Kumukalakela Yehova Nakalemesha Kalala
Kumukalakela Yehova Nakalemesha Kalala
‘Yuma yalema yejima, . . . toñojokenuña yumoyu.’—FWI. 4:8.
1, 2. Chumanyi chinakuletesha antu amavulu mukaayi kubula kulemesha yuma yalema muwumi, nawa chumichi chaleteshaña kwihula malwihwinyi?
TUNAKUSHAKAMA mumpinji yasweja kukala mukuhanda kwawantu. Antu abula wulunda wawuwahi naYehova chayikalilaña chikupu kuumika iyi “nyaka yakala.” (2 Tim. 3:1-5) Hiyakweti wakuyikwasha kumanisha kukala kwawuku nawa hiyamanishaña kukala kweniku chikupuku. Chatela kulemesha yuma yalema, amavulu afwilaña kuhema yisela yayiha kulonda alalameni kukala kwamonañawu mukuhanda kwawu.
2 Antu avula kutwamijaku yisela yakuditiyisha aweni kuwaha hakwila nawu omiki kukala kwamonañawu muwumi. AkwaKristu niwena neyi kubabala piñi anateli kutachika kwila yuma yoyimu. Tunateli kutondolwela ñahi chumichi? Komana chumichi chinayi mukwila nawu hitwatela kuhemaku? Tunateli kwesekeja ñahi yisela nanyidimu? Nshimbinyi yamuNsona yinateli kutukwasha hela chakwila twalemesha yuma yalema muwumi tubuleña kuhambakesha?
Kulemesha Yuma Yalema Mukaayi Mwakeñawu Yakuditiyisha Kuwaha
3, 4. Indi Nsona jatukwashaña ñahi kulemesha yuma yalema?
3 Kafwampi antu mukanu kaayi alemesha chikupu ‘yuma yakuditiyisha aweni kuwaha.’ (2 Tim. 3:4) Wubwambu wetu naYehova wunateli kwikala muwubanji muloña kaayi kakonkomwenaña hakudiluñisha. (Yish. 21:17) Dichaletesheli kapostolu Pawulu kuhosha hansañu yakalemesha munyikanda yasonekeleliyi Timotewu niTitusa. Neyi tulondela kufumba kweniku, hitukuluwankana nayitoñojoka yamukaayi muyabulaña kulemeshawu yuma yalemaku.—Tañenu 1 Timotewu 2:1, 2; Titusa 2:2-8.
4 Kunyaka, Solomoni wasonekeli chawahila kutoñojoka hayuma yalema muwumi kubadika kusha maana hakuhema mpinji yejima. (Mukwa. 3:4; 7:2-4) Muloña wakwila hitwashakamaña yaaka yayivuluku, twatela ‘kuzata nañovu’ kulonda tukapuluki. (Luka 13:24) Dichi twatela kutwalekahu kutoñojoka yuma ‘yalema yejima.’ (Fwi. 4:8, 9) Chumichi chaya mukwila nawu tushi maana kuyuma yejima yakeñekaña hakwikala mukwaKristu.
5. Chumanyi chitwatela kulemesha nankashi muchihandilu?
5 Chakutalilahu, akwaKristu alemesha chikupu mudimu wawu nawa azataña nañovu hakumwimbujola Yehova niYesu. (Yow. 5:17) Chumichi chaleteshaña antu kuhameka akwaKristu alala nikuyikuhwelela muloña azataña nañovu. Sweje-e dinu nyitu yayisaka yazataña nañovu kulonda yikwasheña yisaka yawu. Kafwampi neyi muntu hakwashaña chisaka chindi muyuma yakumujimbaku, “naleki mwaya kwitiya kwakukuhwelela,” chumichi chinesekani nakumukaana Yehova.—1 Tim. 5:8.
Twalemesha Kudifukula Kwetu Nawa Kwatuzañaleshaña
6. Tweluka ñahi netu twatela kulemesha kudifukula kutwadifukulaña kudi Yehova?
6 Yehova wamonaña nindi chalema kudifukula kudi yena munjila yayiwahi mpinji yejima. Chakutalilahu, hampinji yadiñawu kuNshimbi yamwinkeluwu Mosi, aIsarela amweneña kañalaña neyi aleka kudifukula kudi Yehova. (Yosh. 23:12, 13) Muyaaka nkulakaji yakusambila C.E., atumbanji twaKristu ateleleli kuzata nañovu kulonda ntañishilu niyililu yatama yibuli kwiñila mukudifukula kwalala. (2 Yow. 7-11; Chim. 2:14-16) Makonu akwaKristu alala alemesha kudifukula kwawu.—1 Tim. 6:20.
7. Indi Pawulu waloñesheli ñahi mudimu windi wakushimwina?
7 Mudimu wetu wakushimwina watuzañaleshaña. Hela chochu, hakwila nawu tutwalekuhu namuzañalu mumudimu wakushimwina, twatela kutoñojoka chiwahi nikudiloñeshela chadimu. Pawulu walumbulwili chatoñojokeleñayi hadi antu atañishileñayi. Wasonekeli nindi: “Nekali dehi wesekana nawantu ejima muyuma yejima, kulonda mwejimimu nitweshi kuhandisha nachu amu. Yuma yejima yinelaña, nelilaña nsañu yayiwahi kulonda nidiiluku hamu nayu.” (1 Kor. 9:22, 23) Pawulu watiyileña kuwaha kukwasha amakwawu kuspiritu, nikutoñojoka chikupu chatela kuloñeshayi yuma yinakaankiluwu antiyilili jindi. Dichi wayikolesheleña kudifukula kudi Yehova.
8. (a) Twatela kumona ñahi antu itwadizishaña mumudimu wakushimwina? (b) Indi kudizisha kadizi Bayibolu kwatuzañaleshaña ñahi mumudimu wakushimwina?
8 Pawulu walemesheli ñahi mudimu windi wakushimwina? Wakeñeli ‘kumukalakela’ Yehova niantu akeñeleña kutiya nsañu yalala yashimwinineñayi. (Rom. 12:11; 1 Kor. 9:19) Neyi tunakudizisha antu Izu daNzambi, chili tunakudizisha mwiniitala Bayibolu hela hakupompa kwawakwaKristu, indi kwiji haKudifukula kwaChisaka, komana twashañaku maana kudi antu itwatañishaña? Hadaha twatoñojokaña netu kudizisha kadizi Bayibolu mpinji yejima himudimu watukalila nankashi. Kafwampi chumichi chakeñekaña kuleka kuzata nyidimu yetu kulonda tuzatishi iyi mpinji hakukwasha amakwawu. Komana chumichi hichesekana namazu ahosheliyi Yesu nindi ‘mukuhana mwekala muzañalu weneni kubadika wekala mukutambwilaku’ nehi? (Yil. 20:35) Kudizisha amakwawu njila yawamwinu kwatuzañaleshaña kubadika kuzata mudimu wudi wejima.
9, 10. (a) Komana kulemesha yuma yalema kwaya mukwila nawu tubuleña kwikala nampinji yakunooka nikudiluñisha nawakwetu? Lumbululenu. (b) Chumanyi chikumukwasha eluda kukolesha amakwawu nikwikala wakasunuka?
9 Kulemesha yuma yalema hikwaya mukwila nawu tubuleña kwikala nampinji yakunooka hela yakudiluñisha nawakwetuku. Yesu wemikili chakutalilahu chachiwahi chakwikala nampinji bayi yakutañisha hohuku, ilaña niyakunooka nikukwata wubwambu nawantu amakwawu. (Luka 5:27-29; Yow. 12:1, 2) Kulemesha yuma yalema cheñi hikwaya mukwila nawu chiña muntu yekali wakasika mpinji yejimaku. Neyi Yesu wadiña wakasika, antu hiyadi kuya kudi yenaku. Anyana niwena adiña akasunuka kuya kudi yena. (Maku 10:13-16) Tunateli kumwimbujola ñahi Yesu wadiña nakwesekeja yuma?
10 Mana kwetu wumu wahosheli hadi eluda nindi, “Wakeñaña kuzata nyidimu yayivulu yomweni, ilaña hakeñaña kumona akwawu nindi awaninaku.” Komana antu anateli kuhosha mazu amuchidiwu hadenu? Chachiwahi kubula kukuhwelela yuma yayivulu kudi amakwawu. Chakutalilahu, anyana azataña chiwahi neyi anvwali ayimikila yikonkwanyi yatelela nikuyikwasha kuyishikija. Chochimu, aeluda anateli kukolesha antu muchipompelu kupama kuspiritu nikuyileja jinjila jatela kuyikwasha kwila mwenimu. Kubombelahu, neyi eluda yesekejaña yuma yatela kuzatayi, wukwikala wakasunuka nawa wukukoleshaña amakwawu. (Rom. 12:3) Muhela wumu wahosheli nindi: “Hinakeñaña eluda kwila maleñu muyuma yejimaku. Ilaña neyi mpinji yejima kuletahu nikadileñu nehi, chakalaña kuhanjeka nindi.” Muhela mukwawu wahosheli nindi wamonaña neyi aeluda amakwawu “atiyishaña woma muloña amwekanaña kukasika chikupu.” Aeluda hiyatela kukañesha muzañalu watela kwikala nawakwawu akwakwitiya ejima kutalisha hakudifukula kudi Yehova ‘Nzambi wamuzañaluku.’—1 Tim. 1:11.
Kukalakala Nyidimu muChipompelu
11. Indi ‘kushikahu’ muchipompelu kwalumbulukadi?
11 Pawulu chayikolesheliyi amayala muchipompelu kushikahu kukalakala nyidimu yamaneni, hafwilileña kukolesha muntu wudi wejima kuditiyisha yomweni kuwahaku. Ilaña wasonekeli nindi: ‘Muntu nakeñi mudimu wakutala akwawu nakeñi mudimu wawuwahi.’ (1 Tim. 3:1, 4) Amayala akwaKristu ‘anakukeña kushikahu’ atela kufwila kuzata nañovu kulonda ekali nayililu yakuspiritu yakeñekaña hakwila azatili ana kwawu. Neyi munahiti dehi chaaka chimu kufuma hapapatisheweliyi mana kwetu nawa nashikiji yuma yamuNsona yakeñekaña hakwikala ankoñi akuzatila neyi chashimunawu ha 1 Timotewu 3:8-13, anateli kumuhameka kulonda amutondi. Ilukenu nenu vasi 8 yahosha hatooka nawu: ‘Ankoñi [akuzatila atela] kwikala nakalemesha.’
12, 13. Lumbululenu njila jatela kuyikwasha ana kwetu atwansi kushikahu hakuzata nyidimu.
12 Komana wudi mana kwetu wapapatishewa wunapandakani muyaaka yawansi walemesha kudifukula kudi Yehova? Kudi jinjila jajivulu jimwatela kwila kulonda mushikuhu. Njila yatachi yidi yakuzata nañovu mumudimu wamwiha. Komana mwadiluñishaña kuzata nawamana kwetu akweti yaaka yashiyashana mumudimu wamwihi? Mwakeñaña muntu imwatela kudizisha Bayibolu? Neyi munakudizisha kadizi waBayibolu kwesekeja nanjila jatulejañawu hakupompa kwawakwaKristu, munateli kuwahisha ntañishilu yenu. Cheñi nawa mukwiluka chakutiyila wushona muntu wunakudiza hanjila jaYehova. Neyi kadizi wenu yamona kulema kwakuhimpa yuma yikwawu, mukwiluka chakumukwasha mumesu awunda nawa munjila yayiwahi kulonda yazatisheña nshimbi jamuBayibolu.
13 Enu ana kwetu atwansi munateli kudihana nakukwasha akulumpi muchipompelu, kuhitila mukuyikwasha muyuma yidi yejima yimukutwesha. Munateli cheñi kusha maana Kwitala daWanta, kuhitila mukudihemba kulonda dikali dawunyoji. Neyi mudihana kuzata yuma yejima yimunateli kuzata, kudihana kwenu kukumwekesha nawu mwalemesha mudimu wenu wakushimwina. Kufwana Timotewu, munateli kudiza chakwakamena nyidimu yamuchipompelu namuchima wejima.—Tañenu Afwilipi 2:19-22.
14. Indi ana kwetu atwansi anateli “kuyishinshika” ñahi kulonda akalakali nyidimu muchipompelu?
14 Aeluda ikalenu asoñama kulonda muzatisheña ana kwetu atwansi anakufwila ‘kutemuka kufwila kwatama kwawukwenzi’ nawa anakukabila ‘kuloña, nikukeña, nikuwunda,’ niyililu yikwawu yayiwahi. (2 Tim. 2:22) Neyi muyinkaña nyidimu yakuzata muchipompelu, anateli “kuyishinshika” neyi akutwesha kukalakala nyidimu, kulonda ‘chikuyañawu kumbidi chimwekanaña kudi antu ejima.’—1 Tim. 3:10; 4:15.
Chakumwekesha Kalemesha Kalala muChipompelu nimuChisaka
15. Kwesekeja namukanda wa 1 Timotewu 5:1, 2, tunateli kulemesha ñahi amakwawu?
15 Kwikala nakalemesha kwakeñekaña kulemesha ana kwetu niahela. Mukufumba kwindi kwamufumbiliyi Timotewu, Pawulu wahosheli hansañu yakulemesha amakwawu. (Tañenu 1 Timotewu 5:1, 2.) Chumichi chalema nankashi neyi munakuzata namuntu weyala hela wamumbanda. Twatela kwimbujola chakutalilahu chaYoba chakulemesha ambanda sweje-e iñodindi. Wadikasili chikupu kulonda abuli kutala mumbanda wacheñi namuchima wakumufwila. (Yoba 31:1) Kulemesha amana kwetu niahela kukuleñela tubuleña kukenkama hela kwila yuma yidi yejima yikuletesha mana kwetu hela muhela kubula kwikala wakasunuka nanetu. Kulemesha amakwawu kwalema nankashi sweje-e kudi eyala namumbanda anakukeña kudisumbula. MukwaKristu walemesha yuma yalema hanateli kumudimba muntu wamumbanda hela weyala nindi nikakusambula hela nikasumbuka neyuku.—Yish. 12:22.
16. Indi antu amakwawu amukaayi amonaña ñahi mudimu weyala, nawa Bayibolu yalumbulula ñahi mudimu windi?
16 Twatela cheñi kwikala ababala kulonda tutwalekuhu kulemesha nyidimu yatwinkayi Nzambi muchisaka. Antu ayuulañayi Satana adiwulaña mudimu weyala nawa tata yawantu. Akwakuhema yisela atiyaña kuwaha kumwekesha amayala nawa atata jawantu neyi atelela hohu kuyiseha nikubula kuyilemesha. Hela chochu, iyala amwinka mudimu weneni nankashi muNsona, amukunjika mudimu wakwikala “mutu wamumbanda.”—Efwes. 5:23; 1 Kor. 11:3.
17. Lumbululenu chitunateli kumwekesha netu twalemesha nyidimu yetu kuhitila mukutanjika kudifukula kwachisaka.
17 Iyala nateli kukwasha chisaka chindi muyuma yakumujimba. Ilaña neyi nakuyikwasha wanyi kuspiritu, wukumwekesha nawu hakweti maana nikashinshuku. (Kuhit. 6:6, 7) Dichi, mukanda wa 1 Timotewu 3:4 wahosha nawu neyi wudi mutu wachisaka nawa wunakufwila kushikahu kukalakala nyidimu yikwawu muchipompelu, watela kwikala muntu ‘wayulaña chachiwahi mwitala dindi yomweni, wukweti anyanindi amwovwahilaña nakalemesha kalala.’ Dihulenu nenu, ‘Komana natanjika mpinji yakudifukula kwachisaka mpinji yejima mwitala dami?’ Ambanda akwaKristu amakwawu alembelelaña anfumu jawu kulonda ayilomboleña munsañu yakuspiritu. Amayala ejima atela kutoñojoka chikupu kulonda eluki chamonañawu iwu mudimu. Hela chochu, mumbanda mukwaKristu watela kuzatila hamu nanfumwindi kulonda ntanjikilu yaKudifukula kwaChisaka yendeña chiwahi.
18. Indi anyana anateli kudiza ñahi kukalakala nyidimu yalema?
18 Anyana niwena ayikolesha kulemesha yuma yalema muchihandilu. (Mukwa. 12:1) Chatama wanyi neyi anyana anyanya adizaña chakuzata nañovu, nikwila nyidimu yikwawu yahetala yesekana nayaaka niwuswa wukwetuwu. (Mukeŋa 3:27) Mwanta Davidi wadizili kwikala kabiña wamuwahi hachidiñayi kansi. Welukili cheñi kwimba nikusoneka tumina, iyi yuma yadiziliyi yamuleñeleli kukalakela kumesu amwanta wamuIsarela. (1 Sam. 16:11, 12, 18-21) Chakadi kujina, hampinji yadiñayi kansi Davidi wadiña nakuhema, ilaña wadizili cheñi yuma yalema yazatishiliyi hakumuhameka Yehova. Mudimu wawukabiña wadiziliyi wamukwashili kulombola munza waIsarela mumesu awunda. Enu atwansi, nyidimwinyi yimunakudiza yikayikwasha kumuzatila Nleñi yenu kulonda mudiloñeshi kukalakala nyidimu kumbidi?
Esekejenuña Yuma
19, 20. Yililwinyi yakwesekeja yuma yimunakufwila kwikala nayu enu aweni nihakudifukula?
19 Tunateli kuzata nañovu kulonda twesekejeña yuma, kubadika kwikala akasika chikupu. Hitwakeñaña “kuswejesha nankashi kuloñaku.” (Mukwa. 7:16) Muntu wakasunuka nateli kumanisha kukala hetala nikumudimu hela hakuzata nawamana kwetu niahela akwaKristu. Antu amuchisaka atela kwikala ababala kulonda abuleña kukalisha hakwila nawu ashakameña kumatelu awunda mwitala dawu. Antu ejima amuchipompelu anateli kwikala aseha nikudiluñisha nawakwawu nawa atela kuhanjekaña nikutañisha munjila yakudikolesha.—2 Kor. 13:10; Efwes. 4:29.
20 Antu amunu mukaayi hiyalemeshaña nshimbi jaYehovaku. Ilaña antu jaYehova eluka nawu kumwovwahila Nzambi nikwikala akashinshi dichuma chalema nankashi. Hikukooleka kwakweni kwikala hakachi kawantu amavulu adifukulaña kudi Yehova “nakalemesha kalala.” Tutwalekenuhu kulemesha yuma yalema muwumi wetu nikudifukula.
Munateli Kwakula Nenudi?
• Muloñadi wutwatela kufwomwena yitoñojoka yamukaayi muyabulaña kulemeshawu yuma yalema?
• Tunateli kwikala ñahi namuzañalu nikulemesha mudimu wetu wakushimwina?
• Chitwamonaña nyidimu yetu chamwekeshaña ñahi nawu twalemesha yuma yalema hela nehi?
• Muloñadi kulemesha amana kwetu niantu amuchisaka chikwalemena? Lumbululenu.
[Malwihu aKuzatisha haKudiza]
[Nyevulu yidi hefu 12]
Iyala watela kukwasha chisaka chindi muyuma yakumujimba niyakuspiritu