Magin Lubos na Seryoso sa Paglilingkod ki Jehova
Magin Lubos na Seryoso sa Paglilingkod ki Jehova
“Ano man na seryosong bagay, . . . padagos na horophoropon an mga bagay na ini.”—FIL. 4:8.
1, 2. Ano an dahelan ta an dakol sa kinaban na ini bakong seryoso an pagmansay sa buhay, na nagbabangon nin anong mga hapot?
AN PANAHON na kinabubuhayan niato saro sa pinakamasakit asin pinakamakaturotristeng mga panahon sa kasaysayan nin tawo. Para sa mga mayo nin marigon na espirituwal na pundasyon, tibaad haros imposible na makatagal sa ‘delikadong mga panahon na ini na masakit pakibagayan.’ (2 Tim. 3:1-5) Sa saindang sadiri sana sinda nagkukua nin kosog tanganing makaya an buhay sa kada aldaw, asin limitado sana an kapangganahan ninda. Tanganing daing gayo magparahadit sa buhay, dakol an minahanap pirme nin bagong mapaglilibangan.
2 Tanganing makaya an mga tension sa buhay, parateng ineenot nin mga tawo an mga kaalingan sa buhay. Kun bakong maingat an mga Kristiano, madali sindang madadara kan paaging ini nin pamumuhay. Paano niato malilikayan iyan? Kaipuhan daw na magin seryoso kita sa gabos na panahon? Paano niato babalansehon an mga kaalingan asin an mga paninimbagan? Anong mga prinsipyo sa Kasuratan an maninigong magin giya niato, tanganing minsan ngani seryoso kita sa buhay, dai man kita sobra kaseryoso?
Pagigin Seryoso sa Sarong Kinaban na Namomoot sa Kaalingan
3, 4. Paano kita tinatabangan kan Kasuratan na pahalagahan an pangangaipo na magin seryoso?
3 Daing duwa-duwa na an kinaban na ini nagtatao nin dai maninigong importansia sa ‘pagkamoot sa mga kaalingan.’ (2 Tim. 3:4) An pagpahalaga kaiyan sa pag-oroogma puedeng makaraot sa espirituwalidad niato. (Tal. 21:17) Huli kaini, may marahay na dahelan na sa mga surat ni apostol Pablo ki Timoteo asin Tito may konseho man mapadapit sa pagigin seryoso. An pag-aplikar kaiyan makakatabang sa sato na dai maimpluwensiahan kan bakong seryosong pagmansay kan kinaban dapit sa buhay.—Basahon an 1 Timoteo 2:1, 2; Tito 2:2-8.
4 Mga siglo bago kaini, si Salomon nagsurat manongod sa kahalagahan nin pagpagilid kun beses sa mga kaalingan tanganing asikasohon an seryosong mga bagay sa buhay. (Ecl. 3:4; 7:2-4) Iyo, huli sa kahalipotan kan buhay, kaipuhan niatong ‘maghingoa nin maigot’ tanganing makamit an kaligtasan. (Luc. 13:24) Sa katuyohan na iyan, kaipuhan niatong padagos na horophoropon an gabos na “seryosong bagay.” (Fil. 4:8, 9) Nangangahulogan iyan nin pagtao nin maingat na atension sa kada aspekto kan Kristianong pamumuhay.
5. Ano an sarong aspekto nin buhay na maninigo niatong seryosohon?
5 Halimbawa, bilang pag-arog ki Jehova asin Jesus, sineseryoso kan mga Kristiano an saindang paninimbagan na magin mahigos. (Juan 5:17) Bilang resulta, parate sindang inoomaw huli sa saindang marahay na ugale sa trabaho asin pagigin mapagtitiwalaan. An mga payo nin pamilya nangorognang interesado sa maigot na pagtrabaho tanganing masustentohan an saindang pamilya. Total, an dai pagsustento sa sadiring pamilya katumbas nin ‘pagpainda ki Jehova’!—1 Tim. 5:8, nota sa ibaba.
Seryoso Pero Magayagayang Pagmansay sa Satong Pagsamba
6. Paano niato naaraman na maninigo niatong seryosohon an satong pagsamba ki Jehova?
6 Para ki Jehova, dapat na pirmeng ibilang na seryoso an tunay na pagsamba. Bilang halimbawa, sa irarom kan Ley ni Moises, an mga Israelita nag-aagi nin maraoton na mga epekto kun minatalikod sinda sa pagsamba ki Jehova. (Jos. 23:12, 13) Kan enot na siglo C.E., an mga parasunod ni Cristo kinaipuhan na magmaigot nanggad tanganing an tunay na pagsamba dai maapektaran nin salang mga katokdoan asin atitud. (2 Juan 7-11; Kap. 2:14-16) Ngonyan, danay na sineseryoso kan tunay na mga Kristiano an pagsamba ninda.—1 Tim. 6:20.
7. Paano si Pablo nag-andam para sa saiyang ministeryo?
7 An satong ministeryo sa langtad sarong gikanan nin kagayagayahan. Minsan siring, tanganing magdanay kitang magayagaya sa ministeryo, kaipuhan niatong seryosong pag-isipan iyan asin patienot na mag-andam para dian. Ipinaliwanag ni Pablo kun paano nia kinonsiderar an mga tinotokdoan nia. Sia nagsurat: “Ako nagin gabos na bagay sa gabos na klase nin tawo, tanganing sa gabos na paagi ikaligtas ko an nagkapira. Alagad ta ginigibo ko an gabos na bagay para sa maogmang bareta, tanganing ikapaabot ko iyan sa iba.” (1 Cor. 9:22, 23) Naogma si Pablo sa pagtabang sa mga tawo sa espirituwal, asin seryoso niang pinag-isipan kun paano nia ikakatao an espesipikong mga pangangaipo kan mga nagdadangog sa saiya. Huli kaini, nakapagtao sia sa sainda nin pamparigon sa boot asin nin dahelan na sambahon si Jehova.
8. (a) Ano an maninigong magin saboot niato sa satong mga tinotokdoan sa ministeryo? (b) Paano an pagkondukta nin pag-adal sa Biblia makakatao nin kagayagayahan sa ministeryo?
8 Gurano kaseryoso si Pablo manongod sa saiyang ministeryo? Sia andam na “magpaoripon” ki Jehova pati na sa mga mahinanyog sa mensahe kan katotoohan. (Roma 12:11; 1 Cor. 9:19) Kun ginigibo niato an paninimbagan na itokdo sa mga tawo an Tataramon nin Dios—baga man sa panahon nin pag-adal sa Biblia, Kristianong pagtiripon, o Pampamilyang Pagsamba—iniisip daw niato an satong paninimbagan sa satong mga tinotokdoan? Tibaad iniisip niato na an pagkondukta nin regular na pag-adal sa Biblia sobra nang pagabat sa sato. Totoo, sa parate nangangahulogan iyan na kaipuhan niatong gamiton sa pagtabang sa iba an panahon niato para sa personal na mga gibohon. Alagad bako daw na kaoyon iyan kan mga tataramon ni Jesus na “igwang orog na kaogmahan sa pagtao kisa sa pag-ako”? (Gibo 20:35) An personal na pagtokdo sa iba kan dalan pasiring sa kaligtasan matao sa sato nin kaogmahan na dai ikakakomparar sa ano man na iba pang aktibidad.
9, 10. (a) An pagigin seryoso daw nangangahulogan na dai na kita puedeng magrelaks asin makipag-oroogma? Ipaliwanag. (b) Ano an makakatabang sa sarong magurang sa kongregasyon na magin nakakaparigon asin madaling dolokon?
9 An pagigin seryoso dai nangangahulogan na dai na kita puedeng magrelaks asin mag-ogma kaiba an ibang tawo. Itinao ni Jesus an perpektong halimbawa nin pagtao nin panahon bako sanang tanganing magtokdo kundi magrelaks man asin magpatalubo nin marahay na relasyon sa iba. (Luc. 5:27-29; Juan 12:1,2) An pagigin seryoso dai nangangahulogan na maninigong pirmeng maheling sa sato an pagkaestrikto. Kun si Jesus estriktohon asin sobra kaseryoso, seguradong dai kutana naparani sa saiya an mga tawo. Dawa an mga aki pamugtak an boot sa saiya. (Mar. 10:13-16) Paano niato maaarog an pagigin timbang ni Jesus?
10 Sa pagpanongod sa sarong magurang sa kongregasyon, an sarong tugang na lalaki nagsabi, “Halangkawon an pamantayan nia para sa saiyang sadiri alagad nungka siang nag-aasa nin pagkaperpekto sa iba.” Iyan daw an masasabi dapit sa saindo? Tama sana na magkaigwa nin rasonableng mga inaasahan sa iba. Halimbawa, naghihimate nanggad an mga aki kun an mga magurang nagbubugtak nin rasonableng mga pasohan asin tinatabangan an mga aki na maabot iyan. Siring man, puedeng dagkahon kan kamagurangan an mga indibiduwal sa kongregasyon na tumalubo sa espirituwal asin puede sindang magtao sa mga ini nin espesipikong mga suhestion kun paano iyan gigibohon. Apuera kaini, kun an sarong magurang sa kongregasyon timbang an pagmansay sa sadiri, sia magigin nakakaparigon asin madaling dolokon. (Roma 12:3) An sarong tugang na babae nagsabi: “Habo kong ginigibong suba nin magurang sa kongregasyon an gabos na bagay. Alagad kun pirme siang seryoso, masakit dumolok sa saiya.” An saro pa nagsabi na sa pagmate nia an nagkapirang magurang sa kongregasyon “puedeng magin nakakatakot na marhay huli ta sobra sinda kaseryoso.” Dai noarin man gugustohon kan kamagurangan na mainaan an kagayagayahan na maninigong yaon sa gabos na nagsasamba ki Jehova, an “maogmang Dios.”—1 Tim. 1:11.
Pag-ako nin Paninimbagan sa Kongregasyon
11. Ano an boot sabihon kan ‘naghihingoa’ sa kongregasyon?
11 Kan dagkahon ni Pablo an mga lalaki sa kongregasyon na magmaigot na makualipikar sa mas dakulang paninimbagan, an intension nia bako na dagkahon an siisay man na panigoan an personal na ambisyon. Imbes, sia nagsurat: “Kun an siisay man na lalaki naghihingoang maabot an katongdan nin paraataman, sia nagmamawot nin marahay na gibo.” (1 Tim. 3:1, 4) An terminong ‘naghihingoa’ nangangahulogan na kaipuhan na pataluboon nin Kristianong mga lalaki an makosog na pagmawot na magmaigot na magkaigwa kan espirituwal na mga kualidad na kaipuhan tanganing mapaglingkodan an saindang mga tugang. Kun an sarong tugang na lalaki kisiera sarong taon nang bautisado asin naaabot na nia an sono sa Kasuratan na mga kualipikasyon para sa ministeryal na mga lingkod na yaon sa 1 Timoteo 3:8-13, sia puede nang irekomendar sa katongdan. Mangnoha na an bersikulo 8 espesipikong nagsabi: “An ministeryal na mga lingkod maninigo man na magin seryoso.”
12, 13. Iladawan kun paano an hoben na mga tugang na lalaki puedeng maghingoang umabot nin paninimbagan.
12 Ika daw sarong seryosong bautisadong lalaki na nasa huring mga taon nin pagigin tin-edyer? May nagkapirang paagi na puede kang maghingoang umabot nin paninimbagan. An saro iyo an pagpaoswag kan saimong personal na pakikikabtang sa ministeryo sa langtad. Naoogma ka daw na maglingkod sa langtad kaiba an mga tugang ano man an saindang edad? Nagmamaigot ka daw na makahanap nin matotokdoan mo sa Biblia? Kun an saimong pagkondukta nin pag-adal sa Biblia iinooyon mo sa mga suhestion sa satong Kristianong mga pagtiripon, mapapaoswag mo an saimong kakayahan sa pagtokdo. Apuera dian, makakanood kang magkaigwa nin empatiya sa saro na nakakanood kan mga dalan ni Jehova. Kun naheheling na kan inaadalan mo sa Biblia an pangangaipo na gumibo nin mga pagbabago, manonodan mong magin pasensioso asin mataktika sa pagtabang sa saiya na iaplikar an mga prinsipyo sa Biblia.
13 Kamong mga hoben na tugang na lalaki, puede kamong magpresentar na tumabang sa mga gurang na sa kongregasyon sa ano man na posibleng paagi. Puede man kamong magpaheling nin interes sa itsura kan Kingdom Hall, na nagtatabang tanganing pirme iyan na malinig asin areglado. Kun kamo nagpepresentar na tumabang sa ano man na magigibo nindo, patunay iyan na seryoso kamo sa saindong ministeryo. Arog ni Timoteo, puede nindong manodan na tunay na magmakolog sa pangangaipo kan kongregasyon.—Basahon an Filipos 2:19-22.
14. Paano an hoben na mga lalaki ‘mababalo kun baga angay’ nang maglingkod sa kongregasyon?
14 Kamong kamagurangan, magin mapagrisa kun paano magagamit an hoben na mga lalaki na naghihingoang ‘dumulag sa mga mawot na konektado sa pagkahoben’ asin nagmamaigot na isagibo an “katanosan, pagtubod, pagkamoot, katoninongan,” pati na an iba pang mararahay na kualidad. (2 Tim. 2:22) Paagi sa pagtao sa sainda nin mga gigibohon sa kongregasyon, sinda ‘mababalo kun baga angay’ nang tawan nin paninimbagan, tanganing an saindang “pag-oswag maheling kan gabos na tawo.”—1 Tim. 3:10; 4:15.
Pagigin Seryoso sa Kongregasyon Asin Pamilya
15. Segun sa 1 Timoteo 5:1, 2, paano niato ikakapaheling na seryoso niatong minamansay an iba?
15 Kaiba sa pagigin seryoso an pagtao nin dignidad sa satong mga tugang. Sa pagkonseho ki Timoteo, tinawan ni Pablo nin atension an pangangaipo na magalang na mansayon an iba. (Basahon an 1 Timoteo 5:1, 2.) Nangorognang mahalaga ini sa pagtratar sa mga bakong kasekso. Maninigong arogon an halimbawa ni Job sa pagtao nin dignidad sa mga babae, nangorogna sa saiyang agom. Naghingoa nanggad sia na dai magparaheling na may seksuwal na pagmawot sa ibang babae. (Job 31:1) Kun kita seryoso sa satong mga tugang, dai kita makikigitilan sa sainda o magibo nin ano man na maresulta sa pagigin bakong komportable sa sato nin sarong tugang. An pagtao nin dignidad sa iba nangorognang mahalaga sa mga magkailusyon. Nungkang kakawatan nin seryosong Kristiano an emosyon nin bakong kasekso.—Tal. 12:22.
16. Paano an pagmansay kan nagkapira sa kinaban dapit sa papel kan agom na lalaki asin ama napapalaen sa paglaladawan dian kan Biblia?
16 Kaipuhan man kitang mag-ingat tanganing mapagdanay an seryosong pagmansay sa itinao sa sato nin Dios na papel sa laog kan pamilya. Binabasang-basang kan kinaban ni Satanas an papel kan agom na lalaki asin ama. An industriya nin aling-alingan nawiwiling ibilang an payo nin pamilya na maninigo sana sa pag-olog-olog asin dai paggalang. Minsan siring, an Kasuratan nagtatao nin dakulang paninimbagan sa agom na lalaki, na inaasignaran bilang “payo kan saiyang agom na babae.”—Efe. 5:23; 1 Cor. 11:3.
17. Ipaliwanag kun paanong an pakikikabtang niato sa pampamilyang pagsamba puedeng magpaheling na seryoso kita sa satong mga paninimbagan.
17 An sarong agom na lalaki tibaad nagsusustento sa pamilya nia. Alagad kun dai sia nagtatao nin espirituwal na paggiya, dai nia ikinakapaheling an pakamansay asin kadonongan. (Deut. 6:6, 7) Huli kaini, an 1 Timoteo 3:4 nagsasabi na kun ika an payo nin pamilya asin naghihingoang umabot nin dagdag na mga pribilehio sa kongregasyon, dapat saro kang lalaki na “nangengenot sa saiyang kasararo sa harong sa marahayon na paagi, na nagpapasakop an mga aki na may lubos na pagkaseryoso.” Mapadapit digdi, hapota an saimong sadiri, ‘Regular daw akong nagtatagama nin panahon para sa samong pampamilyang pagsamba?’ May mga Kristiana na haros kaipuhan pang makimaherak sa agom ninda na mangenot sa espirituwal. An kada agom na lalaki maninigong siyasaton an saiya mismong pagmansay sa paninimbagan na ini. Siempre, an sarong Kristianang agom maninigong nagsusuportar sa areglo na Pampamilyang Pagsamba asin nakikipagtabangan sa agom nia tanganing magin mapanggana iyan.
18. Paano puedeng manodan nin mga aki na magin seryoso?
18 An mga aki dinadagka man na magseryoso sa buhay. (Ecl. 12:1) Mayong maraot kun makakanood an mga aki na magtrabaho nin maigot, na nag-aasikaso nin mga gibohon sa harong na tama sana sa saindang edad asin kakayahan. (Lam. 3:27) Kan si Hadeng David aki pa, nanodan niang magin marahay na pastor. Nanodan man nia na magin musikero asin kompositor—mga abilidad na huli kaiyan nakapaglingkod sia sa tagapamahala sa Israel. (1 Sam. 16:11, 12, 18-21) Daing duda, bilang solterito, si David mahilig magkawat, alagad nakanood man sia nin kapakipakinabang na mga abilidad na ginamit nia kan huri tanganing omawon si Jehova. An mga abilidad nia bilang pastor nakatabang sa saiya na pasensiosong pangenotan an nasyon nin Israel. Kamong mga hoben, naghihingoa daw kamong makanood nin nagkapirang kapakipakinabang na abilidad na makakatabang sa saindo na mapaglingkodan an saindong Kaglalang asin maandam sa saindo para sa maabot pang mga paninimbagan?
Magin Timbang
19, 20. Anong timbang na atitud mapadapit sa saimong sadiri asin pagsamba an determinado mong pagdanayon?
19 Kita gabos puedeng magmaigot na mapagdanay na timbang an satong pagmansay sa sadiri—na dai nagtatao nin sobrang importansia sa sadiri. Habo niatong magin “labi-labi kamatanos.” (Ecl. 7:16) An paminsanminsan na pagsuba makakatabang kun nakakaistres an mga kamugtakan, baga man sa harong, sa trabaho, o kun kaolay an satong Kristianong mga tugang. An mga miembro nin pamilya maninigong mag-ingat na dai magin sobra kamatinuyaw tanganing dai ninda maraot an ligtas na lugar nin katoninongan na maninigo sa sarong harong. Sa kongregasyon, an gabos puedeng makanood na maogmang makiibaiba, na pinapagdadanay na nakakapakosog asin positibo an pag-orolay asin an pagtotokdo niato.—2 Cor. 13:10; Efe. 4:29.
20 Nabubuhay kita sa kinaban na dai nagpapahalaga ki Jehova o sa mga ley nia. Sa kabaliktaran, an banwaan ni Jehova interesadong marhay sa pagkuyog asin kaimbodan ninda sa saindang Dios. Dakulang kaogmahan nanggad na magin kabtang kan siring kadakulang kasararoan nin mga tawo “na may lubos na pagkaseryoso” sa pagsamba ki Jehova! Magin determinado logod kita na pagdanayon an seryosong pagmansay sa satong buhay asin pagsamba.
Ano an Isisimbag Nindo?
• Taano ta maninigo kitang dai magpaimpluwensia sa bakong seryosong pagmansay kan kinaban dapit sa buhay?
• Paano kita puedeng magin magayagaya pero seryoso sa satong ministeryo?
• Paano an satong pagmansay dapit sa pag-ako nin paninimbagan nagpapaheling kun baga seryoso kita o dai?
• Ipaliwanag kun taano ta seryosong bagay an pagtao nin dignidad sa satong mga tugang asin kapamilya.
[Mga Hapot Para sa Pag-adal]
[Mga Ritrato sa pahina 12]
Dapat na itao kan agom na lalaki an materyal patin espirituwal na pangangaipo kan pamilya nia
