Ñaneakãguapýkena jaservívo Ñandejárape

‘Pejepyʼamongetákena opa mbaʼe iñimportántevare, [...] pesegíkena pejepyʼamongeta koʼã mbaʼére.’ (FILI. 4:8, NM)

1, 2. Mbaʼéicha rupípa heta hénte oiko opaichagua vyʼarã rapykuéri, ha mbaʼépa iporã ñañeporandu?

KOʼÁG̃A rupi yvyporakuéra ohasa asyeterei, ha opa mbaʼe ijetuʼueteve yma guarégui. Heʼi voi ningo la Biblia ‘pe ára pahápe heta ojehasa asytaha’. Ha umi hénte ndojeroviáiva Ñandejárare ndoikuaái mbaʼéichapa ombohováita ko situasión (2 Tim. 3:1-5). Oñehaʼãmbaitéramo jepe ogueropuʼaka umi provlemaita, apenaite oho hese hikuái. Upévare heta oĩ oikóva opaichagua vyʼarã rapykuéri hesarái hag̃ua iprovlemakuéragui.

² Heta hénte ojapose oimeraẽ mbaʼe jahecha ndahesaráiripa umi mbaʼe ojopyetereívagui chupekuéra. Ha ñande kristiáno nañañatendéiramo, ikatu avei jaiko upéicha. Upévare iporã ñañeporandu: “Mbaʼépa ikatu ajapo ani hag̃ua haʼa ko ñuhãme? Ndovaléi voi piko sapyʼami jepe ajediverti? Mbaʼéichapa ikatu ajapo umi tembiapo iñimportánteva ha añemotiémpo avei avyʼa hag̃ua? Mbaʼéichapa la Biblia ikatu chepytyvõ cheakãguapy hag̃ua ajapóvo umi mbaʼe iñimportánteva ha ani ahasa la rrája?”.

Ñaneakãguapýkena ko múndo oikóramo jepe vyʼarã rapykuéri

3, 4. Mbaʼéichapa la Biblia ohechauka ñandéve iñimportanteha ñaneakãguapy?

³ Jahechaháicha, ko múndope henyhẽ umi hénte ‘ojapóva chupekuéra ombovyʼávante’ (2 Tim. 3:4). Ha koʼã mbaʼe ikatuhína ñanemomombyry Jehovágui (Pro. 21:17). Upévare apóstol Pablo oñemoñeʼẽrõ guare Timoteo ha Títope heʼi chupekuéra iñakãguapyvaʼerãha, ha upéva ñanepytyvõta ñandéve avei ani hag̃ua jaiko ko múndo añáme ojeikoháicha (elee 1 Timoteo 2:1, 2 ha Tito 2:2-8).

⁴ Yma Salomón heʼimavaʼekue ñamboykevaʼerãha umi vyʼarã tekotevẽramo, ikatu hag̃uáicha jajapo umi mbaʼe iñimportantevéva (Ecl. 3:4; 7:2-4). Jaikuaa ningo ñande rekove mbykyetereiha, ha ñañehaʼãmbaitevaʼerãha jajesalva hag̃ua (Luc. 13:24). Upévare tekotevẽ ñañemotiémpo jajapo hag̃ua umi mbaʼe iñimportantevéva ha ñañatende porã opa mbaʼe jajapótavare ñande rekovépe (Fili. 4:8, 9).

5. Mbaʼépa ojapomantevaʼerã opavave kristiáno?

⁵ Jehová ha Jesús ningo ombaʼapo kyreʼỹ, upévare umi kristiáno tee ojapo avei upéicha (Juan 5:17). Pyʼỹi ojeguerohory chupekuéra itravahohápe naimondái ha iguápo rupi. Haʼekuéra oikuaa porã umi nomanteneséiva ifamíliape ojoguaha umi ‘omboykévape Jehovápe’, upéicha rupi tuvakuéra koʼýte ombaʼapo jejopy vaʼerã itravahohápe (1 Tim. 5:8, nóta).

Ñaneakãguapy ha javyʼa jaservívo Ñandejárape

6. Mbaʼérepa jaʼekuaa Jehová oipotaha ñaneakãguapy ñamombaʼeguasúvo chupe?

⁶ Ymaite guivéma Jehová oipota isiervokuéra iñakãguapy omombaʼeguasúvo chupe. Upévare umi isrraelíta ndojapóirõ guare pe léi mosáika heʼíva, oheja chupekuéra ohasa asy hembiapo vaikuére (Jos. 23:12, 13). Upéi síglo primérope ojerure kristianokuérape oñatende hag̃ua ani ogueraha vai chupekuéra  rrelihión japu omboʼéva ha umi mbaʼe vai ojapóva umi hénte aña (2 Juan 7-11; Rev. 2:14-16). Koʼág̃a rupi Ñandejára ojerure avei ñandéve ñaneakãguapy hag̃ua ñamombaʼeguasúvo Chupe (1 Tim. 6:20).

7. Mbaʼépa ojapovaʼekue Pablo omombeʼu hag̃ua pe marandu porã?

⁷ Javyʼaiterei ningo ñamombeʼúramo ñande rapichakuérape pe marandu porã. Ha akóinte javyʼaséramo upéicha, tekotevẽ ñamombaʼe upe tembiapo oñemeʼẽva ñandéve ha jajeprepara porã. Jajapovaʼerã apóstol Pablo ojapo haguéicha ha jahechakuaa mbaʼeichagua héntepepa ñamboʼéta. Haʼe heʼi voi: ‘Aiko opáichavo rei jahecha naipytyvõipa peteĩme jepe. Ajapo koʼã mbaʼe pe marandu porã rehehápe, aikuaauka hag̃ua che rapichakuérape avei’ (1 Cor. 9:22, 23, JMP). Pablo ovyʼaitereivaʼekue oipytyvõ haguére hapichakuérape oikuaa hag̃ua Ñandejárape, ha ojepyʼamongeta avei ikatu hag̃uáicha ohechakuaa mbaʼépa oikotevẽ hikuái. Upéicha omokyreʼỹ chupekuéra oservi hag̃ua Jehovápe.

8. a) Mbaʼe rresponsavilidápa jaguereko ñaporomboʼévo? b) Mbaʼérepa javyʼaite ñambostudiáramo ñande rapichápe?

⁸ Apóstol Pablo omombaʼetereivaʼekue predikasión, upévare oservi tembiguáiramo Jehovápe ha umi ohendúvape pe marandu porã (Rom. 12:11; 1 Cor. 9:19). Ñande avei jahechaukavaʼerã ñamombaʼeha upe marandu ñamboʼévo Ñandejára Ñeʼẽ opavavépe. Tahaʼe ñambostudiávo ñande rapichápe hógape, jastudia jave ñande rogayguándi térã jajapo jave diskúrso Salónpe. Jaikuaa jarekoha tuicha rresponsavilida ñaporomboʼévo ha ikatu voi ñapensa ipohyiha upéva. Pór ehémplo, jajapóramo peteĩ estúdio káda semána ñamboykemantevaʼerã ñane rembiapo, upévare ikatu ñaimoʼã ijetuʼuetereiha ñakumpli. Péro ñanemanduʼavaʼerã Jesús heʼivaʼekuére: ‘Javyʼave ñameʼẽvo, ñandéve oñemeʼẽrangue’ (Hech. 20:35). Javyʼaitereíta ningo ñaipytyvõramo ñande rapichápe ojesalva hag̃ua, ndaipóri voi mbaʼeve ñambojojavaʼerã upévare.

9, 10. a) Mbaʼérepa jaʼekuaa peteĩ iñakãguapýva ikatuha avei hory térã ovyʼa hapichakuérandi? b) Mbaʼépa ojapovaʼerã ansianokuéra umi ermáno oñembojase hag̃ua hendápe?

⁹ Ikatu oime ñapensa ñaneakãguapy térã ñandesérioramo ndovaleiha ñanderory ha javyʼa ñande rapichakuérandi, péro ndaupéichai. Jesús oheja ñandéve peteĩ ehémplo neporãva upévape. Haʼe oñemotiempovaʼekue omboʼe hag̃ua umi héntepe, ha avei opytuʼu ha ojeheʼave hag̃ua hapichakuérare (Luc. 5:27-29; Juan 12:1, 2). Upéicharõ, ñaneakãguapy ndeʼiséi jaikotaha ñande rovasyháre. Jesucristo ijarhél térã iserioitereírire, ndaiporivaʼerãmoʼã ovyʼáva hendive. Péro haʼe ndaupéichai, upévare umi mitã jepe oñeñandu porã vaʼekue hendive (Mar. 10:13-16). Ha ñande, mbaʼéichapa ikatu ñahaʼanga ñane Mboʼehára Jesucrístope?

¹⁰ Peteĩ ermáno heʼi peteĩ ansiánore: “Haʼe oñehaʼãmbaite ojapo opa mbaʼe hekopete, péro ndahaʼéi upévarente ohaʼarõva ermanokuéra ojapo haʼéicha”. Ojeʼépa ñanderehe avei upéicha? Ndaivaíri ningo ñahaʼarõ ñande rapichágui ojapo porã heta mbaʼe. Pór ehémplo tuvakuéra ikatu heʼi ha oipytyvõ ifamíliape ohupyty hag̃ua hetave mbaʼe Jehová servísiope, ha upéicha haʼekuéra oñehaʼãvéta ohupyty upéva. Avei kongregasiónpe umi ansiáno ikatu oipytyvõ ha oñemoñeʼẽ ermanokuérape oñakãrapuʼã hag̃ua Jehová servísiope. Péro oñantendevaʼerã ojapóvo upéva anítei ohasa la rrája; upéicharõ añoite umi ermáno ovyʼáta ha oñembojaséta hendápe (Rom. 12:3). Peteĩ ermána heʼi: “Ndaigustomoʼãi umi ansiáno opukapareíramo ñañeʼẽ jave hendivekuéra, péro ijetuʼúta avei ñañemboja peteĩ iserioitereíva rendápe”. Ambue ermána katu heʼi: “Oĩ ansiáno ni ndopukavýiva ñañemongeta jave hendive, ha umichagua ñanemongyhyje voi”. Katuete ni peteĩ ansiáno ndoipotamoʼãi ikáusare ermanokuéra  oñeñandu vai térã hovapuku oservívo ‘Ñandejára ovyʼávape’ (1 Tim. 1:11).

Kuimbaʼekuéra, ikatúpa pembaʼapove kongregasiónpe?

11. Mbaʼéichapa peteĩ ermáno ikatu ohechauka “oñehaʼãha” ohupyty hetave mbaʼe Jehová servísiope?

¹¹ Apóstol Pablo omokyreʼỹ ermanokuérape ohupyty hag̃ua hetave mbaʼe Jehová servísiope, péro upéva ndeʼiséi oñakãrapuʼãvaʼerãha hikuái ojechauka hag̃uánte. Haʼe oipotavaʼekue oñembaʼapove Jehovápe g̃uarã, upévare heʼi chupekuéra: ‘Oĩramo oñehaʼãva ombaʼapove kongregasiónpe, mbaʼe porã ojaposehína’ (1 Tim. 3:1, 4, BNP). Umi ermáno “oñehaʼãva” ohupyty upéva tekotevẽ ohechauka oipytyvõseha ermanokuérape ipyʼaite guive ha okumplivaʼerã umi mbaʼe oñehaʼarõva chuguikuéra. Umi ansiáno ohecháramo peteĩ ermáno oñehaʼãha okumpli 1 Timoteo 3:8-13-pe heʼíva ha ojapómava un áño ojevautisa hague, ikatúma ojerure hikuái oñenombra hag̃ua chupe siérvo ministeriál. Ha heʼiháicha versíkulo 8-pe, upe ermáno iñakãguapyvaʼerã ikatu hag̃uáicha oiko chugui siérvo ministeriál.

12, 13. Mbaʼépa ikatu ojapo umi mitãrusu oñakãrapuʼã hag̃ua Jehová servísiope?

¹² Ha nde mitãrusu ndekariaʼýmava rehóvo, oiméramo rejevautisáma ha avei neakãguapy, ikatuhína rejapo heta mbaʼe reñakãrapuʼã hag̃ua Jehová servísiope. Pór ehémplo, ikatu resẽve predikasiónpe. Upéicharõ ikatúta repredika opaichagua ermánondi ha avei retopáta estúdio vívliko. Ha katuete oikóta ndehegui peteĩ mboʼehára ikatupyrýva ha reikuaa porãvéta mbaʼépa oikotevẽ ne estudiánte, reñehaʼãramo rembostudia chupe ojeʼeháicha rreunionhápe. Rehechávo okambiaha ohóvo katu, retratakuaa ha reipytyvõkuaátama chupe ojapo hag̃ua la Biblia heʼíva.

¹³ Ikatúnepa reipytyvõ umi ermáno ijedávape? Nekyreʼỹpa remopotĩ ha reñangareko hag̃ua Salón del Reino rehe? Ndeguápo ha nekyreʼỹramo rejapokuévo oimehaichagua tembiapo ojejeruréva ndéve, rehechaukareína neakãguapyha. Ha rejoguáta avei Timotéope reñangarekóramo ermanokuérare nde pyʼaite guive (elee Filipenses 2:19-22).

14. Mbaʼéichapa ansianokuéra ohecháta ikatúpa oñemeʼẽ rresponsavilida tuichavéva peteĩ mitãrusúpe?

¹⁴ Ansianokuéra, pemohembiapókena umi ermáno oñehaʼãvape ojehekýi ‘umi mbaʼe vai omoakãrakúvagui mitãrusukuérape, oikóva tekojojápe, ojeroviáva Crístore, oporohayhúva ha oikóva pyʼaguapýpe’ (2 Tim. 2:22). Umi tembiapo pemeʼẽva chupekuéra kongregasiónpe penepytyvõta pehecha hag̃ua mbaʼeichaguápa umi ermáno, pemeʼẽ mboyve chupekuéra rresponsavilida tuichavéva. Ha ojapo porãramo hembiapo kongregasiónpe, opavavénte ohechakuaáta ‘mbaʼéichapa oñakãrapuʼã ohóvo’ (1 Tim. 3:10; 4:15).

Ñaneakãguapýkena kongregasiónpe ha ñande rogapýpe

15. Mbaʼéichapa japorotratáta ñaneakãguapýramo, heʼiháicha 1 Timoteo 5:1, 2?

¹⁵ Ñaneakãguapýramo jatrata porã ha ñamombaʼéta ñane ermanokuérape. Péicha voi heʼivaʼekue apóstol Pablo Timotéope (elee 1 Timoteo 5:1, 2). Kuimbaʼe omombaʼevaʼerã  kuñáme ha kuña katu kuimbaʼépe. Job oheja ñandéve peteĩ ehémplo iporãitereíva upévape, haʼe omombaʼe ha orrespetavaʼekue kuñanguérape ha koʼýte hembirekópe, upévare nomañatieʼỹi ambue kuñáre (Job 31:1). Umi iñakãguapýva ndoikomoʼãi voi onovillea omakaneaségui rei térã ojapo oimeraẽ mbaʼe omoñeñandu vaítava hapichápe. Ha umi kristiáno omendátava katu koʼýte tekotevẽ omombaʼe hembirekorãme. Peteĩ ermáno iñakãguapýva ni guaʼuhápe ndojapomoʼãi koʼã mbaʼe ohuga hag̃ua hapicháre (Pro. 12:22).

16. Mbaʼéichapa ojehecha ko múndope umi túva ha ménape, péro mbaʼépa omboʼe la Biblia?

¹⁶ Ñandejára heʼi mbaʼéichapa káda uno jatratavaʼerã ñande rogayguápe, ha ñaneakãguapýramo jajapo ha ñamombaʼéta upe Haʼe heʼíva. Ko múndo añáme katu ojeapoʼi ha oñeñembohory túva ha menakuérare. Pór ehémplo, téle, rrevísta térã ambue mbaʼépe ojehechauka túva térã ménape peteĩ kuimbaʼe výroicha ha oĩmínteva upérupi. Péro la Biblia heʼi porã ‘menakuéra omoakãha hembirekópe’, ha upévare tekotevẽ ojerrespeta chupe (Efe. 5:23; 1 Cor. 11:3).

17. Mbaʼéichapa menakuéra ohechauka iñakãguapyha omoakãvo hogapy?

¹⁷ Umi kristiáno omoĩva ifamíliape hemikotevẽ, péro noipytyvõiva chupekuéra omombarete hag̃ua ijerovia, naiñarandúi ni naiñakãguapýi (Deu. 6:6, 7). La Biblia heʼi voi umi ohupytyséva hetave mbaʼe Jehová servísiope omoakã porã vaʼerãha hogapy, ha ifamiliakuéra iñakãguapyvaʼerãha (1 Tim. 3:4). Upévare tuvakuéra iporã oñeporandu: “Ajapo piko káda semána pe Aty Jastudia Hag̃ua Ñande Rogayguándi?”. Ñambyasýramo jepe oĩ heta ména ndojapóiva upéva, ha hembireko oikovaʼerã ojerure asy chupe okumpli hag̃ua. Upéicharõ, menakuéra oñehaʼãvaʼerã ojapo Ñandejára ojeruréva omoakã porãséramo hogapy. Ha tembirekokuéra katu oipytyvõvaʼerã iménape ikatu hag̃uáicha ojapo porã hembiapo.

18. Mbaʼépa oipytyvõta umi mitãme iñakãguapy hag̃ua?

¹⁸ La Biblia omokyreʼỹ imitãvape iñakãguapy hag̃ua odesidíta jave mbaʼépa ojapóta hekovépe (Ecl. 12:1). Ikatu hag̃uáicha mitãnguéra ombaʼapose ha ikatupyry, michĩete guive oñemeʼẽvaʼerã chupekuéra hembiaporã ogapýpe umi ikatuvaʼerãichagua ojapo (Lam. 3:27). Pór ehémplo, rréi David imitãʼírõ guare oñangarekovaʼekue ovechakuérare, ombopu ha ojapo avei heta músika. Ojapokuaa rupi koʼã mbaʼe, oho ombaʼapo rréi de Israélpe g̃uarã (1 Sam. 16:11, 12, 18-21). Katuete David imitãrõ guare ohuga hapichakuérandi, péro avei ombaʼapokuaa ha ikatupyryvaʼekue. Umi mbaʼe oipytyvõ chupe ikariaʼyvévo omombaʼeguasu hag̃ua Jehovápe. Haʼe oñangareko  rupi ovechakuérare ipasiensiave, ha upéva oipytyvõ chupe oisãmbyhy porã hag̃ua tetã Israélpe. Ha peẽ mitãrusu ha mitãkuña, peñehaʼãpa pendekatupyryve ikatu hag̃uáicha peservi porãve Jehovápe ha upéicha pehupyty hetave mbaʼe iservísiope?

Ani jahasa la rrája

19, 20. Mbaʼépepa ñanepytyvõta ñanderory ha javyʼakuaáramo?

¹⁹ Oĩ porã añete ñaneakãguapy ha ñandesério, péro ndovaléi jahasa la rrája. Umi kristiáno hekojojáva noñemombaʼeguasúi ha ndeʼíri ijehe ndojavyiha voi (Ecl. 7:16). Ñanderory ha javyʼakuaáramo tuicha ñanepytyvõta jahasa jave peteĩ situasión ijetuʼúva, tahaʼe ñande rógape, ñande travahohápe térã kongregasiónpe. Avei ndovaléi jahecha ivaíva meménte ñane famíliare, upéicha jajapóramo ijetuʼúta jaiko hag̃ua pyʼaguapýpe ñande rógape. Ha kongregasiónpe katu iporãta ñañehaʼãramo japuka ermanokuérandi ha ñañembyaty javyʼami hag̃ua oñondivepa. Péro ñanemanduʼavaʼerã umi mbaʼe jaʼe ha ñamboʼéva ijuky ha oporomokyreʼỹvaʼerãha (2 Cor. 13:10; Efe. 4:29).

²⁰ Ko múndope noñemombaʼéi Jehovápe ni umi mbaʼe Haʼe heʼíva. Ñande kristianokuéra katu ñañehaʼã ñaneñeʼẽrendu Chupe ha jajerovia hese. Ajéiko javyʼaite jaservi haguére Jehovápe ñane ermanokuérandi! Upévare, koʼág̃a koʼýte jajedesidivaʼerã ñaneakãguapy, ha jahechauka ñande rekovépe ñamombaʼeha ñande servísio.

Mbaʼépa rembohováita?

• Mbaʼérepa ndajaikoivaʼerã ko múndope ojeikoháicha?

• Mbaʼéichapa ikatu ñaneakãguapy ha javyʼa jaservívo Ñandejárape?

• Mbaʼéichapa peteĩ iñakãguapýva ohechauka ohupytyseha hetave mbaʼe Jehová servísiope?

• Mbaʼérepa iñimportánte jatrata porã ha ñamombaʼe ñande rogaygua ha ermanokuérape?

[Porandu ñahesaʼỹijóva]

[Nóta oĩva taʼanga ndive páhina 12]

Ména nombofaltaivaʼerã hogayguápe hemikotevẽ ha omombaretevaʼerã chupekuéra ijerovia