Jen Kaorõki Eddo ko Ad jãn Jeova
Jen Kaorõki Eddo ko Ad jãn Jeova
‘Komin kobrak lemnak ko ami kin men ko im rej menin kautiej ak raorõk.’—PIL. 4:8, UBS.
1, 2. Etke elõñ armej ro ilo lal̦ in el̦ap aer jol̦o̦k iien ko aer ilo menin kam̦õn̦õn̦õ ko? Ta kajjitõk ko jenaaj etali?
JEJ mour ilo juon tõre me elukkuun pen mour im el̦ap jorrããn ko rej wal̦o̦k. Ro im rejjab epaake Anij epen ñan aer kijenmej ium̦win iien kein renana im repen. (2 Ti. 3:1-5) Rej kate er jãn raan ñan raan, bõtab rejjab maroñ kõm̦adm̦õde aolepen apañ ko aer. Rejaje ren ta im ejjel̦o̦k emaroñ jipañ er. Kõnke elukkuun pen mour im ejjab pidodo ñan aer ineke eddo ko aer, rein rej jol̦o̦k el̦ap iien ilo menin kam̦õn̦õn̦õ ko.
2 Armej ro rej pukot wõt menin kam̦õn̦õn̦õ ko kõnke rejjab kõn̦aan l̦õmn̦ak kõn inepata ko rej iioni. El̦aññe ro doon Anij rejjab kõjparok er, innem remaroñ bareinwõt kõm̦m̦an ãindein. Ewi wãween jemaroñ kõjparok kõj bwe jen jab ãinwõt armej ro jet? Ej mel̦el̦ein ke bwe jejjab aikuj bõk kun̦aad ilo menin kam̦õn̦õn̦õ ko? Ta ko jemaroñ kõm̦m̦ani bwe jen jokkin wõt juon ilo menin kam̦õn̦õn̦õ ko im ilo eddo ko ad? Ta naan in kakapilõk ko jãn Baibõl̦ eo im remaroñ jipañ kõj ñan kõm̦m̦ane men in?
Jen Kate Kõj Kõm̦m̦ani Eddo ko Ad
3, 4. Ewi wãween Baibõl̦ eo ej jipañ kõj bwe jen kaorõki eddo ko ad im jab ãinwõt armej ro jet?
3 Armej ro rej kajejtokjãn men ko el̦ap aer aorõk kõnke el̦apl̦o̦k aer kõn̦aan “kabuñburueir” make. (2 Ti. 3:4) Ñe el̦ap ad kaorõk menin kam̦õn̦õn̦õ ko ãinwõt armej rein, men in emaroñ ko̦kkure kõtaan eo ad ippãn Jeova. (JK. 21:17) Eñin unin Paul ej rõjañ kõj bwe jen kate kõj im ineek eddo ko ad. El̦aññe jej l̦oore naan in kakapilõk in, jeban kajejtokjãn eddo ko ad ãinwõt armej ro jet.—Riit Rom 12:8, UBS.
4 Elõñ buki iiõ ko m̦oktal̦o̦k, Solomon ear kwal̦o̦k bwe ewõr men ko ilo mour im raorõkl̦o̦k jãn menin kam̦õn̦õn̦õ ko. Jej aikuj kõl̦mãnl̦o̦kjen̦ kake men kein. (Ekl. 3:4; 7:2-4) Etke? Kõnke ekadu mour im jej aikuj lukkuun kate kõj ñan ad maroñ bõk lo̦mo̦o̦r. (Luk 13:24) Eñin unin jej aikuj lukkuun kõl̦mãnl̦o̦kjen̦ kõn aolep men ko raorõk. (Pil. 4:8, 9, UBS) Men kein raorõk ej aolep men ko jej kõm̦m̦ani ilo mour ko ad ãinwõt ro doon Anij.
5. Ta eo armej ro doon Anij rej aikuj kate er ñan kõm̦m̦ane?
5 Ñan waanjoñak, ro doon Jeova rej kajeoñwe Jeova im Jijej ilo aer kate er ilo jerbal ko aer. (Jon 5:17) Armej ro rej nõbar ro doon Anij kõnke em̦ool aer jerbal im el̦ap aer niknik. Em̦m̦aan ro im ewõr aer baam̦le rej aikuj kate er jerbal bwe ren maroñ kabwe aikuj ko an baam̦le ko aer. Juon em̦m̦aan eo ejowan im ejjab jerbal ñan kabwe aikuj ko an baam̦le eo an ej “karmijjete tõmak” eo an make. Men in ej ãinwõt ñe ej kaarmejjeteik Jeova!—1 Ti. 5:8, UBS.
Jen M̦õn̦õn̦õ ilo Ad Kabuñ im Jerbal ñan Jeova
6. Etke jej aikuj lukkuun kaorõk wãween ad kabuñ ñan Jeova?
6 Ippãn Jeova, elukkuun aorõk bwe jen kabuñ ñan e ilo wãween eo ejim̦we. Ñan waanjoñak, Jeova ear kaje ri Israel ro el̦aññe rej oktakl̦o̦k jãn e im kabuñ ñan anij ko jet. (Jos. 23:12, 13) Ilo iien ko etto, ri kal̦oor ro an Jijej rar aikuj lukkuun kate er ñan kõjparok bwe kabuñ eo em̦ool en jab ettoon kõn katak ko rebõd im m̦anit ko an armej. (2 Jon 7-11; Rev. 2:14-16) Rainin, ro doon Jeova rej lukkuun kaorõk wãween aer kabuñ ñan E.—1 Ti. 6:20.
7. Ta eo Paul ear kõm̦m̦ane bwe en maroñ jipañ armej ro ilo jerbal in kwal̦o̦k naan?
7 Jerbal in kwal̦o̦k naan ej kõm̦m̦an bwe jen m̦õn̦õn̦õ. Bõtab, ñan ad maroñ m̦õn̦õn̦õ wõt ilo jerbal in kwal̦o̦k naan, jej aikuj lukkuun l̦õmn̦ak kõn wãween jemaroñ jipañ ro jej iion er ilo jerbal in kwal̦o̦k naan im kõppojakl̦o̦k im̦aan. Jemaroñ l̦oor joñak eo an Paul ilo an kar l̦õmn̦ak kõn wãween emaroñ jipañ armej ro im ear katak ippãer. Ear ba: “Ij erom men otemjej ñõn armij otemjej, bwe in maroñ lomoren jet iair kin jabdewõt wãwen eo imaroñe. Aoleb men kein ij kõmmõni kin gospel wõt, bwe en wor aõ ejinkõj ilo jerammõn ko an.” (1 Ko. 9:22, 23, UBS) Paul ear m̦õn̦õn̦õ in jipañ aolep armej, im ear kõl̦mãnl̦o̦kjen̦ kõn wãween emaroñ jipañ er kajjojo bwe ren jel̦ã kajjien Jeova. Ilo an kar kõm̦m̦an ãindein, ear maroñ rõjañ armej ro im kõm̦akũt er bwe ren kabuñ ñan Jeova.
8. (a) Ewi wãween jej aikuj watõk eddo eo ad ñan katakin armej ro? (b) Etke jej m̦õn̦õn̦õ el̦aññe jej katakin armej ro ilo jerbal in kwal̦o̦k naan?
8 Ewi joñan an kar Paul kaorõke jerbal in kwal̦o̦k naan? Ear m̦õn̦õn̦õ in jerbal ãinwõt juon “ri kamakoko” ñan Jeova im aolep ro ear kwal̦o̦k naan ñan er. (Rom 12:11, UBS; 1 Ko. 9:19, UBS) Jerbal eo ad ñan katakin armej ro kõn Naan ko an Jeova ej juon jerbal elukkuun aorõk. Ñan waanjoñak, ej an kajjojo ri kwal̦o̦k naan eddo ñan katakin armej ro kõn Baibõl̦ eo. Iloan congregation eo, kar lel̦o̦k eddo ñan jet em̦m̦aan ro bwe ren katakin ri tõmak ro m̦õttaer kõn Baibõl̦ eo. Im eddo eo ñan katakin ajri ro ej pãd ippãn ro jemãer im jineer. Jej ke aolep kile im lukkuun kaorõki eddo kein ad? Jet iien jemaroñ l̦õmn̦ak bwe elukkuun pen ñan katakin armej ro kõn Anij kajjojo wiik. Jemaroñ bõk l̦õmn̦ak in kõnke el̦ap ad jol̦o̦k iien ko ad make im kajerbali iien kein ñan ad ilo̦k im jipañ ro jet. Bõtab, ejjab ke men eo in im Jijej ear rõjañ kõj ñan kõm̦m̦ane? Jijej ear ba bwe “elablok mõnõnõ ilo lelok jen bõk.” (Jrb. 20:35, UBS) El̦aññe jej kate kõj ñan katak Baibõl̦ ippãn armej ro bwe ren bõk lo̦mo̦o̦r, men in enaaj bõktok el̦ap lañlõñ im m̦õn̦õn̦õ ñan kõj.
9, 10. (a) Ad kaorõke eddo ko ad ej ke mel̦el̦ein bwe jejjab maroñ kõm̦m̦an iien ñan kakkije im m̦õn̦õn̦õ ippãn armej ro? Jouj im kõmel̦el̦e. (b) Ewi wãween bwe en pidodo an armej ro kepaake juon elder?
9 Jej poub im kaorõki eddo ko ad ak jej bareinwõt kõm̦m̦an iien ñan kakkije im m̦õn̦õn̦õ ippãn armej ro. Jijej ear likũt juon joñak em̦m̦an ñan kõj. Ear jab baj katakin ro jet wõt, ak ear kõm̦m̦an iien ñan an kakkije im m̦õn̦õn̦õ ippãer bwe en l̦apl̦o̦k an jel̦ã kajjier. (Luk 5:27-29; Jon 12:1, 2) Meñe jej kaorõki eddo ko ad ak jej aikuj bareinwõt kwal̦o̦k ad m̦õn̦õn̦õ im jouj ñan armej ro. El̦aññe Jijej ear juon armej eo im ejaje kõm̦m̦an kõjak ak m̦õn̦õn̦õ, armej ro renaaj ke kar m̦õn̦õn̦õ in kepaake? Jaab, reban kar. Ajri ro rar m̦õn̦õn̦õ im rar kõn̦aan pãd iturin Jijej. (Mark 10:13-16) Ewi wãween jemaroñ kajeoñwe Jijej?
10 Juon jeid im jatid m̦aan ear ba naan kein kõn juon elder, “Ej lukkuun kate e joñan wõt an maroñ ilo jerbal eo an, bõtab ej kile bwe ro jet ewõr joñan aer maroñ.” Ak ta kõn kwe? Ekkar bwe jen kõtmãne bwe armej ro ren kõm̦m̦ane ijo kun̦aaer, bõtab jej aikuj keememej bwe rejjab weeppãn. Ñan waanjoñak, el̦aññe ro jemen im jinen ajri ro rej lel̦o̦k jerbal ko ñan ajri ro nejier ekkar ñan joñan maroñ ko aer im rej jipañ er, ajri ro renaaj m̦õn̦õn̦õ in pokake er. Ilo ejja wãween in l̦o̦k wõt, jet jeid im jatid rej m̦õn̦õn̦õ in jerbale naan in rõjañ ko an elder ro el̦aññe rej jipañ er im kwal̦o̦k ilo jouj ta ko rej aikuj kõm̦m̦ani. El̦aññe juon elder ej kile bwe ejjab weeppãn im ewõr joñan an maroñ, men in emaroñ kõm̦m̦an bwe en pidodo an armej ro kepaake. (Rom 12:3, UBS) Juon jeid im jatid kõrã ear ba: “Em̦m̦an ippa ñe juon elder ej kaorõke eddo ko an. Ak el̦aññe ejaje kõm̦m̦an kõjak im m̦õn̦õn̦õ, innem enaaj pen ñan kepaake e.” Bar juon ear kwal̦o̦k bwe “emijak in kepaake jet elder ro me ejeja aer ettõñ.” Elder ro rej aikuj kate er ñan jipañ aolep bwe ren wõnm̦aanl̦o̦k wõt im kabuñ ilo lañlõñ ñan Jeova, ‘Anij eo em̦õn̦õn̦õ.’—1 Ti. 1:11.
Eddo ko ilo Congregation Eo
11. Ta ko juon brother ej aikuj kõm̦m̦ani bwe en maroñ bõk eddo ko rel̦apl̦o̦k ilo congregation eo?
11 Paul ear rõjañ em̦m̦aan ro ilo congregation ko bwe ren kate er ñan bõk eddo ko rel̦apl̦o̦k. Ear jab rõjañ er ñan jibadek jerbal kein bwe ren maroñ utiej im̦aan mejen armej. Ear ba: “Elañe juõn emman ej lukkun kõnan bwe en juõn ri tel ilo eklesia, ej kãlet jerbal eo ebolõmen.” (1 Ti. 3:1, 4, UBS) Ñe em̦m̦aan ro rej jibadek eddo ko rel̦apl̦o̦k ilo congregation eo, rej aikuj lukkuun m̦õn̦õn̦õ in kate er ñan kajejjet men ko rej aikuji ñan aer maroñ jipañ ri tõmak ro m̦õttaer. El̦aññe em̦õj an juon brother peptaij ium̦win juon iiõ im ej jerbali naan in kakapilõk ko ilo 1 Timote 3:8-13, innem remaroñ jitõñ e ñan bõk eddo ko rel̦apl̦o̦k ilo congregation eo. Eddo kein relukkuun aorõk, im rejjab aikuj “kõm̦m̦an kõjak” kaki.
12, 13. Kwal̦o̦k jet men ko likao ro remaroñ kõm̦m̦ani bwe ren maroñ bõk eddo ko rel̦apl̦o̦k ilo congregation eo.
12 Kwõj ke juon likao me em̦õj an peptaij? Im kwõj ke lukkuun kaorõk jerbal eo am̦ ñan Jeova? El̦aññe aet, innem elõñ wãween ko kwõmaroñ kõm̦m̦ani ñan kal̦apl̦o̦k eddo ko am̦ ilo congregation eo. Juon wãween ej ilo am̦ kal̦apl̦o̦k ijo kun̦aam̦ ilo jerbal in kwal̦o̦k naan. Kwõj ke juon eo im ej m̦õn̦õn̦õ in jerbal ippãn aolep ri kwal̦o̦k ro, meñe rerũtto ak redik? Kwõj ke lukkuun kate eok bwe en wõr am̦ ri katak? El̦aññe kwõj katak Baibõl̦ ippãn armej ro im kajerbali naan in kakapilõk ko kwõj bõki ilo iien kweilo̦k ko, enaaj em̦m̦anl̦o̦k wãween am̦ katakin armej ro. Im kwõnaaj jel̦ã kilen tũriam̦okake armej eo im kwõj katak ippãn bwe en jel̦ã kõn Jeova. Bareinwõt, kwõnaaj katak ñan kwal̦o̦k jouj im meanwõd ilo am̦ jipañ ri katak eo am̦ bwe en make kõm̦m̦an oktak ko ilo mour eo an.
13 Kom̦ likao ro, kom̦ maroñ jipañ ro rerũtto ilo congregation eo ilo jabdewõt wãween ko kom̦ maroñ. Kom̦ maroñ bareinwõt bõk kun̦aam̦i im jipañ karreo Im̦õn Kweilo̦k eo. El̦aññe kwõj m̦õn̦õn̦õ in jipañ ilo jabdewõt wãween kwõmaroñ, men in ej kam̦ool bwe kwõj lukkuun kaorõke jerbal eo am̦ ñan Jeova. Ilo wãween in, kwõnaaj katak ñan lukkuun jipañ im kakajoor ri tõmak ro jet m̦õttam̦ ilo congregation eo ãinwõt kar Timote.—Riit Pilippai 2:19-22.
14. Ewi wãween elder ro remaroñ “mãlejjoñ” likao ro?
14 Kom̦ elder ro, kom̦win kajerbal likao ro me em̦m̦an m̦wilier im joñak ko aer, im rej lukkuun kate er. (2 Ti. 2:22) Kom̦win lel̦o̦k ñan er jerbal ko ilo congregation eo ñan “mãlejjoñ er m̦okta” im lale el̦aññe repojak ñan bõk eddo ko rel̦apl̦o̦k. Ilo wãween in, ‘aer wõnm̦aanl̦o̦k enaaj alikkar ñan armej otemjej.’—1 Ti. 3:10; 4:15.
Kautiej Ri Tõmak ro M̦õttam̦ im Kaorõk Eddo ko Am̦ ilo Baam̦le Eo
15. Ekkar ñan 1 Timote 5:1, 2, UBS, ewi wãween jej kwal̦o̦k ad kautiej ñan ro jet?
15 Jej aikuj kwal̦o̦k kautiej ñan aolep ri tõmak ro m̦õttad. Ilo lõta eo an Paul ñan Timote, Paul ear kwal̦o̦k bwe ej juon menin aikuj ñan ad kautiej ro jet. (Riit 1 Timote 5:1, 2, UBS.) Elukkuun aorõk bwe em̦m̦aan ro ren kwal̦o̦k aer kautiej kõrã ro, im bwe kõrã ro ren kwal̦o̦k aer kautiej em̦m̦aan ro. Elukkuun em̦m̦an joñak eo an Job kõn wãween an kar kautiej kõrã ro, el̦aptata kõrã eo pãleen. Ear jek ilo bũruon bwe en jab kallimjek kõrã ro jet im mejkaiie kake er. (Job 31:1) Ilo ad kautiej doon, jenaaj kate kõj bwe jen jab katoojoj ak kõm̦m̦ane jabdewõt men ko im remaroñ bõktok l̦õmn̦ak ko rejakkar ak rettoon ñan ro jeid im jatid. Ro im rej l̦õmn̦ak in m̦are rej aikuj bareinwõt kwal̦o̦k aer kautiej doon. Juon armej eo ej karejar ñan Anij eban iukkure kõn eñjake eo an bar juon.—JK. 12:22.
16. Ewi wãween an armej ro watõk eddo ko an l̦eo ilo baam̦le eo an? Ta eddo eo eaorõk an l̦eo ekkar ñan Baibõl̦ eo?
16 Jej aikuj bareinwõt kaorõke eddo ko Anij ear letok ñan kõj ilo baam̦le ko ad. Armej ro ilo lal̦ in an Setan rej kõm̦m̦an kõjak im kajejtokjãn eddo ko an em̦m̦aan ro im ewõr aer baam̦le. Ekkã an men in wal̦o̦k ilo pija ko jej alwõji. Men in armej rein rej kõm̦m̦ane ejjab jim̦we. Eddo ko an l̦eo ilo baam̦le eo an relukkuun aorõk. Ekkar ñan Baibõl̦ eo, ej ba bwe l̦eo ej “bõran lio pãleen.”—Ep. 5:23; 1 Ko. 11:3.
17. Ta juon iaan wãween ko l̦eo ej kwal̦o̦k bwe ej kaorõki eddo ko an jãn Jeova?
17 Elukkuun aorõk bwe em̦m̦aan ro ren jerbal ñan kabwe aikuj ko an baam̦le ko aer. Bõtab, el̦aññe ejjab jipañ baam̦le eo an bwe ren epaakel̦o̦k Jeova, ejjab jerbale naan in kakapilõk ko jãn Jeova. (Dt. 6:6, 7) Ta eo em̦m̦aan ro ewõr aer baam̦le im rekõn̦aan bõk eddo ko rel̦apl̦o̦k ilo congregation eo rej aikuj kõm̦m̦ane? Baibõl̦ eo ej ba: “En jelã karõk nukin eo an, im ajiri ro nejin ren bokake e im kautiej e.” (1 Ti. 3:4, UBS) Kõn men in, kwõn kajjitõk ippam̦ make: ‘Ij ke kõm̦m̦an iien aõ katak ippãn baam̦le eo aõ kajjojo wiik?’ Ilo jet baam̦le ko, kõrã ro rej akwel̦ap ñan l̦õm̦aro ippãer bwe ren katak ippãn baam̦le eo. Men in ej ke wal̦o̦k ilo baam̦le eo am̦? L̦eo ej aikuj kaorõk eddo in an ñan katak ippãn baam̦le eo. Kõrã eo ej aikuj bareinwõt kõm̦m̦ane ijo kun̦aan ilo an jipañ l̦eo pãleen bwe ren katak ippãn ajri ro kajjojo wiik.
18. Ewi wãween ajri ro remaroñ katak bwe ren maroñ jel̦ã kun̦aaer?
18 Ajri ro rej aikuj jel̦ã kun̦aaer, kõnke men in emaroñ jipañ er ilo aer naaj jerbal ñan Jeova ilo raan ko im̦aan. (Ekl. 12:1) Ej juon men em̦m̦an el̦aññe ajri ro rej katak kilen jerbal. Ren katak kilen kõm̦m̦ani jerbal ko im ekkar ñan joñan dettaer im joñan maroñ ko aer. (Lia. 3:27) Ñan waanjoñak, Devid ear katak kilen lale jiip ko ke ear l̦addik wõt. Ear bareinwõt katak kilen kõjañjañ im kine al ko, im ke ear rũttol̦o̦k ear kajerbali jel̦ã kein an ñan jerbal ñan Saul, kiiñ in Israel eo. (1 Sa. 16:11, 12, 18-21) Ejjel̦o̦k pere bwe ear wõr iien an iukkure ke ear dik, bõtab ear bareinwõt katak kilen jerbal. Tokãlik, ear kajerbal men ko ear katak kaki ñan an karejar ñan Jeova. Kõnke ear jel̦ã kilen lale jiip ko, men in ear kõmaroñ e ñan jel̦ã meanwõd ilo an tõl ri Israel ro. Kom̦ jodrikdrik ro, jete jerbal ko kom̦ jel̦ã kõm̦m̦ani? Jerbal kein renaaj ke jipañ kom̦ bwe kom̦win jerbal ñan Ri Kõm̦anm̦an eo ami? Im renaaj ke kepoj kom̦ ñan eddo ko rel̦apl̦o̦k ilo raan ko rej pedotok?
Kaorõk Jerbal ko Ad im M̦õn̦õn̦õ
19, 20. Meñe jej kaorõk jerbal ko ad ñan Jeova, ta eo jej aikuj bar kõm̦m̦ane?
19 Meñe jej lukkuun kaorõk jerbal ko ad ñan Jeova, jej aikuj bar m̦õn̦õn̦õ. Armej ro doon Anij rej aikuj kate er bwe ren jokkin wõt juon ilo menin kam̦õn̦õn̦õ ko im ilo eddo ko aer. Jejjab kõn̦aan kowãnik kõj make el̦e jãn joñan. (Ekl. 7:16) Jet iien emaroñ l̦ap ad illu, inepata ak mijak ilo m̦oko im̦õd, ilo jikin jerbal ko ad, im bareinwõt ippãn ri tõmak ro m̦õttad. Ta eo jemaroñ kõm̦m̦ane? Jemaroñ kõm̦m̦an kõjak ak kattõñ doon kõnke men in emaroñ kadikl̦o̦k ad illu, inepata ak mijak. Ro jemen im jinen rej aikuj kõjparok bwe ren jab kõrraate doon ak kõrraate ajri ro nejier, kõnke men in emaroñ kõm̦m̦an bwe en dikl̦o̦k lem̦õn̦õn̦õ ak en ejjel̦o̦k aenõm̦m̦an ilo baam̦le eo. Ilo congregation ko, elukkuun aorõk bwe jen m̦õn̦õn̦õ ippãn doon. Jen kakajoor wõt doon ilo iien ad bwebwenato ippãn doon. Ñe em̦m̦aan ro rej kõm̦m̦ani katak ko aer ijo im̦aan, ren kwal̦o̦k ilo juon wãween ej kakajoor im jab kõlõkatip ro jet.—2 Ko. 13:10; Ep. 4:29.
20 Jej mour ilo juon tõre me armej ro rej kajejtokjãn kien ko an Jeova. Bõtab, armej ro doon Jeova rej lukkuun kate er bwe ren pokake im tiljek wõt ñan e. Jej lukkuun m̦õn̦õn̦õ bwe jej ro uwaan doulul eo an Jeova im rej lukkuun kaorõke jerbal ko aer ñan e. Jen wõnm̦aanl̦o̦k wõt im kaorõke jerbal ko ad im wãween ad kabuñ ñan e.
Ewi Wãween Kwõnaaj Uwaak?
• El̦ap an armej ro ilo lal̦ in jol̦o̦k el̦ap iien ilo menin kam̦õn̦õn̦õ ko. Etke eaorõk bwe jen jab ãinwõt er?
• Ewi wãween jemaroñ lo m̦õn̦õn̦õ ilo ad kaorõk jerbal ko ad ñan Jeova?
• Ewi wãween em̦m̦aan ro remaroñ kwal̦o̦k aer lukkuun kaorõke eddo ko aer ilo congregation eo im ilo baam̦le ko aer?
• Etke eaorõk bwe jen kwal̦o̦k ad kautiej ro jeid im jatid ilo tõmak im ro ilo baam̦le ko ad?
[Kajitõk ko ñan katak]
[Pija ilo peij 12]
L̦eo ej aikuj kabwe aikuj ko an baam̦le eo an im katakin er kõn Jeova
