Panlingkoran si Jehova Tekep na Inkaseryoso

“Naynay yon seguroen iray mas importantin bengatla.”​—FIL. 1:10.

1, 2. Akin et dakel natan so totoon agda seseryosoen so bilay, tan mamapalesa iya na antoran tepet?

MANBIBILAY itayo ed panaon a sankairapan tan makapasinagem nen say kapiganman. Saramay totoon andian na maapit a relasyon ed si Jehova et ngalngali agda la naanosan iyan “nikadkaduma tan mair-irap a panaon.” (2 Tim. 3:1-5) Mandedepende ira’d dilin biskeg da pian nasungdoan so kada agew, balet ta ag-itan magenap. Kanian say gagawaen la laingen na dakel et sasalien da ray balon klase na panagligliwaan pian napaliisan day pagmaliw a masyadon seryoso ed bilay.

² Pian nalingwanan na totoo iray problema da, maslak a say likeliket so iyuuna ra. No agmanalwar iray Kristiano, mainomay iran naalisan na ontan ya awawey. Panon tayon napaliisan itan? Kaukolan kasin setseryoso tayon lanang? Panon tayon magmaliw a balanse no nipaakar ed panliliket tan ed saray responsabilidad tayo? Antoran prinsipyo ed Kasulatan so usaren tayon pinagkagiya, pian anggano ipaprayuridad tayo ray importantin bengatla et agtayo setseryoson maong?

Pagmaliw a Seryoso Diad Mundon Maaro ed Likeliket

3, 4. Panon itayon tutulongan na Kasulatan pian namoria tayoy kaimportantian na pagmaliw a seryoso?

³ Talagan mapatpatnag a sayan mundo et alablabas so ‘panangaro to ed likeliket.’ (2 Tim. 3:4) Say ontan ya awawey et mapeligro’d espiritualidad tayo. (Uli. 21:17) Duga labat sirin a diad samay sulat nen apostol Pablo ed si Timoteo tan Tito et inlaktip toy bilin nipaakar ed inkasimoon tan inkaseryoso. Say pangiyaplika ed satan et ontulong ed sikatayon agnaalig so panmoria na sayan mundo.​—Basaen so 1 Timoteo 2:1, 2; Tito 2:2-8.

⁴ Pigaran siglo antis na satan, insulat nen Solomon a walaray pankanawnawan maabig so pangisakripisyo ed likeliket pian nonoten iray importantin bengatla. (Ecl. 3:4; 7:2-4) On, lapud antikey so bilay, kaukolan tayoy “mipuligesgesan” pian nagamoray kilalaban. (Luc. 13:24, ftn.) Kanian kaukolan a ‘naynay tayon seguroen iray mas importantin bengatla.’ (Fil. 1:10) Kabaliksan na saya ya imanoen tayon maong so kada aspekto na bilay tayo bilang Kristiano.

5. Antoy sakey ed saray aspekto’d bilay a nepeg tayon seryosoen?

⁵ Alimbawa, seseryosoen na saray Kristiano so responsabilidad da a mantrabahon impasya, bilang pangaalig da ed si Jehova tan Jesus. (Juan 5:17) Lapud satan, pandinayewan na totoo so inkakuli tan inkanapanmatalkan da. Nagkalalo lan pampapagaan na saray ulo na pamilya so pantrabahon maong pian nasuportaay pamilya ra. Amta ran no say sakey et agto legpetey pamilya to et “impulisay to lay pananisia” tan singa to met la impulisay si Jehova!​—1 Tim. 5:8.

Seryoso Ingen ta Maliket ed Panagdayew

6. Akin et nepeg tayon seryosoen so panagdayew tayo’d si Jehova?

⁶ Parad si Jehova, talagan importante so pandayew ed sikato diad dugan paraan. Alimbawa, mauges so nansumpalan na saray Israelita sanen tinaynan day tuan panagdayew. (Jos. 23: 12, 13) Nen unonan siglo C.E., kaukolan ya mipuligesgesan iray papatumbok nen Kristo pian say tuan panagdayew et agnarutakan na palson bangabangat tan mauges iran kagagawa. (2 Juan 7-11; Apo. 2:14-16) Anggad sayan panaon tayo, itutultuloy a seseryosoen na saray tuan Kristiano so tuan panagdayew.​—1 Tim. 6:20.

7. Panon a namparaan si Pablo parad ministeryo to?

⁷ Say ministeryo tayo et lapuan na liket. Balet, pian napansiansia tayo itan a liket, kaukolan tayon pablien so ministeryo tan manparaan parad satan. Impaliwawa nen Pablo no panon ton inkonsidera iramay totoon imbangat to. Insulat to: “Nagmaliw ak ya amin a bengatla diad amin a klase na totoo, ta pian diad amin a paraan et nilaban ko so arum ed sikara. Balet gagawaen ko so amin a bengatla nisengeg ed maong a balita, ta pian ninabang ko itan ed arum.” (1 Cor. 9:22, 23) Nanliketan nen Pablo so itulong ed totoo diad espiritual a paraan, tan ninonot ton maong no panon ton niiter so espisipikon pankaukolan na saray pupulongan to. Lapud satan et apaseseg tan apakiwas to ran mandayew ed si Jehova.

8. (a) Antoy nepeg ya awawey tayo ed saray totoon ibabangat tayo? (b) Panon a makatulong so panangiyaral na Biblia pian nalikna tayoy liket ed ministeryo?

⁸ Kaunongan kaseryoso si Pablo ed ministeryo to? Sikatoy akaparaan ya ‘manpaaripen’ ed si Jehova tan ed saramay ondengel ed mensahe na katuaan. (Roma 12:11; 1 Cor. 9:19) Legan tayon gagawaen so responsabilidad ya ibangat ed totoo so Salita na Dios​—balanglan diad panangiyaral na Biblia, diad Kristianon pantitipon, odino diad Panagdayew na Pamilya—​sankanonot tayo kasi so obligasyon tayo ed saray ibabangat tayo? Ompan liknaen tayon pabelat so pangikondukta na regular a panangiyaral na Biblia. Tua, pian nagawaan itan et kaukolan tayon bawasan so panaon parad personal iran aktibidad tan usaren itan a panaon parad itulong ed arum. Balet, agta imbaga nen Jesus ya “mas makapaliket so mangiter nen say mangawat”? (Gawa 20:35) Diad pangibangat tayon mismo ed arum nipaakar ed dalan parad kilalaban, nalikna tayoy liket ya agnaparaan na antokaman nin aktibidad.

9, 10. (a) Kasin say inkaseryoso et kabaliksan ton agtayo la makapanrelaks tan makapituyaw ed arum? Ipaliwawa. (b) Antoy ontulong ed sakey ya elder pian magmaliw a makapaseseg tan mainomay ya asinggeran?

⁹ Agto labay ya ibaga a no seryoso tayo et agtayo la makapanrelaks tan makapituyaw ed arum. Impanengneng nen Jesus so perpekton alimbawa ed saya. Sikatoy angiganay panaon parad pambangat, balet wala met so panaon to parad panagrelaks tan ed saray kakaaro to. (Luc. 5:27-29; Juan 12:1, 2) Agto met labay ya ibagan no seryoso tayo et kaukolan ya is-istrikto lan lanang so itsura tayo. Ta no si Jesus et setseryoso tan is-istrikto, seguradon agmaasingger iray totoo’d sikato. Balet, agta anggan saray ugugaw et labalabay day Jesus? (Mar. 10:13-16) Panon tayon naalig so inkabalanse nen Jesus?

¹⁰ Oniay impaneskribe na agi ed sakey ya elder: “Anggaman atagey so iilaloan to’d sarili to, agto aanapan na inkaperpekto so arum.” Ontan met kasi nibaga na arum ed sika? Maabig no makatunongan so iilaloan tayo ed arum. Singa bilang, mas mainomay ya onkiwas iray anak no mangiletneg so atateng na makatunongan iran kalat tan tulongan da ran mandampot ed saratan. Mipadpara, aglabat pasesegen na saray elder iray membro na kongregasyon ya onaligwas ed espiritual noagta mangibaga met iray espisipikon suhestion no panon dan nagawaan itan. Ontan met, no balanse so sakey ya elder, sikatoy makapaseseg tan mainomay ya asinggeran. (Roma 12:3) Oniay imbaga na sakey a sister: “Agko labay no say elder et gagawaen ton lurey so amin a bengatla. Balet no seryoso met lan lanang, mairap ya asinggeran.” Wala met so sister ya angibagan walaray elder ya “makapataktakot ya asinggeran ta seryoso iran maong.” Aglabay na saray elder a nabawasay liket a nalikna komon na saray kaagian da diad panagdayew ed “maliket a Dios” a si Jehova.​—1 Tim. 1:11.

 Pandampot ed Responsabilidad Diad Kongregasyon

11. Antoy nepeg a gawaen na Kristianon lalaki pian nadampot day kaaruman a responsabilidad?

¹¹ Sanen pinaseseg nen Pablo iray lalaki diad kongregasyon a pansagpotan day onkualipika parad kaaruman a responsabilidad, agto imbagan gawaen da itan pian penekey ambisyon da. Imbes, insulat to: “No dadampoten na siopaman so betang na manangasikaso, maabig a kimey so pipilaleken to.” (1 Tim. 3:1, 4) Pian nadampot na Kristianon lalaki iray kaaruman a responsabilidad, nepeg a pankimeyan day nawalaan na espiritual iran kualidad a nakaukolan pian napanlingkoran day agagi ra. No say agin laki et sakey taon met lan abautismoan tan akapet to la ray Makasulatan a kualipikasyon parad katulongan (odino, ministeryal) a lingkor a walad 1 Timoteo 3:8-13, nayari lan irekomenda. Imanoen so espisipikon ibabaga na bersikulo 8: “Saray katulongan a lingkor et nepeg a seryoso.”

12, 13. Deskribien iray paraan a saray agagin lalaki et nadampot day kaaruman a responsabilidad.

¹² Kasin sakey kan kalangweran ya brother a maniseryoso ed panagdayew ed si Jehova? Walaray pigaran paraan pian nadampot moy kaaruman a responsabilidad. Say sakey et say pamaaligwas ed pibibiang mo’d ministeryo. Kasin naliliketan kan nakaiba iray agagi diad ministeryo, antokaman so edad da? Kasin panggugunaetan moy makalmo na iyaralay Biblia? No diad pangiyaaral moy Biblia et iyaaplikam iray suhestion a nanaaralan diad saray Kristianon pantitipon, napaaligwas moy abilidad mon manbangat. Sakey ni, naaralan moy milikna ed samay ibabangat mo nipaakar ed dalan nen Jehova. No namoria la na iyaaralan mo a walaray kaukolan ton umanen, naaralan moy magmaliw a maanos tan mataktika diad itulong mo’d sikato ya iyaplika iray prinsipyo na Biblia.

¹³ Sikayoran kalangweran ya agagin lalaki, nepeg ya akaparaan kayon ontulong ed saray maedad la ed kongregasyon, diad antokaman a posiblin paraan. Sarag yo met so mitulongan pian say Kingdom Hall et mansiansian malinis tan marakep a nengnengen. No mabulos kayon ontulong diad antokaman a paraan a sarag yo, pakapatnagan itan a seryoso kayo ed ministeryo yo. Singa si Timoteo, naaralan yoy masimoon a pangasikaso ed saray pankaukolan na kongregasyon.​—Basaen so Filipos 2:19-22.

14. Panon a saray kalangweran ya agagin lalaki et ‘nasali no kasin manepeg’ iran manakbat na responsabilidad ed kongregasyon?

¹⁴ Agagi mi ran elder, nepeg ya manonot kayo’d pangiter na kimey ed saray kalangweran ya brother ya ‘onaarawi ed saray pilalek ya inuugaw’ tan manseseet a mangipatnag na “inkatunong, pananisia, aro, deen,” tan arum nin maong a kualidad. (2 Tim. 2:22) No ikdan yo ra na saray kimey diad kongregasyon, ‘nasali no kasin manepeg’ iran manakbat na responsabilidad, “pian nanengneng na amin a totoo so iyaaligwas” da.​—1 Tim. 3:10; 4:15.

Pangipanengneng na Inkaseryoso Diad Kongregasyon tan Pamilya

15. Unong ed 1 Timoteo 5:1, 2, panon tayon nipanengneng so inkaseryoso diad pantrato tayo’d arum?

¹⁵ Say inkaseryoso et laktipen toy pideneng ed saray agagi tekep na dignidad. Diad samay bilin nen Pablo ed si Timoteo, impabitar ton kaukolan tayon tratoen so arum tekep na respeto. (Basaen so 1 Timoteo 5:1, 2.) Nagkalalo lan  importante iya diad pidedeneng ed agtayo kaparay sekso. Say alimbawa nen Job ed marespeton pidedeneng ed bibii lalo la’d asawa to et marakep ya aligen. Sikatoy determinadon ag-onlinggis ed arum a bii tekep na pampilpilalek. (Job 31:1) No seryoso tayo, paliisan tayoy pikakarinyoan tan agtayo manggagaway antokaman a lapud satan et liknaen na agagi ya nasisikig ira. Nagkalalo lan importante so pangipanengneng na respeto diad baetan na saninaro, ya iisipen day nipaakar ed pankasal. No say Kristiano et seryoso, agton balot panggalawan so liknaan na agto kaparay sekso.​—Uli. 12:22.

16. Ipaliwawa no akin a duma so panmoria na mundo ed betang na asawan lalaki tan kaamaan ed ibabagay Biblia a betang da.

¹⁶ Kaukolan tayo met so manalwar pian mansiansian seryoso so panmoria tayo’d inter na Dios ya betang tayo’d pamilya. Leleglemewen na mundo nen Satanas so betang na asawan lalaki tan kaamaan. Diad saray palabas tan pelikula et singa ompapaway ya ayos labat ya elek-elekan tan agrespetoen iray ulo na pamilya. Balet, ibabaga na Kasulatan ya baleg so responsabilidad na asawan laki, ta sikato so “ulo na asawa to.”​—Efe. 5:23; 1 Cor. 11:3.

17. Ipaliwawa no panon a say pibiang tayo’d panagdayew na pamilya et mangipanengneng a seryoso tayo’d responsabilidad tayo.

¹⁷ No say asawan laki et lelegpeten toy pamilya to balet ta agto ra igigiya ed espiritual, ipapanengneng ton sikatoy kulang na karunongan. (Deu. 6:6, 7) Satan so rason no akin ya ibabaga na 1 Timoteo 3:4 a no sakey kan ulo na pamilya tan labay mon dampoten so kaaruman iran pribilehyo diad kongregasyon, nepeg a ‘maabig so panangidaulom ed dilin sankaabungan mo, a walaan ka na ananak a matulok tan makalakal.’ Tepetan mo sirin so inkasika, ‘Makakapangigana ak kasi na panaon parad regular ya panagdayew na pamilya mi?’ Walaray Kristianon asawan bibii ya aliling to et kaukolan da ni mikasi’d kaasawaan da ya idaulo so pamilya diad espiritual. Balang asawan laki et nepeg ya mangusisan maong ed panmoria to’d responsabilidad to. Siempre, nepeg ya suportaan na Kristianon asawan bii so uksoyan na Panagdayew na Pamilya tan mitulongan ed asawa to pian ontalona itan.

18. Panon a naaralan na ugugaw so magmaliw a seryoso?

¹⁸ Papasesegen met iray ugugaw ya iyunay mas importante iran bengatla ed bilay. (Ecl. 12:1) Maabig no naaralan day mankuli, singa say pankimey ed abung, basta sarag da lan gawaen. (Tag. 3:27) Sanen ugaw ni si Arin David, naaralan toy magmaliw a maong a pastol. Naaralan to met so magmaliw a musikero tan composer. Lapud sarayan abilidad to et sikatoy akapanlingkor ed ari na Israel. (1 Sam. 16:11, 12, 18-21) Seguradon nanggalaw met si David nen ugaw ni, balet ta inaral to iray makanan abilidad ya diad inlabas na panaon et nausar to ed pangidayew ed si Jehova. Saray abilidad to bilang pastol et tinmulong ed sikaton maanos ya  idaulo so bansan Israel. Sikayoran kalangweran, antoran makanan abilidad so aaralen yo ya ontulong ed sikayon manlingkor ed Amalsa tan mangiparaan ed sikayo parad saray responsabilidad diad arapen?

Magmaliw a Balanse

19, 20. Anton balansin panmoria nipaakar ed sarilim tan ed panagdayew mo so determinadom a pansiansiaen?

¹⁹ Sarag tayon amin a pankimeyan so pansiansian balanse ed panmoria tayo’d sarili tayo​—ya agtayo setseryoson maong. Agtayo labay a magmaliw itayon ‘alabas a matunong.’ (Ecl. 7:16, Maung a Balita) No amta tayo met so manpaelek, napakepa tayoy tensyon, balanglan diad abung, diad trabaho, odino diad pidedeneng tayo’d saray kaagian tayo. Maabig no saray membro na pamilya et manalwar pian ag-ira masyadon makritiko, diad ontan et mansiansian mareen so sankaabungan da. Diad loob na kongregasyon, marakep met no walay istoryaan tan elekan. Ingen ta seguroen tayon say pantotongtong tan panagbangat tayo et makapaseseg tan positibo.​—2 Cor. 13:10; Efe. 4:29.

²⁰ Manbibilay itayo ed mundon agmamapabli ed saray ganggan nen Jehova. Balet, nidumaduma iray lingkor nen Jehova ta parad sikara et importantin maong so katutulok tan katooran da’d Dios da. Malikeliket itayo ta kabiangan itayo na baleg a grupo na totoon mandadayew ed si Jehova tekep na inkaseryoso! Komon ta determinado itayon pansiansiaen so seryoson panmoria ed bilay tan ed panagdayew tayo.

Antoy Ebat Mo?

• Akin et nepeg tayon resistian so agseryoson awawey na sayan mundo?

• Panon itayon magmaliw a maliket ingen ta seryoso diad ministeryo tayo?

• Panon a say panmoria tayo’d pangawat na responsabilidad et pakapatnagan no seryoso tayo odino andi?

• Ipaliwawa no akin a seryoson bengatla so pideneng ed saray agagi tan kapamilyaan tekep na dignidad.

[Tepetepet Parad Panagaral]

[Saray litrato ed pahina 12]

Nepeg ya itarya na asawan laki so materyal tan espiritual a pankaukolan na pamilya