Go Hlankela Jehofa re sa Tšee Dilo Gabohwefo
Go Hlankela Jehofa re sa Tšee Dilo Gabohwefo
“Dilo le ge e le dife tše di naganišišwago ka šedi, . . . tšwelang pele le naganišiša ka dilo tše.”—BAFIL. 4:8.
1, 2. Ke’ng seo se dirilego gore batho ba bantši mo lefaseng ba tšee bophelo gabohwefo, gona seo se rotoša dipotšišo dife?
RE PHELA lefaseng le le nago le masetlapelo le mathata a magolo kudu historing ya batho. Batho bao ba se nago motheo o mobotse wa moya, ba ka hwetša go sa kgonege go lebeletšana le “dinako [tše] tše di hlobaetšago tšeo go lego thata go lebeletšana le tšona.” (2 Tim. 3:1-5) Letšatši le letšatši ba fo kgotlelela ge ba lebeletšane le mathata—eupša seo ga se ba hole ka selo. Go e na le gore ba lebelele bophelo bo le bohlokwa, batho ba bantši ba kitimišana le menate ya lefase.
2 Gantši batho ba etiša pele maipshino e le go itebatša mathata a bophelo. Ge e ba Bakriste ba sa hlokomele, ba ka tanywa gabonolo ke mokgwa wo wa bophelo. Re ka phema seo bjang? Na ga se ra swanela go ba le nako ya go ithabiša? Re ka dira bjang gore go be le tekatekano magareng ga maipshino le maikarabelo a rena? Ke melao efe ya motheo ya Mangwalo yeo e swanetšego go re hlahla gore gaešita le ge re tshwenyegile ka dilo tša bohlokwa, re se ke ra fetelela ra ba ra feleletša re thatafatša selo se sengwe le se sengwe?
Go se Tšee Dilo Gabohwefo Lefaseng Leo le Ratago Maipshino
3, 4. Mangwalo a re thuša bjang go bona bohlokwa bja go se tšee dilo gabohwefo?
3 Go molaleng gore lefase le le ‘rata maipshino’ ka tsela e feteletšego. (2 Tim. 3:4) Go kgothaletša ga lona maipshino go ka bea boemo bja rena bja moya kotsing. (Die. 21:17) Ka gona, moapostola Paulo o be a na le lebaka le le kwagalago la go akaretša keletšo ya mabapi le go se tšee dilo gabohwefo ge a be a ngwalela Timotheo le Tito. Go diriša keletšo yeo go tla re thuša gore re se tutuetšwe ke pono ya lefase ya go tšea bophelo gabohwefo.—Bala 1 Timotheo 2:1, 2; Tito 2:2-8.
4 Nywagakgolong e fetilego, Solomone o ngwadile ka mehola ya go tšea bophelo e le bja bohlokwa go e na le go fo dula re kitimišana le maipshino. (Mmo. 3:4; 7:2-4) Ka ge bophelo e le bjo bokopana, re swanetše go ‘katana ka matla’ gore re phološwe. (Luka 13:24) Gore re phološwe, re swanetše go dula re šetša dilo ka moka tšeo di “naganišišwago ka šedi.” (Bafil. 4:8, 9) Seo se bolela gore re swanetše go šetša karolo e nngwe le e nngwe ya bophelo bja rena bja Bokriste.
5. Ke karolo efe e nngwe ya bophelo yeo re sa swanelago go e tšea gabohwefo?
5 Ka mohlala, Bakriste ba tšeela godimo boikarabelo bja bona bja go šoma ka thata e le ge ba ekiša Jehofa le Jesu. (Joh. 5:17) Ka baka leo, gantši ba a retwa ka baka la mekgwa ya bona e mebotse ya go šoma le potego ya bona. Dihlogo tša malapa ke tšona di šomago ka thata gore di hlokomele malapa a tšona. Le gona ge motho a palelwa ke go hlokomela lapa ka dilo tša nama, seo se swantšhwa le go “latola Jehofa”!—1 Tim. 5:8, mongwalo wa tlase wa Reference Bible.
Go Thabišwa ke Borapedi bja Rena Eupša re sa bo Tšee Gabohwefo
6. Re tseba bjang gore re swanetše go tšeela godimo borapedi bja rena go Jehofa?
6 Jehofa ga se a ka a tšea borapedi bja therešo gabohwefo. Ka mohlala, ka tlase ga Molao wa Moshe, Baisiraele ba ile ba lebeletšana le ditlamorago tše šoro ge ba be ba aroga borapeding bja bona go Jehofa. (Josh. 23:12, 13) Lekgolong la pele la nywaga C.E., balatedi ba Kriste ba be ba swanetše go katana ka matla go dira gore borapedi bja therešo bo se senywe ke dithuto le mekgwa e fošagetšego. (2 Joh. 7-11; Kut. 2:14-16) Lehono, Bakriste ba therešo ba tšwela pele ba tšeela godimo borapedi bja bona.—1 Tim. 6:20.
7. Paulo o ile a lokišetša bjang bodiredi bja gagwe?
7 Bodiredi bja rena bja tšhemo ke bjona bo re thabišago. Lega go le bjalo, e le gore re dule re thabile bodireding, re swanetše go bo tšeela godimo le go lokišetša e sa le pele. Paulo o hlalositše kamoo a bego a tšeela godimo batho bao a bego a ba ruta. O ngwadile gore: “Ke bile dilo tšohle go batho ba mehuta ka moka, e le gore ka mešegofela ke phološe ba bangwe. Eupša ke dira dilo tšohle bakeng sa ditaba tše dibotse, e le gore ke di abelane le ba bangwe.” (1 Bakor. 9:22, 23) Paulo o be a thabišwa ke go thuša batho moyeng gomme o be a naganišiša kamoo a ka thušago batheetši ba gagwe ka gona. Ka baka leo, o ile a kgona go ba kgothatša le go ba tutuetša gore ba rapele Jehofa.
8. (a) Re swanetše go lebelela bjang batho bao re ba rutago bodireding bja rena? (b) Ke bjang go swara thuto ya Beibele go ka oketšago lethabo la rena bodireding?
8 Bodiredi bo be bo le bohlokwa gakaaka’ng go Paulo? O be a ikemišeditše go ba “mohlanka” wa Jehofa le wa bao ba tlago go theetša molaetša wa therešo. (Baroma 12:11; 1 Bakor. 9:19) Ge re rwala boikarabelo bja go ruta batho Lentšu la Modimo—e ka ba thutong ya legae ya Beibele, sebokeng sa Bokriste goba lenaneong la Borapedi bja Lapa—na re lemoga boikarabelo bjo re nago le bjona go bao re ba rutago? Mohlomongwe re kwa eka go swara thuto ya ka mehla ya Beibele ke morwalo wo re ka se kgonego go o rwala. Ke therešo gore gantši go nyakega gore re šomiše karolo e itšego ya nako ya rena gomme re e gafele go thuša ba bangwe. Eupša na seo ga se dumelelane le mantšu a Jesu a rego “go na le lethabo le legolo go neeng go feta go amogeleng”? (Dit. 20:35) Go ruta ba bangwe tsela ya gore ba phološwe go re thabiša go feta modiro le ge e le ofe o mongwe.
9, 10. (a) Na go se tšee dilo gabohwefo go bolela gore re ka se be le nako ya go iketla le go thaba le batho ba bangwe? Hlalosa. (b) Ke’ng seo se tla thušago mogolo gore e be yo a kgothatšago le yo a batamelegago?
9 Go se tšee dilo gabohwefo ga go bolele gore re ka se be le nako ya go iketla le go thaba le batho ba bangwe. Jesu o beile mohlala o mobotse ka go se fo dulela go ruta eupša o be a fela a ipha nako ya go iketla le go ba le ditswalano tše dibotse le ba bangwe. (Luka 5:27-29; Joh. 12:1, 2) Le gona go se tšee dilo gabohwefo ga go bolele gore re swanetše go dula re sentše sefahlego. Ge nkabe Jesu e be e le motho yo a dulago a sentše sefahlego, e se motho yo a nago le bogwera, ruri batho ba be ba ka se mmatamele. Le bana ba be ba thabela go ba le yena. (Mar. 10:13-16) Re ka ekiša bjang go ba le tekatekano ga Jesu?
10 Ge ngwanabo rena yo mongwe a be a bolela ka mogolo yo mongwe, o itše: “Dilo tša gagwe di rulagantšwe gabotse eupša ga se a letela gore batho ba bangwe ba phethagale.” Na batho ba ka bolela bjalo ka wena? Re swanetše go ba le pono e lekalekanego ka ba bangwe. Ka mohlala, bana ba arabela gabotse ge batswadi ba ba beela dipakane tše di nago le tekatekano le go thuša bana go di fihlelela. Ka tsela e swanago, bagolo ba ka kgothaletša ba bangwe ka phuthegong gore ba gole moyeng gomme ba ba nee ditšhišinyo tša kamoo ba ka dirago seo ka gona. Go feta moo, ge mogolo a dira dilo ka tekatekano, o tla ba motho yo borutho le yo a batamelegago. (Baroma 12:3) Kgaetšedi yo mongwe o itše: “Ga ke nyake gore mogolo a tšee selo se sengwe le se sengwe e le metlae. Eupša ge e ba ka mehla a tšeela selo se sengwe le se sengwe godimo, go ba thata go mmatamela.” Kgaetšedi yo mongwe o itše o kwa eka bagolo ba bangwe “ba a tšhoša ka ge ka tlhago ba bonagala ba tšeela selo se sengwe le se sengwe godimo.” Le ka mohla bagolo ba ka se nyake go senya pono e thabišago yeo badumedi ka moka ba swanetšego go ba le yona ka borapedi bja bona go Jehofa, “Modimo yo a thabilego.”—1 Tim. 1:11.
Go ba le Boikarabelo ka Phuthegong
11. Go “katanela” ditokelo ka phuthegong go bolela’ng?
11 Ge Paulo a be a kgothaletša banna ka phuthegong gore ba katanele go swanelegela boikarabelo bjo bogolo, maikemišetšo a gagwe e be e se go kgothaletša motho gore a rate maemo. Go e na le moo, o ngwadile gore: “Ge e ba motho le ge e le ofe a katanela go fihlelela bolebeledi, o kganyoga modiro o mobotse.” (1 Tim. 3:1, 4) Go ‘katana’ go nyaka gore banna ba Bakriste ba hlagolele kganyogo e kgolo ya go šoma ka thata gore ba hwetše ditshwanelego tše di nyakegago tša moya e le gore ba hlankele bana babo bona. Ge e ba ngwanabo rena a kolobeditšwe bonyenyane ka ngwaga o tee e bile go fihla bokgoleng bjo itšego a fihlelela ditshwanelego tša Mangwalo tša go ba mohlanka wa bodiredi tšeo di lego go 1 Timotheo 3:8-13, a ka bolelelwa gore a kgethwe. Ela hloko gore temana ya 8 ka mo go kgethegilego e re: “Bahlanka ba bodiredi ka mo go swanago ba swanetše go ba šedi.”
12, 13. Hlalosa ditsela tšeo ka tšona bana babo rena ba ka katanelago boikarabelo.
12 Na o ngwanabo rena yo a lego šedi goba yo a sa tšeego dilo gabohwefo yo a lego nywageng ya go obelela e masomepedi? Go na le ditsela tše dintši tšeo ka tšona o ka bontšhago gore o katanela go swanelega. E nngwe ya tšona ke ka go kaonefatša tsela yeo o tšeago karolo ka yona bodireding bja tšhemo. Na o mohuta wo o thabelago go šoma le bana babo rena ba bagolo le ba banyenyane ge o le bodireding bja tšhemo? Na o leka go hwetša motho yo o ka ithutago le yena Beibele? Ge o swara thuto ya Beibele ka go dumelelana le ditšhišinyo tšeo di newago dibokeng tša rena tša Bokriste, o tla kaonefatša mokgwa wa gago wa go ruta. Go feta moo, o tla ithuta go bontšha kwelobohloko mothong yo a ithutago ditsela tša Jehofa. Ge morutwana wa gago a thoma go bona diphetogo tšeo a swanetšego go di dira, wena o tla bona kamoo o ka mo thušago ka gona o sa fele pelo le ka temogo gore a diriše melao ya motheo ya Beibele.
13 Lena bana babo rena ba bafsa le ka ikemišetša go thuša bao ba godilego ka phuthegong kamoo le ka kgonago ka gona. Le ka ba la bontšha gore le tshwenyega ka go bogega ga Holo ya Mmušo, la thuša go e boloka e hlwekile e bile e le bothakga. Ge le ithaopela go thuša ka tsela le ge e le efe yeo le ka e kgonago, moya wa lena wa go rata go thuša o nea bohlatse bja gore ga le tšee bodiredi bja lena gabohwefo. Go swana le Timotheo, le ka ithuta go hlokomela dinyakwa tša phuthego go tšwa dipelong tša lena.—Bala Bafilipi 2:19-22.
14. Bana babo rena ba bafsa ba ka ‘lekolwa bjang mabapi le ge e ba ba swanelega’ go hlankela ka phuthegong?
14 Bagolo, dulang le nyaka go diriša bana babo rena ba bafsa bao ba katanelago go “tšhaba dikganyogo tša bofsa” le bao ba phegelelago “toko, tumelo, lerato, khutšo,” gotee le dika tše dingwe tše dibotse. (2 Tim. 2:22) Ka go ba abela dilo tšeo ba ka di dirago ka phuthegong, ba ka ‘lekolwa pele mabapi le ge e ba ba swanelega’ go rwala boikarabelo, e le gore “tšwelopele ya [bona] e bonagale go batho bohle.”—1 Tim. 3:10; 4:15.
Go Bontšha Gore ga o Tšee Dilo Gabohwefo ka Phuthegong le ka Lapeng
15. Go ya ka 1 Timotheo 5:1, 2, re ka bontšha bjang gore re tšeela ba bangwe godimo?
15 Go se tšee dilo gabohwefo go akaretša go swara bana babo rena le dikgaetšedi ka seriti. Paulo o boletše ka go hlompha batho ba bangwe ge a be a eletša Timotheo. (Bala 1 Timotheo 5:1, 2.) Se se tloga se le bohlokwa ge o dirišana le batho ba bong bjo bo fapanego le bja gago. Re swanetše go ekiša tsela yeo Jobo a ilego a swara basadi ka seriti, kudukudu molekane wa gagwe. O be a ikemišeditše go tšwa pelong gore a se lebelele mosadi yo mongwe ka go mo kganyoga. (Job 31:1) Go tšeela godimo bana babo rena le dikgaetšedi go tla dira gore re se bapale le bona ka lerato goba go phema go dira selo le ge e le sefe seo se tla dirago gore ngwanabo rena goba kgaetšedi a thatafalelwe ke go ba lefelong le tee le rena. Go bohlokwa kudu gore batho ba babedi bao ba ratanago ba naganne ka go nyalana ba swarane ka seriti. Mokriste yo a tšeelago dilo godimo a ka se bapale ka maikwelo a motho yo mongwe wa bong bjo bo fapanego le bja gagwe.—Die. 12:22.
16. Bontšha phapano magareng ga tsela yeo lefase le lebelelago monna le tate ka yona le tsela yeo Beibele e hlalosago tema yeo a e kgathago.
16 Le gona re swanetše go tšeela godimo boikarabelo bjo re bo neilwego ke Modimo ka malapeng a rena. Lefase la Sathane le dira metlae ka tema e kgathwago ke monna le tate. Intaseteri ya tša boithabišo e kgahlišwa ke go nyenyefatša hlogo ya lapa le go dira gore e lebelelwe e le feela motho yo a swanetšego go kwerwa le go nyatšwa. Lega go le bjalo, Mangwalo a neile monna boikarabelo bjo bogolo, a re ke “hlogo ya mosadi.”—Baef. 5:23; 1 Bakor. 11:3.
17. Hlalosa kamoo tsela yeo re tšeago karolo ka yona borapeding bja lapa e ka bontšhago gore ga re tšee boikarabelo bja rena gabohwefo.
17 Monna a ka hlokomela lapa la gagwe ka dilo tša nama. Eupša ge e ba a sa le nee tlhahlo ya moya, o tla ba a bontšha gore ga a na temogo e bile ga a bohlale. (Doit. 6:6, 7) Ka gona, 1 Timotheo 3:4 e re ge e ba o le hlogo ya lapa gomme o katanela go hwetša ditokelo tše di oketšegilego ka phuthegong, o swanetše go ba monna yo a “okamelago ba lapa la gagwe ka mokgwa o mobotse, a na le bana ba ikokobetšago bao ba sa tšeego dilo gabohwefo le gatee.” Tabeng ye, ipotšiše gore: ‘Na ka mehla ke beela ka thoko nako ya borapedi bja lapa?’ Gantši basadi ba bangwe ba Bakriste ba swanelwa ke go lopa banna ba bona gore ba etelele pele dilong tša moya. Monna yo mongwe le yo mongwe o swanetše go hlahlobišiša tsela yeo a lebelelago boikarabelo bjo. Ke therešo gore mosadi wa Mokriste o swanetše go thekga thulaganyo ya Borapedi bja Lapa gomme a dirišane le monna wa gagwe gore e atlege.
18. Bana ba ka ithuta bjang go se tšee dilo gabohwefo?
18 Bana le bona ba kgothaletšwa go se tšee bophelo gabohwefo. (Mmo. 12:1) Ga se phošo ge bana ba ithuta go šoma ka thata, ba dira mediro ya ka gae go ithekgile ka nywaga ya bona le bokgoni bja bona. (Dillo 3:27) Ge Kgoši Dafida e be e sa le mošemanyana, o ile a ithuta go ba modiši yo botse. O ile a ba a ithuta go ba rammino le mohlami wa dikoša—bokgoni bjo bo ilego bja dira gore a feleletše a hlankela kgoši ya Isiraele. (1 Sam. 16:11, 12, 18-21) Ga go pelaelo gore ge Dafida e be e sa le ngwana o be a na le nako ya go bapala, eupša o ile a ba a ithuta dilo tše bohlokwa tšeo ka morago a ilego a di diriša go tumiša Jehofa. Bokgoni bja gagwe bjalo ka modiši bo ile bja mo thuša go etelela pele setšhaba sa Isiraele a sa fele pelo. Lena bafsa, ke dilo tše kae tše di holago tšeo le ithutago tšona—dilo tšeo di tla le thušago go hlankela Mmopi wa lena le go le lokišeletša boikarabelo bja nakong e tlago?
Go ba le Pono e Lekalekanego
19, 20. Ke pono efe e lekalekanego yeo o ikemišeditšego go dula o na le yona ka wena le ka borapedi bja gago?
19 Ka moka ga rena re ka katanela go lekalekanya tsela yeo re lebelelago dilo ka yona—re sa itšeele godimo. Re ka se nyake go ‘itira ba lokilego kudu.’ (Mmo. 7:16) Go dira metlae go ka fokotša maikwelo a go se iketle, e ka ba ka gae, mošomong goba ge re dirišana le bana babo rena le dikgaetšedi ba Bakriste. Ditho tša lapa di swanetše go itiša malebana le go swayaswaya diphošo ka mo go feteletšego moo di ka senyago khutšo e botse yeo e swanetšego goba gona ka lapeng. Ka phuthegong, bohle re ka ithuta go sega le batho ba bangwe le go thabela go ba le bona, ra boloka dipoledišano le mokgwa ya rena wa go ruta o aga e bile o amogelega.—2 Bakor. 13:10; Baef. 4:29.
20 Re phela lefaseng leo le nyatšago Jehofa le melao ya gagwe. Go fapana le seo, batho ba Jehofa ba tshwenyegile kudu ka go kwa ga bona le go botegela Modimo wa bona. Ruri go a thabiša go ba karolo ya mokgatlo woo o mogolo wa batho bao ba rapelago Jehofa ba sa ‘tšee dilo gabohwefo’! Eka re ka ikemišetša go dula re sa tšee dilo gabohwefo bophelong le borapeding bja rena.
O be o tla Araba Bjang?
• Ke ka baka la’ng re swanetše go lwantšha pono yeo lefase le nago le yona ya go tšea bophelo gabohwefo?
• Ke bjang re ka thabišwago ke bodiredi bja rena eupša re sa bo tšee gabohwefo?
• Pono ya rena ka go ba le boikarabelo e bontšha bjang gore re tšea dilo gabohwefo goba go se bjalo?
• Hlalosa gore ke ka baka la eng go le bohlokwa go swara bana babo rena le ditho tša lapa ka seriti.
[Dipotšišo tša Thuto]
[Diswantšho go letlakala 12]
Monna o swanetše go hlokomela lapa la gagwe ka dilo tša nama le tša moya