niɔn? ?Amun su mian amun ɲin naan amun a kle sran kun i Biblu’n nun like? Sɛ amun nian ajalɛ nga be kle e aɲia’m be bo’n su’n, amún sí like klé kpa. Asa ekun’n, be nga be su suan Zoova i atin’n, wafa nga be wun fa yo be’n, amún kwlá wún i wlɛ. Kpɛkun kɛ be nga amun kle be like’n bé wún kɛ ɔ fata kɛ be fa ajalɛ wie mun’n, amún sí wafa nga amun kwla tra be awlɛn be uka be amanniɛn su naan b’a nanti Biblu’n nun mmla’m be su’n.
13 Aniaan kanngan mun kusu, amun kwla uka kpɛnngbɛn nga be o asɔnun’n nun’n. Yɛle kɛ like kwlaa nga bé yó’n amun kwla se be kɛ amún úka be. Asa ekun’n, Ɲanmiɛn Sielɛ Sua’n i nun yɛinyɛin yolɛ’n kwla yo amun cinnjin. Ɔ maan amun kwla uka be nga be yo naan i nun w’a yo sanwun’n. Amun klun nga amun tu i kɛ amún dí i sɔ junman mun’n, ɔ kle kɛ Ɲanmiɛn junman’n i dilɛ’n ti amun cinnjin. Kɛ Timote sa’n, amun kwla sɔnnzɔn wafa nga amun kwla nian asɔnun’n i lika kpa’n.—An kanngan Filipfuɛ Mun 2:19-22 nun.
14. ?Wafa sɛ yɛ be kwla “sa” aniaan yasua kanngan mun “nian” ka naan b’a man be junman asɔnun’n nun ɔn?
14 Asɔnun’n nun’n, gbanflɛn wie’m be mian be ɲin naan b’a buman “like nga gbanflɛn konvi sɔ i’n i akunndan.” Yɛ be ‘mian be nyin be yo sa ng’ɔ ti kpa’n, be lafi Nyanmiɛn su, be klo Nyanmiɛn nin sran, yɛ be nuan sɛ be wun.’ Asɔnun kpɛnngbɛn mun, maan amun nian nun be man i sɔfuɛ’m be junman. (2 Tim. 2:22) Sɛ amun man be junman asɔnun’n nun’n, amun kwla “sa be nian” sɛ be kwla junman cinnjin uflɛ di o. Kɛ ɔ yo sɔ’n, ‘sran’n kwlaa bé wún kɛ be su yo kpa tra laa’n.’—1 Tim. 3:10; 4:15.
Asɔnun’n nun nin awlobo’n nun’n wafa nga e kwla nian nun e yo ninnge mun’n
15. ?Kɛ nga 1 Timote 5:1, 2 fa kle’n sa’n, wafa sɛ yɛ e kwla kle kɛ e bu e wiengu’m be sran ɔn?
15 Kɛ be se kɛ e nian nun e yo ninnge mun’n, i wie yɛlɛ kɛ e bu aniaan’m be sran. Afɔtuɛ nga Pɔlu mannin Timote’n i nun’n, Pɔlu kannin e ɲin m’ɔ fata kɛ ɔ yi sran’n i ndɛ. (An kanngan 1 Timote 5:1, 2 nun.) Sɛ e ti yasua’n, e nin bla mun e nantilɛ’n nun’n, annzɛ sɛ e ti bla’n, e nin yasua mun e nantilɛ’n nun’n, yɛ ɔ fata kɛ e yi aɲinyiɛ’n i nglo kpa ɔ. Wafa nga Zɔbu fa buli bla’m be sran’n, i li wafa ng’ɔ fa buli i yi i sran’n ɔ yo ɲɛnmɛn. Ɔ maan e kwla nian su. Ɔ miɛnnin i ɲin kpa naan w’a kpɛman bla uflɛ i kannglɛ. (Zɔb 31:1) Sɛ e bu e niaan yasua annzɛ bla kun i sran’n, e nin i e su traman ndalie annzɛ e su yoman like wie m’ɔ kwla yo naan aniaan sɔ’n w’a wunmɛn i wun fɛ’n. Kɛ sran nɲɔn be su suan be wun silɛ naan b’a ja be wun’n, ɔ ti cinnjin kpa wie kɛ be bu be wiengu sran. Klistfuɛ ng’ɔ ti kpa’n, ɔ fɛmɛn i wiengu toman mma.—Nya. 12:22.
16. ?Wafa nga mɛn’n nunfuɛ wie’m be bu awlobo kpɛn mun’n, ɔ nin wafa nga Biblu’n kan junman ng’ɔ fata kɛ be di’n i ndɛ’n, be ngbaciɛ’n yɛle benin?
16 Asa kusu’n, junman nga Ɲanmiɛn mannin e kɛ e di i awlo’n nun’n, ɔ fata kɛ ɔ yo e cinnjin. Awlobo nun junman ng’ɔ fata kɛ awlobo kpɛn’n kun di’n, Satan i mɛn’n nunfuɛ’m be yo i finfin. Ninnge kɛ flimu sa’m be nun’n, be kle kɛ ɔ fataman kɛ be ɲin yi yasua nga be ti awlobo kpɛn’n. Sanngɛ Biblu’n man yasua ng’ɔ le bla’n i junman cinnjin kpa kun. Yɛle kɛ ɔ ti “bla i su kpɛn.”—Efɛ. 5:23; 1 Kor. 11:3.
17. Wafa nga awlobofuɛ’m be Ɲanmiɛn sulɛ’n kwla kle kɛ e faman junman ng’ɔ fata kɛ e di’n e diman aɔwi’n, an yiyi nun.
17 Yasua kun kwla niɛn i awlobofuɛ’m be lika. Sanngɛ sɛ ɔ faman Ɲanmiɛn i mmla mun kleman be’n, nn ɔ nantiman ngwlɛlɛ su. (Mml. 6:6, 7) I sɔ’n ti’n, 1 Timote 3:4 se kɛ sɛ sran kun ti awlobo kpɛn naan ɔ klo kɛ ɔ́ dí junman uflɛ ekun asɔnun’n nun’n, ɔ fata kɛ ɔ yo sran m’ɔ “si i bɔbɔ i awlo’n su nian, bɔ i mma’m be bu i sran be nyin yi i kpa” ɔ. Ɔ maan sɛ e ti awlobo kpɛn’n, maan e usa e wun kɛ: ‘?N sieli blɛ kun naan e nin min awlobofuɛ mun y’a fa su Ɲanmiɛn awlo lɔ titi?’ Ɔ ju wie’n, Klistfuɛ bla wie mun yɛ be srɛ be wun mun kɛ be fa ajalɛ Ɲanmiɛn i su like suanlɛ’n nun awlo lɔ ɔ. Sanngɛ ɔ fata kɛ be wun’m be tinuntinun’n, junman sɔ’n lo be kpa. I yo, ɔ fata kɛ Klistfuɛ bla’m be suan awlobofuɛ’m be Ɲanmiɛn sulɛ’n i bo, naan be uka be wun mun naan w’a yo ye.
18. ?Wafa sɛ yɛ ba kanngan’m be kwla nian nun be yo ninnge mun ɔn?
18 Ba’m be kusu be wla be fanngan wie kɛ nán be fa ninnge nga be kwla uka be naan b’a su Zoova kpa be ɲrun lɔ’n be di aɔwi. (Aku. 12:1) Sɛ ba kanngan’m be suan junman dilɛ kpa awlo lɔ naan like nga be kwlɛ i yo’n i nuan junman yɛ be di’n, ɔ timan tɛ. (Ngw. 3:27) I nun mɔ famiɛn Davidi te yo bakan’n, ɔ sɔnnzɔnnin bua kankanlɛ. Asa ekun’n, ɔ sɔnnzɔnnin miziki bolɛ nin jue klɛlɛ. I sɔ ninnge m’ɔ suannin be’n be yoli maan ɔ kwla ko dili junman Izraɛli famiɛn’n i awlo lɔ. (1 Sam. 16:11, 12, 18-21) Ɔ ti weiin kɛ Davidi i kaan nun’n, ɔ si ngowa kan, sanngɛ kusu ɔ suannin ninnge wie mun mɔ i sin’n, ɔ fa manmannin Zoova ɔ. Kɛ m’ɔ si bua kankan’n ti’n, i sɔ’n ukɛli i naan w’a kwla trɛ i awlɛn w’a sie Izraɛli nvle’n. ?Ba kanngan mun, ninnge fanunfanun nga be kwla uka amun cɛn wie lele naan amun a su amun Yifuɛ’n, naan amun a kwla di junman wie mun’n, be nun nɲɛ yɛ amun su suan ɔn?
Maan e akunndan’n yo sɛsɛ
19, 20. ?E mɛn dilɛ’n nin Ɲanmiɛn sulɛ’n su akunndan sɛsɛ benin yɛ y’a ta nda kɛ é bú ɔ?
19 E ngba e kwla mian e ɲin naan y’a yoman sran m’ɔ boman nzɛmundɛ kaan sa ɔ. E kunndɛman kɛ é ‘bú e wun sran kpa’ ngboko. (Aku. 7:16) Ɔ ju wie’n, kɛ lika’n jran kpa awlo lɔ annzɛ junman su lɔ’n, annzɛ kɛ e nin e niaan Klistfuɛ mun e o’n e kwla e yi aɲinsuɛ kan. Sɛ e yo sɔ’n, ɔ kwla yo maan lika’n yo kpa. Ɔ fata kɛ awlobo kun i nunfuɛ’m be nian be wun naan b’a buman be wiengu fɔ ngboko. I liɛ’n awlo’n nun yó fɔun kpɛkun i nun tranlɛ’n ɔ́ yó fɛ titi. Asɔnun’n nun’n, e kwlakwla e kwla bo nzɛmundɛ likawlɛ. Kpɛkun e kwla yo maan e yalɛ kokolɛ’n nin e like klelɛ’n be wla e niaan be fanngan yɛ be cici be wla.—2 Kor. 13:10; Efɛ. 4:29.
20 Mɛn nga e o nun yɛ’n nun’n, sran’m be fa Zoova i mmla’m be to mma. Sanngɛ Zoova i sufuɛ’m be liɛ’n, ɔ ti cinnjin kpa man be kɛ be ɲin yi Ɲanmiɛn naan nán be kpɔci i le. Kɛ e o sran kpanngban sɔ mɔ be faman Zoova i sulɛ’n be ‘yoman aɔwi’n’ be nun’n, nanwlɛ ɔ yo e fɛ! Maan e ta nda kɛ e su faman mɛn dilɛ’n nin Ɲanmiɛn sulɛ’n e yoman aɔwi le.
?Amún tɛ́ su sɛ?
• ?Ngue ti yɛ ɔ fata kɛ e kpalo be ɲin su yiyilɛ akunndan mɔ w’a tru mɛn’n nun kpokpaa’n niɔn?
• ?Wafa sɛ yɛ e faman Ɲanmiɛn sulɛ’n e kanman ngowa sanngɛ e di su aklunjuɛ ɔ?
• ?Wafa sɛ yɛ junman dilɛ’n i su akunndan nga e bu’n, ɔ kle kɛ ɔ ti e cinnjin annzɛ ɔ timan e cinnjin ɔn?
• Like nga ti yɛ e niaan nin e awlobofuɛ’m be sran bulɛ’n timan aɔwi like’n, an yiyi nun.
[Kosan mun]
[Foto mun, bue 16]
Ɔ fata kɛ yasua ng’ɔ le bla’n ɔ niɛn i awlobofuɛ’m be lika naan ɔ kle be Ɲanmiɛn su like.