Nˈoktuˈunëm tukëˈëyë mëdë mayˈäjt wintsëˈkën
“May witstë mä tëgekyë [...] diˈibë nitëjkëp ja mayˈäjt wintsëˈkën.” (FILI. 4:8)
1, 2. ¿Tiko mayë jäˈäy jëjpˈam tpëjtäˈäktë xondakën, ets tijaty yajtëˈëwën jaˈäjtp?
NINÄˈÄNËM duˈunë naxwinyëdë jäˈäy tkawinguwäˈägë ayoˈon jotmay extëm tyam. Jantsy tsip nimëjää xëë tiempë nyaxy ets “ayoˈon mëët”. Ets mayë jäˈäy diˈib yajpattëp jagam mëdë Dios kyaj tnijawëdë wiˈix twinguwäˈägëdët (2 Tim. 3:1-5). Jyatuundëbë mëjää, per tsip nimëjää tmëmadäˈäktët. Pääty mayë jäˈäy tˈëxtäˈäytyë naybyudëkë mä xondakën diˈib jaˈäjtp yä naxwiiny parë tjäˈäytyëgoyäˈändë yˈamay jyotmay.
2 Parë mayë jäˈäy twinguwäˈägë yˈamay jyotmay, yëˈë jëjpˈam pyëjtaktëbë xondakën. Ets pën kyaj nyaygyuentˈatëdë Dios mëduumbë mbäät ok nyayjäˈäwbyäädëdë ko nanduˈunë jyukyˈäjtënë dyajnëjkxtë. Pääty, ¿wiˈix mbäät nnaygyuentˈäjtëm? ¿Yëˈë duˈun yˈandijpy ko njëjpkudijëtyaˈayëm tukëˈëyë xondakën diˈib jaˈäjtp? ¿Wiˈix mbäät nmoˈoyëmë lyugäär duˈun ja xondakën ets duˈun tijaty nikëjxmˈäjtëm extëmë Dios mëduumbë? ¿Ti käjpxwijën diˈib mä Biiblyë mbäät xypyudëjkëm parë nˈijxëm tijaty yajmëjpëjtäˈägäämp ets nwinmäˈäyëm kijpxënbyaaty?
Nˈokjukyˈäjtëm mëdë mayˈäjt wintsëˈkën oyë jäˈäy tmëjpëjtäˈäktë xondakën
3, 4. ¿Diˈibatyë käjpxwijën xyˈanmäˈäyëm ko jëjpˈam ets nyaˈijxëmë mayˈäjt wintsëˈkën?
3 Jotmaymyëët njënäˈänëm ko naxwinyëdë jäˈäy yëˈëyë wyinmäˈänyˈäjttëp “ja xik awëˈkëk” o xondakën (2 Tim. 3:4). Tyäˈädë kajaa kyujotmayëty mët ko mbäät xytyukmëjagamgakëmë Jyobaa (Pro. 21:17). Päätyë Pablo ojts tˈanëëmë Tito tiko naty jyëjpˈamëty ets jyukyˈatët mët ja mayˈäjt wintsëˈkën. Tyäˈädë yëˈë xypyudëjkëm parë kyaj nmëjpëjtakëmë xondakënë extëmë naxwinyëdë jäˈäy (käjpxë Titʉ 2:2-8).
4 Salomón nan ojts tkujayë ko tsojkëp ets njëjpkudijëm näˈätyë xondakën parë nduˈunëm diˈib mas jëjpˈam (Ecl. 3:4; 7:2-4). Pes extëm nnijäˈäjëm, jantsy konë tyäˈädë jukyˈäjtën ets tsojkëp nduˈunëm mëk ja mëjää parë nbatëm ja nitsokën (Luk. 13:24). Päätyën tsyekyëty nmäˈäy nwijtsëm tukëˈëyë “diˈibë nitëjkëp ja mayˈäjt wintsëˈkën” (Fili. 4:8, 9). O ja tuk peky njënäˈänëm, tsojkëp nˈijxëm yajxon wiˈixën mbäät jyukyˈaty tuˈugë Dios mëduumbë.
5. ¿Ti diˈib mbäädë Dios mëduumbë tmëjpëjtäˈäktë?
5 Extëm nˈokpëjtakëm, yëˈë Dios mëduumbëty myëjpëjtaktëbë tyuunk yˈayoˈon, duˈun extëmë Jyobaa mëdë Jesus (Fwank 5:17). Päätyë jäˈäy myëjkumayëdë mët ko tyuumbëjäˈäyˈattë ets ko oy tijaty ttundë. Yëˈë uˈunkteety yëˈë patëp mëk tyunët, pes pën kyaj nyaytyukjotmaytyunyëty ja fyamilyë “tëëdën tˈëxtijy ja mëbëjkën” diˈib nyapatypy extëmxyëp tjëjpkudijë Jyobaa (1 Tim. 5:8).
Nˈokmëduˈunëmë Dios mëdë mayˈäjt wintsëˈkën per mëdë xondakën
6. ¿Wiˈix nnijäˈäjëm ko tsojkëbë Jyobaa nmëduˈunëm mëdë mayˈäjt wintsëˈkën?
6 Nuˈun kujkë tiempë nyaxy, Jyobaa xëmë tˈawixy ets nmëduˈunëm mëdë mayˈäjt wintsëˈkën. Pääty, ko ja israelitë tkamëmëdoodë ja anaˈamën diˈib yajmooytyë, Jyobaa kyaj yaˈˈawäˈätspëtsëëmëdë mä naty jam tkumëdowdë (Jos. 23:12, 13). Mä ja apostëlëtëjk jyukyˈäjttë, ojts yaˈˈanëëmëdë ja Dios mëduumbë ets mëk nyaygyuentˈatëdët parë kyaj nyinaxëdët ja axëëkpë jäˈäyˈäjtën ets parë kyaj dyajtëkëdët ja tukniˈˈijxënë diˈib kyaj tyëyˈäjtënëty (2 Fwank 7-11; Diˈibʉ Jat. 2:14-16). Ets axtë tyambäät duˈunyëmë Jyobaa xyˈanmäˈäyëm ets nmëduˈunëm mëdë mayˈäjt wintsëˈkën (1 Tim. 6:20).
7. ¿Wiˈixë Pablo nyayjëjpˈijxë parë ttuunyë Diosë tyuunk?
7 Ko nduˈunëmë Diosë tyuunk, xymyoˈoyëm mëjwiin kajaa jotkujkˈäjtën. Pääty pën xëmë nmëdatäˈänëmë tyäˈädë jotkujkˈäjtën, tsojkëp nmëjpëjtakëmë tyäˈädë tuunk ets kontiempë niˈëxpëjkëm wiˈix ndunäˈänëm. Extëmë apostëlë Pablo xëmë tmëdäjty wyinmäˈänyoty pënaty myëtmaytyäˈägan, yëˈë jyënany: “Nandëˈënëts nnaybyëjtaˈagyëty extëm yëˈëjëty, es dëˈën näägëty nyitsoˈoktët. Ndunyëts dëˈën tëgekyë tyäˈädë mët yëˈëgyëjxm ja oybyë ayuk, es dëˈën diˈibë myëdoodëp pyäädëdët tiˈigyë mët ëj ja nitsokën” (1 Kor. 9:22, 23). Tyäˈädë apostëlë tyukxondak mëjwiin kajaa ko tpudëjkë ja jäˈäyëty ets pyawinmääy wiˈix mbäät tpudëkë niduˈuk niduˈuk. Duˈuntsoo tmëjämooytyë parë tmëdundëdë Jyobaa.
8. 1) ¿Wiˈix mbäät nmëjpëjtakëmë Diosë tyuunk ko nyaˈëxpëjkëm? 2) ¿Tiko mëjwiin kajaa xymyoˈoyëmë jotkujkˈäjtën ko nyaˈëxpëjkëmë jäˈäy?
8 Pablo myëjpëjtakë Diosë tyuunk. Ets axtë naybyëjtakë extëm tuˈugë tuumbë juybyë parë tmëduunyë Jyobaa ets ja jäˈäyëty diˈib myëtmaytyak (Rom. 12:11; 1 Kor. 9:19). Ëtsäjtëm nan nikëjxmˈäjtëm tyam ets ndukniˈˈijxëmë Diosë yˈAyuk. Extëm ko nyaˈëxpëjkëmë jäˈäy mä jyëën tyëjk, ko nyajnäjxëm tuˈugë diskursë o ko nDiosˈawdäjtëm mëdë Familyë. ¿Njaygyujkëm yajxon tidën nikëjxmˈäjtëm ko ndukniˈˈijxëm? Näˈäty mbäät nwinmäˈäyëm ko mëk nyaˈëxpëjkëmë jäˈäy sëmään sëmään, pes tsojkëp njuˈtëmë tiempë mä nmëdäjtëm ja tuunk ayoˈon. Per ¿ti kyaj Jesus jyënany ko “niˈigë njotkujkˈäjtëm ko wiink jäˈäy nbudëjkëm es kyaj ko wiink jäˈäy xypyudëjkëm”? (Apos. 20:35.) Duˈunë duˈun, mëjwiin kajaa nëjkxë jotkujkˈäjtënë xymyoˈoyëm ko ndukniˈˈijxëmë jäˈäy ja nëˈë tuˈu diˈib xyajnitsoˈogäˈänëm.
9, 10. 1) ¿Tëyˈäjtën ko diˈib myëdäjtypyë mayˈäjt wintsëˈkën kyaj mbäät xyondaˈaky? Oknimaytyäˈäk. 2) ¿Ti pudëkëdëbë mëjjäˈäytyëjk parë yˈitët ajiiky amëguˈuk ets yajmëwingonët?
9 Ko nmëdäjtëm ja mayˈäjt wintsëˈkën kyaj yëˈë tˈandijy ko kyaj mbäät nxondakëm. Jesus yäjk tuˈugë oybyë ijxpajtën, pes yëˈë kyaj jeˈeyë ojts dyaˈëxpekyë jäˈäy, nan jyuˈtë tiempë parë ojts pyoˈkxy ets käjpx maytyak mët ja jäˈäyëty (Luk. 5:27-29; Fwank 12:1, 2). Ets nan kyaj yëˈë tˈandijy ko kyaj mbäät nˈokxikënë. Pes koxyëbë Jesus kyëxeˈky jantsy awäˈän o kyaj yˈëmay kyäjpxmayë, ¿pënxyëp mëwingonanë? Per yëˈë, kyaj duˈun jyaˈayˈajty, pes axtë ja ënäˈkuˈunk jantsy oy nyayjäˈäwëdë mët yëˈë (Mar. 10:13-16). ¿Wiˈix mbäät nbanëjkxëmë Jesusë yˈijxpajtën parë nduˈunëm tijaty kijpxënbyaaty?
10 Tuˈugë nmëguˈukˈäjtëm duˈun ojts tnimaytyaˈaky ja mëjjäˈäy diˈib tuump mä naymyujkën: “Yëˈë mëk jyantsy nyayajtunyëty, per ninäˈä tkaˈˈawixy ets ja myëguˈuktëjk nanduˈun tyunët”. ¿Mbäät nanduˈun myajnimaytyaˈaky? Kyaj wiˈixëty ko nˈawijxëm ets ja nmëguˈukˈäjtëm ttunët diˈib mbäät tmëmadaˈaky. Extëm nˈokpëjtakëm, ko tääk teety tˈanëëmëdë ja yˈuˈunk yˈënäˈk ti mbäät ttundë etsë net tpudëkëdë, ta ja uˈunk ënäˈk tpëjtäˈäktë jyot myëjää parë duˈun ttundë. Nanduˈun jyaty mä naymyujkën, ko mëjjäˈäytyëjk tpudëkëdë niduˈuk niduˈuk ja nmëguˈukˈäjtëm ets tmoˈoytyë käjpxwijën wiˈix mbäät mas oy yˈittë mëdë Jyobaa, ta tkukäjpxëdë. Yëˈë mëjjäˈäytyëjk tsojkëp ttundëdë mëjää parë kyaj nyaymyëjpëjtäˈägëdët, net yˈittët mas ajiiky amëguˈuk ets oypyënëty myëwingonëdët (Rom. 12:3). Tuˈugë nmëguˈukˈäjtëm jyënaˈany: “Kyajts nˈoyjawët ko mëjjäˈäytyëjk tpëkët tijaty xiˈiky andaˈaky, per nan tsipxyëbëts nmëwingony diˈib kyaj yˈëmay kyäjpxmayë”. Ja tuˈuk jyënany ko näägë mëjjäˈäytyëjk ninuˈun “kyaˈˈajiiky kyaˈˈamëguˈugëty ets ko tsëˈkëdëbë nmëguˈukˈäjtëm”. Seguurë nˈijtëm ko nituˈugë mëjjäˈäy tkatsojkënyëˈatët etsë myëguˈuktëjk diˈib myëduundë Jyobaa, tadë “Diosë jotkujkpë” nyayjawëdët mon tuk (1 Tim. 1:11, Traducción del Nuevo Mundo).
Pënaty nyikëjxmˈataampy ja tuunk
11. ¿Wiˈix dyaˈixyëty tuˈugë Dios mëduumbë ko nyikëjxmˈataampy ja tuunk?
11 Ko Pablo ojts tˈanëëmë ja yetyëjkëty parë niˈigyë tnikëjxmˈattët ja tuunk mä naymyujkën, kyaj yëˈë tmaytyäˈägany ets net myëjpëtsëmdët. Yëˈë duˈun parë tyundët, pääty tˈanmääytyë: “Pën ja pën [tyunäˈäny] mëbëjkpëtëjk kuentˈäjtpë, oyë tadë tuunk diˈibë tsyejpy” (1 Tim. 3:1, 4). ¿Wiˈix tuˈugë Dios mëduumbë dyaˈixyëty ko tunäämp duˈun? Ko ttsojkënyëˈatët tyunäˈänët ets dyajnigëxëˈëgët ja oybyë jäˈäyˈäjtën parë tmëdunëdë myëguˈuktëjk. Yëˈë mëjjäˈäytyëjk mbäät tnigajpxy ets tuˈugë yetyëjk tyunët extëmë mëjjäˈäyë pyudëjkëbë, pën të yˈijnë tuk jëmëjt mä nyëbety ets pën kyuytyuumpy extëm jyënaˈanyë 1 Timotee 3:8-13. Nˈokˈijxëm ko bersikulo 8 yajxon tnigajpxy ko “diˈibaty pyudëjkëdëp ja mëbëjkpëtëjkë kyuentˈäjtpëty, yëˈë diˈibë naymyayˈäjt naywyintsëˈkëp”.
12, 13. ¿Ti mbäät ttundë mixyˈënäˈk parë niˈigyë yajtuunkmoˈoytyët mä naymyujkën?
12 Mixyˈënäˈk, ¿të mnëbajnë ets mmëjpëjtakypyë Diosë tyuunk? Pën jam myaˈkˈabajnë, ta kanäk peky diˈib mbäät xytyuny parë myajtuunkmoˈoyët mä naymyujkën. Tuk peky, yëˈë ko mnëjkxët mas niˈigyë tëjkˈayeˈebyë. ¿Mnëjkxp käjpxwäˈkxpë mëdë mëjjäˈäy mutsk jäˈäy? ¿Mˈëxtaabyë jäˈäy diˈib yˈëxpëkaambyë Biiblyë? Pën myaˈëxpejkypyë jäˈäy extëm nyaˈˈanmäˈäyëm mä naymyujkën, ta jantsy oy nëjkx mdukniˈˈixë ets nëjkxëp mnaybyëjtaˈagyëty duˈun extëm ja jäˈäy yaˈixy yajpääty. Ets ko ja jäˈäy dyajtëgatsët ogäˈän ja jyukyˈäjtën, nëjkxëp xypyudëkë mëdë maˈkxtujkën ets tsuj yajxon parë tkuytyunët tijatyë Biiblyë nyiˈanaˈamëp.
13 ¿Mˈawäˈänëbë naybyudëkë nmëguˈukˈäjtëm diˈib të myëjjäˈäyënë? ¿Mduump xondaˈakyˈää xondaˈakyjot ko wyaˈatsyë Tëjk mä nˈëxpëjkëm o ko yˈaˈoyë? Pën mnibeˈtypyˈajtypy oytyim diˈibëtyë tuunk, ta xyaˈixëdët ko mjantsy myëjpëjtakypyë Diosë tyuunk. Jamyats ko mbäät mjäˈäyˈaty extëmë Timoteo diˈib kyuentˈäjt ja myëguˈuktëjk ets naytyukjotmaytyuunë (käjpxë Filipʉs 2:19-22).
14. ¿Wiˈix “jawyiin yaˈijxmatsy” ja ënäˈktëjkëty mä naymyujkën?
14 Mëjjäˈäytyëjk, tuunkmoˈoytyë duˈumbë mixyˈënäˈk diˈib tyuundëbë mëjää parë tmastuˈuttë ja “ënäˈktëjkëtyë wyinmäˈäny” ets dyajnëjkxtë “tuˈugë jikyˈäjtën extëm diˈibë Dios tsyejpy, diˈibë mëbëjkën mëëtpë, tsojkën mëëtpë [etsë] tiˈigyëˈäjtën mëëtpë” (2 Tim. 2:22). Ja tuunk diˈib yajtuknipëjktëp mä naymyujkën, yëˈë mëët “jawyiin yaˈijxmatsy”. Pën kyuytyuumpy yajxon tijaty yajtuknipëjkp, ta niˈamukë nëjkx “tˈixtë” wiˈix wyimbety (1 Tim. 3:10; 4:15).
Nˈokˈyaˈijxëmë mayˈäjt wintsëˈkën mä naymyujkën ets mä jëën tëjk
15. Extëm jyënaˈanyë käjpxwijënë mä 1 Timotee 5:1, 2, ¿wiˈix mbäät tuˈugë Dios mëduumbë dyaˈixyëtyë mayˈäjt wintsëˈkën mëdë myëguˈuktëjk?
15 Njäˈäyˈäjtëm mëdë mayˈäjt wintsëˈkën yëˈë yˈandijpy nwintsëˈkëm ets nmëjˈijxëm niˈamukë nmëguˈukˈäjtëm, duˈun extëmë Pablo ojts tkäjpxwijy ja Timoteo (käjpxë 1 Timotee 5:1, 2). Jëjpˈam ets duˈun njäˈäyˈäjtëm ko nyajpatëm mët tuˈugë toxytyëjk o mët tuˈugë yetyëjk. Job yäjk tuˈugë oybyë ijxpajtën, pes xëmë ojts tmayˈaty twintsëˈëgë ja toxytyëjkëty ets mas ja nyëdoˈoxy, ko kyaj tˈijxy ja wiinkpë toxytyëjk (Job 31:1). Yëˈë nmëguˈukˈäjtëm diˈib yaˈijxëbë mayˈäjt wintsëˈkën, kyaj tˈanäx tˈamayë ja yetyëjk o toxytyëjk ets ninäˈä ti tkatuny diˈib ja myëguˈuk axëëk yajnayjawëdëp. Ets pënaty myëdäjttëp ja ëy kajpxy parë pyëkäˈändë, tsojkëp tmayˈat twintsëˈëgët ja diˈib pyëkaampy. Yëˈë Dios mëduumbë diˈib myëdäjtypyë mayˈäjt wintsëˈkën ninäˈä jeˈeyë tkawiinˈëën tkawinxäjët ja mixy o ja kiixy (Pro. 12:22).
16. ¿Wiˈixë naxwinyëdë jäˈäy dyajnaxy ja yetyëjk kasäädë o ja uˈunkteety, per wiˈixë Biiblyë jyënaˈany mä ja tuunk diˈib nyikëjxmˈäjtypy?
16 Ja tuk peky diˈib mbäät nˈijxëm mëdë mayˈäjt wintsëˈkën, yëˈë ja tuunk diˈibë Dios niduˈuk niduˈuk të xymyoˈoyëm mä familyë. Naxwinyëdë jäˈäy diˈibë Satanás yˈaneˈempy jeˈeyë nixiˈiky tukxiˈiky dyajnaxtë ja yetyëjk kasäädë o ja uˈunkteety. Extëm mä telebisionk o mä pelikula dyajnaxtë uˈunkteety extëm tuˈugë karikatuurë diˈib nipën kyawintsëˈëgëty. Perë Biiblyë jyënaˈany ko yetyëjk mëjwiin kajaa ja tuunk tnikëjxmˈaty mët ko yëˈë “nyigëbäjkˈäjtypy ja nyëdoˈoxy” (Éfe. 5:23; 1 Kor. 11:3).
17. ¿Wiˈix nyajnigëxëˈkëm ko nmëjpëjtakëm tijaty nikëjxmˈäjtëm mä familyë?
17 Tuˈugë uˈunkteety diˈib myoobyë fyamilyë tijaty tëgoyˈäjtxëp, per kyaj ttukniˈˈixë Diosë jyaˈa, kyaj naty jyapëtyë jyot wyinmäˈäny ets kyaj naty dyaˈixyëtyë wijyˈäjtën (Deu. 6:6, 7). Päätyë 1 Timotee 3:4 jyënaˈany ko ja diˈib nyikëjxmˈataampy ja tuunk mä naymyujkën, tsojkëp “yajxon [yˈanaˈamët] mä tyëjk es dëˈën tmoˈoyët ja ijxpajtënë yˈuˈunk yˈënäˈk es myëmëdowëdët es wyintsëˈëgëdët”. Pën mijts uˈunkteety, nayajtëwëdë: “¿Tuˈukmujkpëts sëmään sëmään parëts nDiosˈawdattë mëdëtsë nFamilyë?”. Jotmaymyëët njënäˈänëm ko taaˈäjtpë toxytyëjk diˈib myënuˈkxtaktëbë nyaˈay parë duˈun ttundët. Niˈamukë yetyëjk tsojkëp tmëjpëjtäˈäktëdë tyäˈädë tuunk diˈib nyikëjxmˈäjttëp. Etsë toxytyëjk nan tsojkëp tpudëkët ja nyaˈay parë mbäät ttundë extëm të ttukniwitsëdë.
18. ¿Wiˈix mbäädë ënäˈkuˈunk tmëjpëjtäˈäktë tijaty?
18 Biiblyë nan yˈanmaabyë uˈunk ënäˈk ets tmëjpëjtäˈäktët tijaty mbäät pyudëkëdë parë yajxon tmëdundëdë Jyobaa (Ecl. 12:1). Kyaj wyiˈixëty ko ja uˈunk ënäˈk yajmoˈoyëdë tyuunk extëm ja xyëë jyëmëjt ets extëm ja wyijyˈäjtën. Net yajxon tjattët tyundët mä myutskˈattë (Lam. 3:27). Extëmë David, mutsknëmë naty ko ojts tjaty yajxon byorreegë kuentˈatët. Nan ojts tjaty dyajjënäˈänëdë tuumbajn diˈib mëët yˈëy, ets nan ojts tmaˈkxyë ëy yaˈaxy diˈib ojts yajjäˈtyëty rey wyindum (1 Sam. 16:11, 12, 18-21). David ëyëˈk kuyäjt extëmë ënäˈkuˈunk, per nan ojts tjaty winë diˈib ok yajtuun parë tmëjkumääyë Jyobaa. Extëm nˈokpëjtakëm, ko byorreegë kuentˈäjty ojts tjaty myaˈkxtukët, diˈib ok pudëjkë parë ojts twooyoˈoy ja nax käjpn. Ënäˈktëjk, ¿jam kujk tijaty xyjattë diˈib mbäät mbudëkëdë parë yajxon xymyëdundëdë Jyobaa ets myajtuknipëktët mas niˈigyë tuunk?
Nˈokwinmäˈäyëm kijpxënbyaaty
19, 20. ¿Wiˈix mbäät nwinmäˈäyëm kijpxënbyaaty mä ëtsäjtëm këˈëm ets mä nDiosmëduˈunëm?
19 Tsojkëp ets niˈamukë nwinmäˈäyëm kijpxënbyaaty ets kyaj ndimnaymyëjpëjtakëm. Nituˈugë Dios mëduumbë kyanayajnaxäˈänyëty “mëk wäˈäts jäˈäy” (Ecl. 7:16). Ko nˈaxiˈikˈäjt nˈagäjpxˈäjtëm mbäät kajaa xypyudëjkëm ko nbatëmë amay jotmay jënoty tëgoty, mä tuunk ayoˈon o mä naymyujkën. Kyaj yˈoyëty ets jeˈeyë xëmë nˈijxëm tijaty kyaj oy yajtuny mä familyë, pes mbäät tyëgoy ja jotkujkˈäjtën diˈib mbäät jyaˈˈaty mä tuˈuk tuˈugë jëën tëjk. Ets mä naymyujkën nan oy ko njäjtëm nxik nxoˈonën mëdë nmëguˈukˈäjtëm ets mëët nyajnäjxëm agujk jotkujk. Per xëmë mbäät njamyajtsëm ko ja käjpx maytyakën ets ja tukniˈˈijxën, yëˈë diˈib pudëkëdëp ja nmëguˈukˈäjtëm ets oytyunëdëp (2 Kor. 13:10; Éfe. 4:29).
20 Naxwinyëdë jäˈäy kyaj twintsëˈëgëdë Jyobaa ets ni yˈanaˈamën. Perë ëtsäjtëm xëmë nmëmëdowäˈänëm ets nmëdunäˈänëm. ¡Jantsy jotkujk nayjäˈäwëm ko ndukˈijtëmë Jyobaa nyax kyäjpn diˈib mëduunëp mëdë “mayˈäjt wintsëˈkën”! Duˈunë duˈun, nˈokpëjtakëmë jot winmäˈäny ets njukyˈäjtëm mëdë mayˈäjt wintsëˈkën ets nmëjpëjtakëmë Diosë tyuunk.
¿Wiˈix mˈatsoojëmbitët?
• ¿Tiko kyaj yˈoyëty nmëjpëjtakëmë xondakënë extëmë naxwinyëdë jäˈäy?
• ¿Tiko mbäät nduˈunëmë Diosë tyuunk mëdë mayˈäjt wintsëˈkën, per nanduˈun mëdë xondakën?
• Tuˈugë Dios mëduumbë diˈib myëjpëjtakypyë Diosë tyuunk, ¿wiˈix tˈixy tijaty nyikëjxmˈäjtypy?
• Oknimaytyäˈäk tiko jyëjpˈamëty ets njäˈäyˈäjtëm mëdë mayˈäjt wintsëˈkën mä naymyujkën ets mä jëën tëjk.
[Yajtëˈëwën]
[Letrë diˈib miimp mä dibujë mä pajina 15]
Yetyëjk kasäädë tsojkëp tmoˈoyët ja fyamilyë tijaty tëgoyˈäjtxëp ets nanduˈun ttukniˈˈixëdë Diosë jyaˈa
